Abena Israele Balikwete Ubuntungwa bwa Kuisalila

3. Lifunde nshi ilya kubalilapo pa Mafunde Ikumi, kabili abena Israele ba cishinka basalile shani ukuti bakalalikonka?

³ Yehova aebele Abena Israele ukuti: “Nine Yehova Lesa wenu, uwamufumishe mu calo ca Egupti, mu ng’anda ya busha.” (Amalango 5:6) Mu 1513 B.C.E., Lesa alubwile abena Israele mu cipesha amano ukufuma mu busha mu Egupti, kanshi balishibe ukuti aya mashiwi ya cine. Mwi funde lya kubalilapo pa Mafunde Ikumi, Yehova aebele abena Israele ukupitila muli Mose ukuti: “Wilaba na milungu imbi pa cinso candi.” (Ukufuma 20:1, 3) Pali ilya nshita, abena Israele balisumine ukuti bakalakonka amafunde yakwe. Abene bali-itemenwe ukusala ukuti bakalapepa Yehova fye eka.—Ukufuma 20:5; Impendwa 25:11.

4. (a) Finshi Mose aebele abena Israele ukusala? (b) Finshi tufwile ukusala muno nshiku?

⁴ Ilyo papitile imyaka nakalimo 40, Mose acinkwileko na maka inkulo ipya iya bena Israele ukuti bafwile ukusala ica kucita. Atile: “Nalenga umuulu ne calo ukube nte pali imwe lelo, ukuti nimbika ku cinso cenu umweo ne mfwa, ipaalo ne citiipu: e ico saleni umweo, ku kuleka mube no mweo, imwe no bufyashi bwenu.” (Amalango 30:19) E fyo caba na kuli ifwe, twalikwata ubuntungwa bwa kusala ico twingatemwa ukucita. Kuti twasala ukubombela Yehova mu cishinka no kwenekela ubumi bwa muyayaya, nelyo kuti twasalapo ukukanakonka amafunde yakwe no kwisakandwa. Lekeni tulande pa bantu bamo abasalile ukucita ifisuma na pali bamo abasalile ukucita ifyabipa.

Ukusala Icingatuwamina

8. Bushe Amalango 30:20 yatila uulefwaya ukusala icingamuwamina afwile ukucita finshi?

⁸ Ilyo Mose akonkomeshe abena Israele ukusala umweo, alumbwile ifintu fitatu ifyo balekabila ukucita, atile bafwile: “Ukutemwa Yehova Lesa [wabo], ukuumfwa kwi shiwi lyakwe, no kulambatila kuli wene.” (Amalango 30:20) Nomba natulande pali cimo na cimo pa kuti tusambilileko ifyo twingacita pa kusala icingatuwamina.

9. Kuti twalanga shani ukuti twalitemwa Yehova?

⁹ Ukutemwa Yehova Lesa wesu: Tusala ukubombela Yehova pantu twalimutemwa. Ilyo tutontonkanya pa fya kutusoka ifyacitike ku bena Israele, nangu twatunkwa, tulakosa no kukaana ukucita ifyabipa kabili tatufwaisha ifyuma nge fyo abantu muli cino calo bacita. (1 Abena Korinti 10:11; 1 Timote 6:6-10) Tulambatila kuli Yehova no kukonka amafunde yakwe. (Yoshua 23:8; Amalumbo 119:5, 8) Ilyo abena Israele bashilaingila mu Calo ca Bulayo, Mose abakonkomeshe ukuti: “Moneni, namusambilishe ifipope ne fya bupingushi, ifyo Yehova Lesa wandi anjebele, ku kuleka muficite mu kati ka calo ico muleingilamo ku kucikwata. E ico bakeni no kucita; pantu ici e mano yenu kabili e mucetekanya wenu ku menso ya bantu na bantu, abakomfwe fipope ifi.” (Amalango 4:5, 6) Ino e nshita ya kulanga ukuti twalitemwa Yehova pa kubika sana amano ku kumupepa mu mikalile yesu. Nga twasala ukucite co, ukwabula no kutwishika, Yehova akatupaala.—Mateo 6:33.

10-12. Finshi tusambililako ku fyacitike mu nshiku sha kwa Noa?

