Tetekeleni Yehova “Lesa wa Cisansamushi Conse”

“Acindikwe Lesa kabili Wishi wa kwa Shikulwifwe Yesu Kristu, Shifwe wa nkumbu kabili Lesa wa cisansamushi conse.”—2 KOR. 1:3.

1. Cinshi fwe bantu bonse tukabila te mulandu no mushinku?

UKUTULA fye pa kufyalwa, fwe bantu tulakabila icisansamushi. Umwana alalila nga ali ne nsala nelyo nga alefwaya ukumwimya. Nangu fye ni lintu twakula, ilingi line tulakabila aba kutusansamusha. Ne nshita tufwaya sana ukutusansamusha, ni lilya tuba na mafya.

2. Mashiwi nshi ayo Yehova alanda ayalanga ukuti akasansamusha abamutetekela?

² Ilingi line, abatusansamusha ni balupwa ne fibusa. Nomba, limo limo ifilenga tube no bulanda fintu ifyo abantu bashingafumyapo. Lelo Lesa e wingatusansamusha fye nangu ubwafya bukule shani. Icebo cakwe citila: “Yehova aba mupepi na bonse abalilila kuli ena, . . . akomfwa ne nkuuta yabo.” (Amalu. 145:18, 19) Ca cine, “amenso ya kwa Yehova yalola pa balungama, na matwi yakwe yomfwa inkuuta yabo.” (Amalu. 34:15) Nomba pa kuti Lesa atwafwe no kutusansamusha, tufwile ukumutetekela. Davidi alilondolwele bwino ifyo tulingile ukucita ilyo aimbile ati: “Yehova akaba icubo kuli onse uwacushiwa, icubo mu nshita sha mafya. Kabili abaishiba ishina lyenu bakamutetekela, pantu tamwakatale amusha abamufwaya, mwe Yehova.”—Amalu. 9:9, 10.

3. Bushe Yesu alondolwele shani ukutemwa uko Yehova atemwa abantu bakwe?

³ Yehova amona abamupepa ukuti balicindama sana. Yesu alilondolwele ici cishinka ilyo atile: “Bushe inseba shisano tabashita mu tundalama tubili utunono sana? Na lyo line Lesa talabapo nangu lumo. Lelo ne mishishi ya ku mitwe yenu yalipendwa yonse. Mwilatiina; mwalicindama ukucila inseba ishingi.” (Luka 12:6, 7) Na kabili, Yehova abomfeshe kasesema Yeremia ukweba abena Israele ukuti: “Nalikutemwa ukutemwa kwa muyayaya. E mulandu wine nakupalamikila ukubomfya icikuuku.”—Yer. 31:3.

4. Mulandu nshi tulingile ukutetekela mu malayo ya kwa Yehova?

⁴ Ukutetekela Yehova na mu malayo yakwe kuti kwatusansamusha ilyo tuli na mafya. Kanshi tufwile ukutetekela Lesa nga filya Yoshua amutetekele. Atile: “Tapali amashiwi nangu yamo pa mashiwi yonse ayasuma ayo Yehova amwebele ayashacitika. Fyonse fyalicitika. Tapali nangu cimo icishacitika.” (Yosh. 23:14) Na kabili, kuti twacetekela ukuti “Lesa wa cishinka” kabili takalekeleshe ababomfi bakwe aba cishinka ilyo bale-eshiwa nga nshi.—Belengeni 1 Abena Korinti 10:13.

5. Mulandu nshi fwe bantu twingasansamushishako bambi?

⁵ Umutumwa Paulo aitile Yehova ukuti “Lesa wa cisansamushi conse.” “Ukusansamusha” kulanda amashiwi ya kukoselesha ku muntu uuli na macushi nelyo ubulanda. Ifi fine e fyo Yehova acita. (Belengeni 2 Abena Korinti 1:3, 4.) Takwaba nangu cimo ico Shifwe wa ku muulu engafilwa ukufumyapo kabili te kuti afilwe ukusansamusha umuntu uuli onse. Kanshi Yehova kuti acita conse pa kusansamusha abamutemwa. E mulandu wine na ifwe tusansamushisha Abena Kristu banensu “abali na macushi yalekanalekana.” Kuti twabasansamushisha “ku cisansamushi ico Lesa atusansamushishako.” Aya mashiwi yalalondolola bwino ifyo Yehova akwatisha amaka ya kusansamusha abalecula!

