Ababomfi Ba Kwa Yehova Aba Nsansa

“Ba nsansa abaibukila ukuti balakabila ifya ku mupashi.”—MATEO 5:3.

1. Insansa sha cine cine cinshi, kabili cinshi shilangilila?

ABANTU ba kwa Yehova balaipakisha insansa icine cine. Kemba wa malumbo Davidi atile: “Ba nsansa abantu abo Yehova e Lesa wabo!” (Amalumbo 144:15, NW) Ukuba ne nsansa cipilibula ukumfwa bwino. Insansa sha cine cine, ishifuma ku mutima, shibako ilyo umo aishiba ukuti alasenaminwa na Yehova. (Amapinda 10:22) Insansa sha musango yo shilangilila ukuti twaliba na bucibusa busuma na Shifwe wa ku muulu no kutila tulekushiwa pa kwishibo kuti tulecita ukufwaya kwakwe. (Amalumbo 112:1; 119:1, 2) Ne co twingatemwa sana ukwishiba ca kuti Yesu atantawilile ifintu 9 ifingatulenga ukuba ne nsansa. Ukubebeta ifi fintu muli cino cipande ne cikakonkapo kukatwafwa ukwishiba ifyo twingaba ne nsansa nga ca kuti tulebombela Yehova “Lesa wa nsansa,” mu busumino.—1 Timote 1:11.

Ukwibukila Ukuti Tulakabila Ifya ku Mupashi

2. Ni lilali lintu Yesu alandile pa nsansa, kabili mashiwi nshi abalilepo ukusosa?

² Mu 31 C.E., Yesu alandile ilyashi lyaishibikwa sana mu calo conse. Litwa ukuti Ilyashi lya pa Lupili pantu Yesu alilandile pa lupili mupepi na Bemba wa Galili. Ilandwe lya kwa Mateo litila: “Ilyo [Yesu] amwene amabumba aninine ulupili; kabili ilyo aikele, abasambi bakwe baishile kuli wene; kabili ayasamwine akanwa kakwe no kutendeka ukubasambilisha ati: ‘Ba nsansa abaibukila ukuti balakabila ifya ku mupashi, pantu ubufumu bwa mu muulu bwabo.’” Nga kuyapilibula fye nga filya fine Yesu ayasosele, aya mashiwi abalilepo ukulanda yatila: “Ba nsansa abalanda ku mupashi,” nelyo “Ba nsansa abalomba umupashi.” (Mateo 5:1-3; Kingdom Interlinear; utulembo twa pe samba) Baibolo wa Today’s English Version wena atila: “Ba nsansa abaishiba ukuti balanda lwa ku mupashi.”

3. Ukuba abaiceefya kulundako shani insansa?

³ Mu Lyashi lyakwe ilya pa Lupili, Yesu atile umuntu alaba ne nsansa sana nga ca kuti alibukila ukutila alakabila ifya ku mupashi. Abena Kristu baiceefya, abaishiba ukuti babembu, balapapaata Yehova ukuti alekelele imembu shabo mwi lambo lya cilubula ilya kwa Kristu. (1 Yohane 1:9) Kanshi balaba no mutende ne nsansa sha cine cine. Kemba wa malumbo atile: “Wa nsansa uo bucipondoka bwakwe bwalekelelwa, uo ulubembu lwakwe lwafimbwapo.”—Amalumbo 32:1; 119:165, NW.

4. (a) Kuti twalanga shani fyo twalibukila ukuti tulakabila ifya ku mupashi no kuti bambi na bo balakabila fyene? (b) Finshi fimbi ifilundako insansa shesu pa mulandu wa kuti twalibukila ifyo tulakabila ifya ku mupashi?

⁴ Ukwibukila ukuti tulakabila ifya ku mupashi kulatucincisha ukubelenga Baibolo cila bushiku, ukulanonkelamo mu ca kulya ca ku mupashi ico “umusha wa cishinka kabili uwashilimuka” apekanya “pa nshita yalinga,” no kulasangwa lyonse ku kulongana kwa Bwina Kristu. (Mateo 24:45; Amalumbo 1:1, 2; 119:111; AbaHebere 10:25) Ukutemwa abantu kulenga twaishiba ukuti balakabila ifya ku mupashi kabili kulatucincisha ukuba abapimpa mu mulimo wa kusambilisha no kushimikila imbila nsuma ya Bufumu. (Marko 13:10; Abena Roma 1:14-16) Ukwebako bambi icine ca mu Baibolo kulatuletele nsansa. (Imilimo 20:20, 35) Na kabili insansa shilafulilako nga twaetetula pe subilo lishaiwamina ilya Bufumu na pa mapaalo bukaleta. Isubilo lya “mukuni unono” uwa Bena Kristu basubwa lya kupeelwa ubumi bwa bumunshifwa ku muulu ilyo bakalateka mu Bufumu bwa kwa Kristu. (Luka 12:32; 1 Abena Korinti 15:50, 54) ‘Impaanga shimbi’ shena shisubila ukupeelwa ubumi bwa muyayaya muli paradaise pe sonde ilikalatekwa no Bufumu bwa kwa Lesa.—Yohane 10:16; Amalumbo 37:11; Mateo 25:34, 46.

