9. Bulayo nshi abantunse balaiwa pa Abena Roma 8:21?

⁹ Aba ababa ne subilo lya pe sonde nomba balelolela inshita ilyo ifibumbwa fya buntunse “fikalubulwa ku busha bwa kubola.” (Abena Roma 8:21) Uko kulubulwa kukatendeka pa numa Kristu ne milalo yakwe iya mu muulu bapwisha ubucushi bukalamba ukubomfya Armagedone. Uku kukaba e konaulwa kwa bwikashi bubifi bonse ubwa kwa Satana, e lyo pakakonke amapaalo ya mu Kuteka kwa Myaka Ikana Limo ukwa kwa Kristu mu Bufumu.—Ukusokolola 19:17-21; 20:6.

Ubuntungwa Bushaiwamina Ubuli ku Ntanshi

11. Buntungwa nshi ubushaiwamina abakapusuka ubucushi bukalamba bakaipakisha?

¹¹ Pa numa ubucushi bukalamba, ubukatungulula ku Armagedone, bwasangulule sonde ukufumyapo ububifi, Satana Kaseebanya akaleka ukuba “umulungu wa nshita ino.” Bakapepa ba kwa Yehova tabakaleshomboka no kusonga kwa kwa Satana ukwa bubifi. (2 Abena Korinti 4:4; Ukusokolola 20:1, 2) Ukupepa kwa bufi takwakalande fya bufi na kabili pali Yehova nangu ukuleta amalekano pa bwikashi bwa bantunse. Ababomfi ba kwa Lesa tabakafyengwe na kabili nelyo ukucushiwa na balashi ba buntunse. Ala kwena ubu buntungwa bushaiwamina abantu bakaipakisha!

12. Ni shani abantu bonse bakalubulwa ku lubembu na ku fyo ulubembu lwaleta?

¹² Yesu “Umwana wa mpaanga wa kwa Lesa, uulesendo lubembu lwa ba pano isonde,” akabomfya umutengo we lambo lyakwe ku kupase membu sha bantu. (Yohane 1:29) Ilyo Yesu ali pe sonde no kulekelela imembu sha muntu, aleundapa abalelekelelwa ku kulango kuti nabalekelelwa. (Mateo 9:1-7; 15:30, 31) Ifyo fine e fyo, mu cipesha amano, Kristu Yesu, uwaba ni Mfumu ya Bufumu bwa kwa Lesa, akondapa impofu, bacibulu, bankomamatwi, abalemana, abafulungana amano, na balwala amalwele yambi. (Ukusokolola 21:3, 4) “Imbela ya lubembu” lwa bantu bonse aba cumfwila ikafumishiwapo pa kuti amatontonkanyo yabo ne micitile fikalebatemuna no kutemuna Lesa. (Abena Roma 7:21-23) Ku mpela ya Myaka Ikana Limo, bakaba nabalengwa abantunse abapwililika, mu ‘cata ne cipasho’ ca kwa Lesa wine wine eka.—Ukutendeka 1:26.