Ukushipikisha Ifilenga Amacushi

6. Landeni pa fintu fimo ifileta amacushi.

⁶ Kwaba ifintu ifyalekanalekana ifilenga tulekabila icisansamushi. Icintu icituletela sana ubulanda ni mfwa ya muntu wesu, maka maka iya mwina mwesu nelyo umwana. Limo kuti twakabila ukusansamushiwa pa mulandu wa musobolola nelyo ulupato. Ukulwalilila, ubukote, ubupiina, amafya ya mu cupo, nelyo ifyabipa ificitika mu calo kuti fyalenga umuntu ukufwaya uwa kumusansamusha.

7. (a) Kusansamusha kwa musango nshi kufwaikwa mu nshita sha macushi? (b) Finshi Yehova engacita pa kusansamusha umutima “wa bulanda kabili uwasakamikwa”?

⁷ Mu nshita sha macushi kuti twakabila icisansamushi ica kutunashako umutima, ukutubweshako amatontonkanyo, inkuntu, kabili tulakabila icisansamushi ilyo tulwele na lintu tule-eshiwa. Ku ca kumwenako, tontonkanyeni pa mutima. Icebo ca kwa Lesa na co cilanda ukuti umutima kuti waba no ‘bulanda kabili kuti wasakamikwa.’ (Amalu. 51:17) Yehova kuti atusansamusha nga tuli no mutima wa bulanda kabili uwasakamikwa pantu “[alondapa] aba nkumbabulili, no kubakakila pa filonda fyabo.” (Amalu. 147:3) Na lintu tuli na macushi, Lesa kuti asansamusha umutima wesu nga twapepa kuli ena, twamutetekela, no kukonka amafunde yakwe.—Belengeni 1 Yohane 3:19-22; 5:14, 15.

8. Bushe Yehova kuti atwafwa shani nga tuli na malangulushi?

⁸ Amatontonkanyo yesu yalakabila icisansamushi pantu amesho kuti yalenga twaba na malangulushi. Ku maka yesu fwe bene, nalimo te kuti tushipikishe amesho ya musango yu. Lelo uwaimbile amalumbo atile: “Ilyo amatontonkanyo ya kusakamika yafulile muli ine, e lyo ifya kusansamusha fyenu fyantalalike umutima.” (Amalu. 94:19) Na kabili Paulo alembele ukuti: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Fil. 4:6, 7) Ukubelenga Amalembo no kulatontonkanyapo sana kuti kwatwafwa ukupwisha amalangulushi.—2 Tim. 3:15-17.

9. Cinshi cingatwafwa nga tulemona kwati te kuti tucite ifyo Yehova atwenekela ukucita?

⁹ Limo limo kuti twafuupuka ica kuti twalamona kwati tatwalinga ukubomba imilimo imo. Inkuntu sha musango yu kuti shalenga tulemona kwati te kuti tucite ifyo Yehova atwenekela ukucita nelyo ukuti te kuti tubombe imilimo imo iya mu cilonganino. Na lintu tuleumfwa ifi, Yehova kuti atwafwa no kutusansamusha. Lekeni tulangilile: Ilyo Yoshua bamupeele umulimo wa kutungulula abena Israele mu kulwisha inko ishali na maka, Mose aebele abena Israele ati: “Shipeni kabili koseni. Mwitiina nelyo ukufwa umutombo ku cinso cabo, pantu Yehova Lesa wenu e uleya pamo na imwe. Takamushe nelyo ukumulekelesha.” (Amala. 31:6) Apo Yehova alemwafwa, Yoshua alitungulwile abantu ba kwa Lesa mu Calo ca Bulayo kabili balicimfishe abalwani babo bonse. Mu kubangilila, Yehova alyafwile Mose pali Bemba wa Kashika.—Ukufu 14:13, 14, 29-31.

10. Amacushi nga yalenga tulelwala, finshi fingatwafwa?

¹⁰ Amacushi kuti yakuma sana ubumi bwesu ica kuti limbi no kulwala twalalwala. Ca cine ukuti ifya kulya ifisuma, ukulaala ama-awala ayalinga no kulatukusha umubili, no kuba no busaka kuti fyalenga twaba no bumi ubusuma. Ukubika amano ku Cebo ca kwa Lesa na ko kuti kwalenga twaba no bumi ubusuma. Kanshi nga tuli na malangulushi kuti cawama ukutontonkanya pa fyo Paulo apitilemo na pa mashiwi ya kukoselesha ayo asosele, ayatila: “Monse monse balatutitikisha, lelo tabatufyenenkesha ica kuti twafilwa na pa kusunkanina; tulapeshiwa amano, lelo te kupeshiwa amano ica kuti twafilwa no mwa kulosha; balatucusha, lelo tatulekeleshiwa; nangu batupoosa pa nshi, tatonaika.”—2 Kor. 4:8, 9.