Ifyo Abaloosha Bengaba ne Nsansa

5. (a) Amashiwi ya kuti “abaloosha” yalola mwi? (b) Bushe abaloosha basansamushiwa shani?

⁵ Ilyo Yesu alumbwile cimbi icileta insansa, cimoneka kwati nalimo aleipilika fye. Atile: “Ba nsansa abaloosha, pantu bakasansamushiwa.” (Mateo 5:4) Bushe umuntu kuti aba shani ne nsansa ilyo aleloosha? Pa kumfwikisha umo Yesu aloseshe, tulingile ukwishiba umusango wa kuloosha alelandapo. Umusambi Yakobo alondolwele ukuti ukukanapwililika kwesu cintu cimo icingatulenga ukuloosha. Alembele ati: “Sangululeni iminwe yenu, mwe babembu, kabili sangululeni imitima yenu, mwe ba mitima ibili. Beni no bulanda, loosheni no kulila. Lekeni inseko shenu shisanguke ukuloosha, no kusekelela kwenu kusanguke inkumbabulili. Iceefyeni mu menso ya kwa Yehova, na o akamusansabika.” (Yakobo 4:8-10) Ababa no bulanda pa mulandu wa kuti babembu, balasansamushiwa ilyo basambilila ukuti imembu shabo kuti shalekelelwa nga batetekela ilambo lya cilubula ilya kwa Kristu no kulacito kufwaya kwa kwa Yehova, pantu e kulangilila ukuti umuntu alilapila icine cine. (Yohane 3:16; 2 Abena Korinti 7:9, 10) Nga bacite fyo, kuti baba na bucibusa busuma na Yehova ne subilo lya kumubombela, ukumulumbanya no kwikala ku ciyayaya. Ici cilabaletela insansa icine cine.—Abena Roma 4:7, 8.

6. Ni mu mano nshi bamo baloosesha, kabili basansamushiwa shani?

⁶ Amashiwi ya kwa Yesu yasanshamo na baloosha pa mulandu wa fya muselu filecitika muli cino calo. Yesu atile ukusesema kwa kwa Esaya 61:1, 2 kwafishiwepo muli wena. Uku kusesema kutila: “Umupashi wa kwa Shikulu Yehova waba pali ine, pa kuti Yehova ansubila ku kubile mbila nsuma ku balanda; antuma ku kukakililako abafunaike misana, . . . ku kusansamusha bonse abaloosha.” Uyu mulimo Yesu atuminwe ukubomba ulabombwa na lelo line na Bena Kristu basubwa abacili pe sonde, kabili bafwiwa na banabo, ‘impaanga shimbi.’ Bonse balabombako umulimo wa mampalanya uwa kushila akashilwa pa mpumi sha “bantu abateta no kulila pa fya muselu fyonse ifilecitwa mu kati ka uko [umusumba wa busangu uwa Yerusalemu, uwimininako Kristendomu].” (Esekiele 9:4) Aba baloosha balasansamushiwa ku ‘mbila nsuma ya bufumu.’ (Mateo 24:14) Baliba ne nsansa pa kwishibo kuti nomba line ubwikashi bwabipa ubwa kwa Satana buli no kupyanikwapo ne calo cipya ica kwa Yehova icalungama.

Ba Nsansa Abafuuke Mitima

7. Ni mwi ‘ukufuuka umutima’ kushalola?

⁷ Yesu atwalilile ukulanda Ilyashi lyakwe ilya pa Lupili. Atile: “Ba nsansa abafuuka imitima, pantu bakapyana isonde.” (Mateo 5:5) Limo limo umuntu nga alifuuka amonwa kwati aliba no bunake. Lelo, te fyo caba. Ilyo uwasoma Baibolo umo alelondolola umwalola ishiwi lyapilibulwa ukuti “abafuuke mitima,” alembele ati: “Icishibisha sana umuntu [uwafuuka umutima] ca kuti alailama sana. Te mu kuti alinakilila ico takwata amaka, nangu akuntukilwa fye pa kulanga ukutemwa, nelyo akutumana fye ico taishibapo nangu cimo. Lelo uwafuuka umutima muntu wa maka nga nshi uulama amaka yakwe.” Yesu umwine atile: “Nalifuuka kabili nalipetama umutima.” (Mateo 11:29) Na lyo line, Yesu ali uwashipa mu kulandilako ifishinte fyalungama.—Mateo 21:12, 13; 23:13-33.

8. Bushe ukufuuka umutima kwayampana ne mibele nshi, kabili cinshi tulingile ukubela abafuuke mitima ilyo tulebishanya na bambi?

⁸ Kanshi, ukufuuka umutima kwalyampana sana no kuilama. Na lintu umutumwa Paulo alependawila “ifisabo fya mupashi,” alumbwilile pamo ukufuuka no kuilama. (Abena Galatia 5:22, 23) Pa kulundulula ukufuuka, kano twayafwiwa no mupashi wa mushilo. Ukufuuka mibele iilenga Umwina Kristu ukuba pa mutende na bashasumina e lyo na ba mu cilonganino. Paulo alembele ati: “Fwaleni icitemwishi ne nkumbu, icikuuku, ubupete, ukufuuka, no kushishimisha. Twalilileni ukushipikishanya no kuitemenwa ukulekelelana.”—Abena Kolose 3:12, 13.

