Utuyofi Tulaleta Ubulanda Sana No Konaula Icitetekelo

“IFITUMBI fyali fye mpanga yonse, kabili tatwaishibe na pabelele ing’anda yesu ilyo ishilaonaika.” Ifi e fyo umwaume wa ku Sri Lanka alandile ilyo icinkukuma ca pali bemba (tsunami) caletele bamulamba no konaula umushi aleikalapo mu December mu 2004. Mu cipande cimo icalelanda pali aka kayofi, uulemba amalyashi pa fya mapepo atile, limo “apepa kuli Lesa ninshi nasumanya na meno ku cifukushi.”

Abengi batila uuleta ifinkunka ni Lesa, kabili afiletela ukuti akande abantu. Kalemba wa malyashi umo alandile pa nkuuka imo iyaipeye abantu ati, “kuboko kwa kwa Lesa” kwailetele. Mu United States, bashimapepo bamo batile, icalengele kube utuyofi tumo pamo nga inkuuka beta ati Katrina, ni co “Lesa alikalipe” pa mulandu wa “membu abantu balecita muli ilya misumba.” Mu Sri Lanka abaBuddha abakamamo na menshi batile abalengele kube tsunami, Bena Kristu. Aya mashiwi yalengele abaBuddha bapataninako na Bena Kristu. Uusunga itempele lya baHindu atile, icalengele aka kayofi, ni co lesa wabo Shiva alifulilwe pantu abantu kulya tabakwete misango isuma. Intungulushi ya mapepo iya baBhuddha mu United States yatile: “Tatwaishiba ico utu tuyofi tucitikila. Tatwaishiba ne co ifwe twabela pano calo.”

Nga mwamona amayanda ayaonaika, abantu nabafwa, e lyo na bantu abali no bulanda sana, bushe limo mulaipusha amuti, ‘Cinshi Lesa asuminishisha ukucula kwafule fi?’ Nelyo bushe mutontonkanya ati, ‘Pali ifikalamba ifyalenga Lesa asuminishe ifintu fya musango yo ukucitika, nomba tatweba fye ifyo fintu’? Ifipande fyakonkapo fyalalanda pali uyu mulandu. Muli ifi fipande, balatweba ne fyo abantu bengaicingilila pa kuti tabacenekwe nelyo ukufwa nga baumfwa ukuti kwalapona akayofi nangu nga ca kuti no kucitika na kacitika.

[Icikope pe bula 19]

Bashimapepo abengi tabaishiba ico Lesa asuminishisha amasanso yalengwa ne fyaba pe sonde

Bushe Lesa E Ulenga Utuyofi Ukucitika?

BAIBOLO itila, “Lesa kutemwa.” (1 Yohane 4:8) Kabili taba na lufyengo e lyo wa luse. Baibolo isosa no kuti, “Cilibwe icasansuka, ya mpomfu imicitile yakwe; pantu imibele yakwe yonse bupingushi: Lesa wa cishinka kabili uwabulo bupondamishi, uwalungama kabili uwatambalala.”—Amalango 32:4.

Apo Yehova Lesa e Kabumba, aleshiba ifingaleta utuyofi kabili alikwata na maka ya kufilesha ukuti fileta utuyofi. Ifi fintu twalandapo e lyo ne mibele Lesa akwata iyo Baibolo yalandapo, e filenga abantu abengi ukupapa abati, “Cinshi Lesa alekela utuyofi tulecitika?”a Abantu abengi abaleipusha kale mu bufumacumi ico Lesa asuminishisha ifinkunka ukucitika, balisanga ukutila Lesa alilondolola bwino bwino mu Cebo cakwe Baibolo icalenga asuminishe. (2 Timote 3:16) Moneni ifyebo fyakonkapo.

Balikeene Ukutemwa kwa kwa Lesa

Baibolo itweba ukutila Lesa apeele abafyashi besu aba kubalilapo fyonse ifyo balekabila pa kuti babe ne nsansa no kulaikala umutende. E lyo nga ca kutila bena na bana babo baliumfwila ifunde Lesa abapeele ilyaleti: “Fyaleni, fuleni, kumaneni pe sonde,” Lesa nga alitwalilile ukusakamana abantu bonse abali no kwisula pe sonde.—Ukutendeka 1:28.

