‘Mwilashimunuka Ukusalapula’

Ilyo abana benu baleya balekula, bafwile ukwishiba ukuti mu fyo bacita kuti mwafuma ifisuma nelyo ifibi. Na lintu bali abaice bafwile ukukonka ifyo abalebatungulula balelanda, nampo nga ni pa ng’anda, ku sukulu, nelyo mu bwikashi. Sambilisheni abana benu ukuti, bakalobolola ico balebyala. (Abena Galatia 6:7) Kuti mwabasambilisha shani?

Baibolo itila: “Wishimunuka ukusalapula.” (Amapinda 23:13) Nga mwaeba umwana ifyo mwakulamucita nga alufyanya, mulingile ukulacita ifyo fine fye. Ba Norma abekala ku Argentina batile: “Calicindama sana ukulacita ifyo fine mwaeba umwana. Nga mulealuka-aluka umwana takulamumfwila, akulacita fye ifyo alefwaya.”

Abafyashi nga baebela abana kabela no kubalondolwela bwino ifyo bakulabacita nga balufyanya, abana tabakulacita ifikansa nga bacita icilubo. Abana balakonka ifyo abafyashi balebeba nga nabeshiba ifyo balabacita nga tabakonkele amafunde nelyo nga nabeshiba ukuti nga balufyanya fye, nangu cibe shani abafyashi tabalekepo fye.

Na lyo line, nga mulefwaya umwana asambilile, tamufwile ukumusalapula mu bukali. Baibolo itila: “Mwilaba ne mpatila ku banenu, muleke icipyu no bukali no kootoka no musaalula.” (Abena Efese 4:31) Mu kusalapula umwana, tamufwile ukuba ubunkalwe.

Finshi mwingacita pa kuti mwikwata sana icipyu umwana wenu nga amukalifya? Ba Peter abekala ku New Zealand batile: “Tacanguka ukuilama, na lyo line abana bafwile ukwishiba ukuti ico babasalapwila ni co nabalufyanya te mulandu wa kuti abafyashi babo tabailama nga bakalipa.”

Ba Peter na bena mwabo balaafwa abana babo ukwishiba ubusuma bwa kusalapulwa. Batile: “Nangu abana bacita icatukalifya, tulanda sana pa fyo bafwile ukulacita, te pa fyo balufyenye.”

“Lekeni Abantu Bonse Beshibe Ukuti Muli ba Mutembo”

Lesa alandile pa fyo ali no kusalapula abantu bakwe ati: “Nkakusalapula ukusalapula ukwalinga.” (Yeremia 46:28) Mukafuma ifisuma nga ca kutila mwasalapula umwana ukulingana ne cilubo acitile. Paulo alembeele Abena Kristu ati: “Lekeni abantu bonse beshibe ukuti muli ba mutembo.”—Abena Filipi 4:5.

Cimo icilanga ukuti mwaliba no mutembo, kusalapula abana ukwabula ukubomfwisha insoni. Ba Santi, abekala ku Italy batile: “Nshilenga abana bandi ukulaimona kwati tabacindama. Lelo ndesha ukumona icilubo ico bacitile, no kubafwa ukukanabwekeshapo ico bacitile. Nshisalapula abana bandi ilyo pali abantu bambi, nangu fye ni lintu bali na bana banabo. Nshibaseka pa filubo bacita, nampo nga tuli fweka nelyo nga tuli pa bantu.”

Ba Richard abo tulandilepo kale, balimona ukuti ukuba no mutembo cisuma sana. Batile: “Ilyo mulesalapula umwana, tamufwile ukumukandila na pa filubo acitile kale. Nga mwasalapula umwana pa cilubo acitile, tamufwile ukutwalilila ukulandapo no kulamwibukisha pa fyo alufyenye akale.”

UKUSALAPULA

“Twasanga ukuti ifibomba bwino pa kusalapula abana filapusanapusana. Limo pa kumusalapula kuti cawama ukulanda fye nankwe kabili ukwabula ukupita mu mbali, e lyo limo icingabomba, kumulesha fye ukucitako fimo ifyo atemwa.”—Ba Ogbiti, aba ku Nigeria.

“Pa kuti twishibe abana nga nabomfwa ifyo twalanda tulabeba ukubwekeshapo mu mashiwi yabo. Kabili nga tabacitile ifyo twabeba, tulabasalapula. Nga tulefwaya abana besu ukulacita ifyo twabeba, tufwile ukucita ifyo twabebele ukuti e fyo tukacita nga balufyanya.”—Ba Clive, aba ku Australia.

“Nalisanga ukuti cilaba bwino ukufukamako nga ndelanda na bana bandi pa kuti tuleloleshanya bwino. Ici cilalenga balekutikisha ilyo ndelanda, e lyo no kulenga balemona icinso candi, pantu ne cinso candi kuti calenga baishiba ifyo ndeyumfwa.”—Ba Jennifer, aba ku Australia.

“Tatufwaya ukweba abana besu ati, ‘iwe taumfwa,’ na lintu cilemoneka kwati ico ca cine. E lyo kabili tatukalipila abana besu ilyo pali bamunyinabo. Tubatepelesha fye, nelyo ukubeta pa mbali pa kuti tulande nabo ilyo bali beka.”—Ba Rudi, aba ku Mozambique.

“Abana balaaluka bwangu pantu balitemwa ukukonkelesha bambi. Pali uyu mulandu, tufwile ukulacita ifyo bengasambililako pa kuti belakonkelesha abanabo ku sukulu, nelyo ifyo bamona pa TV, nangu ifyo abantu bambi bacita. Tulingile no kwafwa abana besu ukuba ne mibele isuma iyo tusambilila mu Baibolo. Ukwishiba ifyo Baibolo ilanda kukabafwa ukukanacitako icili conse icingabaletelela.”—Ba Grégoire, aba ku Democratic Republic of the Congo.

“Umwana nga alufyanya, tamufwile ukumuleka fye, mulingile ukumusalapula. Na lyo line, mufwile ukumusalapula mu kulinga. Abana bafwile ukwishiba ifyo mwalacita nga tabakonkele ifyo mwabeba, kabili bafwile ukwishiba ukuti ifyo fine fye e fyo mwalacita.”—Ba Owen, aba ku England.