9. (a) Mulandu nshi ukuba abafuuke mitima kushapelela fye pa kubishanya bwino na bantu banensu? (b) Bushe abafuuke mitima ‘bapyana shani isonde’?

⁹ Na lyo line, ukuba abafuuke mitima takwapelela fye pa kubishanya bwino na bantu banensu. Ilyo twainashisha kuli bumulopwe bwa kwa Yehova mu kuitemenwa ninshi tulelangilila ukuti twalifuuke mitima. Yesu Kristu e ca kumwenako cesu. Ilyo ali pano calo, ali uwafuuka umutima kabili ali-inashishe umupwilapo ku kufwaya kwa kwa Wishi. (Yohane 5:19, 30) Yesu e ubalilapo ukupyana isonde pantu e Kateka wasontwa uwe sonde. (Amalumbo 2:6-8; Daniele 7:13, 14) “Impyani shinankwe,” ba144,000 abasalwa “mu bantunse” ku kuba “ishamfumu pe sonde,” e bo apyana na bo isonde. (Abena Roma 8:17; Ukusokolola 5:9, 10; 14:1, 3, 4; Daniele 7:27) Kristu pamo na bakateka banankwe, bakateka abaume na banakashi abengi nga nshi abapale mpaanga abo ilumbo lya mu kusesema lilandapo, ilitila: “Abalanda bakapyaninine calo, no kuilemeno bwingi bwa mutende.”—Amalumbo 37:11; Mateo 25:33, 34, 46.

Ba Nsansa Abomfwe Nsala ya Bulungami

10. Ni mu nshila nshi imo umo “abomfwe nsala ne cilaka ca bulungami” bakekushiwa?

¹⁰ Na cimbi icilenga insansa ico Yesu asosele ilyo alelanda ilyashi pa lupili lwa mu Galili ca kuti: “Ba nsansa abomfwe nsala ne cilaka ca bulungami, pantu bakekuta.” (Mateo 5:6) Yehova alibikila Abena Kristu ifipimo fya bulungami. E ico, abomfwe nsala ne cilaka ca bulungami bomfwe nsala ne cilaka ca kutungululwa na Lesa. Aba musango yu balishiba bwino ukuti babembu, tabapwililika kabili bafwaisha ukwiminina abasuminishiwa pa ntanshi ya kwa Yehova. Balaba ne nsansa pa kusambilila mu Cebo ca kwa Lesa ukuti nga balapila no kulomba ukulekelelwa ukupitila mwi lambo lya cilubula ilya kwa Kristu, bakaba na maka ya kwiminina abalungama pa ntanshi ya kwa Lesa!—Imilimo 2:38; 10:43; 13:38, 39; Abena Roma 5:19.

11, 12. (a) Bushe Abena Kristu basubwa balungamikwa shani? (b) Bushe icilaka ca bulungami ica banabo ba basubwa cikapwa shani?

¹¹ Yesu atile aba musango yo bakaba aba nsansa pantu “bakekushiwa.” (Mateo 5:6, Kingdom Interlinear) Abena Kristu basubwa abaitwa ku ‘kuteeka nge mfumu’ mu muulu pamo na Kristu ‘balalungamikilwa ku bumi.’ (Abena Roma 5:1, 9, 16-18) Yehova alabafyala no kubapokelela ukuba abana bakwe aba ku mupashi. Baba impyani shinankwe isha kwa Kristu, ishaitwa ku kuba ishamfumu kabili bashimapepo abakateka mu Bufumu bwa mu muulu.—Yohane 3:3; 1 Petro 2:9.

¹² Abanabo ba basubwa bena tabalalungamikilwa ku bumi. Na lyo line, Yehova abamona kwati balilungama pantu balitetekela mu mulopa wasumiwa uwa kwa Kristu. (Yakobo 2:22-25; Ukusokolola 7:9, 10) Apo ni bacibusa ba kwa Yehova abakapusuko “bucushi bukalamba,” bamonwa nga balungama. (Ukusokolola 7:14) Ilyo “imyulu ipya” ikalateka, icilaka cabo ica bulungami cikapwa kabili bakapanga isonde lipya ‘umukekala ubulungami.’—2 Petro 3:13; Amalumbo 37:29.

Ba Nsansa aba Luse

13, 14. Ni nshila nshi twingalangilamo kuti tuli ba luse, kabili mapaalo nshi yaba mu kuba aba luse?

¹³ Ilyo Yesu atwalilile ukulanda Ilyashi lyakwe ilya pa Lupili, atile: “Ba nsansa aba luse, pantu bakabelelwa uluse.” (Mateo 5:7) Nga ni mu cilye, bamona kwati uluse ni filya shimafumu abweshamo umutima no kukanakanda impulamafunde ukulingana ne fyo ifunde lilanda. Lelo, ici capusanako ne fyo libomfiwa muli Baibolo. Mwena ishiwi lyapilibulwa ati “uluse” lilosha sana ku kulangulukilako nelyo ukuba ne nkumbu ica kuti wailulula abalecula. E ico, aba luse balalanga ukuti baliba ne cililishi. Icilangililo ca kwa Yesu ica mwina Samaria ca kumwenako cisuma ica muntu ‘uwabelele uluse’ umunankwe uwali mu kukabila.—Luka 10:29-37.