Lelo, ku ca bulanda, Adamu na Efa balipondokele Kalenga wabo ilyo bakeene ku mufulo fye ukumumfwila, pantu tabalefwaya alebatungulula. (Ukutendeka 1:28; 3:1-6) Abana ba kwa Adamu na Efa abengi balikonka filya fine abafyashi babo bacitile. (Ukutendeka 6:5, 6, 11, 12) Kanshi kuti twatila, abantunse bonse bafwaya ukuitungulula no kuisakamanina isonde ilyo bekalapo, tabafwaya ukuti Lesa alebatungulula. Apo Yehova ni Lesa wa kutemwa, uufwaya abantu ukusala ico batemenwe, tabapatikisha ukucindika bumulopwe nelyo bukateka bwakwe, nangu ca kutila ifyo bacita limo kuti fyabaletela amafya.b

Lelo Yehova talekelesha abantunse. Ukufika na lelo, “alenga akasuba ukubalikila ababifi na basuma kabili alenga imfula ukuloka pa balungama na bashalungama.” (Mateo 5:45) E lyo kabili, Lesa alipeela abantu amaka ya kusambilila ifyo icalo caba ne fyo ciba pa kuti ifintu pamo nga ifinkukuma, bamulamba ne nkuuka ficitike. Ici calenga abantu ukusambilila fimo ifingabafwa ukwishiba nga ca kutila kwalaba inkuuka, nelyo ifintu fimbi ifileta ubusanso pamo nga ukupuulika kwa lupili.

Ino nshita abantu balishiba ne fifulo pano calo ukwingaba ifinkukuma nelyo inkuuka. Mu fyalo fimo ukwishiba ifi fintu kwalilenga abantu ukupusuka pantu balabasambilisha ifya kucita kabili ubuteko bulabikako amano ku kukuula bwino ifikuulwa kabili bulabika ne fya kusokelako abantu nga kuleba akayofi. Na lyo line utuyofi tulefuma ku fyaba pano calo, tulefulilako fye. Kwaba ifintu ifingi ifilenga utuyofi ukufula no kubipisha.

Abantu Balekala na mu Fifulo Umuba Utuyofi

Ilingi line icilenga akayofi ukubipa sana, te kutila icinkunka cishile na maka. Lelo, ni co mu ncende akayofi kacitikila mulekala abantu abengi sana. Ukulingana ne fyo baWorld Bank basangile, mu fyalo ukucila pali 160, abantu abengi fye (ukucila 25%) bekala mu fifulo umwingaba utuyofi utwingepaya abantu abengi sana. BaJacob Klaus, abasambilila sayansi, ababombela pa Columbia University mu United States, batile, “Mu fifulo umuba utuyofi tufuma ku fyaba pano isonde nga mwaya mulefula abantu, ne caciba fye no kucitika pe sonde ukwabula ukuleta ubwafya, kuti caba kayofi.”

Fimo ifilenga aya masanso, ukubipilako kukuula ifikuulwa na mayanda mu kwangufyanya ukwabula ukuteyanya bwino ififulo balekuulapo. E lyo cimbi kuteme miti, e lyo ne fya kukuulakuula pa mushili ifilenga amenshi ne fintu fimbi ukukanaingila mu mushili. Ukutemaula imiti pamo ne fya kukuulakuula pa mushili e fileta sana bamulamba na matipa ayakunkuluka, yalya ayonaula ifintu.

Abantu na bo balacita fimo ifilenga icinkukuma caba akayofi, pantu kwena te mushili watenshiwa wipaya abantu no kubacena, lelo fikuulwa filya ifipona. E calenga abasambilila pa finkukuma balesosa abati: “Ifinkukuma tafipaya abantu. Ifikuulwa e fibepaya.”

Aba buteko na bo balalenga abantu abafwa ukufulilako ku mulandu wa mulekelesha wabo. Mu calo cimo ku South Amerika, ifinkukuma fyalyonawile umusumba uukalamba imiku itatu mu myaka 400 iyapita. Kabili ukutula mu 1967 ilyo kwali icinkukuma ca kulekeleshako, abantu abekala muli ulya musumba balifulilako, bafika 5 milioni. Magazini ya New Scientist yatile: “Lelo muli uyu musumba, tamwaba mafunde ya kukonka pa kukuula nelyo nga e mo yaba, ninshi aba buteko tababikako amano ku kumona abantu nga baleyakonka.”

