Ifyo Ubushiku bwa kwa Yehova Bukasokolola

“Ubushiku bwa kwa Yehova bukesa ngo mupuupu, . . . ne sonde ne milimo iyabamo fikasokoloka.”—2 PET. 3:10.

1, 2. (a) Bushe cino calo cabipa cili no kupwa shani? (b) Mepusho nshi twalalandapo?

ICALETA cino calo cabipa, bufi bwa kuti abantu kuti baiteka abene bwino bwino ukwabula ukutungululwa na Yehova. (Amalu. 2:2, 3) Bushe icintu icashimpwa pa bufi kuti caikalilila umuyayaya? Awe iyo! Na lyo line, icalo ca kwa Satana tacakaipwile fye icine. Lelo, Lesa e ukaconaula pa nshita umwine asala kabili mu nshila yakwe umwine. Ifyo Lesa akacita kuli ci calo cabipa fikalanga bwino bwino ukuti alikwata umulinganya no kutemwa.—Amalu. 92:7; Amapi. 2:21, 22.

² Umutumwa Petro alembele ukuti: “Ubushiku bwa kwa Yehova bukesa ngo mupuupu, ilyo imyulu ikapita waa, lelo ifintu ilyo fikakaba se fikasunguluka, ne sonde ne milimo iyabamo fikasokoloka.” (2 Pet. 3:10) Bushe “imyulu” ne “sonde” ifyalumbulwa muli ili lembo ni finshi? Bushe “ifintu” ifikasunguluka na fyo ni finshi? Kabili ni mwi Petro aloseshe ilyo atile “isonde ne milimo iyabamo fikasokoloka”? Ukwishiba ifyasuko kuli ifi fipusho, kwalatwafwa ukuipekanya ilyo tulelolela ifintu fya kutiinya ifili no kucitika nomba line.

Imyulu ne Sonde Ifili no Kupita

3. “Myulu” nshi yalumbulwa pali 2 Petro 3:10, kabili ikapita shani?

³ Baibolo nga yatila “imyulu,” ilingi line ninshi ilelanda pali bakateka, ababa apasansama ukucila abantu bateka. (Esa. 14:13, 14; Ukus. 21:1, 2) Kanshi ‘imyulu iikapita,’ mabuteko ya bantu ayateka cino calo cabipa. Ukupita “waa” nangu ukupita “ne cibulumo cikalamba,” nga fintu Baibolo imbi isosa, kuti capilibula ukuti iyi myulu ikonaulwa mu kwangufyanya.

4. Bushe “isonde” cinshi, kabili likonaulwa shani?

⁴ “Isonde,” bantu ba muli cino calo abataluka kuli Lesa. Abantu ba musango yu e ko bali na mu nshiku sha kwa Noa kabili Yehova apeele icipope ca kuti bonaulwe ku Lyeshi. Baibolo itila: “Lelo kwi shiwi limo line imyulu ne sonde ifya nomba fyasungilwa umulilo kabili fyasungilwa ubushiku bwa bupingushi kabili ubwa konaula abantu abashipepa.” (2 Pet. 3:7) Ilyeshi lyaonawile abantu abashalepepa bonse pa muku umo fye, lelo mu “bucushi bukalamba” ubuleisa, ubonaushi bukacitika mu fiputulwa. (Ukus. 7:14) Mu ciputulwa ca kubalilapo ica bucushi bukalamba, Lesa akalenga bakateka ba muli cino calo ukonaula “Babiloni Mukalamba,” ne ci cikalanga ifyo Lesa apata uyu cilende wa fya mipelele. (Ukus. 17:5, 16; 18:8) Lyena mu nkondo ya Armagedone, iikaba iciputulwa ca kulekeleshako ica bucushi bukalamba, Yehova umwine akafumyapo icalo ca kwa Satana conse fye.—Ukus. 16:14, 16; 19:19-21.

“Ifintu . . . Fikasunguluka”

5. Pa fintu ifikasunguluka paba finshi?

⁵ Bushe “ifintu” “ifikasunguluka” ni finshi? “Ifintu” ifyo Petro alandilepo, ni fyonse ifilenga aba muli cino icalo ukuba ne mibele, imicitile e lyo na mapange yashili ya bukapepa. Pali ifi “ifintu” paba no “mupashi uwa ici calo,” “ubomba mu bana bacintomfwa.” (1 Kor. 2:12; belengeni Abena Efese 2:1-3.) Uyu mupashi, waba fye konse konse mu calo ca kwa Satana. Ulenga abantu ukulatontonkanya, ukuba na mapange, ukulanda, no kucita ifintu mu nshila iilanga ukutontonkanya kwa kwa Satana, “kateka wa bufumu bwa mu lwelele,” uwa cilumba kabili uwatalama.