11. Bushe kuti twacita shani pa kuti tatubwelele inuma mu kupepa?

¹¹ Amesho yamo kuti yalenga icitetekelo cesu ukunaka. Na kabili Yehova kuti atwafwa. Icebo cakwe citila: “Yehova atungilila bonse abalewa, kabili enuna bonse abakontama.” (Amalu. 145:14) Pa kuti twibwelela inuma mu kupepa, tufwile ukuya kuli baeluda pa kuti batwafwe. (Yako. 5:14, 15) Na kabili ukutontonkanya lyonse pe subilo lya mu Baibolo ilya kuba no mweo wa muyayaya kuti kwalenga twashipikisha ilyo tule-eshiwa.—Yoh. 17:3.

Abantu Abo Lesa Asansamwishe

12. Londololeni ifyo Yehova asansamwishe Abrahamu.

¹² Uwaleimba amalumbo umo atile: “Ibukisheni icebo mwasosele ku mubomfi wenu, ico [mwe Yehova] mwanenga ukulolela. Ici e cinsansamusha mu kucula kwandi, pantu icebo cenu cinenga ukuba uwa mweo.” (Amalu. 119:49, 50) Muno nshiku twalikwata Icebo ca kwa Yehova umwaba ifya kumwenako ifingi ifya bantu abo Yehova asansamwishe. Ku ca kumwenako, Abrahamu afwile alisakamikwe ilyo aumfwile ukuti Yehova ali no kunaula Sodomu na Gomora. Uyu mwaume wa citetekelo aipwishe Lesa ukuti: “Bushe cine cine umulungami na o mukamonawila kumo no mubifi?” Yehova alisansamwishe Abrahamu ilyo amwebele ukuti nga mwasangwa abalungami 50, taonaule Sodomu. Lelo, Abrahamu aipwishe Yehova imiku na imbi isano ukuti: Inga muli fye abalungami 45? 40? 30? 20? 10? Imiku yonse iyo Abrahamu aipwishe, Yehova alimutekanishishe kabili cikuuku cikuuku amwaswike ukuti taonaule Sodomu. Nangu cingati mu misumba tamwali abantu abalungami nelyo fye ni 10, Yehova alipuswishe Lote na bana bakwe abanakashi.—Ukute. 18:22-32; 19:15, 16, 26.

13. Bushe Hana alangile shani ukuti alitetekele Yehova?

¹³ Hana, umukashi wa kwa Elkana, alefwaya sana ukukwata umwana. Lelo ali ni ng’umba, kabili ici calemusakamika sana. Alipepele kuli Yehova pali ubu bwafya, kabili Shimapepo Mukalamba Eli amwebele ukuti: “Lesa wa kwa Israele akupeele ico wamulomba.” Aya mashiwi yalisansamwishe Hana, kabili “icinso cakwe tacamoneke ica bulanda na kabili.” (1 Sam. 1:8, 17, 18) Hana alitetekele Yehova ica kuti ashile ifintu fyonse mu maboko yakwe. Nangu ca kuti taishibe ifyo ifintu fyali no kuba, Hana alilekele ukusakamikwa. Mu kuya kwa nshita, Yehova alyaswike ipepo lyakwe. Hana alimiite, afyala no mwana umwaume uo ainike ati Samwele.—1 Sam. 1:20.

14. Mulandu nshi Davidi alekabila icisansamushi, kabili ni nani alombele ukuti amusansamushe?

¹⁴ Imfumu Davidi iya mu Israele na yo bali-isansamwishe kuli Lesa. Apo Yehova “amona mu mutima” wa muntu, ilyo asalile Davidi ukuba imfumu ya bena Israele, alishibe ukuti Davidi ali muntu umufumacumi kabili ali-ipeeleshe mu kupepa. (1 Sam. 16:7; 2 Sam. 5:10) Lelo, pa numa Davidi alicitile ubucende na Bati-sheba kabili alyeseshe ukufisa ulubembu ilyo aipeye umulume wakwe. Lintu Davidi ailwike ifyo ulubembu acitile lwakulile, apepele kuli Yehova ukuti: “Ukulingana ne nkumbu shenu ishingi fumyenipo ububi ubo ncitile. Nsambeni bwino bwino ku bupulumushi bwandi, kabili nsangululeni na ku lubembu lwandi. Pantu nalishiba ububi bwandi, kabili ulubembu lwandi luli pa ntanshi yandi inshita yonse.” (Amalu. 51:1-3) Davidi alilapiile no mweo onse, kabili Yehova alimubelele uluse. Lelo, Davidi ali no kucula ku fyali no kufuma mu lubembu acitile. (2 Sam. 12:9-12) Nangu cibe fyo, uluse lwa kwa Yehova lwalisansamwishe ulya mubomfi wakwe uwaicefya.

