Mwe Bena Kristu—Cankilweni mu Bwina Kristu Bwenu!

“Uuleitakisha, aitakishishe muli Yehova.”—1 ABENA KORINTI 1:31.

1. Cinshi cilecitika ku bantu ukulola ku mipepele?

“UKUKANAYANGWAKO.” Uulanda pa fikumine imipepele nomba line abomfeshe ilyo ishiwi ku kulondolola ifyo abengi bamona imipepele yabo. Alondolwele ukuti: “Abantu abengi pali ndakai kwena balikwata uko bapepa—lelo icikalamba icicitike ca kuti tabaleyangwa imipepele yabo.” Kabili alundilepo ukuti abantu tabalepoosa sana amano ku mipepele yabo. Atile: “Abengi balisumina muli Lesa . . . , lelo tabangwako fye kuli wene.”

2. (a) Cinshi tushilekabila ukupapila pa kukanayangwako kwa bantu ku fya ku mupashi? (b) Busanso nshi ukukanayangwako kwingaletela Abena Kristu ba cine?

² Uku kukanayangwako takulesungusha abasambi ba Baibolo. (Luka 18:8) Nga kulanda fye pa mipepele yalekanalekana, tulingile ukwenekela abantu ukuleka ukupoosako amano. Ukupepa kwa bufi kwalikopeka abantu no kubakalifya imitima pa nshita ntali. (Ukusokolola 17:15, 16) Lelo, ku Bena Kristu bene bene, uku kukanayangwako no kukanapimpa kuti kwaba ukwa busanso. Kuti cabipa sana nga twaleka ukwangwa ku mipepele yesu no kubulwa ukupimpa ukwa kubombela Lesa no kwa kusambilila icine ca mu Baibolo. Yesu asokele ukutaluka ku cifulefule ca musango yo ilyo acincishe Abena Kristu ba mu mwanda wa myaka uwa kubalilapo abaleikala mu Laodekia ati: “Tawatalala nangu ukukaba. Kanshi nga wali uwatalala nangu uwakaba. . . . Uli wa cifulefule.”—Ukusokolola 3:15-18.

Ukuishiba fwe Bene

3. Ni muli finshi Abena Kristu bengacankilwa?

³ Pa kusengauka ukukanayangwako ukwa ku mupashi, Abena Kristu balekabila ukuishiba bwino abene, kabili bafwile ukusekelela pa kuba Abena Kristu. Apo tuli babomfi ba kwa Yehova kabili abasambi ba kwa Kristu, kuti twasanga ifyo batulondolola muli Baibolo. Tuli “nte” sha kwa Yehova, “bakabomba banankwe aba kwa Lesa,” abashimikila bambi “imbila nsuma” mu kupimpa. (Esaya 43:10; 1 Abena Korinti 3:9; Mateo 24:14) ‘Twalitemwana.’ (Yohane 13:34) Abena Kristu ba cine bantu abo “ukupitila mu kubelesha bakansha ukulingulula kwabo ku kulekanya icalungama ne cabipa.” (AbaHebere 5:14) Tuli “fyengelo muno calo.” (Abena Filipi 2:15) Tulabombesha ukuba ne “myendele isuma mu bena fyalo.”—1 Petro 2:12; 2 Petro 3:11, 14.

4. Kapepa wa kwa Yehova kuti aishiba shani ico ashaba?

4 Abena Kristu ba cine balishiba kabili ne co bashaba. “Tabali ba pano calo,” filya fine Intungulushi yabo, Yesu Kristu, tali wa pano calo. (Yohane 17:16) Balipaatukako ku “bena fyalo,” abo “amatontonkanyo yabo yaba mu mfifi, kabili abapaatuka ku bumi bwa kwa Lesa.” (Abena Efese 4:17, 18) Pali uyu mulandu, abakonshi ba kwa Yesu ‘balakaana ukubulapepa ne fya lunkumbwa fya pano calo no kwikala aba mano ayatuntulu no bulungami no kuipeelesha kuli bukapepa muli buno bwikashi bwa ndakai.’—Tito 2:12.

5. Amashiwi ya kuti ‘ukuitakishisha muli Yehova’ yalola mwi?

⁵ Ukuishiba bwino e lyo na bucibusa bwesu na Kateka Wapulamo mu bubumbo bonse fitulenga ‘ukuitakishisha muli Yehova.’ (1 Abena Korinti 1:31) Kuitakisha kwa musango nshi uko kwine? Fwe Bena Kristu ba cine twalitemwa apo Yehova e Lesa wesu. Tumfwila amashiwi ya kuti: “Muli ici e mo atakishishe uuletakisha, mu kwiluka, no kwishiba ine, ukuti nine Yehova uucito luse no bupingushi no bulungami mu calo.” (Yeremia 9:24) ‘Tutakishisha’ mwi shuko lya kwishiba Lesa na pa kubomfiwa na wene ku kwafwa bambi.