6. Bushe umupashi wa ici calo umonekela muli finshi?

⁶ E ico abakwata umupashi wa calo balaleka Satana asonga ukutontonkanya kwabo ne mitima yabo ica kuti balatontonkanya nga ena no kukwata imibele akwatako. Limo baleshiba e lyo limo tabeshiba no kuti balesongwa na Satana. Ne ci cilenga balacita fye ifyo balefwaya ukwabula no kutontonkanya pa kufwaya kwa kwa Lesa. Icilumba no kuitemwa e fibatungulula muli fyonse ifyo bacita. Balalanga umupashi wa bucipondoka ku baletungulula, e lyo kabili balakonkelela sana “ulunkumbwa lwa mubili no lunkumbwa lwa menso.”—Belengeni 1 Yohane 2:15-17.a

7. Mulandu nshi tufwile ‘ukusungila umutima’ wesu?

⁷ Kanshi nacicindama sana ukuba na mano ilyo tulesala aba kwangala nabo, ifya kubelenga, ifya kutamba, na lintu tulebomfya Intaneti, pa kuti ‘tulesunga umutima’ wesu. (Amapi. 4:23) Umutumwa Paulo alembele ukuti: “Cenjeleni: epali umuntu amuteka ubusha ku mano ya buntunse no bucenjeshi ukulingana ne ntambi sha bantu, ukulingana ne fintu fya fye ifya muli ici calo kabili te kulingana na Kristu.” (Kol. 2:8) Tufwile ukwangufyanya ukumfwila ico cipope ilyo ubushiku bwa kwa Yehova bulepalama, pantu ‘ukukaba’ kwa buko kukasungulula “ifintu” fya mu calo ca kwa Satana, cikamoneke no kuti fintu ifingapya ku mulilo. Ici citwibukishako amashiwi yaba pali Malaki 4:1 ayatila: “Ubushiku buleisa ubulepya nge lungu lya mulilo, kabili bonse aba mataki na bonse abacita ifyabipa bakaba nge mpimbili. Kabili ubushiku ubuleisa bukabonaula.”

“Isonde ne Milimo Iyabamo Fikasokoloka”

8. Bushe icalo ne milimo iyabamo “fikasokoloka” shani?

⁸ Ni mwi Petro aloseshe ilyo alembele ukuti “isonde ne milimo iyabamo fikasokoloka”? Aloseshe mu kuti mu bucushi bukalamba, Yehova akasokolola imilimo ya mu calo ca kwa Satana, no kulanga ukuti calelwisha ena no Bufumu bwakwe, kanshi cifwile ukonaulwa. Ilembo lya kwa Esaya 26:21 lyalisobele icikacitika aliti: “Yehova aleisa ukufuma ku cifulo cakwe ku kulubulwisha abekashi ba mu calo pa membu shabo isho bacita kuli ena, kabili icalo cikasokolola umulopa wasuumiwa pali cena kabili tacakafise abaipaiwa ba ciko.”

9. (a) Finshi tufwile ukutalukako, kabili mulandu nshi? (b) Mibele nshi tufwile ukukwata, kabili mulandu nshi?

⁹ Mu bushiku bwa kwa Yehova, bonse abakonkelela icalo ca kwa Satana no mupashi wa ciko uwabipa, imibele yabo ikeshibikwa bwino bwino, pantu bakalaipayana no kwipayana. Na kuba, nalimo ifya kutambatamba ifya lukaakala ifiseekele pali lelo, filelenga fye abengi babeleshe ifyo bakesacita ku ntanshi ilyo “ukuboko [kwa muntu no muntu] kukemina ukuboko kwa munankwe.” (Seka. 14:13) Kanshi nacicindama ukuti tuletaluka ku cili conse, pamo nga amafilimu, ifitabo, ifyangalo fya pa vidio, na fimbipo, ifingalenga twakwata imibele iyo Lesa apata, pamo nga icilumba no kutemwa ulukaakala! (2 Sam. 22:28; Amalu. 11:5) Kanshi natube ne fisabo fya mupashi wa kwa Lesa, pantu fyena fikalenga twikapya ku mulilo wa mampalanya.—Gal. 5:22, 23.

“Imyulu Ipya ne Sonde Lipya”

10, 11. Bushe “imyulu ipya ne sonde lipya” ni finshi?