¹⁴ Nga tulefwaya ukuti tube ne nsansa shaba mu kulanga uluse, tufwile ukulacita ifya nkumbu ku bali mu kukabila. (Abena Galatia 6:10) Yesu ali ne cililishi ku bantu. Ilyo abamwene, “abekatilwe inkumbu, pantu bali nge mpaanga ishabula kacema. Kabili atendeke ukubasambilishe fintu ifingi.” (Marko 6:34) Yesu alilwike ukuti ifya ku mupashi e fyacindamishe ifyo abantu balekabila. Na ifwe bene kuti twaba ne cililishi no luse nga tulepeelako bambi ico bakabila sana, e kutila ‘imbila nsuma ya bufumu.’ (Mateo 24:14) Na kabili kuti twayafwilisha na Bena Kristu banensu abakoloci, bamukamfwilwa, abana ba nshiwa, no ‘kusansamusha abakungumane mitima.’ (1 Abena Tesalonika 5:14; Amapinda 12:25; Yakobo 1:27) Ukucite fi kukatuletele nsansa, na Yehova akatubelelo luse.—Imilimo 20:35; Yakobo 2:13.

Abasanguluke Mitima Kabili aba Mutende

15. Bushe kuti twaba shani abasanguluke mitima kabili aba mutende?

¹⁵ Yesu alandile pa fintu fileta insansa ifyalenga 6 na 7 ilyo atile: “Ba nsansa abasanguluke mitima, pantu bakamona Lesa. Ba nsansa aba mutende, pantu baketwa ‘abana ba kwa Lesa.’” (Mateo 5:8, 9) Umuntu uwaba no mutima wasanguluka ni ulya uwa busaka mu mibele, na lwa ku mupashi, kabili ali-ipeela umupwilapo kuli Yehova. (1 Imilandu 28:9; Amalumbo 86:11) Ishiwi lya ciGriki ilyapilibulwa ati “aba mutende” nga kulikonka fye lyalola mu kuti “abapango mutende.” Aba mutende bekala mu mutende na Bena Kristu banabo kabili balatukuta ukuba aba mutende na kuli bambi. (Abena Roma 12:17-21) ‘Balafwaya umutende no kuukonkelela.’—1 Petro 3:11.

16, 17. (a) Cinshi abasubwa betilwa ukuti “abana ba kwa Lesa” kabili ‘bamona shani Lesa’? (b) Bushe aba “mpaanga shimbi” ‘bamona shani Lesa’? (c) Ni mu mano nshi aba “mpaanga shimbi” bakabela “abana ba kwa Lesa,” kabili ni lilali?

¹⁶ Aba mutende kabili abasanguluke mitima balaiwa ukuti “baketwa ‘abana ba kwa Lesa’” kabili “bakamona Lesa.” Abena Kristu basubwa balifyalwa ku mupashi kabili balipokelelwa ukuba “abana” ba kwa Yehova nangu ni lintu bacili pano calo. (Abena Roma 8:14-17) Ilyo babuushiwa ku kuba na Kristu mu muulu, babombela ku cinso ca kwa Yehova kabili balamumona.—1 Yohane 3:1, 2; Ukusokolola 4:9-11.

¹⁷ Aba mutende, e kutila ‘impaanga shimbi,’ babombela Yehova pe samba lya kwa Kacema Musuma, Yesu Kristu, uuba ‘Shibo wa Nshita pe.’ (Yohane 10:14, 16; Esaya 9:6) Abakacimfya ubwesho bwa kulekelesha ilyo Imyaka Ikana Limo iya Kuteka kwa kwa Kristu ikapwa, bakapokelelwa ukuba abana ba kwa Yehova aba pano calo no “kukwata ubuntungwa bwa bukata ubwa bana ba kwa Lesa.” (Abena Roma 8:21; Ukusokolola 20:7, 9) Ilyo balolela ubu bulayo, beta Yehova ati Shibo pantu bali-ipeela kuli wena ico balishiba ukuti e Kapeela wa Bumi. (Esaya 64:8) Nge fyo cali kuli Yobo na Mose abaikeleko kale, na bo ‘balamona Lesa’ na menso yabo aya citetekelo. (Yobo 42:5; AbaHebere 11:27) Ku ‘menso ya mitima yabo’ na mu kwishiba Lesa bwino bwino, balimona imibele ya kwa Yehova iishaiwamina kabili balamupashanya apapela amaka yabo ilyo bacito kufwaya kwakwe.—Abena Efese 1:18; Abena Roma 1:19, 20; 3 Yohane 11.

18. Ukulingana ne fintu 7 ifileta insansa ifyo Yesu atantawilile, ni bani baba ne nsansa pali lelo?

¹⁸ Natumona ifyo abaibukila ukuti balakabila ifya ku mupashi, abaloosha, abafuuke mitima, abomfwe nsala ne cilaka ca bulungami, aba luse, abasanguluke mitima, na ba mutende balasanga insansa sha cine cine mu kubombela Yehova. Lelo aba bantu balabakaanya kabili balabapakasa. Bushe ifi filapwisha insansa shabo? Ili lipusho likasukwa mu cipande cikonkelepo.