Tacayanguka

6. Mulandu nshi cishayangukila kuli bamo ukutwalilila ukusekelela pa kuba Abena Kristu?

⁶ Kwena, ukutwalilila ukusekelela pa kuba Abena Kristu takwayanguka iyo. Umulumendo uwakulile mu ng’anda ya Bena Kristu ebukisha ukuti pa kashita kanono alinakile lwa ku mupashi. Atila: “Limo limo, nalemona kwati nshaishibe ico nabelele Inte ya kwa Yehova. Nasambilishiwe icine ukutula ku bwaice. Limo limo naleti nalimo iyi mipepele na yo ine cimo cine fye ne yashala.” Fimbi na fyo ififulunganya abacaice fyaba fyangalo ne fisabankanishiwa pa TV, e lyo no kutontonkanya kwa ndakai ukwapusana na bukapepa. (Abena Efese 2:2, 3) Abena Kristu bamo kuti pambi balaitwishika limo limo no kutontonkanya sana ukuti napamo umulimo babomba tawacindama.

7. (a) Kuibebeta nshi kwalinga ku babomfi ba kwa Lesa? (b) Busanso nshi bwabamo?

7 Bushe ukulaibebeta mu nshita mu nshita kwalilubaninina fye? Awe iyo. Napamo kuti mwaibukisha ukuti umutumwa Paulo akoseleshe Abena Kristu ukulaibebeta ilyo atile: “Muleyesha mwe bene mumone nga muli mu citetekelo, muleilinga mwe bene.” (2 Abena Korinti 13:5) Umutumwa Paulo pano alekoselesha ukubombesha ukumona ubunake bwa ku mupashi ubuli bonse ubwingemako e lyo ukucitapo fimo fimo ku kulungike fintu. Ilyo Umwina Kristu aleilinga pa kuti amone nga ali mu citetekelo, afwile ukumona nge fyebo fyakwe ne ncitilo fileumfwana na cintu asuminamo. Lelo nga tatucenjele, ukuibebeta ukutulenga ukufwaya ukwishiba ico ‘twaba’ nelyo ukufwaya amasuko ayashileumfwana na bucibusa bwesu na Yehova nelyo icilonganino ca Bwina Kristu takwawama kabili kuti kwaonaula fye bumupashi bwesu.a Te kuti tufwaye nangu panono ‘ukubunsha icitetekelo cesu’!—1 Timote 1:19.

Na Ifwe Bene Tulaponenwa no Bwafya

8, 9. (a) Mose aleitwishika shani? (b) Yehova ayankwileko shani ku fyo Mose aletontonkanya? (c) Mumfwa shani pa malayo ya kwa Yehova?

⁸ Bushe Abena Kristu abaitwishika limo limo balingile ukutontonkanya ukuti balipelebela? Awe iyo! Kuti basansamushiwa ukwishibo kuti ukuyumfwa kwa musango yo te nomba kutampile. Inte sha cishinka isha kwa Lesa isha pa kale shaleba no bwafya bumo bwine. Ku ca kumwenako, natulande pali Mose uwali ne citetekelo caibela, bucishinka, no kuipeelesha. Ilyo apeelwe umulimo uwamoneke ukukula nga nshi, Mose kutwishika kutwishika aipwishe ati: “Nine ani?” (Ukufuma 3:11) Cilemoneka kwati ico Mose aletontonkanyapo ca kuti, ‘Tapali ico naba!’ atemwa ati ‘Te kuti mombe!’ Kwali ifingi ifyalengele Mose ukutontonkanya ukuti tafikilepo. Ali mu luko lwa basha. Abena Israele balimukeene. Tali kalanda walongoloka. (Ukufuma 1:13, 14; 2:11-14; 4:10) Ali kacema, umulimo uo abena Egupti bapatile. (Ukutendeka 46:34) E mulandu wine kanshi atontonkanishishe ukuti tafikilepo ukulubula abantu ba kwa Lesa abaali mu busha!

⁹ Yehova akoseleshe Mose pa kumulaya ifintu fibili ati: “Nakulaba nobe; kabili ici e ciishibilo kuli iwe ica kuti nine nakutuma: iwe pa kufumya abo bantu mu Egupti, e lyo mukesabombela Lesa pa lupili ulu.” (Ukufuma 3:12) Lesa aleeba umubomfi wakwe uwaleshimunuka ukuti aali no kuba nankwe lyonse. Kabili, Yehova alelangilila ukuti nangu cibe shani aali no kulubula abantu bakwe. Imyaka yonse iyi, Lesa alitulaya amalayo yapalako aya kututungilila. Ku ca kumwenako, ukupitila muli Mose aebele uluko lwa kwa Israele ilyo lwali mupepi no kwingila mu Calo Calaiwe ati: “Koseni kabili talileni. . . . Yehova Lesa wenu e uleya na imwe; takamupoose fye, nangu kumulekelesha.” (Amalango 31:6) Yehova kabili alaile Yoshua ati: “Umuntu nangu umo takabe na maka ya kulungatana na iwe inshiku shonse sha mweo obe. . . . Nakulaba na iwe: nshakakupoose fye nangu kukulekelesha.” (Yoshua 1:5) Kabili alaya Abena Kristu ati: “Nshakakushe nakalya nangu kukulekelesha nakalya.” (AbaHebere 13:5) Pa kuba no wa kututungilila uwa musango yu tufwile kanshi ukusekelela pa kuba Abena Kristu!