E fyaba na mu musumba wa New Orleans, ku Louisiana, mu U.S.A., uwakuulwa pa ncende yabela mwi samba, iyibunda bwangu. Nangu ca kutila balipanga ifya kucingilila ba mulamba ne fya kulenga amenshi ukukama bwangu, akayofi abengi baletiina kalicitike mu 2005 ilyo inkuuka ya pa cimana iyaleitwa ati Katrina yaishile no kubuunsha umusumba. Lipoti yali mu nyunshipepala ya USA Today yatile: “Abantu balisuulile ukusoka kwaliko pa nshita ntali” e lyo bambi “tababikileko na mano.”

Abantu tababikako amano na ku kusoka kwa kuti icalo cilekaba sana nangu ca kutila abasambilila sayansi abengi batila uku kukaba na ko kulelenga utuyofi utufuma ku nkuuka na kuli babemba ukubipilako. Kanshi te Lesa alenga kwaba utuyofi lelo ifilenga, babuteko, ne fyo abantu bacita e lyo no kukanabomfya bwino indalama sha calo. Ifi fintu twalandapo ifyo abantu bacita kuti fyatwibukisha cilya cishinka ca mu Baibolo icitila, umuntu te kuti “ashikimike amatampulo yakwe.” (Yeremia 10:23) Cimbi icilenga ni co abantu tababikako amano ku kusoka na ku fishibilo fya kuti kwalaba akayofi.

Mufwile Ukwishiba Ifilanga Ukuti Kwalaba Akayofi

Ca cine ukutila utuyofi tufuma ku fyaba pano calo kuti twacitika ukwabula no kulanga ukuti twalacitika. Pali Lukala Milandu 9:11 patila: “Pantu inshita ne ca mankumanya fiponena kuli [ifwe] bonse bene.” Lelo ilingi line kulaba ifilanga ukutila kwalaba akayofi e lyo limo na ba buteko baleshiba, batampa no kwishibisha abantu ukuti kwalaba akayofi. E ico abantu nga baishiba ifishibilo fya kayofi, te lingi bafwa.

Mu 2004, ilyo icinkunka caleitwa ati tsunami caonawile icishi ca Simeulue, mu Indonesia, abantu 7 fye e bafwile pa bantu abengi abali kulya. Abantu abengi balifulumwike no kuya kumbi ico balishibe ukutila icipuupu ca mwela nga cileshunda pa fimana ifikalamba, ninshi kwalaba bamulamba abakalamba. Abantu bambi balapusuka ilyo kwaba ifipuupu fya mwela nelyo ilyo ulupili lwalapuulika nga ca kutila baumfwila ukusoka. Apo ilingi line ifishibilo filanga ukuti kwalaba ubusanso e fibalilapo ukumoneka ninshi ubuteko tabulasoka na bantu ukuti kwalaba icinkunka, kuti cawama ukwishiba ifi fishibilo no kumfwila ukusoka, maka maka nga mwikala mu cifulo umuba ifinkunka.

Lelo uwasambilila pa kupuulika kwa mpili atile, ca bulanda ukuti “abantu abengi tabasumina nga babasoka pa kayofi nangu ca kutila nacimoneka apabuuta tuutu ukuti kalabako.” Ici cicitika sana mu ncende mulya limo basoka abantu pa kayofi lelo ukwabula ukuti kacitike e lyo na mulya akayofi kacitikepo kale sana. E lyo limo abantu tabafwaya fye ukufulumuka no kusha ifipe, nangu ca kutila akayofi kali mu mupepi.

Mu fifulo fimbi abantu bapiina ica kutila balafilwa no kubutuka ukufuma ku cifulo ukuli ubwafya. Lelo te Kabumba wesu alenga abantu ukuba abapiina, bantu banabo e balenga pantu e bafilwa ukubateka bwino. Ku ca kumwenako, aba buteko ilingi line balapoosa indalama ishingi sana ku kushita ifyanso fya nkondo, nomba tabafwilisha abapiina.

Lelo kwaliba fimo ifingafwa umuntu uuli onse te mulandu ne fyo aba. Ni finshi ifyo? Lesa alitupeela ifishinte fya mafunde ifyaba mu Cebo cakwe Baibolo ifipususha abantu nga bafikonka.

Ifishinte Ifipususha Abantu

◼ Mwilaesha Lesa. Pa Amalango 6:16 patila: “Mwilaesha Yehova Lesa wenu.” Abena Kristu ba cine tabacetekela ukupusukila kwi shuko, no kutontonkanya ukuti Lesa lyonse akulabacingilila ku fyabipa. Nga caishibikwa ukutila kwalaba ubusanso, balomfwila ukufunda ukutila: “Uwacenjela amono bubi no kubelama; abapelwa amano bapitapo no kukandwa.”—Amapinda 22:3.