Aba Nsansa Nangu Balapakaswa

“Muli aba nsansa ilyo abantu bamupontela no kumupakasa no kumubepesha umusango onse wa bubifi pa mulandu wandi.”—MATEO 5:11.

1. Cinshi Yesu aebele abakonshi bakwe icakumine ukupakaswa ne nsansa?

UMUKU wa kubalilapo Yesu aebele abatumwa ukuya ku kushimikila Ubufumu, abasokele ukuti abantu bali no kulabakaanya. Abebele ati: “Mukapatwa ku bantu bonse pa mulandu we shina lyandi.” (Mateo 10:5-18, 22) Na lyo line, mu Lyashi lyakwe ilya pa Lupili, Yesu aebele abatumwa bakwe na bambi ukuti ukukaanya kwa musango yo takwali na kubapusula insansa sha cine cine. Na kuba, Yesu ayampenye insansa sha Bena Kristu ku kupakaswa! Bushe ukupakaswa kuti kwaleta shani insansa?

Baculila Ubulungami

2. Nge fyo Yesu no mutumwa Petro basosele, kucula nshi kuleta insansa?

² Icileta insansa icalenga 8 ico Yesu asosele caba muli aya mashiwi: “Ba nsansa abapakaswa pa mulandu wa bulungami, pantu ubufumu bwa mu muulu bwabo.” (Mateo 5:10) Kwena, ukucula takwawama. Umutumwa Petro alembele ati: “Pantu kutashiwa nshi, nga mushipikisha ilyo mulebembuka no kutobwa amapi? Lelo nga mushipikisha ilyo mulecita icisuma no kucula, ici cena cintu icapokelelwa kuli Lesa.” Kabili atwalilile no kuti: “Lelo, umo uwa muli imwe ecula nga kepaya nelyo umupuupu nelyo incitatubi nelyo uwa mulomo. Lelo nga acula pa kuba Umwina Kristu, eba na nsoni, lelo mwi shina ili e mo alecindikila Lesa.” (1 Petro 2:20; 4:15, 16) Ukulingana na mashiwi ya kwa Yesu, ukucula kuleta insansa nga ca kuti umuntu aleculila ubulungami.

3. (a) Bushe ukupakashilwa pa mulandu wa bulungami kwalola mwi? (b) Ilyo Abena Kristu ba kubalilapo bapakeswe baumfwile shani?

³ Ubulungami bwa cine cine bwaba kucito kufwaya kwa kwa Lesa no kumfwila amafunde yakwe. E ico, ukuculilo bulungami cipilibula ukucula pa mulandu wa kukanafwaya ukupula mu fipimo fya kwa Lesa nelyo mu fyo afwaya. Ico abatumwa balepakashilwa ku ntungulushi sha baYuda ni pa mulandu wa kuti balekaana ukuleka ukushimikila mwi shina lya kwa Yesu. (Imilimo 4:18-20; 5:27-29, 40) Bushe ukupakaswa kwalengele baleka ukusekelela nelyo ukuleka ukushimikila? Nakalya! “Bafumine pa cinso ca cilye ca Sanhedrini, balesekelela ico balingilwe abawamino kusaalwilwa ishina lyakwe. Kabili cila bushiku mwi tempele na ku ng’anda ne ng’anda batwalilile ukwabulo kuleka ukusambilisha no kubila imbila nsuma pali Kristu, Yesu.” (Imilimo 5:41, 42) Uku kupakaswa kwabalengele ukusekelela no kubalenga ukupimpa na kabili mu mulimo wa kubila. Pa numa, Abena Kristu ba kubalilapo balipakeswe ku bena Roma pantu balikeene ukupepa kateka.

4. Milandu nshi imo ilenga ukuti Abena Kristu balepakaswa?

⁴ Na muno nshiku, Inte sha kwa Yehova balipakaswa pa mulandu wa kuti balakaana ukuleka ukushimikila ‘imbila nsuma iyi ya bufumu.’ (Mateo 24:14) Ilyo Inte sha kwa Yehova babalesha ukulongana kwabo ukwa Bwina Kristu, balasalapo ukucula ukucila ukupula mwi funde lya mu Baibolo ilya kulongana pamo. (AbaHebere 10:24, 25) Balipakaswa pa mulandu wa kukanaipoosa mu milandu ya calo, kabili limo limo, na pa mulandu wa kuti balakaana ukubomfya umulopa bubi bubi. (Yohane 17:14; Imilimo 15:28, 29) Na lyo line, ukufwaya ukucito bulungami muli yu musango kwaliletela abantu ba kwa Lesa aba muno nshiku umutende ne nsansa.—1 Petro 3:14.

Bapontelwa pa Mulandu wa kwa Kristu

5. Cinshi cilenga sana abantu ba kwa Yehova ukupakaswa pali lelo?

⁵ Icalenga 9 ico Yesu alandilepo mu Lyashi lyakwe ilya pa Lupili na co cine cakuma ukupakaswa. Atile: “Muli aba nsansa ilyo abantu bamupontela no kumupakasa no kumubepesha umusango onse wa bubifi pa mulandu wandi.” (Mateo 5:11) Icilenga sana abantu ba kwa Yehova ukupakaswa ni co tabaaba ulubali lwa buno bwikashi bwabipa. Yesu aebele abasambi bakwe ukuti: “Amuba aba pano calo, aba pano calo nga batemenwe ababo bene. Nomba apo tamuli ba pano calo, lelo nalimusala mu ba pano calo, e co aba pano calo bamupatila.” (Yohane 15:19) Ifi fine e fyo no mutumwa Petro asosele, ilyo atile: “Balapapa kabili balamusaalula pantu tamwenda na bo kabili muli iyi mibele iya kutotobela kumo kwine ukwa kuipoosaika.”—1 Petro 4:4.

