CINSHI twingacita ku kulenga Lesa ukusekelela? Bushe kuti twamupeela icili conse?— Yehova atila: “Ica mweo conse ca mu [mpanga] candi.” Asosa no kuti: “Silfere wandi, na golde wandi.” (Amalumbo 24:1; 50:10; Hagai 2:8) Lelo, kwaliba ico twingapeela Lesa. Bushe walicishiba?—

Yehova alatuleka ukusala nampo nga tuli no kumubombela atemwa iyo. Tatupatikisha ukucita ifyo alefwaya tucite. Natweshe ukumona umulandu Lesa atupangile ukuti tulesala nampo nga tuli no kumubombela atemwa iyo.

Napamo iroboti walilishiba. Ni mashini iyapangwa ukuti ilecita fyonse ifyo uwaipangile alefwaya. E co iroboti talisala ica kucita. Yehova afwaya nga atupangile bonse nga maroboti. Nga atupangile ukuti tulecita fye ifyo alefwaya. Lelo Lesa tacitile co. Bushe nawishiba icalengele?— Ifya kwangasha fimo fyaba nga maroboti. Ilyo batinika ibatani, ficita filya uwapangile cilya ca kwangasha afipangiile ukulacita. Bushe walimonapo ica kwangasha ca musango yo?— Ilingi abantu balatendwa ukwangasha icintu icilecita fye ifyo capangilwa ukucita. Lesa tafwaya tulemumfwila kwati tuli maroboti ayapangilwa ukumubombela. Yehova afwaya ifwe ukumubombela pa mulandu wa kuti twalimutemwa na pa mulandu wa kuti tulefwaya ukumumfwila.

Bushe uletontonkanya ukuti Shifwe wa mu muulu omfwa shani lintu twamumfwila pa mulandu wa kuitemenwa?— Njebako, bushe ifyo ucita filenga abafyashi bobe ukumfwa shani?— Baibolo itila umwana wa mano “alenga wishi ukusamwa” lelo umwana umuwelewele “bulanda kuli nyina.” (Amapinda 10:1) Bushe walimona ukuti nga wacita ifyo banoko na bawiso bakweba ukucita balasansamuka?— Lelo bomfwa shani nga taulebomfwila?—

Nomba natutontonkanye pali Shifwe wa ku muulu, Yehova. Alatweba ifyo twingamusansamusha. Buula Baibolo yobe no kwisula pa Amapinda 27:11. Apa Lesa aletweba ati: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.” Bushe walishiba ifyo cipilibula ukuseebanya umuntu?— Umuntu kuti akuseebanya pa ku kuseka no kutila tawingacita ifyo walanda ati kuti wacita. Bushe Satana aseebanya shani Yehova?— Natumone.

Ibukisha, mu Cipandwa 8 ica cino citabo twasambilile ukuti Satana afwaya ukuba pa muulu no kuti afwaya bonse ukumumfwila. Satana atila abantu bapepa Yehova pa mulandu fye wa kuti Yehova akabapeela umweo wa muyayaya. Ilyo Satana alengele Adamu na Efa ukupondokela Yehova, asonsombele Lesa. Aebele Lesa ati: ‘Abantu bamubombela fye pa mulandu wa kuti mulabapeela fimo. Nga mwansuminisha, kuti nafumya bonse kuli imwe.’

Ca cine ukuti aya mashiwi tayasangwa mu Baibolo. Lelo lintu twabelenga pali Yobo, cimoneka ukuti Satana alandile ifya musango yu kuli Lesa. Kuli Satana na kuli Yehova cali icacindama nampo nga Yobo ali no busumino kuli Lesa atemwa iyo. Natukupukule amaBaibolo yesu pali Yobo ifipandwa 1 na 2 no kumona icacitike.

Mona muli Yobo icipandwa 1 ukuti Satana ali ku muulu ilyo bamalaika baisa mu kumona Yehova. E co Yehova aipusha Satana ati: “Ni kwi uko wafuma?” Satana ayasuka ati nafuma mu kulolesha pe sonde. Kabili Yehova amwipusha ati: ‘Bushe walolekesha Yobo, no kumono kuti alamombela no kuti tacita fyabipa?’—Yobo 1:6-8.