15. Bushe Yehova ayafwile shani Yesu ilyo kwashele fye inshita iinono ukuti bamwipaye?

¹⁵ Ilyo Yesu ali pano calo, alipitile mu fya kwesha ifingi. Lesa alisuminishe ukuti eshiwe muli uyu musango, kabili Yesu alitwalilile ukuba umuntu wapwililika uwa kaele, alitetekele Yehova, kabili aletungilila ukuteka Kwakwe. Ilyo kwashele inshita iinono ukuti bamufutuke no kumwipaya, Yesu apepele kuli Yehova ukuti: “Ukufwaya kwenu e ko kucitwe, te kwandi iyo.” Lyena malaika amoneke kuli ena no kumukosha. (Luka 22:42, 43) Lesa alipeele Yesu ifyo alekabila pali ilya nshita. Alimusansamwishe, ukumukosha, no kumwafwa.

16. Bushe Lesa kuti atwafwa shani nga balefwaya ukutwipaya pa mulandu wa citetekelo cesu?

¹⁶ Na ifwe nga batupingwila ukufwa pa mulandu wa citetekelo cesu, Yehova akatwafwa ukutwalilila ukuba aba kaele kuli ena. Na kabili, tulasansamushiwa kwi subilo lya kubuuka. Kabili tulalolela inshita ilyo umulwani wa kulekelesha, imfwa, ‘akonaulwa’! (1 Kor. 15:26) Ababomfi ba kwa Yehova aba cishinka abafwa, ukubikako na bambi, Yehova alabebukisha kabili akababuusha. (Yoh. 5:28, 29; Imil. 24:15) Ukucetekela ubulayo bwa kwa Yehova ubwa kubuusha abafwa kulatusansamusha kabili kulalenga twaba ne subilo lyakosa ilyo baletucusha.

17. Bushe Yehova atusansamusha shani ilyo twafwilwa?

¹⁷ Ala tulasansamushiwa ukwishiba ukuti abantu besu abafwa balikwata isubilo lya kubuuka no kuba no mweo mu calo cipya umushakabe amacushi yonse ayabako pali ino nshita! Kabili cikawama nga nshi ukuba mwi “bumba likalamba” ilya babomfi ba kwa Yehova abakapusuka impela ya cino calo cabipa ilyo bakalasengela abakabuuka no kubasambilisha amafunde ya kwa Lesa!—Ukus. 7:9, 10.

Mwi Samba Mwaba Amaboko ya kwa Lesa aya Muyayaya

18, 19. Bushe ababomfi ba kwa Lesa basansamushiwa shani ilyo balebacusha?

¹⁸ Mu lwimbo ulusuma nga nshi kabili ulwa kukoselesha, Mose akoseleshe abena Israele ukuti: “Umwa kufisama mobe ni muli Lesa wa kale, na mwi samba lyobe muli amaboko ya muyayaya.” (Amala. 33:27) Pa numa kasesema Samwele aebele abena Israele ukuti: “Mwileka ukukonka Yehova kabili mufwile ukubombela Yehova ne mitima yenu yonse. . . . Yehova takaleke abantu bakwe pa mulandu we shina lyakwe ilikulu.” (1 Sam. 12:20-22) Nga twalambatila kuli Yehova no kutwalillila ukuba mu kupepa kwa cine, takatulekeleshe. Akatwalilila ukutwafwa ilyo twaba na macushi.

¹⁹ Muli shino nshita sha-afya Lesa alitwalilila ukwafwa no kusansamusha ababomfi bakwe. Pa myaka iingi nga nshi, Abena Kristu banensu mu calo conse balabacusha no kubapoosa mu cifungo pa mulandu fye wa kubombela Yehova. Ifyo bapitamo filanga ukuti cine cine Yehova alasansamusha ababomfi bakwe ilyo bale-eshiwa. Ku ca kumwenako, munyinefwe umo mu fyalo fyali kale Soviet Union balimukakile imyaka 23 pa mulandu wa kuba Umwina Kristu. Na lyo line, balisangileko inshila ya kumupeelelamo ifya kulya fya ku mupashi pa kuti fingamukosha no kumusansamusha. Uyu munyinefwe atile: “Muli ilya myaka, nalisambilile ukutetekela Yehova kabili alinkoseleshe.”—Belengeni 1 Petro 5:6, 7.