10, 11. Umwina Lebi Asafi ayafwiwe shani ukutwalilila ukutontonkanya bwino pa mulimo wakwe kuli Yehova?

1⁰ Imyaka mupepi na 500 ukufuma pali Mose, umwina Lebi wa busumino uwe shina lya Asafi ukwabulo kupita mu mbali alembele ifyo aletwishika ukuti mu kuba uwatambalala tamwaba icilambu cine cine. Ilyo wena aleshomboka pa kubombela Lesa pa mulandu wa fya kwesha na matunko, Asafi amwene abantu abasuulile Lesa baleikala bwino no kuba abakankaala. Ici calengele Asafi ukumfwa shani? Asumine ukuti: “Lelo ine, yali mupepi no kutela amolu yandi, shapene shitelemuke inyantilo shandi; pantu nafinwike abatakisha, ilyo namono mutende wa babifi.” Atampile ukutwishika nga mwali icilambu mu kuba kapepa wa kwa Yehova. Asafi atontonkenye ati “Kanshi nasangulwilo mutima wandi ibusha, no kusambile minwe yandi ibusha mu kaele, apo nabo wapumwa akasuba konse.”—Amalumbo 73:2, 3, 13, 14.

¹¹ Asafi acitile shani pali aya matontonkanyo ya kutwishika? Bushe aliyakeene? Iyo. Aliyalandilepo mwi pepo apepele kuli Lesa, nga fintu tubelenga mu Amalumbo 73. Icalengele Asafi ukwaluka nga nshi ni lintu aile kwi tempele. Ilyo aali kulya, aishileiluka ukuti takwaba icacila pa kubombela Lesa. Apo nomba bumupashi bwakwe bwalibwelele, alyumfwikishe ukuti Yehova alipatile ububi kabili ukuti mu kuya kwa nshita ababifi bali no kukandwa. (Amalumbo 73:17-19) Pa kucite fi, Asafi akoseshe umucinshi akwete pa kuba umubomfi wa kwa Yehova. Atile kuli Lesa: “Ine naba kuli imwe pe; mwanjikata ku kuboko kwandi kwa kulyo, ku mano ayo mwapanda mulantungulula, na pa numa mukampokelela mu bukata.” (Amalumbo 73:23, 24) Asafi alisekelele muli Lesa wakwe na kabili.—Amalumbo 34:2.

Bali-ishibe Bwino Sana

12, 13. Peeleni ifya kumwenako fya bantu ba mu Baibolo abalecankwa pa kuba ifibusa fya kwa Lesa.

¹² Inshila imo iya kukoseshamo ukusekelela kwesu pa kuba Abena Kristu kubebeta no kupashanya icitetekelo ca bakapepa ba cishinka, abalecankilwa nga nshi muli bucibusa bwabo na Lesa te mulandu na macushi. Natulande pali Yosefe, umwana wa kwa Yakobo. Ilyo aali ne myaka iinono, balimushitishe mu busha no kumusenda ku Egupti, bakilomita abengi nga nshi ukumufumya kuli wishi uwaletiina Lesa kabili ukutali nga nshi ukufuma ku mwabo ukwali abantu bakwe, aba kumutungilila. Ilyo aali mu Egupti, takwali umuntunse uko Yosefe engaya ku kupandwa amano ya bulesa, e ico aali no kulolenkana ne fya kwesha ifyali no kumwesha ukumona nga ali ne mibele isuma kabili nga alishintilile pali Lesa. Lelo, Yosefe atwalilile ukuishiba bwino ukuti aali mubomfi wa kwa Lesa, kabili atwalilile ukuba uwa bucishinka ku co aishibe ukuti e calungama. Calemuletela umucinshi ukuba kapepa wa kwa Yehova te mulandu no kuba mu ncende ya bulwani, kabili tashimunwike ukulondolola ifyo aletontonkanya.—Ukutendeka 39:7-10.

¹³ Pa numa ya myaka 800, umukashana umwina Israele uwaishileba umusha kuli mushika wa fita fya bena Suria Naamani tatalilelaba ukuti aali kapepa wa kwa Yehova. Ilyo ishuko lyamoneke, mu kushipa umukashana ashimikile pali Yehova ilyo alondolwele ukuti Elisha e kasesema wa kwa Lesa wa cine. (2 Ishamfumu 5:1-19) Pa numa ya myaka iingi, Imfumu yacaice Yoshia, te mulandu no kuba mu ncende umo ifintu fyabipile nga nshi, yaalwile ifyalekabila ukwalulwa mu mipepele, yawemye itempele lya kwa Lesa, kabili yabweseshe lulya luko kuli Yehova. Yoshia asekelele mu citetekelo cakwe na mu kupepa kwakwe. (2 Imilandu, ifipandwa 34, 35) Daniele na banankwe batatu abaHebere mu Babiloni tabatalile abalaba ukuti baali babomfi ba kwa Yehova, kabili te mulandu no kutitikisha na matunko, batwalilile ukuba aba cishinka. Cine cine, balecankwa pa kuba ababomfi ba kwa Yehova.—Daniele 1:8-20.

Cankilweni mu Bwina Kristu Bwenu

14, 15. Cinshi casanshiwa mu kucankilwa mu kuba Abena Kristu?

