Neil umuWayuu uwikala mu Manaure afyelwe no bulwele ubushipola. Alepeela Lesa umulandu ukuti e walenga ukulwala kwakwe, ne ci calengele ukuti aleba fye uwasakamikwa ica kuti alefwaya fye no kuipaya. Bushiku bumo Nte umo uwalebomba incito mu matauni ayapusanapusana aile kwi tauni uko Neil aleikala, kabili alandile nankwe pa Bufumu bwa kwa Yehova ilyo aleshimikila abantu ku ng’anda ne ng’anda. Pali ilya nshita Neil ali fye ne myaka 14. Ilyo Nte amwene ukuti Neil nabikako amano, atendeke ukusambilila Baibolo nankwe. Neil alitemenwe nga nshi ukwishiba ukuti Yehova ni Lesa wa kutemwa, kabili te walenga ukuti alecula. Ilyo abelengele pa bulayo bwa kwa Lesa ubwa kuti isonde likaba Paradise umushakabe ukulwala, alitemenwe icibi!—Esaya 33:24; Mateo 6:9, 10.

Pali ilya nshita balupwa lwa kwa Neil balipusene no lupwa lumbi. Nomba pa kuti baicingilile, bacitilepo fimo ukukonka ulutambi lwabo. Neil ashimika icacitike, atila: “Pa kubala naleumfwa umwenso ukulanda kuli balupwa lwandi pa fintu nalesambilila, maka maka ku bakalamba ba mu lupwa lwesu abo bacindike sana.” Abafyashi ba kwa Neil balikalipe nga nshi ilyo baishibe ukuti Neil tali na kukonka intambi ishishalingene ne fyo amalembo yalanda nelyo isha kucindika imipashi. Ici calengele Neil ukukuukila ku Ríohacha kabili atendeke ukulalongana ne cilonganino cali kulya. Mu kuya kwa nshita alibatishiwe, kabili mu 1993 alisontelwe ukuba umubomfi atumikila. Pa numa ya myaka itatu atendeke bupainiya bwa nshita yonse. Mu 1997 Neil alisontelwe ukuba eluda mu cilonganino, kabili mu 2000 alisontelwe ukuba painiya wa ibela.

Natulande na pali baTeresa abaWayuu abatendeke ukusambilila Baibolo ne Nte sha kwa Yehova. BaDaniel abaume abo baleikala nabo kabili abo bakweteko abana batatu, balebapumya no kubacusha kabili balecushisha kumo na bana. Nangu cingati pa numa baDaniel balisumine ukulasambilila Baibolo pamo na baTeresa, ilingi line baleya mu kunwa na banabo. Kabili limo limo baleikala uko kwine inshiku shine nelyo shisano. Balesha fye ulupwa lwabo lulecula. Nangu cali fyo, baTeresa tabalekele ukusambilila Baibolo, kabili balesangwa ku kulongana lyonse. Ici calengele baDaniele beluke ukuti ukusambilila Baibolo kwalicindama. Ku ca bulanda, bushiku bumo umwana wabo umo alipile sana ilyo amenshi ayalebilauka mwi ketulo yamwitikile kabili alifwile. Lintu baTeresa balelosha umwana wabo, ifibusa fyabo na bena mupalamano balebapatikisha ukukonka intambi sha pa cililo ishishalingene ne fyo Baibolo ilanda.

Pa nshita baTeresa na baDaniel balelosha, aba mu filonganino fyaba mupepi no ko bekala balebakoselesha no kubasansamusha. Pa numa ya cililo, aba mu cilonganino ca ciWayuunaiki balitwalilile ukulabasansamusha. Ilyo baDaniel bamwene ifyo aba mu filonganino balangile icitemwiko kuli bena, balitwalilile ukusambilila no kulakosha bucibusa bwabo na Lesa. Balekele ukunwa no kucusha baTeresa, kabili pa numa balyupene. BaDaniel batendeke ukubombesha pa kuti balesunga bwino ulupwa lwabo. Balitwalilile ukusambilila no kukosha bucibusa bwabo na Lesa kabili mu 2003 balibatishiwe. Nomba bonse babili balatungulula amasambililo ya Baibolo ayengi. Ino nshita balupwa lwa baTeresa balakutika ku mbila nsuma iyo Inte sha kwa Yehova shishimikila, ne calenga ni co baTeresa baleshimikila kuli bena. Umwipwa wa baDaniel umulumendo ni bakasabankanya uushilabatishiwa, e lyo abakashana babili nabo balesambilila Baibolo kabili balasangwa na mu kulongana. E lyo Bamulamu wa baTeresa abanakashi abo umwana mwaume afwile mu busanso nabo balitendeka ukusambilila Baibolo pamo no lupwa lwabo.

Ibala Ililelunduluka

Lwa ku kabanga, ku kapinda ka ku kuso aka Ríohacha kwaba itauni lya Uribia apaba makilomita 100. Mu cilonganino ca Uribia Wayuu mwaba bakasabankanya ba Bufumu 16, abengi pali aba balebombesha ukushimikila ku bekala muli ilya mishi. Eluda umo muli ici cilonganino alandile pa nyendo benda ukuya mu kushimikila kuli isho ncende ukutila: “Twashimikile mu mushi umwaba amayanda mupepi na 12 ayakwata imitenge iipi no tumawindo utunono. Ku ntanshi ya ng’anda ili lyonse kulaba umutenge uwabatama uyo bapangila kuli cactus, iyo beta ukuti yotojolo uucingilila ulupwa na batandashi ku kasuba. Twalitemenwe ukumona ukuti abengi balefwaisha ukusambilila, e co twalibwelelako no kuyatendeka amasambililo ya Baibolo. Ilyo twabweleleko twasangile ukuti abengi tabaishibe ukubelenga. Batwebele ukuti kwaliko isukulu ilyo bashapwile ukukuula pantu tabakwete indalama. Uwaleangalila ubukuule bwa ili sukulu alitusuminishe ukulabomfyako ikalasi limo ukusambilishishamo abaWayuu ukubelenga no kulemba e lyo no kulatungulwilamo amasambililo ya Baibolo. AbaWayuu 6 balisambilila ukulemba no kubelenga kabili balelunduluka mu kusambilila Baibolo. Tulatemwa nga nshi ukumona ifyo abantu abengi bafwaisha ukusambilila Icebo ca kwa Lesa, kanshi tulefwaya ukuti tukalelonganina muli ulya wine mushi.”