Bamukamfwilwa—Finshi Bakabila? Kuti Mwabafwa Shani?

Ba Jeanne bali mu ng’anda yabo iinono, baumfwa insala kabili bapekanya ifya kulya. Lintu balolesha pa tebulo, basanga ukuti babikilepo imbale shibili . . . awe e fyo batendeka no kuloosha. Pa mulandu wa kuti balibeleshe, ba Jeanne bacipekanya ifya kulya ifya bantu babili! Napapita imyaka ibili apo abena mwabo bafwila.

ABASHAFWILWAPO te kuti beshibe ifyo abafwilwa abena mwabo bakalipwa. Na kuba, palapita sana inshita pa kuti umuntu asumine ukuti umwina mwakwe uo atemenwe nga nshi alifwa. Ba Beryl, abali ne myaka 72, balifililwe ukusumina ilyo abena mwabo bafwile mu kupumikisha. Batile: “Nalemona kwati ndelota fye. Nalifililwe ukusumina ukuti tabakatale ababwela ku ng’anda na kabili.”

Abo baputula ukuulu nelyo ukuboko limo bomfwa kwati e ko kuli. E fyo ciba na ku baleloosha abena mwabo, limo nga bali mu cintubwingi balamona abena mwabo nelyo basanga ukuti balesosha abena mwabo!

Ba Beryl, abo tulandilepo, batile: “Abanandi balingafwile sana. Lelo, abengi tabalefwaya ukulanda pa balume bandi, ba John. Cali fye kwati tabatalile ababa nako, kabili ici calenkalipa.”

Ba Paul, abo abakashi bafwile kuli kansa, balondolola umulandu baletemenwa nga ca kuti abanabo babeta ukuti baye nabo kumo. Batile: “Limo nalefwaya fye ukuba neka nelyo ukwikala tondolo. Lelo nga nayaishako na banandi, naleumfwa bwino; nshaletalalilwa sana. Nalemona ukuti abantu balensakamana, kabili ici calelenga ukuti nilaba sana no bulanda.”b

Ba Paul, abo tulandilepo, balilondolwele ifyo ca-afya ukuleka ukulatontonkanya pa fyo baleikala na bena mwabo. Batile: “Ine no mukashi wandi twali kwati tumuti tubili utwalekulila pamo utwapombana. Nomba ilyo umukashi wandi afwile, cali kwati batemapo kamo e lyo akashala kalamoneka fye cimbi cimbi. Tacali bwino ukushala neka.”

Ba Herbert, abo papita imyaka 6 apo abakashi bafwila, batile: “Naletemwa sana nga ca kuti abantandalile baikala no kulakutika ilyo ndelanda ifyo naleumfwa pali iyo nshita. Ninjishiba ukuti limo tacalebangukila ukuba na ine, lelo naletasha ifyo balenangulukilako.” Ba Paul batile ifyalecita umunabo fyalebafika sana pa mutima pantu aleipusha ifyo baleumfwa. Basosele ukuti, “naletemwa ifyo alenakilila pa kunjipusha ifyo naleumfwa pali iyo nshita kabili ilingi line nalemweba ifyo naleumfwa.”—Amapinda 18:24.