BUSHE cilakwangukila ukubombela Yehova?— Kasambilisha Mukalamba talandile ati cali no kwanguka ukucite co. Ubushiku bwa kuti mailo Yesu ali no kwipaiwa, aebele abatumwa bakwe ati: “Nga aba pano isonde bamupata, mwaishiba ukuti babala bapata ine.”—Yohane 15:18.

Petro aitakishe ati takashe Yesu, lelo Yesu aebele Petro ati ali no kumukaana imiku itatu bulya bwine bushiku. Kabili ifi fine e fyo Petro acitile! (Mateo 26:31-35, 69-75) Ica musango yu kuti cacitika shani?— Calicitike pantu Petro aishileba no mwenso, na batumwa bambi na bo balitiinine.

Bushe walishiba umulandu abatumwa bakwatile umwenso?— Bafililwe ukucite cintu cacindama. Ukwishibe ci kuti kwatwafwa ukubombela Yehova, te mulandu ne fyo uuli onse engalanda kuli ifwe nelyo ukutucita. Lelo ica kubalilapo, tufwile tupituluke mu fyacitike pa bushiku bwa kulekelesha Yesu ali na batumwa bakwe.

Ica ntanshi, basefya Ica Kucilila capamo. Ica Kucilila cali ca kulya caibela ico balelya cila mwaka ku kucinkulako abantu ba kwa Lesa pa lwa bushiku Lesa abalubwile mu busha mu Egupti. Lyena Yesu atendeka ica kulya caibela na cimbi. Tuli no kulanda pali ci mu cipandwa ca ku ntanshi no kulondolola ifyo ico ca kulya citwafwa ukwibukisha Yesu. Pa numa ya ico ca kulya kabili pa numa ya kulanda amashiwi ya kukoselesha abatumwa bakwe, Yesu abasenda kwi bala lya Getsemane. Iyi ni ncende batemwa ukutandalako ilingi.

Yesu aya akatalamukila mwi bala mu kupepa. Aeba Petro, Yakobo, na Yohane na bo ukupepa. Lelo bapona mu tulo. Imiku itatu Yesu afumapo mu kuyapepa, kabili imiku itatu abwela no kusanga Petro na bambi nabalaala! (Mateo 26:36-47) Bushe nawishiba umulandu balekabila ukubela abalola no kulapepa?— Natulandepo.

Yuda Iskariote ali ku Ca Kucilila na Yesu na batumwa bambi mu kubangilila kwa cilya cungulo bushiku. Nga fintu pambi uleibukisha, Yuda aishileba umupuupu. Nomba asanguka shikamfutu. Alishiba ilya ncende yaba mwi bala lya Getsemane uko Yesu ilingi alekumana na batumwa bakwe. E co Yuda aleta abashilika kulya ku kwikata Yesu. Ilyo bafika, Yesu abepusha ati: “Nani mulefwaya?”

Abashilika bayasuka ati: “Ni Yesu.” Yesu tali no mwenso, e co ayasuka ati: “Ni ne.” Abashilika bapapa pa kushipa kwa kwa Yesu ica kuti babwelela inuma no kuwa pa nshi. Lyene Yesu atila: ‘Nga mulefwaya ine lekeni abatumwa bandi baleya.’—Yohane 18:1-9.

Ilyo abashilika baikata Yesu no kumukaka, abatumwa batiina no kufulumuka. Lelo Petro na Yohane balefwaya ukwishiba ifyalacitika, e co balakonka mu numa. Basuka batwala Yesu ku ng’anda ya kwa Kayafa, shimapepo mukalamba. Apo Yohane alishibikwa kuli shimapepo mukalamba, uwa pa mwinshi amusuminisha ukwingila mu lubansa pamo na Petro.

Bashimapepo nabalongana kale pa ng’anda ya kwa Kayafa ku kulubulwisha Yesu. Balefwaya epaiwe. E co baleta Inte ku kulanda ifya bufi pali wene. Abantu bauma Yesu ififunshi no kumutoba amapi. Ilyo ifi fyonse filecitika, Petro ali lwa mupepi.