20. Mulandu nshi twingashininkishisha ukuti Yehova takatulekeleshe?

²⁰ Te mulandu na mesho tuli no kupitamo ku ntanshi, tufwile ukulaibukisha amashiwi ya cisansamushi aya kwa kemba wa malumbo ayatila: “Yehova takalekeleshe abantu bakwe.” (Amalu. 94:14) Nangu cingati tulakabila aba kutusansamusha, na ifwe bene twalikwata ishuko ilikalamba ilya kusansamushako bambi. Mu cipande cikonkelepo tukasambilila ukuti na ifwe bene kuti twasansamushako abaleloosha ilyo tuleikala muli cino calo cabipa.

‘Sansamusheni Bonse Abaloosha’

“Yehova alinsuba . . . ku kusansamusha bonse abaloosha.”—ESA. 61:1, 2.

1. Finshi Yesu acitiile abaleloosha, kabili mulandu nshi?

YESU KRISTU atile: “Ica kulya candi kucita ukufwaya kwa wantumine no kupwisha umulimo wakwe.” (Yoh. 4:34) Ilyo Yesu alebomba umulimo Lesa amupeele, alepashanya imibele iisuma iya kwa Wishi. Pa mibele alepashanya, pali ne fyo Yehova atemwa nga nshi abantu. (1 Yoh. 4:7-10) Umutumwa Paulo alimwene inshila imo iyo Lesa alangilamo ukutemwa ilyo alondolwele Yehova ukuti “Lesa wa cisansamushi conse.” (2 Kor. 1:3) Yesu alilangile ukutemwa kwa musango yu ilyo afikilishe ifyasobelwe mu kusesema kwa kwa Esaya. (Belengeni Esaya 61:1, 2.) Ilyo Yesu ali mwi sunagoge ilya mu Nasarete, abelengele muli uku kusesema no kutila aya mashiwi yalefikilishiwa muli ena. (Luka 4:16-21) Ilyo Yesu alebomba umulimo wakwe, alesansamusha abaleloosha, alebakoselesha no kupwisha amasakamika yabo.

2, 3. Mulandu nshi abasambi ba kwa Kristu balingile ukulasansamushisha bambi nga filya na o alecita?

² Abasambi ba kwa Yesu bonse bafwile ukulasansamusha abaleloosha nge fyo ena alecita. (1 Kor. 11:1) Paulo atile: “Mulesansamushanya no kukuulana.” (1 Tes. 5:11) Apo tuleikala mu “nshita ishayafya nga nshi,” tufwile ukulasansamusha sana abanensu. (2 Tim. 3:1) Abafumacumi abengi nga nshi mu calo fye conse balabakalifya ku bantu abasosa amashiwi no kucita ifintu ifileta amacushi no kulenga ubulanda.

³ Nge fyo Baibolo yasobeele, muli shino nshiku sha kulekelesha isha cino calo cabipa, abantu abengi baba “abaitemwa, abatemwa indalama, aba mataki, aba matutumuko, aba miponto, abashumfwila abafyashi babo, abashitasha, abashaba na cishinka, abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, abafutuka abanabo, bamunshebwa, aba cilumba, abatemwa ukwangala ukucila ukutemwa Lesa.” Iyi mibele ileya ilebipilako fye pantu ‘ababifi kabili incenjeshi balebipilako.’—2 Tim. 3:2-4, 13.

4. Bushe ifintu fili shani mu calo pali ino nshita?

⁴ Ifi fyonse tafilingile ukutupapusha pantu Icebo ca kwa Lesa calilondolola bwino bwino ukuti “icalo conse calaala mu maka ya mubifi.” (1 Yoh. 5:19) Amashiwi ya kuti “icalo conse” yasanshamo bapolitishani, aba mipepele, na bamakwebo, ukubikako fye ne fyo babomfya pa kukuubanya amalyashi ya bufi. Ukwabula no kutwishika, Satana Kaseebanya alilinga ukumwita ati “kateka wa ici calo” na “lesa wa bwikashi buno.” (Yoh. 14:30; 2 Kor. 4:4) Ifintu mu calo filaya filebipilako pantu Satana ali ne cipyu icikalamba ico alishiba ukuti kushele fye inshita inono iya kuti Yehova amonaule. (Ukus. 12:12) Tulasansamuka nga nshi ukwishiba ukuti Lesa takaleke Satana ne calo cakwe icabipa ukutwalilila ukubako! Nomba line, ali no kumonaula kabili umulandu Satana aimishe uwakuma ukuteka kwa kwa Yehova ukapwa!—Ukute., icipa. 3; Yobo, icipa. 2.

