Bushe Ulupwa Lwenu Luleipekanya Ukupusuka?

¹ Ifyo Baibolo yasobele kabili ifilecitika muno nshiku filangilila ukuti impela ya cino calo cabipa ili mupepi. Pali ino nshita twikala mu nshita ishayafya ishapalana sana ne shaliko ilyo Ilyeshi talilaisa. (Mat. 24:37-39) Noa alipuswike ubonaushi bwa cilya calo ca kale pantu ‘aleenda na Lesa.’ (Ukute. 6:9) Noa afwile alisambilishe ulupwa lwakwe ifyo Yehova afwaya pantu nabo balipuswike. Kuti twapashanya shani Noa no kuipekanya pamo no lupwa lwesu ukupusuka impela ya buno bwikashi bubifi?

² Kashimikila wa Bulungami: Noa alibombeshe nga nshi pa myaka 40 ukufika ku 50 nga “kashimikila wa bulungami.” (2 Pet. 2:5) Abantu aali nabo, nampo nga basambilile imisango kuli bamalaika bapondweke nangu iyo, balemuseka ilyo aleshimikila. Ilingi line nga tulebila imbila nsuma tulasanga abantu abashifwaya ukumfwa e lyo nabatupumya, ukulangilila fye ukuti impela ya buno bwikashi naipalama. (2 Pet. 3:3, 4) Lelo, ukupusanako na bantu bali mu nshiku sha kwa Noa, abengi muno nshiku balomfwa ku fyo tubashimikila kabili ‘balekonkomokela’ ku kupepa Yehova. (Esa. 2:2) Tukaipususha ‘fwe bene na baletuumfwa’ nga tuleshimikila ukwabula ukuleka. (1 Tim. 4:16) Kanshi abafyashi balingile ukusambilisha abana babo ukupitila mu fyo balanda ne fyo bacita ukuti umulimo wa kushimikila walicindama!—2 Tim. 4:2.

³ Filya Fine fye “E fyo Acitile”: Pa kuti Noa no lupwa lwakwe bapusuke baali no kukonka ifyo Yehova alebeba. (Ukute. 6:22) Kanshi na ifwe muno nshiku tulingile ‘ukulaumfwila’ amashiwi yaba mu Baibolo no kumfwila umusha wa cishinka. (Yako. 3:17) Mu lupwa lumo umwali abana 6, pali ino nshita balikula, bebukisha ifyo bashibo balekonka ukufunda uko tupokelela ukufuma ku kuteyanya kwa kwa Yehova. Baletungulula isambililo lya lupwa cila mulungu kabili balesenda no lupwa mwi bala pa mpela ya mulungu nga fintu batukoselesha. Bale-esha na maka ukuya no mwana umo mu kushimikila cila mulungu. Filya fine fye batukoselesha e fyo uyu mufyashi alecita kabili ukubombesha kwakwe kwalengele abana bakwe bonse 6 bakula bwino no kuba ababomfi ba cishinka aba kwa Yehova.

⁴ Impela ya buno bwikashi ili no kwisa pa nshita tushile-enekela. (Luka 12:40) Ifwe no lupwa lwesu tukaba abaiteyanya bwino ukupusuka nga twapashanya Noa e lyo twaba ne citetekelo!—Heb. 11:7.