¹⁰ Belengeni 2 Petro 3:13. “Imyulu ipya” Bufumu bwa kwa Lesa ubwa ku muulu, ubwatampile ukuteka mu mwaka wa 1914 ilyo “inshita ya bena fyalo” yapwile. (Luka 21:24) Abakateka muli ubu buteko ni Kristu Yesu na ba 144,000, kabili abengi pali aba balipokelela kale icilambu cabo mu muulu. Mwi buuku lya Ukusokolola, aba basalwa babalondolola ukuti “musumba wa mushilo, Yerusalemu Mupya, uleika mu muulu ukufuma kuli Lesa kabili [uwapekanishiwa] kwati ni nabwinga uwapuulamikilwa umulume wakwe.” (Ukus. 21:1, 2, 22-24) Nga filya mu Yerusalemu wa pe sonde e mwali ubuteko ubwaleteka Israele, e fyo Yerusalemu Mupya na Shibwinga wakwe baba e buteko bukalateka icalo cipya. Uyu musumba wa ku muulu cikaba kwati ‘waika mu muulu’ ilyo ukatendeka ukuteka aba pe sonde.

¹¹ “Isonde lipya,” bantunse abakaba pe sonde lipya abakalanga ukuti balanakila Ubufumu bwa kwa Lesa. Paradaise ya mampalanya iyo abantu ba kwa Lesa babamo na pali ino ine nshita, yaba mu calo cabipa, lelo ku ntanshi ikaba “mu calo [cisuma] icikesa.” (Heb. 2:5) Kuti twacita shani pa kuti tukabe muli ico calo cipya?

Ipekanyeni Ilyo Mulelolela Ubushiku Ubukalamba Ubwa kwa Yehova

12. Mulandu nshi ubushiku bwa kwa Yehova bukatulumushisha aba ku calo?

¹² Paulo na Petro basobele ukuti ubushiku bwa kwa Yehova buli no kwisa “ngo mupuupu,” lilya abantu bashilebwenekela. (Belengeni 1 Abena Tesalonika 5:1, 2.) Nangu fye Bena Kristu, abalolela ubo bushiku, bakapapa ifyo bukesa mu kupumikisha. (Mat. 24:44) Aba ku calo bena, tabakapelele fye pa kupapa. Paulo alembele ati: “Ilyo [abataluka kuli Yehova] balesosa abati: ‘Umutende no mutelelwe!’ e lyo ubonaushi bwa kupumikisha bukabemina filya ukucula kwa pa kupaapa kwisa pa mwanakashi uuli ne fumo; kabili tabakapusuke nakalya.”—1 Tes. 5:3.

13. Kuti twacita shani pa kuti twikabepwa ku kupunda kwa kuti “umutende no mutelelwe!”?

¹³ Ukupunda ukuti “umutende no mutelelwe!” bukaba bufi na bumbi ubukafuma ku fibanda, lelo ababomfi ba kwa Yehova tabakabepwe. Paulo alembele ukuti: “Tamuli mu mfifi, pa kuti ubushiku bulya bukamupumikishe nge fyo amacaca yapumikisha abapuupu, pantu bonse muli bana ba lubuuto.” (1 Tes. 5:4, 5) E ico natwikalilile mu lubuuto, no kutaluka sana ku calo ca kwa Satana icaba mu mfifi. Petro alembele ukuti: “Mwe batemwikwa, pa kwishibila libela ifi fintu, mulecenjela pa kuti mwikasendelwa pamo na bo [bakasambilisha ba bufi mu cilonganino ca Bena Kristu] mu filubo fya aba bantu bampulamafunde no kufuma ku citetekelo cenu.”—2 Pet. 3:17.

14, 15. (a) Bushe Yehova atucindamika shani? (b) Mashiwi nshi ayafuma kuli Lesa ayo tufwile ukulaibukisha?

¹⁴ Nga mwamona, Yehova tatweba fye ukuti “mulecenjela,” lelo alitucindamika pa kutwafwa “ukwishibila libela” ifili no kucitika ku ntanshi.

¹⁵ Ku ca bulanda, bamo tabangwako kabili balasuusha ne fyo batucinkulako pa lwa kuba abalola. Nalimo kuti batila, ‘Kale batampa ukutweba ati impela naipalama, muleba abalola.’ Lelo abo bantu bafwile ukwishiba ukuti nga balelanda ifyo ninshi baletwishika Yehova no Mwana wakwe, te musha wa cishinka fye eka. Yehova atile: ‘Mulecilolela.’ (Haba. 2:3) Yesu na o atile: “Mulelola, pantu tamwaishiba ubushiku ubo Shikulwinwe akesamo.” (Mat. 24:42) Petro na o alembele ukuti: “Mufwile ukuba ne mibele ya mushilo ne milimo ya bukapepa, abalolela kabili abafulukisha ukubapo kwa bushiku bwa kwa Yehova!” (2 Pet. 3:11, 12) Umusha wa cishinka ne Bumba Litungulula tabakatale abaleka ukwangwa kuli aya mashiwi ya kusoka!

