Beni Ica Kumwenako ca Milimo Isuma

1. Mulandu nshi tufwile ukupooselako sana amano ku myendele yesu pe bungano lya citungu?

¹ Ilyo twalongana pa mabungano ya citungu, ifyo tucita ne fyo tusunga bambi filamoneka sana ku batumona. E ico, ifwe bonse, tulekabila ukupoosako sana mano ku fyo Baibolo itukonkomesha ukuti: “[Mube] na mano ayatuntulu, muli fyonse [mube] ica kumwenako ca milimo isuma.” (Tito 2:6, 7) Napamo tufwile ukubombesha pa kuti ‘twiba abangwa fye ifyesu fwe bene, lelo abangwa ne fya bambi.’ (Fil. 2:4) Natulande pa fintu fimo umo twingakonka uku kukoselesha pe Bungano lileisa ilya Citungu ilileti “Peeleni Lesa Ubukata.”

2. Bushe cinshi tufwile ukwibukisha pa kucita amakwebo pa cifulo ce bungano?

² Ukucita Amakwebo: Bamo pa kumona ukuti bambi te kuti bashite kamera, bacita amakwebo ya kukopa ifikope pa mabungano na konse ukubungene abantu ba kwa Yehova. Tacabipa ukukopwa pali aya mabungano yaibela. Na lyo line, abengi abakopa balasangamo icibwesha, e co, makwebo bacita. Pa kuti ica musango uyu tacibifishe ukuyemba kwa ku mupashi ukwa kubishanya kwa Bwina Kristu, twilomba abalecita amakwebo ati batukopeko. E fyo cingaba na ku makwebo yambi. Ico tubunganina pamo kupepa Yehova epela, ukulya pe tebulo lyakwe ilya ku mupashi no kuipakisha ukukoseleshanya.—Rom. 1:11, 12.

3, 4. Bushe kuti ‘twabomba shani icisuma kuli bonse’ pa cifulo ce bungano?

³ Ukwangwa twangwa abantu bambi kufwile ukumonekela mu kusunga bwino icifulo cesu ica kulonganinapo. Uyu mwaka wapwile cali bwino sana ukumona uko indupwa shilesunga umuyano no busaka. Abakalamba abengi na bana babombele umulimo wabo uwa kutoola ifisooso, ukupoosa ifipepala, amaplastiki no bufungau bwa fya kulya, mu ng’ungulu na mu fishala fyapekanishiwe. Ca cine ukuti icalo kuti casuminisha ifiko lelo ukupoosa amano ku busaka kulayemfya ififulo fyesu ifya kupepelapo, kulapuulamika ukulongana kwesu kabili cishibilo ca kuti twalipalama kuli Lesa wa mushilo, Yehova.—Lebi 19:2; 2 Kor. 7:1.

⁴ Bushe mwalimona ifyo ifimbusu fya cintubwingi fimoneka ifya busali kabili ifyaonaulwa pa mulandu wa mulekelesha nelyo fye ubonaushi? Ukusha ifimbusu ifya busaka pa numa ya kubomfya cilangililo ca kuti “tubombe icisuma kuli bonse.” (Gal. 6:10) Ifunde lya kwa Lesa kuli Israele pa kupoosa ubusali lyali ilyaumfwika bwino kabili ilya-anguka ukukonka. Pa kupooso busali icacindeme, kuba apacingeme, ukwishiba ukuti ni we wine ufwile ukuwamya no kupoosela ubusali ku cifulo calinga. (Amala. 23:12, 13) Lilye funde lya ku kale licili lilabomba na lelo kabili abantu abengi balaipakisha ubumi ubutuntulu pa mulandu wa kukonka ifishinte fya liko. Bucishinka ku fipimo fya kwa Yehova lyonse buleta amapaalo kabili bulatupaatula kuli ici calo.—Amala. 28:9, 10.

5, 6. Bushe abana kuti balumbanya shani Yehova kabili mulimo nshi abafyashi bakwata?

⁵ Abafyashi na Bana: Mu calo mwaba abacaice abengi abatumpa, lelo abana besu bena bali-ibela kabili ukube fi kuletela Yehova ilumbo no kuteyanya kwakwe. Nangu cibe fyo, limo limo, amafya yalemako nga ca kuti abana tabalesopwa bwino. (Amapi. 29:15) Abafyashi tabafwile ukulekelesha abana babo pa cifulo ce bungano ukwabula ukubasopa.

