Bethel ya ku Brooklyn Yaikala Imyaka 100

UMWAKA wa 1909 wali umwaka uwacindama sana ku ba mu musumba wa New York City. Muli uyu mwaka ubulalo ubo beta ati Queensboro Bridge bwalitendeke ukubomba kabili bwali pa kati ka musumba wa Queens no wa Manhattan, kabili ubulalo bumbi ubo beta ati Manhattan Bridge bwalitendeke ukubomba kabili bwali pa kati ka musumba wa Manhattan no wa Brooklyn.

Uyu mwaka wali uwacindama na ku Nte sha kwa Yehova. Ilyo uyu mwaka ushilafika, ba Charles Taze Russell, abali abakalamba mu kabungwe ka Watch Tower Bible and Tract Society, akabomfiwa ne Nte sha kwa Yehova, balimwene ukutila kuti cawama ukutampa ukushimikila imbila nsuma ya Bufumu bwa kwa Lesa mu ncende ishingi. (Mateo 24:14) Batontonkenye ukuti ukukuusha amaofeshi ukufuma mu Pittsburgh, ku Pennsylvania, no kuyatwala mu Brooklyn, ku New York, kwali no kubafwa ukucita ifi. E ico batendeke ukupekanya ukukuuka mu 1908, kabili bakuukile ku kutendeka kwa mwaka wakonkelepo.

Cinshi Bakuukiile ku Brooklyn?

Abaletungulula umulimo wa kushimikila ilya nshita balishibe ukuti ukulemba ifipande fyalelanda pa fya mu Baibolo no kufipulinta mu manyunshipepala yali ni nshila isuma iya kusalanganishishamo icine ca mu Baibolo. Na kuba, mu 1908, amalyashi yalelanda pa fya mu Baibolo ayo ba Rus­sell balelemba yalepulintwa mu manyushipepala 11, ayo yalepulintwa yonse pamo amakope 402,000 cila mulungu.

Lelo, ba Russell balembele ati: “Bamunyinefwe abaishibe ifyo abalemba amanyunshipepala bacita . . . batwebele ukutila nga ca kuti ifipande ifyalefuma cila mulungu fyaleba mu manyunshipepala bapulinta mu musumba ukalamba, ninshi ifi fipande fyali no kusabankana mu America monse; kabili batile ici cali no kulenga ukuti mu mwaka fye umo kube amanyunshipepala ayengi ayalepulinta ifi fipande lyonse.” E ico batendeke ukufwaya incende iisuma iingafwa ukuti umulimo wa kushimikila uleya pa ntanshi.

Cinshi basalile umusumba wa Brooklyn? Ba Rus­sell batile: “Ilyo twapepele kuli Lesa, bonse pamo twatile mu Brooklyn, ku New York, umwaba abantu abengi . . . kabili umusumba uo beta ati ‘Umusumba Umwafula Amacalici,’ e mwingawama sana ukubombelamo umulimo wesu uwa kulobolola.” Ifyacitika filanga ukuti ifi bapingwile fyali bwino sana. Mu nshita fye inono, kwali amanyunshipepala ukucila pali 2,000 ayo balepulinta umwaleba amalyashi yalelanda pa fya mu Baibolo ayo ba Russell balelemba.

Kwali na cimbi icalengele umusumba wa New York ukuwama ukukuukilako. Mu 1909, ninshi balisula amaofeshi ya Nte sha kwa Yehova mu Great Britain, mu Germany, na mu Australia, kabili bali no kwisula na yambi ku fyalo fimbi. Kanshi, calilingile ukubika amaofeshi yakalamba mu musumba uwakwete ne cabu icikalamba kabili uwali ne misebo iingi ne nyanji ishingi.

Cinshi Bakwitila ati ku Bethel?

Amaofeshi yakalamba aya kubalilapo aya ba Watch Tower Bible and Tract Society bayapangile mu ma 1880, mu Allegheny (iyaba nomba mu Pittsburgh), mu Pennsylvania. Pali ilya nshita aya maofeshi baleyeta ati Bible House. Mu 1896, abantu 12 e balebombelapo.

Lelo ilyo bakuukiile ku Brooklyn mu 1909, ifikuulwa ifipya umwaleikala abalebombelapo batampile ukufiita ati Bethel.a Cinshi batampiile ukuita ati Bethel? Umwine wa iyi incende ba Watch Tower Society bashitile pa 13-17 Hicks Street ali ni shimapepo uwalumbwike, Henry Ward Beecher kabili iyi ncende baleita ati Beecher Bethel. Balishitile ne ng’anda Beecher aleikalamo kale iyali pa 124 Columbia Heights. Ulupungu lwa kwa Kalinda ulwa March 1, 1909 lwatile: “Cilemoneka kwati cipesha amano ifi tushitile icikuulwa ca kwa Beecher ico beta Beecher Bethel kabili ukwabula kwenekela twashita ne ng’anda aleikalamo. . . . Iyi ng’anda twakulaita ati ‘Bethel,’ kabili amaofeshi yapya no mwa kulonganina twakulafiita ati, ‘The Brooklyn Tabernacle’; aya mashina e yalapyana pe shina lya kuti ‘Bible House.’”

Abeni Balapokelelwa Bwino

Ifi fikuulwa fyaiswilwe pa 13 January, 1909. Ubushiku bwa pali Cimo, pa 6 September, mu 1909, bwali bushiku bwa kupokelela abeni pa Bethel. Inte sha kwa Yehova abengi, abaleitwa ati Abasambi ba Baibolo ilya nshita, balitandele. Bamo bafumine ku kulongana kukalamba ukwa Bena Kristu ukwali mu Saratoga Spring, umusumba uwaba amakilomita nalimo 320 ukufuma ku New York City. Ba Charles Taze Russell abene e bapokelele no kuposha abeni.b