Mu busesemo bwaba pali Daniele 8:5-8, 21, 22 na pali Daniele 11:3, 4 na mo mwaba na fimbi ifyo balondolwele bwino sana pa “mfumu ya ku Yabani [Greece]” ifyaishilecitika. Ubusesemo bwatile ilyo iyi mfumu ikakwata sana amaka, e lyo ikafwa kabili abantu bane abashakafume mu lupwa lwa iko e bakakana ubufumu bwa iko. Ilyo papitile imyaka ukucila 200 ukutula apo ubu busesemo bwalembelwe, Alekesandere Mukalamba e waishileba iyi mfumu ya maka. Ilyashi lya kale lilanda ukutila imfwa yakwe yaishile ukwabula ukwenekelwa no kuti bamushika bakwe bane abashali balupwa lwakwe, e bayakene ubufumu bwakwe.

Abasuusha batila ubu busesemo bufwile bwalembelwe ninshi ifyo bwalandapo fyalicitika kale. Nomba tontonkanyeni na kabili pa lyashi line ilyaba mwi buuku lya kwa Daniele. Nga tulelimona ukuti bwali busesemo, kuti twamona ukuti fyonse ifyo balandilepo fyalicitike. Nomba nga tulelimona kwati lyashi fye lya kale, ilyo balefwaya lyumfwike kwati busesemo, bushe te kuti tupape umulandu bashalandile fimo fimo ifyakumine ili lyashi ifyaishibikwe? Tutile muntu umo uwa bufi uwali pano calo ninshi Alekesandere alifwa, e walengele ili lyashi lyamoneka kwati busesemo, mulandu nshi ashalandile ukutila ilyo Alekesandere akafwa fye, abana bakwe abaume babili bakesha ukupoka ubufumu e lyo bakabepaya? Mulandu nshi ashalandile ukutila, paali no kupita imyaka iingi pa kuti bamushika bane bakatendeke ukuteka mu fitungu fine ifyali mu bufumu bwa kwa Alekesandere? E lyo cinshi ashalumbwilile ishina lya iyi mfumu ya maka e lyo na mashina ya bamushika bakwe bane?

Ni kale abantu batendeke ukusosa ukuti ubusesemo bwa mu Baibolo bwalembelwe ninshi ifyo bwalandapo fyalicitika kale, lelo abasose fyo tabakwata fishinka, balande fyo ukwabula no kufwailisha ifishinka pantu bena baishiba ukuti tapaba uwingasobela ifya ku ntanshi. Apo balakaana abati Baibolo te Cebo ca kwa Lesa, balondolola ifintu ukulingana no kutontonkanya kwa buntunse fye. Lelo, Lesa wa mano, alengele bakasesema balemba fyonse pa busesemo ifingatwafwa ukumona ukutila e walesobela ifikacitika.a