Balecita Ifyabalengele Ukuba Sana ne Nsansa—Bushe na Imwe Kuti Mwacita Cimo Cine?

BA MARC ni baNte abekala ku Canada. Balebomba ku kampani kapanga fimashini ifya maka sana ifyo basayantisiti babomfya pa kusambilila pa fyaba mu lwelele. Balebomba amaawala ayanono kabili balebomba na bupainiya bwa nshita yonse. Lyene umukalamba wa kampani aebele baMarc ukuti alabapeela icifulo icikalamba pa ncito, e kutila bali no kulabomba inshita iikalamba no kulafola indalama ishingi. Cinshi baMarc bacitile?

“Twalipalama Sana Kuli Yehova Ukucila Kale”

BaMarc abo tulandilepo pa ntendekelo ya cino cipande balyumfwilile ukufunda kwa mu Baibolo ukwa kukanabomfya sana icalo. Balikeene icifulo icikalamba ico babapeele pa ncito. Apo umukalamba wa pa ncito alefwaya ukuti baMarc basumine ukulabomba pali cilya cifulo, ilyo papitile fye inshiku ishinono, abebele ukutila bakalafola indalama ishingi sana. BaMarc balanda ukuti: “Ala bwali bwesho, na lyo line nalikeene.” Balanda icalengele ukuti bakaane, batila: “Ine no mukashi wandi Paula, twalefwaya fye ukulabombela sana Yehova. E ico, twapingwilepo ukwangusha imikalile yesu. Twalipepele kuli Yehova pa kuti tube na mano ya kupekanya bwino ifyo tukalabomba kabili twalimike no bushiku ubwa kutendeka ukupoosa inshita iikalamba ukulabombela Yehova ukulingana ne fyo twapangile.”

BaPaula batila: “Inshiku shitatu mu mulungu nalebomba pa cipatala umulimo wa busekilitare kabili nalefola indalama ishalinga fye. Kabili nalebomba na bupainiya bwa nshita yonse. Nangu cibe fyo, na ine wine nalefwaisha ukuyabombela Yehova konse ukwali ukukabila ukukalamba ukwa bakabila ba mbila nsuma kwati ni filya fine fye na baMarc balefwaya. Lelo ilyo natwele kalata ya kulekelapo incito, umukalamba wa pa cipatala anjebele ukuti balinsala ukuba sekilitare mukalamba pa cipatala. Nali no kulafola indalama ishingi,. lelo apo nalefwaya fye ukuleka incito, nalikeene ico cifulo icikalamba. Ilyo naebele umukalamba wa ncito umulandu nakaanine cilya cifulo, alintashishe pa citetekelo candi.”

Tapakokwele, baMarc na baPaula babatumine mu mulimo wa bupainiya bwaibela, kabili baile mu kubombela ukwali icilonganino icinono icabela mu ncende ya mu Canada ukushaba sana Inte sha kwa Yehova. Bushe baleikala shani ilyo bakuukile kulya? BaMarc batila: “Ilyo nalekele incito nabombele pa myaka iingi kabili apo nalefola indalama ishingi, namwene kwati nkacula sana, lelo Yehova alatupaala ilyo tulebomba umulimo wesu uwa kushimikila. Twaliba ne nsansa nga nshi ukulayafwa bambi ukulabombela Lesa. Umulimo wa nshita yonse walikosha icupo cesu. Ilingi line tulanshanya pa fintu ifyacindama, e kuti ifingatwafwa ukulabombela Yehova bwino. Pali ino nshita twalipalama sana kuli Yehova ukucila kale.” (Imil. 20:35) BaPaula nabo batila: “Ilyo mwaleka incito no kufuma mu ng’anda umo mwaleikala bwino, mufwile ukucetekela sana Yehova. Ifwe e fyo twacitile, kabili Yehova alitupaalile. Bamunyinefwe na bankashi ababa mu cilonganino ico batutumako balitutemwa kabili balenga tulefulukisha ukuba nabo. Pali ino nshita amaka nalebomfya pa ncito nalebomba ndeyabomfya ku kwafwa abantu ukwishiba Lesa. Nalitemwa sana ukulabomba uno mulimo.”