Kwena, ca cine, ukufyalwa kwa kwa Yesu kwalicindeme, lelo abasambi bakwe aba kubalilapo bacindamike sana imilimo Yesu abombele ne fyo alesambilisha. Cine cine Lesa tatala afwaya ukuti ukufyalwa kwa kwa Kristu kube ukwacindama ukucila ubumi bwakwe ngo muntu mukalamba. Nomba icacitika ca kuti Krisimasi no kusefya ukwa kubomfya ifikope ne fipasho fya baliko ilyo Yesu afyelwe fyalilumbuka sana ukucila ifyo Yesu umwine aali mu bukalamba.

Icipapusha na cimbi pa lwa Krisimasi, ni nshila basefyeshamo. Nga Yesu alishile pe sonde lelo, cinshi engatontonkanya pa bukwebo ubucitwa nga kwaba Krisimasi? Imyaka 2,000 iyapita, Yesu atandalile itempele mu Yerusalemu. Bakakabula ba ndalama na baleshitisha balimukalifye pantu bamwene ukusefya kwa mipepele ya baYuda nge nshila ya kunonkelamo icuma. Abebele ati: “Tufumyeni muno! Mwicita ng’anda ya kwa Tata ing’anda ya makwebo!” (Yohane 2:13-16) Kanshi twamona bwino bwino ukuti Yesu tasuminishe ukuti mu mipepele muleba na makwebo.

Umwana Nafyalilwa Kuli Ifwe

Nga ca kuti imisefeshe ya Krisimasi tayayampana na Kristu, bushe Abena Kristu bafwile ukulaibukisha shani ukufyalwa kwa kwa Kristu ne mikalile yakwe? Mupepi ne myaka 700 ilyo Yesu talafyalwa, Esaya aseseme pa lwa kwa Yesu ukuti: “Umwana nafyalilwa kuli ifwe, umwana mwaume napeelwa kuli ifwe; bukateka bukaba pa kubeya kwakwe.” (Esaya 9:6) Cinshi Esaya alandile ukuti ukufyalwa kwa kwa Yesu ne milimo ali no kabomba ku ntanshi e fyacindeme? Umulandu alandile ifyo wa kuti Yesu akaba kateka wa maka. Aketwa Cilolo wa Mutende, kabili takwakabe mpela ku mutende nelyo ku kuteka kwakwe. Umulandu umbi wa kuti ukuteka kwa kwa Yesu kukatungililwa no ‘bupingushi e lyo no bulungami.’—Esaya 9:7.

Malaika Gabriele alandile amashiwi yaba mu kusesema kwa kwa Esaya ilyo aebele Maria ukuti Yesu ali no kufyalwa. Atile: “Uyu akaba umukalamba kabili aketwa Umwana wa Wapulamo; kabili Yehova Lesa akamupeele cipuna ca bufumu ica kwa Davidi wishi, kabili akabe mfumu pe na pe pa ng’anda ya kwa Yakobo, no bufumu bwakwe tabwakabe ne mpela.” (Luka 1:32, 33) Kanshi twamona bwino bwino ico ukufyalwa kwa Yesu kwacindamina. Ni pa mulandu wa milimo iyo akabomba nga Kateka wasontwa uwa Bufumu bwa kwa Lesa. Bonse kuti twanonkelamo mu kuteka kwa kwa Kristu, ukusanshako na imwe na batemwikwa benu. Na kuba bamalaika balandile ukuti ukufyalwa kwa kwa Yesu kukaleta ‘umutende pe sonde mu bantu abo [Lesa] abekelwamo.’—Luka 2:14.

Ifwe bonse tulafwaya ukwikala mu calo umwaba mutende no bulungi. Lelo nga tulefwaya ukuipakisha umutende uukaba mu kuteka kwa kwa Kristu, tulekabila ukutemuna Lesa no kuba na bucibusa busuma na wene. Yesu atile ica kubalilapo ico tufwile ukucita pa kuba na bucibusa na Lesa kusambilila pali Lesa na Kristu. Atile: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.”—Yohane 17:3.

Nga twaishiba Yesu bwino bwino kuti twatemwa no kwishibe nshila ya kumwibukishishamo. Bushe kuti twalamwibukishisha ku kulya, ukunwa no kupeeleshanya ifya bupe pa bushiku bumo bwine ubo na ba pa kale balesefyeshapo umutebeto wa cisenshi? Ico cilepusana ne fyo Yesu alandile. Icungulo ilyo talafwa, Yesu aebele abasambi bakwe ifyo alefwaya balecita. Atile: “Uwakwata amafunde yandi no kuyabaka, wene e wantemwa. Kabili uwantemwa, Tata akamutemwa, na ine nkamutemwa no kuilanga apabuuta kuli wene.”—Yohane 14:21.