Moneni ifyo icitabo ca kuti On the Road to Civilization—A World History cilanda pa Bena Kristu ba ntanshi aciti: “Abena Kristu balikene ukubombako imilimo imo iyo abekashi ba mu Roma balebomba. Abena Kristu . . . balemona ukwingila mu bushilika ukuti kwali kukaane citetekelo cabo. Tabalesumina kukwate cifulo mu fya mapolitiki. Baalekana ukupepa kateka.”

9. (a) Mulandu nshi Abena Kristu bali mu Yerusalemu bafulumukile mu 66 C.E.? (b) Bushe cilya bacitile caba shani cipasho cawamisha ica kukonka?

⁹ Ukukuma ku fikansa fya pa mapolitiki no kukangana mu fya nkondo, abasambi tabaitumpilemo nangu fye panono. Mu 66 C.E., abaYuda abali mu Yudea baimiine Kaisare. Umulalo wa bena Roma mu kwangufyanya washingile Yerusalemu. Cinshi Abena Kristu bali mu musumba bacitile? Baibukishe ukufunda kwa kwa Yesu ukwa kufulumuka ukufuma mu musumba. Ilyo abena Roma bafumine mu musumba pa nshita inono fye, Abena Kristu bafulumukile bushilya bwa Mumana wa Yordani ku mpili sha Pella. (Luka 21:20-24) Ukukanaitumpamo kwabo kwaba cipasho Abena Kristu ba busumino abakonkelepo bapashanya.