6. (a) Mulandu nshi abashalapo na banabo babapontelela no kubapakasa? (b) Bushe ukupontelwa kulalenga insansa shesu ukucepa?

⁶ Natumona kale ukuti Abena Kristu ba kubalilapo balipakeswe pa mulandu wa kuti balikeene ukuleka ukushimikila mwi shina lya kwa Yesu. Kristu e wapeele abakonshi bakwe uyu mulimo, atile: “Mukaba inte shandi . . . ukufika ku mpela ya pano isonde.” (Imilimo 1:8) Abashalapo aba busumino pali bamunyina ba kwa Kristu abasubwa, ukwafwiwa na banabo ba cishinka abe ‘bumba likalamba,’ balibomba uyu mulimo mu kupimpa. (Ukusokolola 7:9) E ico, Satana alalwisha ‘abashalako ku lubuto lwakwe [ulubuto lwa “mwanakashi,” e kutila ukuteyanya kwa kwa Lesa ukwa mu muulu], ababaka amafunde ya kwa Lesa kabili abakwata umulimo wa kushimika ubunte bwa kwa Yesu.’ (Ukusokolola 12:9, 17) Fwe Nte sha kwa Yehova tushimikila pali Yesu, Imfumu ileteka iya Bufumu ubukonaula amabufumu ya bantunse ayakaanya icalo cipya ica kwa Lesa icalungama. (Daniele 2:44; 2 Petro 3:13) E mulandu wine batupontelela no kutupakasa, na lyo line twaliba ne nsansa ukuculila pa mulandu we shina lya kwa Kristu.—1 Petro 4:14.

7, 8. Bufi nshi bakakaanya balebepesha Abena Kristu ba kubalilapo?

⁷ Yesu atile abakonshi bakwe bafwile ukuba aba nsansa na lintu ‘balebabepesha umusango onse uwa bubifi’ pa mulandu we shina lyakwe. (Mateo 5:11) Ici e cacitikile Abena Kristu ba kubalilapo. Ilyo umutumwa Paulo ali mu cifungo ku Roma, nalimo mu 59 ukufika ku 61 C.E., intungulushi sha baYuda kulya shasosele pa Bena Kristu ati: “Cine cine ici cakaniko caishibikwa kuli ifwe ukuti konse konse cisoselwa ububi.” (Imilimo 28:22) Paulo na Sila bababepeshe ukuti ‘balipinwine aba pano isonde,’ no kuti balesonga abantu ‘ukulakaanya ifipope fya kwa Kaisare.’—Imilimo 17:6, 7.

⁸ Ilyo kalemba wa lyashi lya kale K. S. Latourette alembele pa Bena Kristu abaikeleko ilyo Ubuteko bwa Roma bwaleteka, atile: “Balebabepesha ubufi bwalekanalekana. Apo balekaana ukusefyako inshiku abasenshi balesefya, Abena Kristu balebabepesha ukuti ni bamukaanalesa. Ico tabalecitako fimo ifya mu bwikashi, pamo nge mitebeto ya cisenshi, nelyo ifisela . . .—balebapumya ukuti balipata abantu. . . . Balebabepesha no kuti Abena Kristu abaume na banakashi balekumana ubushiku . . . kabili balecita ubulalelale. . . . Apo [Icibukisho ca mfwa ya kwa Kristu] calesefiwa na basumina fye epela, Abena Kristu balebatunganya ukuti lyonse baletuula ilambo lya kanya kabili balenwa umulopa wa kanya no kulya umubili wa kako.” Na kabili, apo Abena Kristu ba kubalilapo balekaana ukupepa kateka, balebamona ukuti balwani ba Calo.

9. Bushe Abena Kristu ba kubalilapo balifuupwilwe ilyo balebabepesha ubufi, kabili bushe caba shani pali lelo?

⁹ Ubu bufi tabwaleseshe Abena Kristu ba kubalilapo ukubomba umulimo wabo uwa kushimikila abantu imbila nsuma ya Bufumu. Mu myaka ya ba60 na 61 C.E., Paulo asosele ati “imbila nsuma” ‘yaletwale fisabo no kufushiwa pano calo ponse’ kabili asosele fye no kuti ‘yalibililwe ku cibumbwa conse ica mwi samba lya muulu.’ (Abena Kolose 1:5, 6, 23) Cimo cine e cicitika na lelo. Inte sha kwa Yehova balababepesha ubufi kwati fye ni filya balebepesha Abena Kristu ba kubalilapo. Na lyo line, umulimo wa kushimikila abantu ubukombe bwa Bufumu ulaya pa ntanshi kabili abaubomba balaba ne nsansa.