◼ Tufwile ukucindika ubumi ukucila ifyuma. “Umuntu nangu fye akwate ifingi nga nshi, ubumi bwakwe tabwaba mu fintu ifyo akwata.” (Luka 12:15) Ifyuma fyaba ne ko fibomba, lelo abafwa teti fibafwe. E ico, abatemwa ubumi kabili abacindika ishuko bakwata ilya kubombela Lesa tabaibika mu kapoosa mweo pa kuti fye bacingilile ifipe fyabo.—Amalumbo 115:17.

Mu 2004 baTadashi abekala ku Japan, bafulumwike mu ng’anda yabo ilyo fye icinkukuma catendeke ninshi no buteko tabulaeba abantu ukufulumuka. Balefwaisha ukupusuka ukucila ukupususha ing’anda yabo ne fipe. Ba Akira, abekala mu cifulo cimo cine, balembele ati, “icilanga ifyo akayofi kakulile, te fintu ubwingi fyonaike, lelo fintu umuntu umwine alemona ako kayofi. Ine akayofi kalingafwile ukwangusha imikalile yandi.”

◼ Umfwileni ukusoka ukufuma ku buteko. “Umuntu onse anakile bakateka abacilamo.” (Abena Roma 13:1) Nga ca kutila ubuteko bwatila fulumukeni mu cifulo cimo nelyo nga bamweba ukucita ifintu fimo pa kuti mupusuke, cilawama ukubomfwila. BaTadashi balifumineko ukwali ubwafya pantu baliumfwila ukusoka kwafumine ku buteko. E calengele ukutila becenekwa nelyo ukufwa.

Nga ca kutila takuli ukusoka ukuli konse ukufuma ku buteko, abantu abene bafwile ukumona inshita bengafulumuka e lyo ne fyo bengafulumuka nga baishiba bwino bwino ifyo ubwafya buli. Mu fyalo fimo, ubuteko bwalyeba abantu ifya kucita nga kwaba akayofi pa kuti bapusuke. Nga ca kutila ubuteko bwalimweba ifya kucita, bushe mwalifishiba bwino ifyo fintu? Bushe mwalilanshanya pali fyene no lupwa lwenu? (Moneni umukululo uli muli cino cipande) Mu fyalo ifingi umwaba amaofesi ya Nte sha kwa Yehova, ifilonganino fya Nte sha kwa Yehova fyaliteyanya ifya kucita nga ca kuti camoneka ukutila kwalaba akayofi kabili ifyo bateyanya fyalyafwa sana abantu.

◼ Langeni Ukutemwa kwa Bwina Kristu. Yesu atile: “Ndemupeele funde lipya, ilya kuti muletemwana; ifyo namutemenwe.” (Yohane 13:34) Abantu abatemwa sana abanabo nga filya Kristu atutemwa, balesha apapela amaka yabo pa kuti bafwilishe abanabo ukuipekanya nelyo fye ukupusuka nga kwaisa icinkunka. Mu filonganino fya Nte sha kwa Yehova mwaliba baeluda ababombesha sana pa kuti fye basange bonse ababa mu cilonganino no kushininkisha ukuti bali fye bwino atemwa nabafika fye bwino ukushili ubusanso. Na kabili baeluda balafwaya ukumona nga ca kuti umuntu onse nakwata ifintu pamo nga amenshi ya kunwa ayasuma, ifya kulya, ifya kufwala, e lyo no muti uo alekabila pali iyo nshita. E lyo kabili Inte sha kwa Yehova abali mu fifulo umushili ubusanso baleta bamunyinabo abafumine ukuli akayofi ukuti bekale na bo. Ukutemwa kwa musango yu, “e cikakilo cafikapo ica kwikatana.”—Abena Kolose 3:14.

Bushe utuyofi tufuma ku fyaba pano calo tukatwalilila fye ukubipilako nga fintu bamo balanda? Napamo ico kuti cacitika, lelo ni pa nshita iinono fye. Mulandu nshi? Pantu abantu bali no kuleka ukuiteka e lyo ne fibi ifyafuma mu kuicitila ifyo balefwaya fili no kupwa. E ico, Yehova kateka wesu uwaba no kutemwa, e ukalatusakamana no kusakamana isonde lyonse na fyonse ifyabamo. Ici nga cacitika, isonde likawama icine cine nge fyo twalamona.