16. Mibele nshi tufwile ukutalukako, kabili mulandu nshi?

¹⁶ “Umusha mubi” e utila Shikulu akokola ukwisa. (Mat. 24:48) Uyo musha mubi aba mwi bumba ilyalondololwa pali 2 Petro 3:3, 4. Pali ili ilembo, Petro alembele ati: “Mu nshiku sha kulekelesha mukesa bakapumya” abo pa mulandu wa ‘kukonkelela fye ulunkumbwa lwabo,’ bakalapumya aba cumfwila abafulukisha ubushiku bwa kwa Yehova. Mu nshita ya kwangwa ku fya Bufumu, abo bakapumya bakaba fye abaitemwa no kubika amano ku fya lunkumbwa lwabo. Shi twikatala atukwata imibele ya musango yo iya bucintomfwa, iingesatuletelela! Lelo, “[natulemona] ukutekanya kwa kwa Shikulwifwe ukuti lipusukilo” kabili tukalanga ifi nga tuli abacincila ukulashimikila pa Bufumu no kupanga abasambi no kukanacishamo ukusakamikwa pa lwa nshita ifi fintu fikacitika, pantu Yehova Lesa umwine e waishiba inshita.—2 Pet. 3:15; belengeni Imilimo 1:6, 7.

Tetekeleni Lesa Uupususha

17. Bushe Abena Kristu ba citetekelo bacitile shani pa fyo Yesu abebele pa lwa kufulumuka mu Yerusalemu, kabili mulandu nshi?

¹⁷ Ilyo abashilika ba bena Roma basanshile Yudea mu 66 C.E., Abena Kristu ba citetekelo bacitile ifyo Yesu abebele kabili balifumine mu musumba wa Yerusalemu ilyo fye ishuko lyamoneke. (Luka 21:20-23) Mulandu nshi bafulumukile ukwabula ukwikata na ku cani? Bafwile baleibukisha ifyo Yesu abasokele. Balishibe no kuti bali no kukwata amafya nga bafulumuka, nga fintu Kristu abasokeele libela. Lelo balishibe no kuti Yehova tali no kulekelesha abantu bakwe aba cishinka.—Amalu. 55:22.

18. Bushe amashiwi ya kwa Yesu ayaba pali Luka 21:25-28 yakuma shani ifyo mumona ubucushi bukalamba ubuleisa?

¹⁸ Na ifwe bene tufwile ukucetekela sana Yehova, pantu e ukatupususha ilyo ubucushi bukalamba ubo abantunse bashatala abamona bukesa pali cino calo. Pa nshita imo mu bucushi bukalamba, lelo ilyo Yehova talapingula icalo conse, abantu “bakalafwa umutombo pa mulandu wa mwenso na pa mulandu wa kulolela ifikacitikila aba pe sonde.” Nomba ilyo abalwani ba kwa Lesa bakalatutuma ku mwenso, ababomfi ba kwa Yehova aba cishinka tabakomfwe umwenso nakalya. Bena bakalasekelela pantu bakeshiba ukuti ukulubuka kwabo nakupalama.—Belengeni Luka 21:25-28.

19. Finshi tukalandapo mu cipande cikonkelepo?

¹⁹ Ku ntanshi, kukacitika ifintu ifisuma sana kuli bonse abaipaatulako ku calo na ku “fintu” ifyabamo! Nga fintu icipande cikonkelepo cikalondolola, nga tulefwaya ukuba no bumi, tatufwile fye ukupelela pa kukanacita ifyabipa, lelo tulingile no kukwata imibele iitemuna Yehova e lyo no kulacita ifyo Lesa afwaya.—2 Pet. 3:11.

[Futunoti]

Mibele Nshi Imwe Mufwile Ukukwata?

“Apo ifi fyonse fikasunguluka umusango yu, imwe mufwile ukuba ne mibele ya mushilo ne milimo ya bukapepa.”—2 PET. 3:11.

1. Mulandu nshi ifyo Petro alembeele Abena Kristu muli kalata ya bubili fyacindamine sana?

ILYO umutumwa Petro alembele kalata yakwe iyalenga bubili, icilonganino ca Bwina Kristu ninshi calipita mu mesho ayengi, lelo tacanenwike nangu ukuleka ukukula. E ico Satana Kaseebanya aeseshe inshila imbi iyo abomfesheko na ku numa pa miku iingi ku kulufya abantu. Nga fintu Petro alandile, Satana aeseshe ukulufya abantu ba kwa Lesa ukubomfya bakasambilisha ba bufi abali na “menso ayalembula,” ne “mitima iyacenjela mu kukonkelela ulunkumbwa.” (2 Pet. 2:1-3, 14; Yuda 4) Kanshi Petro alembele kalata ya bubili ukufuma pa nshi ya mutima pa kuti abakoseleshe ukuba aba cishinka kuli Lesa.