¹⁴ Aba babomfi ba kwa Lesa balibombele bwino pantu balishibe bwino bwino ukuti babomfi ba kwa Lesa. Nga ifwe pali lelo? Finshi fimbi ifyaba mu kucankilwa mu kuba Abena Kristu?

¹⁵ Sana sana, ici cisanshamo ukuyumfwa bwino pa kuba abantu abo Yehova ainikapo ishina lyakwe, abo apaala no kucankilwamo. Lesa alishiba abantu bakwe. Umutumwa Paulo, uwaikele mu nshita ilyo kwali icimfulumfulu nga nshi mu mipepele, alembele ati: “Yehova aishiba abakwe.” (2 Timote 2:19; Impendwa 16:5) Yehova alacankilwa mu bantu “bakwe.” Atila: ‘Uwakumya pali imwe, akumya pa mboni ya linso lyandi.’ (Sekaria 2:8) Ukwabulo kutwishika, Yehova alitutemwa. E ico, bucibusa bwesu na wene bufwile ukushimpwa pa kutemwa wene mu kushika. Paulo atile: “Ngo muntu atemwa Lesa, uyu e waishibikwa kuli wene.”—1 Abena Korinti 8:3.

16, 17. Mulandu nshi Abena Kristu, abanono na bakalamba, bengacankilwa mu bupyani bwabo ubwa ku mupashi?

1⁶ Abacaice abakushiwa nge Nte sha kwa Yehova bafwile ukuibebeta ku kumona ngo buKristu bwabo bulekoselako pa kuba ifibusa fya kwa Lesa. Te kuti bashintilile fye pa citetekelo ca bafyashi babo. Ukukuma ku mubomfi umo umo uwa kwa Lesa, Paulo alembele ati: “Ni kuli shikulu wakwe wine eminina atemwa ukuwa.” Kabili Paulo alundapo ati: “Ifwe bonse umo umo pa lwesu tukalubulula kuli Lesa.” (Abena Roma 14:4, 12) Kanshi, ukulaya fye ku kupepa pantu abafyashi benu balaya ku kupepa te kuti cikoshe bucibusa bwenu na Yehova pa nshita ntali.

¹⁷ Ukutula fye ku kale, inte sha kwa Yehova shalitwalilila ukubako. Shatendekele pa mwaume wa busumino Abele—imyaka mupepi na 6,000 iyapitapo—ukufika na kwi “bumba likalamba” ilya Nte sha pali nomba ukulundapo na bakapepa ba kwa Yehova abengi nga nshi abakekala umuyayaya. (Ukusokolola 7:9; AbaHebere 11:4) Ifwe twaba pali bakapepa ba kwa Yehova aba busumino aba ku lutwe fye. Mwandini twaisapyana amapaalo ya ku mupashi ayakalamba nga nshi!

18. Bushe ifyo twacindamika e lyo ne fipimo fyesu fyatupaatulako shani ku calo?

¹⁸ Mu Bwina Kristu bwesu mulesansha ifyo twacindamika, imibele yesu, ifipimo, ne fitulenga twishibikwe ukuti tuli Bena Kristu. Yaba e “Nshila,” e kutila imikalile fye yeka iyafikapo kabili iitemuna Lesa. (Imilimo 9:2; Abena Efese 4:22-24) Mwe Bena Kristu “shininkisheni ifintu fyonse” kabili “ikatisheni icawama”! (1 Abena Tesalonika 5:21) Twalyumfwikisha bwino ubupusano bwaba pa Bena Kristu e lyo ne calo icataluka kuli Lesa. Yehova alitulondolwela bwino bwino ubupusano bwaba pa kupepa kwa cine no kwa bufi. Ukupitila muli kasesema wakwe Malaki, atile: “Mukabwela no kumona apalekene umulungami no mubifi, apalekene uubombela Lesa no ushimubombela.”—Malaki 3:18.

19. Cinshi Abena Kristu ba cine bashakatale abaleka ukucita?

¹⁹ Apo ukucankilwa muli Yehova kwalicindama nga nshi muli cino calo calulunkana, cinshi cingatwafwa ukutwalilila ukusekelela muli Lesa wesu na mu Bwina Kristu bwesu? Fimo fimo ifingatwafwa fili mu cipande cikonkelepo. Ilyo mukalabebeta ifi, shininkisheni ulwa ici: Abena Kristu ba cine tabakatale abaleka ukwangwa ku kupepa kwabo.

[Futunoti]

Ukubakilila Ubukristu Bwesu

“Imwe muli nte shandi, cisemo ca kwa Yehova.”—ESAYA 43:10.

1. Bantu ba musango nshi Yehova akulila kuli wena?

ILYO muli pa Ng’anda ya Bufumu, lolekesheni abali mupepi na imwe. Ni bani mulemona pali ci cifulo ca kupepelapo? Pafwile pali abaice abalekutikisha nga nshi ku mano ya mu Baibolo. (Amalumbo 148:12, 13) Kabili pali ne mitwe ya ndupwa abaleesha sana ukutemuna Lesa te mulandu no kwikala mu calo icasaalula ulupwa. Nelyo pambi kuti mwamona abakoloci besu, abaleikala umwabela ukuipeela kwabo kuli Yehova te mulandu na macushi ya mu bukote. (Amapinda 16:31) Bonse balitemwa Yehova nga nshi. Kabili Yehova na o alibakulila kuli wena. Umwana wa kwa Lesa atile: “Takuli uwingesa kuli ine kano Tata uwantumine, amukula.”—Yohane 6:37, 44, 65.