[Amafutunoti]

[Akabokoshi ne Cikope pe bula 23]

BUSHE MWALIIPEKANYA UKUFULUMUKA?

Aba ku maofeshi yaba mu musumba wa New York ayalolekesha pa fya kucita nga kwaba akayofi batila, abantu mu mayanda balingile ukupekanya ifyo bengafulumuka. Batile bafwile ukukwata icola ca kusenda icakosa, lelo icayanguka ukusenda, no kubikilamo limo ifintu ifingafwaikwa nga kwaba akayofi. Ifyo bengabikamo ni fi:c

◼ Ifitupa ne fipepala fimbi ifyacindama. Ifi fintu fifwile ukuba umo amenshi yashingengila

◼ Amakii yambi aya motoka na ya ku ng’anda

◼ Amakardi ya kushitilapo ifintu nelyo aya kukongwelapo e lyo ne ndalama

◼ Amenshi ya mu mabotolo ne fya kulya ifishonaika

◼ Toci, ka redio, foni ya kwenda na yo (nga mwalikwata), na mabatili na yambi

◼ Umuti uwa kunwa pa mulungu nangu fye umo nga muli pa muti. Uyu muti ufwile no kulembwapo ifya kuunwa ne nshita ya kuunwinapo. Utupepala bamulembelepo umuti, amashina ya badokota wenu na manambala ya mafoni yabo. (Mufwile ukufwaya umuti umbi ilyo uo mukwete taulaleka ukubomba)

◼ Akabokoshi ka miti ikabilwa mu kampampa umuntu nga nacenekwa nelyo alwalisha

◼ Insapato ishakosa, ishishifyenta ku makasa e lyo ne fya kufwala mu mfula

◼ Amanambala ya mafoni aya balupwa lwenu e lyo na po mwapangana ukukumanina e lyo na mapu ya cifulo mwikalamo

◼ Ifintu ifyo abana abanono bakabila

[Futunoti]

[Abatusuminishe Ukubomfya Icikope pe bula 20]

USGS, David A. Johnston, Cascades Volcano Observatory

Utuyofi Tuli No Kupwa

IFINKUKUMA, inkondo, ifipowe na malwele, fintu fimo ifyo Yesu atile fikaba fishibilo fya kuti tuli ku “mpela ya bwikashi” buno. (Mateo 24:3, 7, 8; Luka 21:7, 10, 11) Lelo tatuletila Lesa e ulenga ifi fintu ukucitika. Yesu na Wishi, Yehova Lesa, te baleta ifi finkunka.

Ifyo Lesa akaleta, Bufumu bwakwe atemwa ubuteko bwa ku muulu ubo Yesu akalateka. E lyo kabili akonaula bonse abakaana ubuteko bwa kwa Yehova. Kanshi ifinkunka filanga fye ukutila Lesa ali mupepi no kucita ifi fintu. (Daniele 2:44; 7:13, 14) Nga acite fyo, isonde likaba cifulo ca kwikalapo mu mutende. Muli ili sonde, tamwakabe ukutiina utuyofi tufuma ku fyaba pano calo. Ubulayo bwa kwa Lesa ubwa kutila “Abantu bandi bakekala mu bwikalo bwa mutende na mu mekalo ya mutelelwe mu fya kutuushamo fya cibote,” bukafikilishiwa icine cine.—Esaya 32:18.

Kutikeni Kuli Lesa no Kuba no Mweo!

Nga filya fine icipande cafumako cilelanda, ukumfwila ukusoka kulapususha. Ukumfwila ukusoka kwaba mu Baibolo kwena kwacila na po ukupususha. Lesa alaya ukutila: “Lelo uumfwa kuli ine akekalo mutelelwe, akekale cibote ukubulwo mwenso wa bubi.”—Amapinda 1:33.

Inte sha kwa Yehova balabikako sana amano ku kukutika kuli Lesa ilyo balebelenga Icebo cakwe icapuutwamo cila nshita e lyo no kukonka ifyo abasambilisha. Balefwaya na imwe mulecita ifi fine. Pantu bonse abakutika kuli Yehova no kucita ifyo alanda tabafwile ukutiina ifikacitika ku ntanshi e lyo na kayofi akakaponena ababifi. Lelo kuti balelolela fye ukupeelwa umweo wa muyayaya no kwikala muli Paradaise pano pene pe sonde, apo bali “no kuilemeno bwingi bwa mutende.”—Amalumbo 37:10, 11.