2. Cinshi ibuuku lya 2 Petro icipandwa 3 lilandapo sana, kabili mepusho nshi twingaipusha?

² Petro abalembele ati: “Nacilinga kuli ine, ilyo ncili muli lino itenti, ukumucincisha pa kumwibukishako. Pantu ine ninjishiba ukuti nalaswa mfume muli lino itenti lyandi . . . E ico nakulaesha nga nshi inshita yonse, ukuti ilyo nkafumapo, mwe bene mukaleibukisha ifi fintu.” (2 Pet. 1:13-15) Petro alishibe ukuti ali mupepi no kufwa, lelo alefwaya ukuti ifyo alandile fikatwalilile ukwafwa abantu. Na kuba, fyalilembwa muli Baibolo kabili ifwe bonse tulafibelenga. Mu cipandwa 3 muli kalata ya bubili iya kwa Petro mwaba ifyebo ifya kutwafwa icine cine, pantu cilanda sana pa “nshiku sha kulekelesha” isha cino calo cabipa e lyo na pa konaulwa kwa myulu ne sonde ifya mampalanya. (2 Pet. 3:3, 7, 10) Finshi Petro aletufunda? Bushe ukukonka ukufunda kwakwe kuti kwatwafwa shani ukutemwikwa kuli Yehova?

3, 4. (a) Mashiwi nshi Petro alandile, kabili atusokele shani? (b) Fishinka nshi fitatu ifyo twalalandapo?

³ Pa numa ya kulanda pa konaulwa kwa calo ca kwa Satana, Petro atile: “Imwe mufwile ukuba ne mibele ya mushilo ne milimo ya bukapepa!” (2 Pet. 3:11, 12) Petro alishibe ukuti abacita fye ifyo Yehova afwaya kabili abakwata imibele ya bukapepa e bakapusuka “ubushiku bwa cilandushi.” (Esa. 61:2) E mulandu wine, umutumwa alandile no kuti: “E ico, mwe batemwikwa, pa kwishibila libela ifi fintu, mulecenjela pa kuti mwikasendelwa pamo na bo [bakasambilisha ba bufi] mu filubo fya aba bantu bampulamafunde no kufuma ku citetekelo cenu.”—2 Pet. 3:17.

⁴ Apo Petro ali pali balya ‘abaishibile libela ifi fintu,’ alishibe ukuti mu nshiku sha kulekelesha, Abena Kristu bakalakabila sana ukuba abalola pa kuti batwalilile ukuba aba cishinka. Umutumwa Yohane aishilelondolola bwino bwino umulandu cacindamina. Alimwene icimonwa icalesobela ukutamfiwa kwa kwa Satana mu muulu e lyo ne “cipyu icikalamba” ico akwatile “abasunga amafunde ya kwa Lesa kabili abakwata umulimo wa kushimikila pali Yesu.” (Ukus. 12:9, 12, 17) Ababomfi basubwa aba cishinka pamo ne bumba lya “mpaanga shimbi” isha cishinka bakapusuka. (Yoh. 10:16) Nga ifwe umo umo? Bushe tukatwalilila ukuba aba cishinka? Icikatwafwa, kwesha na maka (1) ukukwata imibele ya bukapepa, (2) ukuba ababula akabi kabili ababula akalema mu mibele na muli bukapepa, na (3) ukwishiba ukuti amesho kuti yatukosha. Natulande pali ifi fishinka.

Beni ne Mibele ya Bukapepa

5, 6. Mibele nshi tufwile ukwesha na maka ukukwata, kabili mulandu nshi tulingile ukubombesha” pa kuikwata?

⁵ Ku kutampa kwa kalata yakwe iya bubili, Petro alembele ukuti: “Kanshi apo ifi fintu fyaba ifi, na imwe mufwile ukubombesha ukulundako imibele iisuma ku citetekelo cenu, kabili ku mibele yenu iisuma mufwile ukulundako ukwishiba ku kwishiba na ko mulundeko ukuilama, na ku kuilama kwine mulundeko ukushipikisha, ku kushipikisha na ko mulundeko bukapepa, na kuli bukapepa kwine mulundeko ukutemwa aba bwananyina, e lyo ku kutemwa aba bwananyina mulundeko ukutemwa abantu bonse. Pantu ifi fintu nga fyaba muli imwe no kufulisha, fikamulenga ukukanaba abanang’ani nelyo abashitwala ifisabo mu kwishiba bwino bwino Shikulwifwe Yesu Kristu.”—2 Pet. 1:5-8.