¹⁰ Ukuumfwa kwi shiwi lya kwa Lesa: Noa aali ni “kashimikila wa bulungami.” (2 Petro 2:5) Abantu abengi nga nshi abali pano calo pa ntanshi ya Lyeshi tababikileko mano ilyo Noa alebasoka. Cinshi cabacitikile? “Ilyeshi lyalishile no kubasenda bonse.” Yesu asokele ukuti e fyo cikaba na muli shino nshiku tulimo isha “kubapo kwa Mwana wa muntu.” Icacitike mu nshiku sha kwa Noa ca kusoka ca maka ku bantu ba muno nshiku abakaana ukumfwa ubukombe bwa kwa Lesa.—Mateo 24:39.

¹¹ Abashipoosako mano ku kusoka kwa kwa Lesa no kupumya ababomfi bakwe aba muno nshiku bafwile ukwishiba ukuti nga tabacitilepo cimo, cikababipila ku ntanshi. Umutumwa Petro alandile pali bakapumya ba musango yo ukuti: “Umwabela ukufwaya kwabo, baluba ici cishinka, ukuti ku kale kwali imyulu ne sonde ilyakambantaniwe ukufuma mu menshi kabili mu kati ka menshi ku cebo ca kwa Lesa; na kuli ifyo icalo icalipo lilya, calyonawilwe ilyo cabunshiwe ku menshi. Lelo ku cebo cimo cine imyulu ne sonde ifya nomba fyabakilwa umulilo kabili fyasungilwa ubushiku bwa bupingushi no bwa konaulwa kwa bantu bashipepa.”—2 Petro 3:3-7.

¹² Tontonkanyeni pa fyo bakapumya ba musango yo bapusene ne fyo Noa na ba mu ng’anda yakwe basalile ukucita. “Ni ku citetekelo e ko Noa, ilyo asokelwe kuli Lesa ulwa fintu ifyali fishilamoneka, alangile akatiina ka bukapepa no kukuula icibwato.” Ukumfwila ukusoka kwapuswishe Noa na ba mu ng’anda yakwe. (AbaHebere 11:7) Mukwai na ifwe bene natuleumfwa bwangu ifyo Lesa aletweba no kucitapo cimo ilyo line.—Yakobo 1:19, 22-25.

13, 14. (a) Mulandu nshi ‘ukulambatila kuli Yehova’ kwacindamina? (b) Cinshi tufwile ukucita pa kuti Yehova aletufunda?

¹³ Ukulambatila kuli Yehova: Pa ‘kusala umweo ukuti tube no mweo,’ tufwile ukutemwa Yehova no kuumfwa kwi shiwi lyakwe. Na kabili, tufwile no ‘kulambatila kuli Yehova,’ e kutila, ukutwalilila ukucita ukufwaya kwakwe. Yesu atile: “Mu kushipikisha kwenu e mo mukabakile myeo yenu.” (Luka 21:19) Na kuba ifyo tusalapo ukucita pali uyu mulandu e filanga ifyo umutima wesu waba. Amapinda 28:14 yatila: “Alishuko muntu uwaba no mwenso pe ku bubi; lelo uutalamiko mutima wakwe akawila mu bubi.” Farao wa ku Egupti alitalamike umutima wakwe. Ilyo icinkunka cimo na cimo calecitika mu Egupti mpaka ne calenga 10, Farao atalamike fye umutima wakwe, tatiinine Lesa. Yehova tapatikishe Farao ukuti abe nkosa mutwe, alekele ulya kateka wa cilumba ukuisalila ifya kucita. Na lyo line, Yehova alicitile ukufwaya kwakwe, nge fyo no mutumwa Paulo asosele ilyo alandile pa fyo Yehova alemona Farao. Atile: “Ni pali ci cine nakulekela ukutwalilila ukubako, ukuti muli iwe e mo nangile amaka yandi, no kuti ishina lyandi libilwe mwi sonde lyonse.”—Abena Roma 9:17.

¹⁴ Ilyo papitile imyake ingi ukufuma apo Lesa alubulwilile abena Israele mu busha bwa kwa Farao, kasesema Esaya atile: “Ni mwe bashifwe, mwe Yehova, bonse tuli mulimo wa minwe yenu; ifwe tuli ibumba, na imwe muli mubumfi.” (Esaya 64:8) Ilyo tusumina ukuti Yehova aletufunda mwi sambililo lya pa lwesu ilya cebo cakwe na lintu tukonka ifyo tusambilila, panono panono tufwala ubuntu bupya. Tusambilila ukuiceefya no kuba no mutima wa kufwaya ukufundwa kabili ico cilenga tutwalilile aba cishinka kuli Yehova pantu tufwaya ukumusekesha no mutima wesu onse.—Abena Efese 4:23, 24; Abena Kolose 3:8-10.