• Ipakisheni Ukusambilila mu Citabo ca Bushe Cinshi Baibolo Isambilisha?
    Ubutumikishi—2006 | February

    • Ipakisheni Ukusambilila mu Citabo ca Bushe Cinshi Baibolo Isambilisha?

      1 Cimo icatuletele nsansa pa Kulongana kwa Citungu ukwaleti “Icumfwila ca Bukapepa,” citabo cafumine icitila Bushe Cinshi Baibolo Isambilisha? Tuli no kutendeka ukulacibomfya nomba line mu mulimo wa mwi bala, sana sana pa kutungulula amasambililo ya Baibolo. E ico tulekabila ukwishiba bwino ifyaba muli ci citabo cipya. Tuli no kucishiba bwino pantu tukacisambilila pe Sambililo lya Citabo pa Cilonganino ukutendeka mu mulungu wa April 17, 2006.

      2 Kangalila we Sambililo lya Citabo pa Cilonganino akalanda pa fipusho fyaba pa ntendekelo ya cila cipandwa. Lyena isambililo likalatungululwa ukubomfya ifipusho fyaba pe samba lye bula. Amalembo yalelanda pa fishinka fikalamba yakalabelengwa no kulandwapo, kabili umukululo utila “Ifyo Baibolo Isambilisha” pa mpela ya cila cipandwa ukalatwafwa ukupituluka mu fyebo pantu e mwaba ifyasuko fyaba mu Malembo ku fipusho fyaba pa ntendekelo ya cipandwa. Mukalaumfwa bwino ukulandapo pantu ifyaba muli ici citabo fyalyanguka ukumfwa kabili fyalembwa mu nshila iisuma nga nshi.

      3 Mu ciputulwa citila “Ifyebo na Fimbi” mwaba amalyashi yalekanalekana. Tukalabomfya ifi fyebo ilyo umusambi wa Baibolo alekabila ukumfwilapo na fimbi pa lyashi limo. Limo limo mwi Sambililo lya Citabo pa Cilonganino mukalaba no kusambilila ifyaba mu “Ifyebo na Fimbi.” Kabelenga we sambililo lya citabo akalabelenga ifyebo na fimbi fyonse ifikumine icipande mulesambilila. Nga ca kutila icipande citali, kuti mwayakanya mu fiputulwa pa kusambilila cena. Mu “Fyebo na Fimbi” tamwaba ifipusho fya kubomfya pa kusambilila. Lelo kangalila kuti aipusha abali mwi bumba ifipusho fingalenga balanda pa fishinka fikalamba.

      4 Tukalaangufyanya ukusambilila ifyebo fili mu citabo ca Baibolo Isambilisha pe Sambililo lya Citabo pa Cilonganino. Nomba pa kusambilila na bantu muli ici citabo tatufwile ukukwankwanya, sana sana nga ca kuti abo tulesambilila na bo baishiba fye ifinono nelyo tabaishiba ifyaba mu Baibolo nangu panono. (Imil. 26:28, 29) Pa masambililo ya Baibolo, amalembo ne filangililo fifwile ukulondololwa bwino sana pamo fye na fimbi ifingakabilwa. E ico pangeni ukusangwa kwi Sambililo lya Citabo cila mulungu no kulandapo sana ilyo tukalasambilila icitabo ca Bushe Cinshi Baibolo Isambilisha?