⁶ Ca cine, “ukubombesha” kulafwaikwa pa kuti tulecita ifingatwafwa ukukwata imibele ya bukapepa. Ku ca kumwenako, pa kuti tulesangwa ku kulongana kwa Bwina Kristu konse, tulebelenga Baibolo cila bushiku, no kutwalilila ukuisambilisha, kano twabombesha. Kabili na pa kuti lyonse tulekwata Amapepo ya Lupwa ayengatwafwa no kutuletela insansa, kano tulebombesha no kupekanya bwino. Nga twabelesha ukucita ifi fintu, cikanguka ukuba ne mibele isuma, maka maka nga twamona ifisuma ifilefumamo.

7, 8. (a) Finshi bamo balanda pa lwa Mapepo ya Lupwa? (b) Mulenonkelamo shani mu Mapepo ya Lupwa?

⁷ Nkashi umo alandile pa Mapepo ya Lupwa ati: “Yalalenga tulesambilila pa fintu ifingi.” Umbi na o atile: “Ukulanda fye icishinka, nshalefwaya bafumyeko isambililo lya citabo. Naleipakisha sana. Nomba, ifi twakwata ubushiku bwa Mapepo ya Lupwa, nalimona ukuti Yehova alishiba ifyo tukabila ne nshita tufikabila.” Munyinefwe umo atile: “Amapepo ya Lupwa yalitwafwa icine cine. Tulomfwa bwino ukukwata inshita ya kusambilila pa fintu ifitukumine sana! Ine no mwina mwandi, twalimona ukuti pali ino inshita natukwata sana ifisabo fya mupashi kabili umulimo wa kushimikila uletuletela insansa sana.” Umutwe wa lupwa na umbi alandile ukuti: “Abana pa lwabo balasokota ifyebo kabili balesambilila ifingi, no kunonkelamo balenonkelamo. Amapepo ya Lupwa yalelenga twacetekela ukuti Yehova alishiba ifitusakamika kabili alasuka amapepo yesu.” Bushe ifi aba balanda e fyo na imwe mumona uku kupekanya kwa kwa Lesa ukushaiwamina?

⁸ Mwilaleka ifintu ifishacindama filelenga mulefilwa ukukwata Amapepo ya Lupwa. Abaupana babili batile: “Lyonse pali Cine icungulo pa milingu 4 iyapita, kwali ifyalecitika mu lupwa lwesu ifyalelenga cilayanguka ukukwata Amapepo ya Lupwa, lelo tatwaleleka fyatupumfyanya.” Kwena limo limo kuti mwayalula panono inshita no bushiku. Na lyo line, mufwile ukupampamina fye pa kukwata Amapepo ya Lupwa, te kwesha ukucilukapo nangu fye mulungu umo!

9. Bushe Yehova ayafwile shani Yeremia, kabili finshi twingasambilila kuli Yeremia?

⁹ Kasesema Yeremia aba ca kumwenako cesu icisuma. Alekabila ukuti Yehova amwafwe kabili alitashishe nga nshi ukwafwa apeelwe. Calengele ukuti ashipikishe no kutwalilila ukushimikila ku bantu abashatemenwe ubukombe. Alandile ukuti: “Icebo ca kwa Yehova . . . caba kwati mulilo uulepya, uwacilikilwa mu mafupa yandi.” (Yer. 20:8, 9) Kabili camulengele no kushipikisha mu nshita shayafya ishafikile na ku konaulwa kwa Yerusalemu. Muno nshiku, twalikwata Icebo ca kwa Lesa icalembwa conse. Nga twabika amano ku kucisambilila no kukwata amatontonkanyo ya kwa Lesa, ukupala Yeremia, na ifwe tukaba ne nsansa ilyo tuletwalilila ukushimikila, tukaba aba cishinka ilyo tulepita mu mesho, kabili tukaba abasanguluka mu mibele na muli bukapepa bwesu.—Yako. 5:10.

Beni “Ababula Akabi, Ababula Akalema”

10, 11. Mulandu nshi tulingile ukuibikilishako pa kuti tube “ababula akabi, ababula akalema,” kabili cisanshamo cinshi?

¹⁰ Fwe Bena Kristu, twalishiba ukuti shino ni nshiku sha mpela. Kanshi tatupeshiwa amano ukumona uko abantu muno calo baba ne mibele iyo Yehova apata pamo nga bukaitemwe, ulukaakala e lyo no kucita ubulalelale bwa cipesha mano. Kuti twatila ico Satana aimininapo ni ci: ‘Ukutiinya ababomfi ba kwa Lesa; ico nga cayafya, ninshi kukowesha amatontonkanyo yabo.’ (Ukus. 2:13, 14) E ico, tufwile ukumfwila ukufunda kusuma ukwa kwa Petro ukutila: “Ibikilisheniko ukuti [Lesa] akamusange ababula akabi, ababula akalema, kabili mu mutende.”—2 Pet. 3:14.

