Mulandu nshi Umwina Kristu umwine alingile ukupingulapo nga kuti asumina nelyo ukukaana imyundapile imo iyo bengabomfya umulopa wakwe?

Ca cine, Abena Kristu tabapeela umulopa wabo ku fipatala pa kuti bengaubomfya ukundapilako bambi nelyo ukusunga umulopa wabo pa kuti bengaubwekeshamo pa numa ya kubabombela, lelo imyundapile imo nelyo ukusenda umulopa pa kuti bapime amalwele yamo te kupula mu fishinte fyaba mu Baibolo. Kanshi umuntu umo umo afwile ukutontonkanyapo bwino pa kupingulapo nga kuti asumina nelyo ukukaana imyundapile imo iyo bengabomfya umulopa wakwe.

Ilyo mulepingula ukucite fi, ipusheni amuti: Nga ca kuti umulopa bakaufumya mu mubili wandi e lyo limbi kuti bausungako na pa nshita iinono, bushe kampingu yandi ikansuminisha ukumona uyu mulopa ngo mulopa wandi ica kutila teti ufwaikwe ‘ukuupongolwela pa nshi’? (Amala. 12:23, 24) Bushe kampingu yandi ikalampeela umulandu nga ca kuti pa kung’undapa bakafumya umulopa wandi umo, bakauwamye, no kuubwekesha mu mubili wandi? Bushe ninjishiba ukuti ukukaana imyundapile yonse iyo bengabomfyako umulopa wandi kulepilibula ukutila ninkaana imyundapile imo pamo nga ilya iya kubomfya fimashini pa kufumya mu mfyo ifiko ifishilefwaikwa mu mubili nelyo iya kubomfya fimashini ukulapompa umulopa nga balebombela umutima na bapwapwa? Ilyo nshilapingulapo, bushe nimpepa kuli Lesa ukuti angafwe?b

Na kabili tabapeela umulopa wabo ku fipatala pa kuti bengaubomfya ukundapilako bambi nelyo ukusunga umulopa wabo pa kuti baubwekeshamo inshita imbi.—Lebi 17:13, 14; Imil. 15:28, 29.