Balaba ne Nsansa Ukupakaswa nge Fyapakeswe Bakasesema

10, 11. (a) Mashiwi nshi Yesu alekelesheko ilyo alelanda pa cileta insansa icalenga 9? (b) Cinshi bakasesema bapakashilwe? Peeleni ifya kumwenako.

¹⁰ Yesu alekeleshe ukulanda pa cileta insansa icalenga 9 na mashiwi ya kuti: “Sekeleleni . . . , pantu e fyo bapakese na bakasesema abatangilile imwe.” (Mateo 5:12) Bakasesema abo Yehova atumine ku kusoka abena Israele babulwe cishinka balebasuula kabili ilingi line balebapakasa. (Yeremia 7:25, 26) Umutumwa Paulo nankwe alishibe ici kabili alembele ati: “Bushe kuli fimbi ifyo ningasosa? Pantu inshita kuti yancepela nga nati nkonkanyepo ukushimika ulwa . . . bakasesema bambi, abo ku citetekelo . . . bapokelele ukweshiwa kwabo mu kupumiwa no kufopaulwa, no kucilapo, mu fikakilo na mu fifungo.”—AbaHebere 11:32-38.

¹¹ Ilyo Ahabu Imfumu yabipa aleteka pamo no mukashi wakwe Yesebele, bakasesema ba kwa Yehova abengi balipaiwe ku lupanga. (1 Ishamfumu 18:4, 13; 19:10) Kasesema Yeremia bamubikile mu makusu kabili pa numa bamupoosele mu cilindi ca matipa. (Yeremia 20:1, 2; 38:6) Kasesema Daniele bamupoosele mu cilindi ca nkalamo. (Daniele 6:16, 17) Bonse aba bakasesema abaliko ilyo ubuKristu bushilatendeka balipakeswe pa mulandu wa kusoselako ukupepa kwasanguluka ukwa kwa Yehova. Bakasesema abengi balipakeswe ku ntungulushi sha mapepo isha baYuda. Yesu aitile bakalemba na baFarise ati “abana ba baipeye bakasesema.”—Mateo 23:31.

12. Cinshi fwe Nte sha kwa Yehova tucimwena ngo mucinshi ukucula nge fyaculile bakasesema ba busumino aba kale?

¹² Muno nshiku, fwe Nte sha kwa Yehova tulapakaswa ilingi line pantu tulashimikila abantu imbila nsuma ya Bufumu mu kupimpa. Abalwani besu balatubepesha abati “tulapatikisha abantu ukusanguke Nte,” lelo twalishiba ukuti e fyo balelengulula na bakapepa ba kwa Yehova aba busumino aba pa kale. (Yeremia 11:21; 20:8, 11) Mucinshi kuli ifwe ukucula nge fyaculile bakasesema ba busumino aba kale. Umusambi Yakobo alembele ati: “Mwe bamunyinane, moneni icipasho ca kucula no kutekanya kwa bakasesema, abalandiile mwi shina lya kwa Yehova. Moneni! Tuletila ba nsansa abashipikisha.”—Yakobo 5:10, 11.

Imilandu ya Cine Cine Iitulenga Ukuba aba Nsansa

13. (a) Cinshi tushifuupwilwa ilyo twapakaswa? (b) Cinshi citulenga ukushangila ilyo tulepakaswa, kabili ico bushininkisho bwa cinshi?

¹³ Ilyo twapakaswa, tatufuupulwa lelo tulasansamushiwa pa kwishibo kuti tulekonka bwino bwino mu ntampulo sha bakasesema, Abena Kristu ba kubalilapo, na Kristu Yesu wine. (1 Petro 2:21) Tulakoseleshiwa sana nga twabelenga amashiwi ya mu Malembo aya nkosho, pamo nga aya ayalembele umutumwa Petro ayatila: “Mwe batemwikwa, mwipapa umulilo uulepya muli imwe, icilecitika ku kumwesha, kwati cintu iceni icamuponena. Nga mwapontelwa pe shina lya kwa Kristu, muli aba nsansa, pantu umupashi wa bukata, kabili umupashi wa kwa Lesa, waikala pali imwe.” (1 Petro 4:12, 14) Ifyatucitikila fyalilenga twaishiba ukuti icilenga tushangile ilyo tulepakaswa ni co umupashi wa kwa Yehova waba pali ifwe kabili ulatukosha. Ukutungililwa no mupashi wa mushilo bushininkisho bwa kuti amapaalo ya kwa Yehova yaba pali ifwe, kabili ici cilatuletela insansa icine cine.—Amalumbo 5:12; Abena Filipi 1:27-29.

14. Milandu nshi itulenga ukusekelela ilyo tulepakashilwa pa mulandu wa bulungami?

¹⁴ Na kabili, ukukaanya no kupakashilwa pa mulandu wa bulungami kulatuletela insansa pantu kushininkisha ukuti tuleikala imikalile ya Bena Kristu ba cine iya kuipeelesha kuli bukapepa. Umutumwa Paulo alembele ati: “Bonse abafwaisha ukwikala umwabela ukuipeelesha kuli bukapepa muli Kristu Yesu bakapakaswa.” (2 Timote 3:12) Na kabili tulaba sana ne nsansa pa kwishibo kuti bucishinka bwesu bupeela ubwasuko ku kutunga kwa kwa Satana ukwa kuti icilenga ububumbo bonse ubwa kwa Yehova ukumubombela ni co fye balamwenamo. (Yobo 1:9-11; 2:3, 4) Tulasekelela ukwishibo kuti na ifwe bene tulafwilishako panono ukwebela bumulopwe bwa kwa Yehova ubwalungama.—Amapinda 27:11.