Ilyo line Satana alanda ifyo amona ukuti e fyalenga. ‘Ico Yobo amupepela ni co takwata mafya. Nga mwaleka ukumucingilila no kufumya ipaalo lyenu pali wene, akamutuka pa cinso cenu.’ E co Yehova ayasuka ati: ‘Cili fye bwino Satana, cita icili conse kuli wene, lelo wicita icabipa pa mubili wa kwa Yobo.’—Yobo 1:9-12.

Cinshi Satana acita?— Alenga abantu baiba ing’ombe sha kwa Yobo ne mpunda no kwipaya abalecema. Lyene inkuba yaipaya impaanga na baleshicema. Na kabili, abantu baisa mu kwiba ingamali no kwipaya abaleshisakamana. Mu kulekelesha, Satana alenga kwaba icimwela icawisha ing’anda umuli abana ba kwa Yobo 10, kabili bonse bafwa. Te mulandu ne fi fyonse, Yobo atwalilila ukubombela Lesa.—Yobo 1:13-22.

Ilyo Yehova amona Satana na kabili, Yehova alanda pa fyo Yobo aletwalilila ukuba uwa busumino. Satana afwaya umwa kubepesha, atila: ‘Nga mwansuminisha ukucita icabipa pa mubili wakwe, alamutuka pa cinso cenu.’ E co Yehova aleka Satana ukucita icabipa pa mubili wa kwa Yobo lelo amusoka ukuti eipaya Yobo.

Satana apuma Yobo no bulwele ica kuti umubili wakwe onse waba ne filonda. Ifi filonda fyalanunka ica kuti takuli uulefwaya ukumupalama. No mukashi wa kwa Yobo amweba ati: “Tukeni Lesa, no kufwa.” Abalebepekesha ukuba ifibusa fya kwa Yobo baisa mu kumupempula kabili bamulenga abelako no bulanda pa kusosa ukuti afwile alecita ifyabipa pa kuti aya mafya yonse yamuponene. Lelo, te mulandu na ya mafya yonse no kucula Satana aleta pali Yobo, Yobo atwalilila ukubombela Yehova mu busumino.—Yobo 2:1-13; 7:5; 19:13-20.

Bushe uletontonkanya ukuti ubusumino bwa kwa Yobo bwalengele Yehova ukumfwa shani?— Bwalengele asekelele pantu Yehova kuti aeba Satana ati: ‘Mona Yobo! Alamombela pa mulandu wa kuitemenwa.’ Bushe ukaba nga Yobo, umuntu Yehova engasonta ati ca kumwenako icilanga ukuti Satana wa bufi?— Cine cine, lishuko ukupeela Lesa icasuko ku fyo Satana atunga ukuti kuti alesha bonse ukubombela Yehova. Tatuletwishika ukuti Yesu amwene ici ukuba ishuko.

Kasambilisha Mukalamba talekele Satana Ukumulenga ukucita icabipa icili conse. Tontonkanya ifyo ica kumwenako cakwe calengele Wishi ukusekelela! Yehova ali na maka ya kusonta pali Yesu no kwasuka Satana ati: ‘Mona Umwana wandi! Alitwalilila ukuba uwa busumino kuli ine pantu alintemwa!’ Na kabili tontonkanya ifyo Yesu asekelela mu kusansamusha umutima wa kwa Wishi. Pa mulandu wa ubo buseko, Yesu ashipikishe ne mfwa ya pa cimuti ca kucushiwilwapo.—AbaHebere 12:2.

Bushe ulefwaya ukuba nga Kasambilisha wesu Umukalamba no kulenga Yehova ukusekelela?— Lyene twalilila ukusambilila ifyo Yehova afwaya iwe ukucita, kabili mulenge ukusekelela pa kucite ifyo fine!

ULETONTONKANYA ukuti mwana nshi pe sonde uwalengele Yehova ukusekelela sana?— Ali Mwana wakwe, Yesu. Natulande pa fintu Yesu acitile ku kulenga Wishi wa ku muulu ukusekelela.