⁶ Abafyashi bamo basanga ukuti icibomba bwino, kupituluka na bana babo pa misango abana bafwile ukuba na yo pa ntanshi ye bungano. (Efes. 6:4) Balafwilisha abana babo ukwishiba ukuti ukutemwa kwine kwine ukwa Bena Kristu “takucita icishiyene” kabili “takuifwaila ifya kuko.” (1 Kor. 13:5) Ukulongana kwa citungu ni nshita yaibela iyabikwa pa mbali ku kusambilishiwa na Yehova, kabili abana pamo na bakalamba kuti balanga umucinshi wa uku kupekanya ku myendele yabo pa cifulo ce bungano na lintu bali kumbi.—Esa. 54:13.

7. Cinshi cingafuma mu myendele yesu iisuma?

⁷ Imyendele yesu isuma kuti yatulandilako bwino no kulenga bantu ukufwaya ukwisa ku kupepa kwa cine. (Mat. 5:16; 1 Pet. 2:12) Shi bonse abo tukakumanya pe bungano lya citungu nabakashimikilwe bwino ukupitila mu nshila tucitilamo ifintu ne fyo tusunga abantu bambi. Nga twacite fyo tukaba “ica kumwenako ca milimo isuma” kabili tukacindika Yehova.—Tito 2:7.

[Akabokoshi pe bula 4]

Langulukileniko Bambi

▪ Mwilacita bukwebo

▪ Sungeni icifulo ca kulonganinapo ne fimbusu ubusaka

▪ Sopeni bwino abana benu

Ukufwala Ukuyene Kulanga Akatiina Kuli Lesa

1. Kuti twacita shani pa kutasha pa kulongana kuleisa ukwa citungu?

¹ Nomba line fye tukakaba ne shuko lya kuba abeni ba kwa Yehova pe Bungano lya Citungu ilileti “Peeleni Lesa Ubukata” ilya 2003. Tuletasha Yehova pa kutulaalika ku mutebeto wa ku mupashi ngo yu! Kuti twalanga akatiina kuli wene no kumutasha pa kupekanya ifya ku mupashi, mu mifwalile ne misakwile yesu.—Amalu. 116:12, 17.

2. Mulandu nshi cacindamina kuli ifwe ukubela no busaka kabili abapempenkana?

² Aba Busaka Kabili Aba muyano: Imimonekele yesu ifwile ukulanga ififwaya Lesa wesu uwa busaka kabili uwa muyano. (1 Kor. 14:33; 2 Kor. 7:1) Fwe bene, umushishi, ne ngala, fifwile ukumoneka bwino, kabili tufwile ukuba abapempenkana. Ubusanku mu mimonekele nabuseeka shino nshiku. Lelo pa mulandu fye wa kuti abalumbuka mu mafilimu nelyo mu mangalo balemoneka aba busanku uyu tauli mulandu wa kumonekala no busanku. Nga tulekonkelela amafashoni fye yonse, abantu kuti bafilwa ukumona ubupusano pa babombela Lesa wa cine na bashimubombela.—Mal. 3:18.

3. Bushe kuti twashininkisha shani ukuti imimonekele yesu ileumfwana no kufunda kusangwa pali 1 Timote 2:9, 10?

³ Ukufwala Kuyene Abatumikishi ba Bwina Kristu: Ilyo umutumwa Paulo alembeele kangalila wa Bwina Kristu Timote, akoseleshe abanakashi ati: “Abanakashi ukufwala bafwale ukuyene, pamo no bufuuke na mano ayatuntulu, . . . mu nshila iyayana abanakashi abatila tutiina Lesa, ukupitila mu milimo isuma.” (1 Tim. 2:9, 10) Pa kuti ukufwala kuyane, icikabilwa kutontonkanya bwino sana. Ifya kufwala fifwile ukuba ifyapempenkana, ifya busaka, kabili ifya bufuuke—te fya mataki nelyo ifibimbula insuna.—1 Pet. 3:3.

4, 5. Kusoka nshi Abena Kristu abaume na banakashi bafwile ukumfwila?

⁴ Paulo asokele pa kukanacishamo mu “[kuipuulamikila] imishishi iyalukwa, na golde nangu ni bamargariti nelyo ica kufwala ca mutengo sana.” (1 Tim. 2:9) Ukukanacishamo mu kubomfya ifibekobeko, ifya kusubasuba, ne fintu fimbi ifya kuipuulamikilako, e nshila ya mano ku banakashi ba Bwina Kristu ukukonka.—Amapi. 11:2.

⁵ Ifishinte fyaba mu kufunda kwa kwa Paulo uko alungatike ku Bena Kristu abanakashi filabomba na ku Bena Kristu abaume. Bamunyina tabafwile ukupala aba ku calo mu fyo bamoneka. (1 Yoh. 2:16) Ku ca kumwenako, mu fyalo fimo, ifimatoloshi ifikulu icine cine ifya kuti