Umukashana wa pa mwinshi uwacisuminisha Petro na Yohane ukwingila aishiba Petro. Atila: “Na iwe wali pamo na Yesu.” Lelo Petro akaana ukuti tamwishiba no kumwishiba Yesu. Ilyo papite nshita umukashana na umbi aishiba Petro no kweba abeminine lwa mupepi ati: “No yu ali pamo na Yesu.” Na kabili Petro akaana ukuti tamwishiba. Ilyo papite nshita ibumba lya bantu lyamona Petro no kumweba ati: ‘Cine cine na iwe wali pamo na bo.’ Umuku wa citatu Petro akaana, ati: “Nshiishibe umuntu uyo.” Petro alapa no kulapa ati alelanda icishinka, kabili Yesu apilibuka no kumulolesha.—Mateo 26:57-75; Luka 22:54-62; Yohane 18:15-27.

Bushe nawishiba umulandu Petro abepeele?— Ca cine, ni pa mulandu wa kuti ali no mwenso. Lelo mulandu nshi akwatile umwenso? Cinshi afililwe ukucita pa kuti abe uwashipa? Tontonkanyapo. Cinshi Yesu acitile pa kuti ashipe?— Apepele kuli Lesa, kabili Lesa alimwafwile ukuba uwashipa. Kabili ibukisha, Yesu aebele Petro imiku itatu ukupepa no kuba uwalola. Lelo cinshi cacitike?—

Cila nshita Petro aponene mu tulo, talepepa, kabili tali uwalola. E co aalipumikishiwa lintu Yesu bamwikete. Ilyo balelubulwisha Yesu, lintu bamumine no kupanga ukumwipaya, Petro alitiinine. Lelo, ninshi tapalapita na maawala ayengi, cinshi Yesu aebele abatumwa bakwe ukwenekela?— Yesu abebele ati filya fine aba pano isonde bamupatile, na bo bene bali no kupatwa.

Nomba natumone icingacitika kuli ifwe icapala icacitikile Petro. Tutile uli mu kalasi e lyo bambi batendeka ukulanda ifyabipa pa bantu abashipika sulupu ku mendela nelyo abashisefya Krisimasi. Ni shani nga ca kuti umo apilibukila kuli iwe, akwipusha ati: “Bushe ca cine ukuti taupika sulupu ku mendela?” Nelyo bambi batila: “Twaumfwa ukuti tausefya na Krisimasi!” Bushe kuti waumfwa umwenso ukulanda icishinka?— Bushe kuti watunkwa ukubepa, filya Petro acitile?—

Pa numa ya ico, Petro alyumfwile ububi pa kukaana Yesu. Ilyo akutulwike pa fyo acitile, aile pa nse no kutendeka ukulila. Abwelele kuli Yesu. (Luka 22:32) Nomba tontonkanyapo. Cinshi cingatwafwa ukukanaba no mwenso pa kuti tatulandile ifyalandile Petro?— Ibukisha, Petro afililwe ukupepa no kuba uwalola. E ico, kuti watila cinshi tufwile ukucita pa kuba abakonshi ba kwa Kasambilisha Mukalamba?—

Tufwile ukupepa kuli Yehova ukuti atwafwe. Lintu Yesu apepele, bushe walishiba ico Lesa amucitile?— Atumine malaika wa kumukosha. (Luka 22:43) Bushe bamalaika ba kwa Lesa kuti batwafwa?— Baibolo itila: “Malaika wa kwa Yehova acite nkambi ukushinguluka pa bamutiina, no kubapokolola.” (Amalumbo 34:7) Lelo pa kuti Lesa atwafwe, tufwile ukucita na fimbi ukulunda pa kupepela ubu bwafwilisho. Bushe walishiba cimbi ico tufwile ukucita?— Yesu aebele abakonshi bakwe ukuba abalola. Bushe uletontonkanya ukuti icingatwafwa ukucite co cinshi?—

