Abaleikala mu Brittany balishibe sana ukupanga no kwensha amato kabili balecita amakwebo na bena Britain. Mu citungu ca Cornwall, icabela ku kapinda ka ku kulyo aka Britain, mwali sana ulubwe lwa cela, ulwaba na muli bronze, kabili uku kwine eko Pytheas aile ilyo afumine ku Brittany. Mu fyo alembele alilondolwele ubukulu ne fyo icalo ca Britain cimoneka, icilanga ukuti afwile alishingulwike cilya calo.

Nangu cingati umo Pytheas apitile tamwaishibikwa bwino, cimoneka kwati alipitile pa kati ka Britain na Ireland, no kuyaiminina pa cishi ca Man, pantu ifyo apimine pa muku walenga bubili fyalilingana sana napo akasuba kabela pali ifi fishi nga cafika akasuba pa kati. Ifyo apimine pa muku walenga butatu filanga ukuti afwile alileiminina na pa cishi ca Lewis icaba pa fishi beta ukuti Outer Hebrides ifyaba ku masamba ya Scotland. Ilyo afumine apa afwile alolele ku kapinda ka ku kuso pa fishi fya Orkney, ifyaba ku kapinda ka ku kuso aka Scotland pantu ifyebo alembele ifyo Pliny Mukalamba ayambwile fyatila ifi fishi fyonse pamo fyali 40.

Cimoneka kwati Pytheas abwelele ku Britain ukubomfya inshila ilya ine apitilemo pa kuya ku Thule kabili ilyo afikile alishingulwike Britain yonse. Tatwaishiba nampo nga alilefika na ku fyalo fya ku Bulaya ilyo ashilabwelelamo ku Mediterranean. Te mulandu ne fyo cali, Pliny Mukalamba atile Pytheas alishibe sana ifyalo ukwalefuma amber. Ifyalo uko balefumya amber kale fyali calo ca Jutland, icaba nomba mu calo ca Denmark, e lyo na mu lulamba lwaba ku kapinda ka ku kulyo aka bemba ya Baltic. Pytheas afwile aumfwile pali ishi ncende ilyo aile ku fyabu fyabela ku kabanga ka Britain, kabili ukulingana ne fyo twaishiba, Pytheas talandapo ukuti alifikile kuli ishi ncende.