Ukusakamikwa Sana

Ukupoosa inshita iikalamba ku kusanga umwa kuliishisha ulupwa ilingi line kulaleta amasakamika kabili kuti kwalenga twilabika amano ku fya kwa Lesa. (Mat. 13:22) Ba Marek abo tulandilepo kale, batile: “Ilyo ubukwebo bwandi bwawile, nasalilepo ukuya ku calo cimbi mu kufwaya incito ya pa muulu. Nailepwako imyeshi itatu, lelo nalibweleleko na kabili no kuyaikalako imyeshi na imbi itatu, ifyo fine e fyo nalecita, kabili pa ng’anda naleikalapo fye inshita inono. Ici calesakamika sana umwina mwandi uushali Nte.”

Iyi mibombele yaliletele ubwafya pa lupwa lwabo. Ba Marek basosele no kuti: “Nalebombela umwakaba sana pa ma-awala ayengi, e lyo kabili nalebomba na bantu aba musaalula, abatemenwe ukucusha bambi. Bali kwati tupondo. Aba bantu balencusha kabili naleba no bulanda. Apo nshalekwata ne nshita ya kuisakamana ne mwine, naletwishika nga kuti nasakamana bambi.”

Mufwile mwalimona ukuti te balya fye abaya mu kwingila incito ku fyalo fimbi abasendwa sana ne ncito. Tontonkanyeni pali ba Jarosław na ba Beata. Ba Jarosław batila: “Pa numa ya kuupana, twaiswile akalituuka pa ncende iisuma umo twaleshitisha ifya kulya. Pa kwamba calemoneka kwati cali fye bwino. Apo twalepanga sana indalama, twalilundulwile ubukwebo bwesu. Lelo tatwalesangwa ku kulongana pantu tatwalekwata inshita. Tapakokwele, nalilekele bupainiya no butumikila. Apo twalepanga indalama ishingi, twabikile indalama pamo no ushali Nte no kwisula ituuka ilikalamba. Natendeke no kulaya ku fyalo fimbi ku kucita ubukwebo umwalefuma indalama ishingi sana. Nshalesangwa sana pa ng’anda, kanshi umwina mwandi no mwana wandi baleikala fye beka. Na mu kulekelesha, ubukwebo bwesu ubwaletuletela sana indalama bwalengele twaleka ukubombela Lesa. Apo twalilekele ukulongana, tatwaletontonkanyapo na pali bamunyinefwe.”

Baeluda balyeseshe pa myaka ukwafwa no kukoselesha ba Jarosław. Ici calengele baluke sana. Ba Jarosław batile: “Mu kulanshanya kumo ukwangafwile sana, baeluda balandile pa mulumendo umo uo Baibolo yalandapo uwakwete icuma, uwalefwaya ukwikala umuyayaya lelo talefwaya ukulekuluka mu fyuma fyakwe. Lyena, mu mucenjelo banjipwishe nga ca kuti ifyali ulya mulumendo e fyo na ine naba. Uko kulanshanya kwalengele namona ifyo nalingile ukucita!”—Amapi. 11:28; Marko 10:17-22.

Ilyo ba Jarosław babebetele imikalile yabo, basalilepo ukuleka ukucita amakwebo ayakalamba. Pa numa ya myaka ibili, ba Jarosław no lupwa lwabo batampile ukupepa na kabili. Pali ino nshita ni baeluda ababombela bamunyinabo. Ba Jarosław batile: “Ilyo bamunyinefwe babika sana amano ku makwebo yabo ica kuti balekelesha ne fya kwa Lesa, mbalondolwela ifyancitikile pa kubeba ububi bwaba mu kuba kwi koli limo line na bashatetekela. Calyafya ukukaana ifintu ifilemoneka ukuba ifisuma no kuba no bufumacumi.”—2 Kor. 6:14.

Ba Marek nabo balisambilileko fimo ilyo ifyabipa fyabacitikile. Nangu ca kuti incito balebomba ku calo cimbi yalebaletela indalama ishaleafwa ulupwa lwabo, bucibusa bwabo na Lesa na Bena Kristu banabo bwalipwile. Mu kuya kwa nshita, balimwene ukuti balingile ukubika sana amano ku fyacindama. Batile: “Pa myaka iingi, nali kwati ni Baruki ‘uwalefwaya ifintu ifikalamba.’ Mu kulekelesha, naebele Yehova ifyali ku mutima, kabili ino nshita mona ukuti nalishikatala mu kupepa Lesa.” (Yer. 45:1-5) Ba Marek nomba bafwaya ukubomba “umulimo uusuma” uwa kuba kangalila mu cilonganino.—1 Tim. 3:1.

Ba Marek basoka bonse abengafwaya ukuya ku calo cimbi mu kufwaya incito iyo bengalafola indalama ishingi abati: “Ilyo uli ku calo cimbi, calyanguka sana ukwikatwa mu citeyo ca ici calo cabipa. Ukukanaishiba bwino ululimi balanda muli ico calo kuti kwalenga mulefilwa ukulanshanya bwino na bambi. Kuti mwabwelela ku calo cenu ne ndalama, lelo pa kuti mukabe abakosa na kabili mu fya kwa Lesa kuti papita inshita.”