2, 3. Mulandu nshi ukubakilila ubuKristu bwesu kwingabela ukwayafya?

² Bushe tatusekelela ukuba pa bantu abo Yehova acankilwamo no kupaala? Lelo ukubakilila ubuKristu bwesu muli shino “nshita shaibela ishayafya” bwafya ubwine bwine. (2 Timote 3:1) Ukucilisha ici cikosela sana abacaice abalekulila mu ndupwa sha Bwina Kristu. Uwacaice wa musango yo umo asumine ukuti: “Nangu ca kuti nalesangwa ku kulongana kwa Bwina Kristu, ukuba kwena nshaishibe nga nali no kutwalilila, pantu ukufwaisha kwa kubombela Yehova kwena tamwali.”

³ Bamo, ukuba kwena kuti balafwaisha ukubombela Yehova, lelo balapumbulwa ku banabo, ku fya mu calo, nelyo ku maka ya lubembu. Ilyo twatitikishiwa nga nshi, kuti twalekelesha ubuKristu bwesu. Ku ca kumwenako, abengi mu calo pali lelo bamona ifipimo fya mu Baibolo ifya mibele isuma ukuti fya kale nelyo batila tafibomba pali ndakai. (1 Petro 4:4) Bamo batila tacacindama ukubombela Lesa ukulingana ne fyo afwaya. (Yohane 4:24) Muli kalata Paulo alembeele abena Efese, alanda ukuti icalo calikwata “umupashi,” wa ciko atemwa imibele catemwisha. (Abena Efese 2:2) Uyo mupashi ulapatikisha abantu ukunakila ku kutontonkanya kwa bantu abashaishiba Yehova.

4. Yesu akomailepo shani pa kukabila kwa kubakilila ubuKristu bwesu?

⁴ Lelo, fwe babomfi ba kwa Yehova abaipeela, twalishibo kuti kuti cabipa sana ku bali bonse pali ifwe—abanono atemwa abakalamba—ukulekelesha ubuKristu bwesu. UbuKristu bwesu bwashimpwa pa fipimo fya kwa Yehova epela na cintu afwaya ifwe ukucita. Na kabushe, twalengelwe mu cipasho cakwe. (Ukutendeka 1:26; Mika 6:8) Baibolo ipashanya ubuKristu bwesu ku fya kufwala, ifya kuti umuntu nga nafwala bonse balefimona. Ulwa ino nshita, Yesu asokele ati: “Moneni! ndeisa ngo mupuupu. Wa nsansa uulelola no kubaka imingila yakwe, ukuti eenda ubwamba na bantu bemona insoni shakwe.”a (Ukusokolola 16:15) Te kuti tufwaye ukufumyapo imibele yesu iya Bwina Kristu ne fipimo fya myendele isuma no kuleka icalo ca kwa Satana ukututwala umo cilefwaya. Nge ci cacitika, tukaba nga bafuulilwe “imingila.” Ico cintu kuti cabipa nga nshi no kuleto museebanya ukalamba.

5, 6. Mulandu nshi ukushikatala kwa ku mupashi kwacindamina?

⁵ Ukucankilwa mu Bwina Kristu bwesu kulatulenga sana ukumona ifyo imikalile yesu ifwile ukuba. Mulandu nshi? Kapepa wa kwa Yehova nga alekelesha ubuKristu bwakwe, kuti aba fye cimbi cimbi, uwabula no buyo. Libili libili Baibolo itweba ukutaluka ku kuba aba mitima ibili aba musango yo. Umusambi Yakobo asokele ukuti: “Uutwishika aba nge bimbi lya muli bemba ilisendwa ku mwela no kusensenunwa. Na kuba, ulya muntu etila akapokelela icintu kuli Yehova; muntu wa mitima ibili, uushashangila mu mibele yakwe yonse.”—Yakobo 1:6-8; Abena Efese 4:14; AbaHebere 13:9.

⁶ Kuti twabakilila shani ubuKristu bwesu? Cinshi cingatwafwa ukuba abaibukila ulwa mapaalo yesu ayakalamba pa kuba bakapepa ba Wapulamo? Mukwai moneni inshila shakonkapo.

Mwilatwishika UbuKristu Bwenu Nangu Panono

7. Mulandu nshi cawamina ukupaapaata Yehova ukutulengula?

⁷ Mulekosha bucibusa bwenu na Yehova. Icipe caumo mutengo ico Umwina Kristu akwata ni bucibusa bwakwe na Lesa. (Amalumbo 25:14; Amapinda 3:32) Nga twatampa ukutwishika ubuKristu bwesu, tufwile ukubebeta sana ifili bucibusa bwesu na Yehova. Kemba wa malumbo mano mano apaapeete ukuti: “Nenguleni, mwe Yehova, no kunjesha; lenguleni imfyo shandi no mutima wandi.” (Amalumbo 26:2) Mulandu nshi ukulengula kwa musango yo kwacindamina? Pantu fwe bene te kuti tuibebete no kwishiba ifyo tufwaisha no kwalemenena umutima wesu. Yehova eka e waba na maka ya kumfwikisha umuntu wesu uwa mu kati—ifyo tufwaisha, amatontonkanyo yesu, ne nkuntu.—Yeremia 17:9, 10.