Tufwile ukukutikisha ku filandwa pa kulongana kwesu ukwa Bwina Kristu no kupoosa amano ku fyo tubelenga mu Baibolo. Lelo tufwile no kupepa kuli Yehova lyonse no kumulomba ukutwafwa ukumubombela. Nga twacite fyo, tukaafwiwa ukuleka ukuba no mwenso. Lyene tukasekelela lintu twakwata ishuko lya kwebako bambi pali Kasambilisha Mukalamba na Wishi.

BUSHE inshita shimo ulayumfwa uwa bulanda no kutalalilwa?— Bushe ulatwishika nga ca kuti paliba abakutemwa?— Abana bamo e fyo batontonkanya. Lelo Lesa alaya ati: “Ine nshakalabe iwe iyo.” (Esaya 49:15) Bushe ico te cisuma ukutontonkanyapo?— Ee, Yehova Lesa alitutemwa icine cine!

Kalemba wa Baibolo umo atile: “Ilyo tata na mayo bandekelesha, e lyo Yehova ambuula.” (Amalumbo 27:10) Ukwishibe co kuti kwatusansamusha icine cine, bushe te ifyo?— Ee, Yehova atweba ati: “Witiina, pantu ine ndi nobe, . . . nakulakwafwa.”—Esaya 41:10.

Lelo inshita shimo, Yehova alaleka Satana ukutuletela amafya. Kabili Yehova alaleka Satana ukwesha ababomfi Bakwe. Inshita imo Kaseebanya alengele Yesu ukucula ica kuti Yesu alilile kuli Yehova ati: “Lesa wandi, Lesa wandi, cinshi ico mwandekelesesha?” (Mateo 27:46) Nangu ca kuti Yesu aliculile, alishibe ukuti Yehova alimutemwa. (Yohane 10:17) Lelo Yesu alishibe no kuti Lesa alaleka Satana ukwesha ababomfi Bakwe no kubacusha. Mu cipandwa cimbi tukalondolola umulandu Lesa alekela Satana ukucite fi.

Ilyo tuli abaice, inshita shimo tulaba no mwenso. Ku ca kumwenako, bushe walilubapo?— Bushe walitiinine?— Abana abengi kuti batiina. Inshita imo Kasambilisha Mukalamba ashimike pa lwa kuluba. Lelo te mwana alubile. Yali ni mpaanga.

Kuti twatila na iwe walipalako impaanga. Mulandu nshi twingasosele fyo? Umulandu wa kuti impaanga te nama shikalamba kabili tashakosa. Kabili shikabila umuntu wa kushisakamana no kushicingilila. Umuntu uusakamana impaanga etwa ati kacema.

Mu lyashi lyakwe Yesu alandile pa lwa mucemi uwakwete impaanga 100. Lelo impaanga imo yalilubile. Napamo yalefwaya ukumona ifyali ku lubali lumbi ulwa lupili. Lelo tapakokwele, iyo mpaanga yaishileba ukutali ne mpaanga shimbi. Bushe kuti waelenganya ifyo ilya mpaanga yaumfwile lintu yaloleshe no kumona ukuti ili fye yeka?—

Cinshi ulya kacema engacita lintu aishiba ukuti impaanga imo nailuba? Bushe kuti alanda ati tapooseko amano ukufwaya iyi mpaanga pantu yailetelela fye iine? Nelyo bushe kuti asha shilya mpaanga 99 pa ncende yacingililwa no kuya mu kufwaya ilya mpaanga imo? Bushe kuti caba icalinga ukuya mu kufwaya fye impaanga imo?— Nga ca kuti ni we wali ilya mpaanga yalubile, bushe kuti wafwaya ulya mucemi ukukufwayafwaya?—