[Akabokoshi pe bula 24]

ICINGASANSAMUSHA ABALELOOSHA

Bushe mwalifwilwapo pa mulandu wa kayofi kafuma ku fyaba pe sonde atemwa icinkunka fye cimbi? Kale sana imyaka nalimo 2,000 iyapita, Lasaro cibusa wa kwa Yesu alifwile ninshi ali fye umulumendo. Ilyo Yesu aumfwile iyi mbila ya bulanda, aile ku mushi wa Betani uko Lasaro aleikala no kuyamubuusha mu “tulo” twa mfwa.—Yohane 11:1-44.

Ico Yesu acitile ici cisungusho, talefwaya fye ukulanga ukuti alitemwa Lasaro no lupwa lwakwe, lelo alefwaya no kuti abantu bacetekele sana filya alaile ukutila “bonse ababa mu nshiishi bakebukishiwa” kabili akababuusha mu Bufumu bwakwe. (Yohane 5:28, 29) Ca cine, muli Paradaise iileisa, Yesu akafumyapo fyonse ifyabipa ifyabako pa mulandu wa bucipondoka bwali mu Edene.a—1 Yohane 3:8.

[Futunoti]

[Akabokoshi ne Cikope pe bula 25]

ICINKUKUMA CALENGELE NATAMPA UKUCITA IFYACINDAMA

Mu 1971, ninshi ndi fye umukashana nalikwata no mwana umo, nalefwaya sana ukuba kemba wa nyimbo. Mu 1957 nafumine mu musumba wa Winnipeg ku Manitoba, mu Canada uko nafyalilwe, no kuya ku California, ku U.S.A., pa kuti mbe mupepi ne tauni lya Hollywood uko naleenekela ukuti kuti naba bwangu kemba wa nyimbo.

Mu nshita ya lusuba lyonse fye pa myaka 9, bamayo, Inte ya kwa Yehova, baleisa mu kuntandalila ukufuma ku Canada. Lyonse nga baisa, balenjebako ifyaba mu Baibolo, apo balishininkishe ukutila ilafwa abantu ukuba ne nsansa no kuba no lupwa ulusuma. Bamayo nalibatemenwe kabili nalekutika nga balelanda na ine. Lelo nga babwelelamo fye, nalepoosa amabuuku balempeela pantu naleti filya fine nalefwaya ukucita fyali fye bwino.

Lyena bushiku bumo mu February 1971, ulucelocelo pali Cibili, kwaishile icinkukuma icambushishe mu tulo. Icongo caliko ni cikanga cinkomye amatwi kabili umushili waletenkana sana. Uku ninshi ndetutuma nabutukile ukwali umwana wandi. Ala nalyumfwile bwino pa kusanga ali fye bwino nalaala pali ka bedi kakwe. Ilyo icinkukuma calekele, amaglasi yatobaike ne fyali mu makabati fyalisalangene pa nshi e lyo amenshi yali mu cishiba ca kusambilamo insamfi yapongolokele pa lubansa. Nangu ca kutila bonse pa ng’anda twali fye bwino, nalifilwa ukubwelela mu kusendama.

Bamayo balilandilepo pa “nshiku sha kulekelesha,” abati cimo ica kwishibilako ishi nshiku, “finkukuma fikalamba.” (2 Timote 3:1; Luka 21:7-11) Ulya mwaka na o mu lusuba balishile mu kuntandalila lelo tabandeteleko amabuuku yalanda pa fya mu Baibolo. Apo balinshimikile icine pa myaka 9 ukwabula ukuti nsumine, balemona ati nshifwaya ukupepa. Tabaishibe ukuti nalyalwike! Ilyo bafikile natendeke ukubepusha amepusho ayengi sana. Apa ninshi nalitampa no kusuulako ku kuba kemba walumbuka.

Ulya wine mulungu nalile na bamayo ku kulongana kwa Bena Kristu ku Ng’anda ya Bufumu, kabili ukufuma iyo nshita naleya lyonse ku kulongana. Bamayo bamfwaile aba kunsambilisha Baibolo. Nabatishiwe mu 1973, kabili pali ino nshita ndabomba amaawala 70 cila mweshi mu mulimo wa kushimikila abantu Imbila nsuma iya Bufumu bwa kwa Lesa. (Mateo 24:14) Ndatasha ukutila icinkukuma tacaonawile icitetekelo candi muli Lesa, lelo e calengele nkwate icitetekelo.—Abashimika ili lyashi ni baColleen Esparza.