Imbila Nsuma Ilebilwa mwi Sonde Lyonse

5. Bushe ukusesema kulanda pa kushimikila imbila nsuma kulefikilishiwa shani muli shino nshiku sha kulekelesha?

⁵ Ifyo Yesu asobeele filefikilishiwa muli shino nshiku. Atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mat. 24:14) Uyu mulimo uwakuma Ubufumu bwa kwa Lesa uo Inte sha kwa Yehova shibomba mwi sonde lyonse uleshimikilwa mu fyalo ifingi nga nshi. Muno nshiku, Inte sha kwa Yehova ukucila pali 7,500,000 ababa mu filonganino ukucila pali 107,000 mu calo conse baleshimikila pa Bufumu bwa kwa Lesa ubo Yesu alelandapo sana ilyo aleshimikila. (Mat. 4:17) Umulimo wesu uwa kushimikila walenga ukuti abaloosha abengi balesansamushiwa. E mulandu wine mu myaka fye ibili iyapita, abantu 570,601 balibatishiwe no kuba Inte sha kwa Yehova!

6. Finshi twingalandapo pa mulimo wesu uwa kushimikila imbila nsuma?

⁶ Umulimo uukalamba uwa kushimikila uo Inte sha kwa Yehova babomba umonekela mu bwingi bwa ndimi sha mpapulo bapilibula no kusabankanya ishacila pali 500. Ica musango yu tacabala acicitika ukutula fye ku kale! Ukuteyanya kwa kwa Yehova ukwa pe sonde kulekulilako, no mulimo babomba na o uleya pa ntanshi. Apo twikala mu calo ca kwa Satana, uyu mulimo te kuti ubombwe ukwabula umupashi wa mushilo uwa kwa Lesa. Pa mulandu wa kushimikila imbila nsuma mwi sonde lyonse, Icebo ca kwa Lesa cilasansamusha abasumina banensu ukubikako fye na bantu bambi abaloosha abapokelela imbila nsuma.

Ukusansamusha Bakapepa Banensu

7. (a) Mulandu nshi tushingenekela Yehova ukufumyapo amacushi yonse pali ino nshita?(b) Twaishiba shani ukutila na ifwe bene kuti twashipikisha ukutucusha na mafya?

⁷ Apo muli ici calo mwaba ifyabipa na macushi ayengi, na ifwe bene twakulakwata amafya. Te kuti twenekele Lesa ukufumyapo fyonse ifilenga twaba no bulanda mpaka akonaule icalo cabipa. Pali ino nshita, pa mulandu wa kutucusha ukwasobelwe, cilafya sana kuli fwe batungilila bumulopwe bwa kwa Yehova ukuba aba kaele. (2 Tim. 3:12) Apo Shifwe wa ku muulu alatwafwa no kutusansamusha, kuti twashipikisha nga filya fyacitile Abena Kristu basubwa aba mu Tesalonika abali ne citetekelo kabili abashipikishe mu fyo balebacusha na mu mafya.—Belengeni 2 Abena Tesalonika 1:3-5.

8. Bushininkisho nshi ubwa mu Malembo ubulanga ukuti Yehova alasansamusha ababomfi bakwe?

⁸ Te kuti tutwishike ukuti Yehova alasansamusha ababomfi bakwe ilyo bali na mafya. Ku ca kumwenako, ilyo kasesema Eliya balefwaya ukumwipaya kuli Namfumu Yesebele, Eliya alitiinine no kufulumuka, alandile no kuti cawama fye no kufwa. Lelo mu nshita ya kuti Yehova akalipile Eliya, alimusansamwishe no kumukosha pa kuti atwalilile ukubomba umulimo wakwe uwa bukasesema. (1 Isha. 19:1-21) Na cimbi icilanga ukuti Yehova alasansamusha abantu bakwe ni fintu ayafwile Abena Kristu mu nshita ya batumwa. Ku ca kumwenako, tubelenga ukuti kwali inshita imo ilyo “abasumina bonse mu Yudea na mu Galili na mu Samaria baikele mu mutende, balekoshiwa.” Kabili “batwalilile ukuba na katiina kuli Yehova no kusansamushiwa no mupashi wa mushilo, balefulilako.” (Imil. 9:31) Ala tulatasha nga nshi ukuti na ifwe bene ‘tulasansamushiwa no mupashi wa mushilo’!

