Imyaka iingi ilyo ifi tafilacitika, Baibolo yalisobele uko Yesu ali no kufyalilwa. Yatile: “We Betelehemu Efrata, we wacepesha ica kutila tawingalinga no kupendelwa pa misumba ya mu Yuda, muli iwe e mukafuma uukaba kateka muli Israele.”b (Mika 5:2) Betelehemu ifwile yali inono sana ica kuti tabaleipendela pa misumba ya mu Yuda. Lelo ili line tauni lyacepesha lyali no kucindama sana. Mesia, nelyo Kristu, uo batile akesa, ali no kufuma mu Betelehemu.—Mateo 2:3-6; Yohane 7:40-42.