8. (a) Ukweshiwa na Yehova kuti kwatunonsha shani? (b) Ngo Mwina Kristu mwayafwiwa shani ukulunduluka?

8 Nga twaeba Yehova ukutulengula, ninshi tulemweba ati atweshe. Kuti pambi asuminisha fimo ukucitika ifingasokolola icine cine ifyo tufwaisha ne fyaba umutima wesu. (AbaHebere 4:12, 13; Yakobo 1:22-25) Tufwile ukupokelela ukwesha kwa musango yo pantu kulatupeela ishuko lya kulanga apafika bucishinka bwesu kuli Yehova. Ukwesha kwa musango yo kuti kwasokolola nga ca kuti tuli “abafikapo kabili abatuntulu muli fyonse, abashabulwa kantu.” (Yakobo 1:2-4) Na pa kucite fyo, bumupashi bwesu kuti bwakulilako.—Abena Efese 4:22-24.

9. Mulandu nshi cacindamina ukuti tuishininkishishe fwe bene ukuti ifisambilisha Baibolo fya cine?

⁹ Ishininkishisheni mwe bene icine ca mu Baibolo. Ukwishiba twaishiba ukuti tuli babomfi ba kwa Yehova te kuti kutwafwe nga takushimpilwe sana pa kwishiba Amalembo. (Abena Filipi 1:9, 10) Umwina Kristu onse—umunono no mukalamba—afwile ukuishininkishisha ukuti ico asuminamo ukwabulo kutwishika e cine icisangwa mu Baibolo. Paulo acincishe abasumina banankwe ati: “Shininkisheni ifintu fyonse; ikatisheni icawama.” (1 Abena Tesalonika 5:21) Abacaice Abena Kristu abafuma mu ndupwa ishitiina Lesa bafwile ukwishibo kuti te kuti bekalile fye mu citetekelo ca bafyashi babo. Davidi akoseleshe umwana wakwe wine Solomone ati, “ishiba Lesa wa kwa wiso, no kumubombela no mutima wa cishinka.” (1 Imilandu 28:9) Solomone wacaice tali no kupelela fye ku kukumbwa icitetekelo ca kwa wishi muli Yehova. Alekabila ukuishibila Yehova umwine, kabili e fyo acitile. Apaapeete Lesa ati: “Mpeeleni amano no kwishiba, no kuleka ndefuma no kwingila ku cinso ca aba bantu.”—2 Imilandu 1:10.

10. Mulandu nshi cishabipila ukwipusha amepusho ayasuma aya kufwaya ukwishiba fimo?

¹⁰ Ukwishiba e kulenga kube icitetekelo cakosa. Paulo atile: “Icitetekelo cifuma ku caumfwika.” (Abena Roma 10:17) Bushe aloseshe mwi? Aloseshe mu kuti pa kubelenga Icebo ca kwa Lesa, tulakosha icitetekelo cesu muli Yehova, amalayo yakwe, no kuteyanya kwakwe. Ukwipusha amepusho yasuma pa filanda Baibolo kuti kwalenga twayumfwikisha bwino bwino. E lyo kabili, pa Abena Roma 12:2, tusangapo ukupanda mano kwa kwa Paulo ukutila: “Mushininkishe mwe bene icabo kufwaya kwa kwa Lesa icisuma kabili icapokelelwa kabili icapwililika.” Bushe kuti twacita shani ifyo? Ukupitila mu “kwishiba bwino bwino icine.” (Tito 1:1) Umupashi wa kwa Yehova kuti watwafwa ukumfwikisha fye na malyashi ayakosa. (1 Abena Korinti 2:11, 12) Tufwile ukupepela ukwafwa kwa kwa Lesa nga tulefilwa ukumfwikisha fimo fimo. (Amalumbo 119:10, 11, 27) Yehova afwaya ukuti tumfwikishe Icebo cakwe, ukucisumina, no kucumfwila. Alatemwa ilyo tuleipusha amepusho ayasuma aya kufwaya ukwishiba.

Pampamineni pa Kutemuna Lesa

11. (a) Kufwaisha nshi ukwa cifyalilwa ukwingatwingisha mu bwafya? (b) Kuti twasanga shani ubukose pa kuti tucimfye amatunko ya banensu?

