Bushe Mulalanshanya na bo Mwatemwa?

INYUNSHIPEPALA ya Polityka iya ku Poland yatile: “Ukulanshanya na bo twatemwa kuleya kulecepelako cila nshita.” Catunganishiwa ukuti mu United States, abaupana balanshanya ifintu fyacindama pa maminiti fye 6 cila bushiku. Incenshi shimo shitontonkanya ukuti hafu wa fyupo ifya bantu abapatukana no kulekana ni pa mulandu wa kuti abaupana ilingi line tabalanshanya.

Ngo kulanshanya kwa bafyashi na bana kwena kwaba shani? Inyunshipepala tulandilepo pa kubala yalanda ati, ilingi line “ilyo abafyashi balelanshanya na bana, batemwa fye ukwipusha kwati balefwailisha imilandu. Batemwa ukwipusha ati: Mwacisambilila shani ku sukulu? Nga banobe bali shani?” Inyunshipepala yaipusho kuti: “Lelo bushe abana kuti basambilila shani ukuba ne fibusa fya pa mutima?”

Ukulanshanya kusuma kukabila ukubikako amano. Nomba bushe kuti twawamya shani ukulanshanya? Yakobo, umusambi kabili Umwina Kristu atukoselesha ukutila: “Umuntu onse afwile abe uwayanguka ukuumfwa, uukokola ukulanda, uukokola ukukalipa.” (Yakobo 1:19) Ca cine, pa kuti tulanshanye mu nshila iikuulilila, tulekabila ukupoosa amano ku fyo umuntu alelanda kabili te kwesha ukumucilima ilyo alelondolola, nangu kutunganya ifyo alasondwelela ilyo talapwisha na kulanda. Mwilatemwa ukulengulula bambi pantu kuti bafuupulwa kabili baleka no kulanda. Ilyo Yesu aleipusha mano mano, taleipusha kwati alefwailisha umulandu umo iyo, lelo alefwaya ukwishiba ifyo abantu baletontonkanya, no kukosha bucibusa bwali pali wene na bantu.—Amapinda 20:5; Mateo 16:13-17; 17:24-27.

Ukukonka ifishinte fisuma ifisangwa mu Baibolo, kukamwafwa ukulalanshanya na bo mwatemwa. Icikafumamo ca kuti, mukaba ne fibusa fisuma nga nshi ifyo mwakulalanshanya na fyo pa myaka iingi kabili ubumi bwenu bonse.