9. Bushe ukusambilila pali Yesu kuti kwatusansamusha shani?

⁹ Fwe Bena Kristu tulasansamushiwa ilyo tusambilila pali Yesu na lintu tulemupashanya. Yesu atile: “Iseni kuli ine imwe bonse mwe balecula kabili abafininwa, na ine nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya, e lyo mwalasanga ukutuusha. Pantu ikoli lyandi talyafina, ne cipe candi calyanguka.” (Mat. 11:28-30) Ukusambilila pa fyo Yesu alesansamusha abantu no kulamupashanya, kuti kwalenga amafya ukucepako.

10, 11. Ni bani bengasansamushako bambi mu cilonganino?

¹⁰ Na Bena Kristu banensu nabo kuti batusansamusha. Ku ca kumwenako, tontonkanyeni pa fyo baeluda mu filonganino bafwa abali na mafya. Umusambi Yakobo atile: “Bushe umo pali imwe nalwala [lwa ku mupashi]? Ete abakalamba ba cilonganino, kabili bamupepeleko.” Finshi fingafumamo? “Umulwele akapola pantu abamupepelako bali ne citetekelo, na Yehova akamwimya. Kabili, nga alicita imembu, imembu shakwe shikelelwa.” (Yako. 5:14, 15) Na bambi aba mu cilonganino kuti bamusansamusha.

¹¹ Ilingi line abanakashi cilabangukila ukwebako abanakashi banabo amafya bakwata. Bankanshi abakalamba bafwile ukulapandako amano bankashi abacaice. Nalimo fimo ificitikila bankashi abacaice fyalicitikilepo bankashi abakalamba. Icililishi cabo no kwishiba ifyo abanakashi baba kuti kwa-afwa abacaice ukuba ne mibele isuma. (Belengeni Tito 2:3-5.) Lelo baeluda e balingile ‘ukusansamusha abali no bulanda’ mu cilonganino. (1 Tes. 5:14, 15) Kabili cisuma ukwishiba ukuti Lesa ‘alatusansamusha mu macushi yesu yonse, pa kuti tube na maka ya kusansamusha abali na macushi yalekanalekana.’—2 Kor. 1:4.

12. Mulandu nshi cacindamina ukusangwa mu kulongana?

¹² Inshila isuma sana iyo tusansamushiwilwamo kusangwa ku kulongana uko amalyashi ya mu Baibolo aya kutukosha yalandwa. Baibolo itila Yuda na Sila “balandile amashiwi ayengi aya kukoselesha aba bwananyina no kubakosha.” (Imil. 15:32) Ilyo ukulongana takulatendeka na pa numa ya kulongana, tulakoseleshanya naba bwananyina mu cilonganino. Kanshi nangu tulecula pa mulandu wa mafya yamo, tatufwile ukuitalusha kuli bamunyinefwe pantu ukuitalusha kuli bamunyinefwe te kwingapwisha amafya. (Amapi. 18:1) Kanshi tufwile ukukonka ukufunda kwa mutumwa Paulo ukutila: “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.”—Heb. 10:24, 25.

Icebo ca kwa Lesa Cilatusansamusha

13, 14. Landeni ifyo Amalembo yengamusansamusha.

¹³ Nampo nga twalibatishiwa nangu e lyo tulesambilila pali Lesa na pa kufwaya kwakwe, Icebo ca kwa Lesa kuti catusansamusha. Paulo alembele ukuti: “Fyonse ifyalembelwe kale fyalembelwe ku kutufunda, pa kuti mu kushipikisha kwesu na mu cisansamushi ca mu Malembo tube ne subilo.” (Rom. 15:4) Icebo ca kwa Lesa kuti catusansamusha no kutulenga ukuba ‘abafikapo bwino bwino, abaipangasha icine cine ukubomba umulimo onse uusuma.’ (2 Tim. 3:16, 17) Ukwishiba icine pa bufwayo bwa kwa Lesa no kukwata isubilo lya cine cine ilya ku ntanshi, kuti kwalenga twasansamushiwa nga nshi. Kanshi natulebelenga sana Baibolo ne mpapulo shilanda pali Baibolo ishingatusansamusha no kutwafwa mu nshila shalekanalekana.