Ulupwa lwa kwa Yesu lwaleikala apa kwende nshiku shitatu ukufuma ku Yerusalemu, ukwali itempele lyayemba ilya kwa Yehova. Yesu aitile ili tempele ati “ing’anda ya kwa Tata.” Wene no lupwa lwakwe baleya kulya cila mwaka ku kusangwa ku Ca Kucilila.

Umwaka umo, ilyo Yesu ali ne myaka 12, ulupwa lwakwe lwatendeke ubulendo bwa kubwelela ku ng’anda pa numa ya kusangwa ku Ca Kucilila. Ilyo baiminine pa ncende bali no kusendama ubo bushiku e lyo bamwene ukuti Yesu tali na balupwa lwabo nelyo abanabo. E co ilyo line Maria na Yosefe babwelele ku Yerusalemu ku kufwaya Yesu. Uletontonkanya ukuti ali kwi?—

Basangile Yesu mwi tempele. Alekutika kuli bakasambilisha, kabili alebepusha ifipusho. Kabili nga bamwipusha, aleasuka. Balepapa pa fyasuko fisuma aleasuka. Bushe wamona umulandu Lesa asekelele pa Mwana wakwe?—

Kwena, ilyo Maria na Yosefe basukile basanga Yesu, imitima yalikele. Lelo Yesu tali uwasakamikwa. Alishibe ukuti itempele lyali ni ncende isuma ukusangwako. E co aipwishe ati: “Bushe tamwishibe ukuti ndi no kuba mu ng’anda ya kwa Tata?” Alishibe ukuti itempele lyali ni ng’anda ya kwa Lesa, kabili aletemwa ukusangwa kulya.

Pa numa ya ico, Maria na Yosefe basendele Yesu uwali ne myaka 12 no kubwelela nankwe ku ng’anda ku Nasarete. Bushe uletontonkanya ukuti Yesu ali shani ku bafyashi bakwe?— Baibolo itila ‘alenakilila kuli bene.’ Bushe uletontonkanya ukuti ico cilepilibula cinshi?— Cilepilibula ukuti alebomfwila. Alecita ifyo abafyashi bakwe balemweba, nangu bamweba ukuyatapa amenshi ku cishima.—Luka 2:41-52.

E co tontonkanya pali ci: Nangu Yesu ali uwapwililika, aleumfwila abafyashi bakwe abali abashapwililika. Bushe ici calilengele Lesa ukusekelela?— Ee, pantu Icebo ca kwa Lesa ceba abana ukuti: “Nakileni abafyashi benu.” (Abena Efese 6:1) Na iwe ukalenga Lesa ukusekelela nga uleumfwila abafyashi bobe, filya fine Yesu alecita.

Inshila imbi wingalenga Lesa ukusekelela kwebako bambi pali wene. Nomba abantu bamo batila abaice tabafwile ukucite ci. Lelo lintu abantu baeseshe ukulesha bakalume ukucite ci, Yesu atile: ‘Bushe tamwatala amubelenga mu Malembo ukuti, “Mu tunwa twa bana abanono Lesa akaleta ukutasha”?’ (Mateo 21:16) E co ifwe bonse kuti twaeba bambi pali Yehova na pa fyo aba Lesa umusuma nga nshi, nga ca kuti tulefwaya ukucite co. Kabili nga twacite co, tukalenga Lesa ukusekelela.

Ni kwi tusambilila ifintu pali Lesa ifyo twingebako bambi?— Ni pe sambililo lya Baibolo ilya pa ng’anda. Lelo tulasambilila na fimbi ku ncende abantu ba kwa Lesa bakumanina ku kusambilila. Lelo kuti twaishiba shani abantu bakwe?—

Cinshi abo bantu bacita pa kulongana kwabo? Bushe cine cine basambilisha ifyaba mu Baibolo? Bushe balaibelenga no kulanshanyapo? Ifi e fyo tukutika kuli Lesa, bushe te ifyo?— Kabili pa kulongana kwa Bwina Kristu kuti twaenekela ukumfwa ifyo Lesa alanda, bushe te ifyo?— Lelo ni shani nga ca kuti abo bantu balelanda ati taufwile ukulakonka ifyo Baibolo ilanda? Bushe kuti watila bantu ba kwa Lesa?—