Ulya kacema atemenwe sana impaanga shakwe shonse, na ilya ine iyalubile. E co aile mu kufwayafwaya ilya yalubile. Tontonkanya pa fyo ilya mpaanga yalubile yasekelele lintu yamwene kacema aleisa! Kabili Yesu atile ulya kacema alisekelele pa kusanga impaanga yakwe. Alisekelele pali ilya mpaanga ukucila na pa mpaanga 99 ishishalubile. Nomba, uwaba nga ulya mucemi wa mu lyashi lya kwa Yesu nani? Nani uutusakamana filya fine ulya kacema asakamene impaanga shakwe?— Yesu alandile ati ni Wishi wa ku muulu. Kabili Wishi ni Yehova.

Yehova Lesa e Kacema Wakulisha uwa bantu bakwe. Alitemwa bonse abamubombela, pamo na baice nga iwe. Tafwaya abali bonse pali ifwe ukucitwa ububi nelyo ukonaulwa. Ukwabula no kutwishika cilasansamusha ukwishiba ukuti e fyo Lesa atusakamana!—Mateo 18:12-14.

Bushe walisumina muli Yehova Lesa?— Bushe umumona ngo muntu wa cine cine?— Ca cine ukuti tatwingamona Yehova. Ni pa mulandu wa kuti Mupashi. Akwata umubili uushimoneka ku menso yesu. Lelo muntu wa cine cine, kabili alatumona. Aleshiba lintu tulekabila ubwafwilisho. Kabili kuti twalanda na wene mwi pepo, filya fine tulanda na bantu bambi pano isonde. Yehova afwaya ifwe ukucite ci.

E ico nga wayumfwa uwa bulanda nelyo ukutalalilwa, cinshi ufwile ukucita?— Landa na Yehova. Palama kuli wene, kabili akakusansamusha no kukwafwa. Uleibukisha ukuti Yehova alikutemwa, na lintu wayumfwa uwatalalilwa. Natubuule Baibolo yesu. Pano pa Amalumbo 23, ukutendekela pa cikomo 1 twaebwa ati: “Yehova e mucemi wandi; nshibulwa. Mu mulemfwe uteku e mo anengo kuyolola, antwala pa menshi ayatekanya.”

Mona ifyo kalemba alundapo, mu cikomo 4: “Ilyo nyenda mu mupokapoka wa kufiita kwa mfwa, nshitiina bubi; pantu imwe muli pamo na ine: inkonto yenu no mutambu wenu filansansamusha.” E fyo abantu bomfwa nga ca kuti Lesa wabo ni Yehova. Balasanga icisansamushi lintu bali mu mafya. Bushe e fyo umfwa?—

Filya kacema wa kutemwa asakamana impaanga shakwe, e fyo na Yehova asakamana bwino abantu bakwe. Abalanga inshila isuma iya kwendamo, kabili balatemwa ukumukonka. Nangu ni lintu bashingulwikwe na mafya, tabakabila kutiina. Kacema abomfya inkonto yakwe ukucingilila impaanga ku nama shingaleta ububi. Baibolo itweba pa lwa fyo umucemi wacaice Davidi acingilile impaanga ku nkalamo na bere. (1 Samwele 17:34-36) Kabili abantu ba kwa Lesa balishiba ukuti Yehova akabacingilila na bo bene. Kuti bayumfwa abacingililwa pantu Lesa ali na bo.

Yehova alitemwa impaanga shakwe icine cine, kabili alashisakamana mu kunakilila. Baibolo itila: ‘Ngo mucemi akatungulula impaanga shakwe. Ku kuboko kwakwe akalonganya utwana twa mpaanga.’—Esaya 40:11.

Bushe tautemenwe ukwishiba ukuti e fyo Yehova aba?— Bushe ulefwaya ukuba pa mpaanga shakwe?— Impaanga shumfwila ishiwi lya kwa kacema wa shiko. Shipalama kuli wene. Bushe ulomfwila Yehova?— Bushe ulapalama kuli wene?— Ninshi taufwile ukutiina. Yehova akaba na iwe.