Watchtower LAIBRARE YA PA INTANETI

Muleba Aba Cishinka Muli Fyonse

“Ikalilileni mu Kutemwa kwa kwa Lesa”
- 11, 12. (a) Bushe bamo abacita imembu ishikalamba balenga shani ulubembu ukubipilako? (b) Bufi nshi ubo Satana abepa pa membu ishikalamba, kabili kuti twacita shani pa kuti tatubepelwe? (c) Kuti twacita shani pa kuti tube ne cishinka ku cilonganino ca kwa Yehova?
  
  ¹¹ Cisuma sana ukuba ne cishinka ku batutungulula mu cilonganino. Bamo nga bacita ulubembu lwabipisha balalenga ulubembu lwabo ukubipilako pantu balafisa no kubepa baeluda nga ca kuti babepushapo. Abantu ba musango yu balatendeka no kucita imembu ishikalamba uku ninshi baleibepa ukuti balebombela Yehova. Na kuba, ici cilenga aba bantu ukutwalilila ukulabepa muli fyonse ifyo bacita. (Amalumbo 12:2) Bambi na bo tabalondolwela baeluda fyonse ifyo bacitile, balafisa ifishinka ifyo baeluda balefwaya ukwishiba. (Imilimo 5:1-11) Ilingi line icilenga abengi ukulabepa mulandu wa kuti balomfwila ubufi Satana abepa.—Moneni akabokoshi akaleti, “Ubufi Satana Abepa pa Membu Ishikalamba.”
  UBUFI UBO SATANA ABEPA PA MEMBU ISHIKALAMBA
  
  Kwaliba ubufi ubwingamuletelela ubo Satana abepa pa membu ishikalamba ubo engatemwa mwasumina. Icawamako fye ca kuti Abena Kristu bena balishiba bwino “imicenjelo” ya kwa Satana Kaseebanya. (Abena Efese 6:11) Natulandeko fye pa bufi butatu ubo abepa.
  
  “Kuti wafisa imembu.” Ukulanda fye icishinka, Yehova alamona fyonse fye ifyo tulecita. “Ifintu fyonse fyaba ubwamba kabili fyaba pa mbilibili ku menso ya uyo tukalubululako.” (AbaHebere 4:13) Apo Yehova aleshiba fyonse kabili tukalubulula kuli ena, mulandu nshi fwe bacitile ulubembu twingafwaila ukulundapo umulandu na umbi uwa kufisa ulubembu ulukalamba ku babomfi bakwe abantunse?—Belengeni na 2 Samwele 12:12.
  
  “Baeluda te bakucetekela, te kwesha ukubeba fyonse.” Imfumu yabipa Ahabu yaebele Eliya aiti: “We mulwani wandi!” (1 Ishamfumu 21:20) Apo Eliya aali ni kasesema wa kwa Yehova mu Israele, nga alyafwile Ahabu pa kuti elelwe imembu shakwe. Mu cilonganino ca Bena Kristu, Yesu alibikamo baeluda ababa “fya bupe ku bantu.” (Abena Efese 4:8) Nangu ca kutila baeluda tabapwililika, “balinda imyeo” yesu, e kutila bafwaya tulepepa bwino Lesa. (AbaHebere 13:17) Te balwani besu; e bo Yehova asonta pa kuti baletwafwilisha.
  
  “Kuti wacingilila umunobe nga wamwafwa ukufisa imembu.” Icishinka ca kutila, nga tulefishilisha ulubembu lwa ubembwike, ninshi tatulemwafwa. Umuntu nga acita imembu ishikalamba, cishibilo ca kuti bucibusa bwakwe na Lesa bwile bulepwa; kanshi uulefisa imembu kuti aba ngo mulwele uulefisa ifishibilo fya bulwele bwakwe kuli dokota uulemundapa. (Yakobo 5:14, 15) Uubembwike kuti atiina ukusalapulwa; lelo ukusalapula ni nshila iyo Yehova atulangilamo ukuti alitutemwa, kabili kuti kwapususha umubembu. (Amapinda 3:12; 4:13) Na kabili, umubembu uushilapila kuti asuka aonaula na bambi mu cilonganino. Bushe kuti mwafwaya ukuti na bambi bayambukilwako ku misango yakwe iyabipa iyalengele ukuti abembuke? (Ubwina Lebi 5:1; 1 Timote 5:22) Kanshi muleesha na maka ukwafwilisha uubembwike ukuyaeba baeluda ulubembu ulo acitile.

Muleba Aba Cishinka Muli Fyonse

“Ikalilileni mu Kutemwa kwa kwa Lesa”