Bushe Lesa E Ulenga Amafya Yatuponena?

ILYO umwana wa baMarion umukashana acenenwe icabipisha kuli bongobongo, baMarion bacitile ifyo fwe bengi twingacita.a Bapepele kuli Lesa ukuti abafwe. Batila: “Nshileibukishapo inshita nayumfwile uwapeleelwa kabili uwalekeleshiwa nge fyo nayumfwile pali iyi nshita.” Pa numa, umwana wabo alilwalishe, kabili baMarion batendeke ukutwishika Lesa. Baipwishe ati: “Mulandu nshi ici cilecitikila?” Balifililwe ukumfwikisha ico Lesa wa kutemwa kabili uusakamana engabalekelesesha.

Icacitikile baMarion cilacitikila abengi. Mwi sonde lyonse fye, abantu abengi nga baba na mafya batila Lesa nabalekelesha. Ilyo umwishikulu wabo aipaiwe, baLisa batila: “Ncili ndashomboka ne lipusho lya kufwaya ukwishiba ico LESA asuminishisha ifyabipa. Nshaleka ukutetekela muli Lesa, lelo icitetekelo candi tacakosa nga filya cali pa kubala.” Pa numa ya kayofi kabipisha akacitikile akanya kakwe, umwanakashi umo na o atile: “Lesa tansansamwishe pali ici cacitike. Tansakamane nelyo ukunanga inkumbu.” Alandile no kuti: “Nshakatale mweleela Lesa.”

Bamo balafulilwa Lesa ilyo bamona ifili mu calo twaikalamo. Balamona ifyalo fyaisulamo ubupiina ne nsala, imbutushi ishishakwata na pa kuuma kuboko, abana banshiwa abengi ku mulandu wa AIDS, ne mintapendwa ya bantu abatitikishiwa na malwele yambi. Ilyo ifi fintu no tuyofi twapalako ficitika, abengi bapeela Lesa umulandu, bamona kwati tapoosako amano.

Lelo, icishinka ca kuti, Lesa te ulenga amafya ayacusha abantunse. Na kuba, paliba imilandu iisuma iya kucetekelo kuti Lesa nomba line fye ali no kupwisha ububifi bonse ubwaletwa pa bantunse. Tulemulaalika ukuti mubelenge icipande cikonkelepo kabili mwalamono kuti Lesa alatusakamana icine cine.

[Futunoti]

Bushe Lesa E Ulenga Amafya?

Amafya ayengi aya bantunse ya kuiletelela fye. Ku ca kumwenako, amangalo yamo ayengaleta amasanso yalishibikwa bwino bwino. Na lyo line, abantu balaitumpa muli bucisenene, bucakolwa no kubomfya bubi bubi imiti, ukupeepa fwaka, ukwangala amangalo yabika ubumi bwabo mu kapoosa mweo, ukubutusha bamotoka, e lyo no kucita ne fintu fimbi. Nga ca kuti ifya musango yu fyaletako ukucula, bushe nani mwingapeela umulandu? Bushe ni Lesa nelyo uulecita ifyabulamo amano? Icebo ca kwa Lesa icapuutwamo citila: “Mwilufiwa: Lesa tasentekwa. Pantu ico umuntu alebyala, e co kabili akalobolola.”—Abena Galatia 6:7.

Na kabili, ilingi abantu balacitilana ifyabipa. Ilyo mu calo muli inkondo, kwena te kuti tutile Lesa e walenga ukucula kwingafuma mu kulwa. Ilyo ncitatubi acena umwikala calo munankwe, bushe ninshi ni Lesa e walenga kulya kucenwa nelyo imfwa? Awe iyo! Ilyo kateeka aletitikisha abantu, ukubacusha, no kwipaya abo ateka, bushe tufwile ukupeela Lesa umulandu? Teti mube amano mu kucite fyo.—Lukala Milandu 8:9.

Lelo ni shani ulwa minshipendwa ya bantu ababa mu bupiina bwa nakalya nakalya nelyo ababa ne nsala? Bushe ni Lesa e walenga? Awe te Lesa. Isonde lilafumya ifya kulya ifingi ifingakumana bonse. (Amalumbo 10:2, 3; 145:16) Mulandu wa kukana-akanya bwino ifya kulya ifingi ifyo Lesa apeela, e cilenga insala no bupiina ubu bwa-anana. Kabili ubu bwafya bwalifilwa ukupwa pa mulandu wa kaso ka bantu.

Icikalamba Icalenga

Nomba ninshi nani alenga ukulwala nelyo ukufwa pa mulandu wa bukote? Napamo kuti mwapapa nga mwaumfwo kuti ne fi fine fintu te Lesa alenga ukuti filecitika. Lesa tabumbile umuntu ukuti alekota no kufwa.

Ilyo abantunse ba kubalilapo babili, Adamu na Efa, babikilwe mwi bala lya Edene, Yehova afwaile bene ukwikala ubumi bwa muyayaya pe sonde lya paradaise. Lelo alefwaya isonde ukwikalwamo na bantu abali no kutasha pa bumi bapeelwe. E co, pa kuti Adamu na Efa batwalilile ukwikala muli Paradaise, balekabila ukuba ne cumfwila kuli Yehova, Kalenga wabo uwa kutemwa.—Ukutendeka 2:17; 3:2, 3, 17-23.

Ku ca bulanda, Adamu na Efa balipondweke. Efa asalilepo ukuumfwila Satana Kaseebanya. Alimubepele kabili mu kucite ci Satana alandile ati Lesa aletana Efa icintu cimo icisuma. E co asalilepo ukulaitungulula kabili afwaile ‘ukuba nga Lesa, uwaishibo busuma no bubi.’ Adamu na o alipondweke ngo mukashi wakwe.—Ukutendeka 3:5, 6.

Ilyo Adamu na Efa babembwike pa kucite ci, balangishe fye apabuuta ukuti tabalingile ukwikala umuyayaya. Baliculile ku fyafumine mu lubembu. Amaka no bukose bwabo fyalipwile, na mu kulekelesha balifwile. (Ukutendeka 5:5) Nangula ni fyo, ukupondoka kwabo kwafuminemo ifintu ifingi ifyabipisha. Tucili tulecula ku fyafuma mu lubembu lwa kwa Adamu na Efa. Umutumwa Paulo alembele ati: “Ulubembu lwaingilile mu muntu umo [Adamu] pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Abena Roma 5:12) Pa mulandu wa kupondoka kwa kwa Adamu na Efa, ulubembu ne mfwa fyasalanganine ku bantunse bonse kwati bulwele bwabipisha.