¹¹ Ishiwi lya kutila “ibikilisheniko” lyalipalana ne shiwi Petro abomfeshe mu kubangilila ilya kuti “ukubombesha.” Ukwabula no kutwishika, Yehova uwapeele Petro umupashi wa mushilo pa kuti alembe aya mashiwi, alishiba ukuti tufwile ukubombesha pa kuti tube “ababula akabi, ababula akalema,” pa kuti icalo ca kwa Satana ciitukowesha. Ukubombesha kusanshamo no kucingilila umutima wesu pa kuti taubelelekwe ku matontonkanyo yabipa. (Belengeni Amapinda 4:23; Yakobo 1:14, 15.) Kabili cisanshamo no kukananenuka ilyo abantu abapapa imikalile yesu iya Bwina Kristu ‘batusaalula.’—1 Pet. 4:4.

12. Mashiwi nshi aya kukoselesha ayaba pali Luka 11:13?

¹² Pa mulandu wa kukanapwililika kwesu, tacayanguka ukucita icalungama. (Rom. 7:21-25) Icingatwafwa fye ukucita ico, kupepa kuli Yehova uupeela umupashi wa mushilo kuli bonse abamulomba ukufuma pa nshi ya mutima. (Luka 11:13) Uyu mupashi, ulalenga twakwata imibele iyo Lesa atemwa kabili ico cilatwafwa ukulwisha amatunko e lyo ne fya kwesha ifyo tule-enekela ukuti fikafulilako ilyo ubushiku bwa kwa Yehova bulepalama.

Lekeni Ifya Kwesha Fimukoshe

13. Nga twaponenwa ne fya kwesha, cinshi cikatwafwa ukushipikisha?

¹³ Apo twikala muli cino calo cabipa, tukalakwata ifya kwesha ifyalekanalekana. Lelo ukucila ukuba aba bulanda, bushe te kuti cibe bwino nga mwalamona ifya kwesha ukuti filemupeela ishuko lya kulanga ukuti mwalitemwa Lesa e lyo no kukosha icitetekelo cenu muli ena na mu Cebo cakwe? Umusambi Yakobo alembele ati: “Mwe bamunyinane, mulemona ukuti nga mwaponenwa ne fya kwesha fyalekanalekana, ninshi mwalipaalwa icine cine, pantu mwalishiba bwino bwino ukuti ukweshiwa kwa citetekelo cenu kuleta ukushipikisha.” (Yako. 1:2-4) Muleibukisha no kuti “Yehova alishiba ukupokolola bakapepa ku fya kwesha.”—2 Pet. 2:9.

14. Bushe ifyo Yosefe acitile fimukoselesha shani pa lwenu?

¹⁴ Tontonkanyeni pa fyo cali kuli Yosefe, umwana wa kwa Yakobo, uo bashitishe mu busha kuli bamunyina. (Ukute. 37:23-28; 42:21) Bushe icitetekelo ca kwa Yosefe calinakile pa mulandu wa bunkalwe bwa bamunyina? Bushe alifuliilwe Lesa pa kusuminisha ukuti icabipa cimucitikile? Icebo ca kwa Lesa citweba bwino bwino ukuti tamufuliilwe! Na kuba, kwali amesho na yambi ayo Yosefe apitilemo. Pa numa balimubepeshe ukuti alefwaya ukwikata muka Potifari kabili bamupoosele na mu cifungo. Nangu cali ifi, na pali iyi nshita tanenwike muli bukapepa bwakwe. (Ukute. 39:9-21) Lelo alekele amesho yamukosha, ne ci calengele alambulwe apakalamba.

15. Finshi twingasambilila kuli Naomi?

¹⁵ Ukwabula no kutwishika, amesho kuti yalenga twaba no bulanda nelyo amalangulushi. Nalimo inshita shimo e fyo Yosefe aleumfwa. Na babomfi bambi aba citetekelo nabo baleumfwa fimo fine. Tontonkanyeni pali Naomi, uo umulume wakwe na bana baume babili bafwile. Atile: “Mulenjita ati Mara [icalola mu kuti “Ubulanda”], pantu Uwa Maka Yonse nanenga ubulanda nga nshi.” (Ruti 1:20, 21) Ifyo Naomi aumfwile fintu uuli onse engomfwa nga ali no bulanda. Ukupala Yosefe, na o wine alitwalilile ukuba ne citetekelo na bucishinka. Yehova alilambwile ulya mwanakashi. (Ruti 4:13-17, 22) E lyo muli Paradaise pano isonde, Lesa akafumyapo fyonse ifitucusha ifyo Satana ne calo cakwe icabipa baleta. “Ifya kale fikalabwa, kabili tafyakese na mu mutima.”—Esa. 65:17.