¹¹ Fwayeni ukutemuna Lesa, te kutemuna bantu iyo. Kwena ca cifyalilwa fye ukufwaya ukuikuminisha kwi bumba limo ilya bantu. Bonse tulakabila ifibusa, kabili ilyo twapokelelwa kuli bambi tulomfwa bwino sana. Mu nshita ya bwaice e lyo na mu bukalamba mwine, abanensu kuti batutitikisha sana, ukutulenga ukufwaya ukubapashanya atemwa ukubatemuna. Lelo ifibusa fyesu te lyonse fifwaya ukuti ifintu fituwamine. Limo limo bafwaya fye ukuba na bamo ilyo balecita icalubana. (Amapinda 1:11-19) Umwina Kristu nga anakilako ku fibusa fyalubana, ninshi alefisa ubuKristu bwakwe. (Amalumbo 26:4) Umutumwa Paulo asokele ukuti: ‘Mwilapashanya imisango ya ba pano nse.’ (Abena Roma 12:2, Diocese of Mbala Bible) Yehova alatupeela ubukose ubo tukabila pa kulwisha amatunko ya banensu aya kuti tube nga bene.—AbaHebere 13:6.

12. Cishinte nshi kabili ca kumwenako nshi cingatukosha ukubakilila bucibusa bwesu na Lesa?

1² Ilyo abantu bambi batupatikisha ukucita icalubana, tufwile ukwibukisho kuti bucishinka bwesu kuli Lesa bwalicilapo kucindama pa fyo icinabwingi baletontonkanya. Pa Ukufuma 23:2 paba icishinte icisuma icitucingilila. Patila: “Wilakonka cinabwingi ku fibi.” Ilyo icinabwingi ca bena Israele banankwe batwishike amaka ya kwa Yehova aya kufikilisha amalayo Yakwe, Kalebu mu kushangila akeene ukukonke cinabwingi. Alishininkishe ukuti amalayo ya kwa Lesa kuti yacetekelwa, kabili alipaalilwe apakalamba pa kushangila kwakwe. (Impendwa 13:30; Yoshua 14:6-11) Bushe na imwe ukupala Kalebu muli abaitemenwa ukukaana ifilefwaya icinabwingi pa kubakilila bucibusa bwenu na Lesa?

13. Mulandu nshi cawamina ukuleka bambi beshibe ukuti tuli Bena Kristu?

¹³ Lekeni cishibikwe ukuti muli Bena Kristu. Pa kubakilila ubuKristu bwesu tufwile ukuitendekelako. Mu nshiku sha kwa Esra ilyo abena Israele ba busumino balebakaanya ukucito kufwaya kwa kwa Yehova, batile: “Ifwe tuli babomfi ba kwa Lesa wa mu muulu na pa nshi.” (Esra 5:11) Nga twaumfwila ukulengulula kwa balwani besu, kuti twatompoka ku mwenso. Lyonse nga tuleesha ukutemuna abantu, tukafilwa ukubomba bwino. E ico mwilatiina. Lyonse mufwile ukuishibisha kuli bambi ukuti muli Nte ya kwa Yehova. Mu mucinshi lelo kabili mu kushangila, kuti mwalondolwela bambi ifyo mwacindamika, ifyo mwasuminamo, ne fyo mwingacita nga Bena Kristu. Lekeni bambi beshibe ukuti mwalipingulapo ukumfwila amafunde ya kwa Yehova ayatukaanya ukucita icabipa. Londololeni bwino bwino ukuti ubuKristu bwenu tabuteluka. Lekeni bambi bamone ukuti mulacankilwa mu fipimo fyenu ifya mibele isuma. (Amalumbo 64:10) Ukuba Umwina Kristu umwine mwine kuti kwamukosha, ukumucingilila, no kulenga fye bambi ukufwaya ukwishibilapo na fimbi pali Yehova na pa bantu bakwe.

14. Bushe ukupumya atemwa ukukaanya fifwile ukutufuupula? Londololeni.

¹⁴ Ca cine, bamo kuti bamupumya nelyo ukumukaanya. (Yuda 18) Bambi nga bakaana ukwankulako ku fyo mulebeba, mwifuupulwa. (Esekiele 3:7, 8) Te mulandu ne fyo mwingapimpa, te kuti mushinine abantu abashilefwaya ukushininwa. Ibukisheni ifyo cali kuli Farao. Ifinkunka, ifipesha mano pamo pene ne mfwa ya mwana wakwe ibeli fyonse fyalifililwe ukunashanasha Farao ukusumina ukuti Mose alelandilako Yehova. E ico, mwileka ukututumo muntu kumutompole. Ukutetekela no kushintilila pali Lesa kuti kwatwafwa ukucimfya umwenso.—Amapinda 3:5, 6; 29:25.

Sambilileniko ku fya ku Numa pa Kuti ku Ntanshi Cikamuwamine

15, 16. (a) Ubupyani bwesu ubwa ku mupashi e cinshi? (b) Kuti twanonkelamo shani mu kwetetula pa bupyani bwesu ubwa ku mupashi ukupitila mu kubomfya Icebo ca kwa Lesa?

¹⁵ Sakamaneni bwino ubupyani bwenu ubwa ku mupashi. Pa kubomfya Icebo ca kwa Lesa, Abena Kristu balamwenamo pa kwetetula pa bupyani bwabo ubwa ku mupashi ubwaumo mutengo. Muli ubu bupyani mwaba icine ca mu Cebo ca kwa Yehova, isubilo lya bumi bwa muyayaya, no mucinshi uwa kwimininako Lesa nga bakabila ba mbila nsuma. Bushe imwe mulaipendelamo mwi bumba lya Nte, ilyapeelwa umulimo wa kupususho bumi pa kushimikila pa Bufumu? Muleibukisho kuti Yehove e usosa ati: “Imwe muli nte shandi.”—Esaya 43:10.