¹⁴ Tufwile ukupashanya Yesu uwalebomfya Amalembo pa kusambilisha no kusansamusha bambi. Ku ca kumwenako, pa numa ya kubuuka, bushiku bumo amoneke ku basambi bakwe babili no ‘kubalondolwela Amalembo.’ Ilyo alelanda nabo, alibafikile pa mitima. (Luka 24:32) Umutumwa Paulo alepashanya Yesu ilyo ‘alelanshanya na bantu Amalembo.’ Ilyo alelanshanya na bena Berea, “imitima yabo yafwaishe nga nshi ukupokelela amashiwi ya kwa Lesa. Balefwailisha mu Malembo cila bushiku.” (Imil. 17:2, 10, 11) Kanshi cisuma ukulabelenga Baibolo cila bushiku ne mpapulo shilanda pali Baibolo pantu shilatunonsha, shilatusansamusha no kutupeela isubilo muli shino nshita shayafya.

Inshila na Shimbi Isho Tusansamushishamo Bambi

15, 16. Fintu nshi fimo ifyo twingacita ku kwafwa no kusansamusha Abena Kristu banensu?

¹⁵ Kuti twa-afwa no kusansamusha Abena Kristu banensu mu nshila shalekanalekana. Ku ca kumwenako, kuti twayafwako abakoloci nelyo abalwele ukushita utwa kubomfya pa ng’anda. Kuti twa-afwako bambi utu milimo, ukulanga ukuti twalibabikako amano. (Fil. 2:4) Kuti twatasha bamunyinefwe pa mibele yabo iisuma pamo nga ukutemwa, ukushipa, icitetekelo e lyo ne fyo bacenjela.

¹⁶ Pa kuti tulesansamushako abakoloci, kuti tulebatandalila no kulakutika sana nga baletwebako ifyo bapitamo e lyo na mapaalo basanga mu kubombela Yehova. Ukucita ifyo kuti kwatukoselesha no kutusansamusha! Nalimo kuti twabelengela pamo Baibolo ne mpapulo shilanda pali Baibolo ilyo twatandalila bambi. Limbi kuti twapekanishisha pamo icipande tulesambilila uyo mulungu mu Ulupungu lwa kwa Kalinda nelyo ukupekanishisha pamo ifyo tukasambilila pe Sambililo lya Baibolo ilya pa Cilonganino. Kuti twatamba nabo DVD ili yonse ilanda pa fya mu Baibolo. E lyo kuti twabashimikilako ifyo twabelengele mu mpapulo shesu ifya tukoseshe nelyo ukubelengela pamo na bena.

17, 18. Mulandu nshi fwe babomfi ba kwa Yehova aba cishinka twingashininkishisha ukuti Yehova akulatwafwa no kutusansamusha?

¹⁷ Nga natwishibako bamunyinefwe abalekabila icisansamushi kuti twabapepelako ilyo tuli fweka. (Rom. 15:30; Kol. 4:12) Ilyo tuleshipikisha amafya no kulaesha ukusansamusha bambi, tulingile ukukwata icitetekelo ne subilo nga filya fyakwete kemba wa malumbo uwatile: “Poosa icisendo cobe pali Yehova, na o akakukosha. Takaleke uwalungama ukutelententa.” (Amalu. 55:22) Ukwabula no kutwishika, lyonse Yehova akulasansamusha no kwafwa fwe babomfi bakwe aba cishinka.

¹⁸ Lesa aebele ababomfi bakwe aba ku kale ukuti: “Ine, nine ndesansamusha imwe mwe bantu.” (Esa. 51:12) Na ifwe Yehova akulatwafwa kabili akulatupaala ilyo tulesansamusha abaleloosha. Nampo nga twakwata isubilo lya kuya ku muulu nelyo ilya kwikala pe isonde, bonse kuti twasansamushiwa ku mashiwi ayo umutumwa Paulo alembeele Abena Kristu banankwe abasubwa, ayatila: “Shikulwifwe Yesu Kristu umwine na Lesa Shifwe, uwatutemenwe no kutupeela icisansamushi ca muyayaya ne subilo ilisuma mu cikuuku ca kwa Lesa, basansamushe imitima yenu no kumukosha mu mulimo onse uusuma na mashiwi yonse ayasuma.”—2 Tes. 2:16, 17.