Pano pali cimbi ica kutontonkanyapo. Baibolo itila abantu ba kwa Lesa bakaba ‘bantu be shina lyakwe.’ (Imilimo 15:14) Apo ishina lya kwa Lesa ni Yehova, kuti twaipusha abo bantu nga ca kuti Lesa wabo ni Yehova. Nga bakaana, ninshi twaishiba ukuti te bantu bakwe. Abantu ba kwa Lesa na kabili kuti baleeba bambi pa Bufumu bwa kwa Lesa. Kabili bakalanga ukuti balitemwa Lesa pa kukonka amafunde yakwe.—1 Yohane 5:3.

Nga ca kuti walishiba abantu abacite fi fyonse, ninshi ufwile ukulalongana na bo. Ufwile ukulakutikisha pali uku kulongana no kwasuka ifipusho lintu fyaipushiwa. Ifi e fyo Yesu acitile ilyo ali mu ng’anda ya kwa Lesa. Kabili nga wacite fi, ukalenga Lesa ukusekelela, filya fine Yesu acitile.

Bushe kuti watontonkanyapo abana bamo abalumbulwa mu Baibolo abalengele Lesa ukusekelela?— Timote aba ca kumwenako capulamo. Wishi tasumine muli Yehova. Lelo nyina, Yunike, na nakulu Loisi bena balisumine muli Yehova. Timote alekutika kuli bene no kusambilila pali Yehova.

Ilyo Timote akulile, umutumwa Paulo atandalile itauni kuntu aleikala. Amwene ifyo Timote alefwaisha ukubombela Yehova. E co aebele Timote ukumukonka ku kubombela Lesa mu mulimo ukalamba. Konse uko baleya, baleeba abantu pa Bufumu bwa kwa Lesa na pali Yesu.—Imilimo 16:1-5; 2 Timote 1:5; 3:14, 15.

Lelo bushe mu Baibolo mwaba fye ifya kumwenako fya bakalume abalengele Lesa ukusekelela?— Iyo. Natumone umukashana munono umwina Israele uwacitile co. Aleikala pa nshita lintu icalo ca Suria ne calo ca Israele fyali pa bulwani. Bushiku bumo abena Suria balwishishe abena Israele no kusenda uyu mukashana bunkole. Atwelwe ku ng’anda ya mukalamba wa bashilika, uwaleitwa ati Naamani. Kulya aishileba umubomfi wa mukashi wa kwa Naamani.

Nomba Naamani alwele ifibashi. Badokota bonse balifililwe ukumuposha. Lelo uyu mukashana munono uwafumine ku Israele alisumine ukuti umubomfi umo uwaibela uwa kwa Lesa, kasesema, kuti aafwa Naamani. Kwena, Naamani no mukashi wakwe tabalepepa Yehova. Bushe uyu mukashana munono abebe ifyo aishiba? Aciba ni we nga wacitile shani?—

Ulya mukashana munono atile: ‘Nga ca kuti Naamani aya kuli kasesema wa kwa Yehova mu Israele, Naamani kuti apola ku fibashi.’ Naamani aumfwilile uyu mukashana munono, no kuya kuli kasesema wa kwa Yehova. Ilyo acitile ifyo kasesema amwebele, alipolele. Ici calengele Naamani ukutendeka ukupepa Lesa wa cine.—2 Ishamfumu 5:1-15.

Bushe kuti watemwa ukwafwa umuntu ukusambilila pali Yehova na pa fyo engacita, nga filya ulya mukashana munono acitile?— Ni bani wingaafwa?— Kwena, pa kubala te kuti batontonkanye ukuti balekabila ubwafwilisho. Lelo kuti walanda na bo pa fintu ifisuma ifyo Yehova acita. Kabili kuti pambi bakutika. Kabili kuti wacetekela ukuti ici cikalenga Lesa ukusekelela.