¹⁶ Kuti mwayipusha mwe bene amepusho pamo nga ya: ‘Bushe ubu bupyani bwa ku mupashi bwacindama shani kuli ine? Bushe nalibucindamika ica kunenga ukutangishako ukufwaya kwa kwa Lesa mu bumi bwandi? Bushe ifyo mona ubu bupyani kuti fyankosha ukukaana amatunko ayenganenga ukupusumuna bwene?’ Ubupyani bwesu ubwa ku mupashi kuti bwatulenga ukuba sana no mutende wa ku mupashi uusangwa fye mu kuteyanya kwa kwa Yehova. (Amalumbo 91:1, 2) Ukubebeta ifyacitika fimo fimo mu kuteyanya kwa kwa Yehova ukwa muno nshiku kuti kwatulenga ukumfwikisha ukuti takuli icili conse icingonaula abantu ba kwa Yehova ukubafumya pano isonde.—Esaya 54:17; Yeremia 1:19.

17. Cinshi cimbi icifwaikwa pa mbali ya kushintilila pa bupyani bwesu ubwa ku mupashi?

1⁷ Kwena, te kuti tushintilile fye pa bupyani bwesu ubwa ku mupashi epela. Ifwe bonse umo umo tufwile ukulundulula bucibusa bwapalamisha na Lesa. Pa numa ya kubombesha sana ukukosha icitetekelo ca Bena Kristu ba ku Filipi, Paulo abalembele ati: “E ico, mwe batemwikwa bandi, ifyo mwaba ne cumfwila lyonse, te pa kubapo kwandi epela, lelo ukucilako nomba pa kukanabapo kwandi, mulebombela ipusukilo lyenu no mwenso no kututuma.” (Abena Filipi 2:12) Tufwile ukubombela ipusukilo lyesu fwe bene ukucila ukweba umbi ukutubombelako.

18. Ukobelwa ne fya ku mupashi kuti kwatulenga shani ukucankilwa mu buKristu bwesu?

¹⁸ Obelweni ne fya ku mupashi. Casoswo kuti “umulimo ulalenga umuntu ukuishiba bwino.” Abena Kristu pali lelo balitumwa ukubomba umulimo wa kubile mbila nsuma iya Bufumu bwa kwa Lesa ubwaimikwa. Paulo atile: “Apo ine ndi, na kabushe, umutumwa wa bena fyalo, nacindika bukapyunga bwandi.” (Abena Roma 11:13) Umulimo wesu uwa kushimikila ulatulenga ukupusanako ne calo, kabili ilyo tulebomba uyu mulimo ubuKristu bwesu bulafikapo bwino bwino. Ukobelwa sana mu fya ku mupashi fimbi, pamo ngo kulongana kwa Bwina Kristu, umulimo wa makuule ya fifulo fya kupepelamo, ukubombesha kwa kwafwa ababulishe, na fimbipo, kuti kwatulenga ukucankilwa mu buKristu bwesu.—Abena Galatia 6:9, 10; AbaHebere 10:23, 24.

Ukucankilwa mu BuKristu Bwesu Kuleta Amapaalo Yakalamba

19, 20. (a) Mapaalo nshi imwe mwaipakisha pa lwenu pa kuba Umwina Kristu? (b) Cinshi citulenga ukucankilwa mu buKristu bwesu?

¹⁹ Kutumaneni panono no kutontonkanya pa mapaalo ubwingi tuipakisha pa kuba Abena Kristu ba cine. Twaliba ne shuko lya kwishibikwa kuli Yehova umwine. Kasesema Malaki atile: “Abali na katiina kuli Yehova balesoshanya; na o Yehova alepeepeka, no kuumfwa, ne buuku lya kwibukisha lyalembelwe ku cinso cakwe, ilya babela Yehova akatiina, ilya batontonkanye shina lyakwe.” (Malaki 3:16) Ipaalo limbi lya kutila Lesa kuti aba cibusa wesu. (Yakobo 2:23) Imikalile yesu ilomfwika bwino pa mulandu wa kuti twalishiba ico twabelapo kabili twalikwata umulimo ushaiwamina. Kabili twalipeelwa ne subilo lya kwikala umuyayaya.—Amalumbo 37:9.

²⁰ Muleibukisha ukuti uupima ifyo mwaba icine cine ne fyo mwacindama ni Lesa, te fyo abantu bambi bengatontonkanya iyo. Bambi bena kuti batulingila fye ku fipimo fya buntunse ifyapelebela. Lelo ukutemwa kwa kwa Lesa no kufwaisha kwakwe ukwa kutubomfya fitulenga ukusekelela pa kuba abantu bakwe. (Mateo 10:29-31) Kabili, ukutemwa uko twatemwa Lesa kuti kwatulenga ukucankilwa mu buKristu bwesu na mu buyo bwesu. “Ngo muntu atemwa Lesa, uyu e waishibikwa kuli wene.”—1 Abena Korinti 8:3.

[Futunoti]