Imfumu Ahasuerusi yasumbwile umuntu umo uwe shina lya kuti Hamani pa cifulo ca pa muulu mwi sano lyakwe. Yamusontele ukuba cilolo mukalamba, e waishileba mpanda mano wakwe umukalamba pali bonse, kabili bamupeele icifulo ca bubili mu bufumu bwa bena Persia. Imfumu yabikileko ne funde lya kuti onse afwile ukulakontamina uyu cilolo. (Estere 3:1-4) Ili ifunde lyalikoseele sana Mordekai. Alishibe ukuti alingile ukulaumfwila imfumu lelo talingile ukupula mu mafunde ya kwa Lesa. Uyu Hamani ali mwina “Agagi.” Kanshi afumine mu lupwa lwa kwa Agagi, imfumu ya bena Amaleke uo kasesema wa kwa Lesa Samwele aipeye. (1 Samwele 15:33) Abena Amaleke bali bantu ababipa nga nshi kabili ici calengele babe abalwani ba kwa Yehova na ba bena Israele. Kanshi Lesa tatemenwe uluko lonse ulwa bena Amaleke.b (Amalango 25:19) Bushe cali no kuba fye bwino ku muYuda wa cishinka ukukontamina umwina Amaleke? Mordekai alikeene ukukontamina Hamani umwina Amaleke. Ukufika fye na muno nshiku, ababomfi ba cishinka aba kwa Yehova balaibika mu kapoosa mweo pa kuti bomfwile ili funde lya kuti: “Tufwile ukunakila Lesa ukucila ukunakila abantu.”—Imilimo 5:29.