16. Bushe tufwile ukulamona shani ipepo, kabili mulandu nshi?

¹⁶ Te mulandu na mesho tukwata, ukwishiba ukuti Lesa alitutemwa kulatwafwa ukutwalilila ukushipikisha. (Belengeni Abena Roma 8:35-39.) Nangu ca kuti Satana takaleke ukutwesha, akafilwa ukututompola nga twatwalilila ukuba “aba mano,” kabili “abalola mu kupepa.” (1 Pet. 4:7) Yesu atile: “E ico, mulelola inshita yonse no kulapepa amapepo ya kupapaata pa kuti mukapusuke kuli fyonse ifikacitika, no kwiminina pa ntanshi ya Mwana wa muntu.” (Luka 21:36) Pa kutweba ukuti tulepepa amapepo ya kupapaata, ico Yesu aletweba ca kuti ino ni nshita ya kuba abakosa pa kuti twaiminina ndi pa ntanshi yakwe na Wishi. Abatwalilila ukuba ifibusa fya kwa Lesa na Yesu e bakwata fye isubilo lya kupusuka ubushiku bwa kwa Yehova.

Beni Abacincila mu Mulimo wa kwa Yehova

17. Nga calyafya ukushimikila uko mwikala, bushe ifyo bakasesema ba kale babombele bwino kuti fyamwafwa shani?

¹⁷ Ukubombako imilimo ya kwa Lesa kulatuletela insansa. Ici citwibukishako amashiwi ya kwa Petro ayatila: “Imwe mufwile ukuba ne mibele ya mushilo ne milimo ya bukapepa!” (2 Pet. 3:11) Umulimo wacindama pali yonse wa kubila imbila nsuma. (Mat. 24:14) Kwena mu ncende shimo calyafya ukushimikila, nalimo ni pa mulandu wa kuti abantu tabafwaya ukumfwa ubukombe nelyo tabafwaya baNte, e lyo nalimo babika fye amano ku fyabo. Ababomfi ba kwa Yehova aba ku kale nabo ifya musango yu fyalebacitikila. Tabanenwike, lelo batwalilile ukubwelelako no bukombe bwa kwa Lesa “libili libili.” (Belengeni 2 Imilandu 36:15, 16; Yer. 7:24-26) Cinshi cabafwile ukushipikisha? Balemona umulimo bapeelwe nga filya Yehova aleumona, te filya icalo caleumona. Kabili balemona ukuti lishuko sana ukwitilwa kwi shina lya kwa Lesa.—Yer. 15:16.

18. Bushe umulimo wa kushimikila pa Bufumu ukalenga shani ishina lya kwa Lesa ukucindikwa ku ntanshi?

¹⁸ Na kuli ifwe bene lishuko sana ukubila ishina lya kwa Lesa no bufwayo bwakwe. Tontonkanyeni pali ici: Pa mulandu wa mulimo wa kushimikila uo tubomba, ilyo ubushiku bukalamba ubwa kwa Yehova bukesa, abalwani ba kwa Lesa tabakatile tatwaumfwileko imbila nsuma. Nga filya fine cali kuli Farao, na bo bene bakeshiba ukuti ni Yehova alebalimuna. (Ukufu. 8:1, 20; 14:25) Pa nshita imo ine, Yehova akacindika ababomfi bakwe aba cishinka pantu akalenga cikeshibikwe bwino bwino ukuti bali beminishi bakwe.—Belengeni Esekiele 2:5; 33:33.

19. Kuti twalanga shani ukuti tumona ukutekanya kwa kwa Yehova ukuti lishuko?

¹⁹ Ilyo Petro alesondwelela kalata yakwe iya bubili alembeele Abena Kristu banankwe ukuti: “Mulemona ukutekanya kwa kwa Shikulwifwe ukuti lipusukilo.” (2 Pet. 3:15) Kanshi, natulemona ukutekanya kwa kwa Yehova ukuti lishuko. Ishuko lya kucita cinshi? Ilya kukwata imibele iitemuna Lesa, ukuba “ababula akabi, ababula akalema,” ukulanga ifyo twatemwa Lesa nga twaponenwa ne fya kwesha, ne lya kuba abacincila mu mulimo wa Bufumu. Nga tulecita ifi, tukakwata amapaalo ku ciyayaya ilyo “imyulu ipya ne sonde lipya” fikesa.—2 Pet. 3:13.