“NAUMFWILE ukutitikisha ukukalamba pali ine ukwa kushimaisha ukuyumfwa kwandi,” e fyalondolola Mike pa kwibukisha imfwa ya kwa wishi. Kuli Mike, ukushimaisha ubulanda bwakwe bwali e bwaume. Lelo pa numa aishileiluka ukuti alilubile. E co lintu cibusa wa kwa Mike alufishe wishikulu, Mike alishibe ica kucita. Asoso kuti: “Imyaka inono iyapitapo, nga namupampanshishe fye pa kubeya no kusoso kuti, ‘Shipa uli mwaume.’ Nomba namwikete pa kuboko no kusoso kuti, ‘Uyumfwe mu nshila iili yonse ulefwaya ukuyumfwilamo. Calakwaafwa ukubombapo. Nga ulefwaya mfumepo, nalafumapo. Nga ulefwaya mbepo, nalabapo. Lelo wiyumfwa uwa mwenso ukulumbulula ukuyumfwa.’”

Umukashana umo alondolola fintu cibusa wapalamisha amwaafwile ifya kubombapo lintu nyina afwile. Ebukisho kuti: “Cibusa wandi lyonse alebapo. Alelila na ine. Alelanda na ine. Naleba fye uwakakuka ne nkuntu shandi, kabili ico cali icakatama kuli ine. Nshali no kuba na nsoni pa lwa kulila.” (Mona Abena Roma 12:15.)