Utuyofi Tulaleta Ubulanda Sana No Konaula Icitetekelo

“IFITUMBI fyali fye mpanga yonse, kabili tatwaishibe na pabelele ing’anda yesu ilyo ishilaonaika.” Ifi e fyo umwaume wa ku Sri Lanka alandile ilyo icinkukuma ca pali bemba (tsunami) caletele bamulamba no konaula umushi aleikalapo mu December mu 2004. Mu cipande cimo icalelanda pali aka kayofi, uulemba amalyashi pa fya mapepo atile, limo “apepa kuli Lesa ninshi nasumanya na meno ku cifukushi.”

Abengi batila uuleta ifinkunka ni Lesa, kabili afiletela ukuti akande abantu. Kalemba wa malyashi umo alandile pa nkuuka imo iyaipeye abantu ati, “kuboko kwa kwa Lesa” kwailetele. Mu United States, bashimapepo bamo batile, icalengele kube utuyofi tumo pamo nga inkuuka beta ati Katrina, ni co “Lesa alikalipe” pa mulandu wa “membu abantu balecita muli ilya misumba.” Mu Sri Lanka abaBuddha abakamamo na menshi batile abalengele kube tsunami, Bena Kristu. Aya mashiwi yalengele abaBuddha bapataninako na Bena Kristu. Uusunga itempele lya baHindu atile, icalengele aka kayofi, ni co lesa wabo Shiva alifulilwe pantu abantu kulya tabakwete misango isuma. Intungulushi ya mapepo iya baBhuddha mu United States yatile: “Tatwaishiba ico utu tuyofi tucitikila. Tatwaishiba ne co ifwe twabela pano calo.”

Nga mwamona amayanda ayaonaika, abantu nabafwa, e lyo na bantu abali no bulanda sana, bushe limo mulaipusha amuti, ‘Cinshi Lesa asuminishisha ukucula kwafule fi?’ Nelyo bushe mutontonkanya ati, ‘Pali ifikalamba ifyalenga Lesa asuminishe ifintu fya musango yo ukucitika, nomba tatweba fye ifyo fintu’? Ifipande fyakonkapo fyalalanda pali uyu mulandu. Muli ifi fipande, balatweba ne fyo abantu bengaicingilila pa kuti tabacenekwe nelyo ukufwa nga baumfwa ukuti kwalapona akayofi nangu nga ca kuti no kucitika na kacitika.

Bushe Lesa E Ulenga Utuyofi Ukucitika?

BAIBOLO itila, “Lesa kutemwa.” (1 Yohane 4:8) Kabili taba na lufyengo e lyo wa luse. Baibolo isosa no kuti, “Cilibwe icasansuka, ya mpomfu imicitile yakwe; pantu imibele yakwe yonse bupingushi: Lesa wa cishinka kabili uwabulo bupondamishi, uwalungama kabili uwatambalala.”—Amalango 32:4.

Apo Yehova Lesa e Kabumba, aleshiba ifingaleta utuyofi kabili alikwata na maka ya kufilesha ukuti fileta utuyofi. Ifi fintu twalandapo e lyo ne mibele Lesa akwata iyo Baibolo yalandapo, e filenga abantu abengi ukupapa abati, “Cinshi Lesa alekela utuyofi tulecitika?”a Abantu abengi abaleipusha kale mu bufumacumi ico Lesa asuminishisha ifinkunka ukucitika, balisanga ukutila Lesa alilondolola bwino bwino mu Cebo cakwe Baibolo icalenga asuminishe. (2 Timote 3:16) Moneni ifyebo fyakonkapo.

Balikeene Ukutemwa kwa kwa Lesa

Baibolo itweba ukutila Lesa apeele abafyashi besu aba kubalilapo fyonse ifyo balekabila pa kuti babe ne nsansa no kulaikala umutende. E lyo nga ca kutila bena na bana babo baliumfwila ifunde Lesa abapeele ilyaleti: “Fyaleni, fuleni, kumaneni pe sonde,” Lesa nga alitwalilile ukusakamana abantu bonse abali no kwisula pe sonde.—Ukutendeka 1:28.

Lelo, ku ca bulanda, Adamu na Efa balipondokele Kalenga wabo ilyo bakeene ku mufulo fye ukumumfwila, pantu tabalefwaya alebatungulula. (Ukutendeka 1:28; 3:1-6) Abana ba kwa Adamu na Efa abengi balikonka filya fine abafyashi babo bacitile. (Ukutendeka 6:5, 6, 11, 12) Kanshi kuti twatila, abantunse bonse bafwaya ukuitungulula no kuisakamanina isonde ilyo bekalapo, tabafwaya ukuti Lesa alebatungulula. Apo Yehova ni Lesa wa kutemwa, uufwaya abantu ukusala ico batemenwe, tabapatikisha ukucindika bumulopwe nelyo bukateka bwakwe, nangu ca kutila ifyo bacita limo kuti fyabaletela amafya.b

Lelo Yehova talekelesha abantunse. Ukufika na lelo, “alenga akasuba ukubalikila ababifi na basuma kabili alenga imfula ukuloka pa balungama na bashalungama.” (Mateo 5:45) E lyo kabili, Lesa alipeela abantu amaka ya kusambilila ifyo icalo caba ne fyo ciba pa kuti ifintu pamo nga ifinkukuma, bamulamba ne nkuuka ficitike. Ici calenga abantu ukusambilila fimo ifingabafwa ukwishiba nga ca kutila kwalaba inkuuka, nelyo ifintu fimbi ifileta ubusanso pamo nga ukupuulika kwa lupili.