Angeni pa Cilambu Mukapokelela

15, 16. (a) Cinshi Yesu asosele ukuti e cingalenga ‘tulesekelela no kwanga’? (b) Cilambu nshi caba mu muulu ica Bena Kristu basubwa, kabili abanabo ‘impaanga shimbi’ na bo bakalambulwa shani?

¹⁵ Yesu apeele umulandu na umbi uwa kwangila ilyo twapatwa no kupakaswa nga filya fyapakeswe bakasesema ba kale. Ilyo alandile amashiwi ya kulekelesha pa cileta insansa icalenga 9, atile: “Sekeleleni no kwanga, pantu icilambu cenu cikalamba mu muulu.” (Mateo 5:12) Umutumwa Paulo na o alembele ati: “Icilambu ca lubembu ni mfwa, lelo ica bupe ico Lesa apeela bumi bwa muyayaya muli Kristu Yesu Shikulwifwe.” (Abena Roma 6:23) ‘Icilambu cikalamba’ bumi bwa muyayaya, kabili ico cilambu te kuti tucibombele. Bupe fye. Yehova e upeela ici cilambu, e co Yesu alandile ukuti caba “mu muulu.”

¹⁶ Abasubwa bapokelela “icilongwe ca bumi,” e kutila ubumi bwa bumunshifwa pamo na Kristu mu muulu. (Yakobo 1:12, 17) Ababa ne subilo lya kwikala pe sonde, ‘impaanga shimbi,’ balolelo kupyana ubumi bwa muyayaya muli paradaise wa pe sonde. (Yohane 10:16; Ukusokolola 21:3-5) Aya mabumba yabili te kuti yabombele ici “cilambu.” Abasubwa ne “mpaanga shimbi” bapeelwa icilambu kuli Yehova pa mulandu ‘wa cikuuku cakwe ica bupe fye icacilamo.’ E mulandu wine umutumwa Paulo asosa ukuti: “Kube ukutootela kuli Lesa pa ca bupe cakwe icishingalondololwa.”—2 Abena Korinti 9:14, 15.

17. Cinshi twingabela aba nsansa ilyo tulepakaswa no “kwanga” mu mampalanya?

¹⁷ Ku Bena Kristu, bamo abali no kupakaswa icibi kuli Kateka Nero, umutumwa Paulo alembele ati: “Natwange na lintu tuli mu bucushi, pa kwishibo kuti ubucushi buletako kushipikisha; ukushipikisha, na ko, kuletako ukusuminishiwa; ukusuminishiwa, na ko, kuletako isubilo, kabili isubilo taliseebanya iyo.” Asosele no kuti: “Sekeleleni mwi subilo. Mu bucushi mube abashipikisha.” (Abena Roma 5:3-5; 12:12) Nampo nga twaba ne subilo lya kwikala ku muulu nangu pe sonde, icilambu tupokelela pa mulandu wa kutwalilila aba cishinka ilyo tule-eshiwa cikalamba nga nshi ukucila ica kwesha conse twingashipikisha. Twaliba no kusekelela ukukalamba nga nshi pa mulandu we subilo twakwata ilya kwikala ku ciyayaya no kubombela Shifwe wa kutemwa, Yehova, no kumulumbanya mu kuteka kwa Mfumu Kristu Yesu. Mu mampalanya, ‘tulanga’ icine cine.

18. Cinshi ico inko shikacita ilyo impela ya buno bwikashi ilepalamina, kabili cinshi Yehova akacita?

¹⁸ Mu fyalo fimo, Inte sha kwa Yehova balipakaswa kabili bacili balapakaswa. Yesu asokele Abena Kristu ba cine mu kusesema kwakwe ukulanda pa mpela ya bwikashi buno, atile: “Mukaba abapatwa ku nko shonse pa mulandu we shina lyandi.” (Mateo 24:9) Ilyo tulepalamina ku mpela ya buno bwikashi, Satana akasonga inko ukupata sana abantu ba kwa Yehova. (Esekiele 38:10-12, 14-16) Ici e cikeshibisha ukuti inshita ya kwa Yehova iya kucitapo cimo naifika. “Nkaikusha no kuishisha no kuilengo kwishibwa ku menso ya nko ishingi; e lyo shikeshibo kuti nine Yehova.” (Esekiele 38:23) Lyena, Yehova akashisha ishina lyakwe ilikalamba kabili akapokolola abantu bakwe ku kupakaswa. Kanshi, “wa nsansa umuntu uushipikisha.”—Yakobo 1:12.

19. Cinshi tufwile ukulacita ilyo tulelolela “ubushiku bwa kwa Yehova” ubukalamba?

¹⁹ Ilyo “ubushiku bwa kwa Yehova” ubukalamba bulepalamina, shi natulesekelela pantu twalingwa “abawamino kusaalwilwa” ishina lya kwa Yesu. (2 Petro 3:10-13; Imilimo 5:41) Nge fyacitile Abena Kristu ba kubalilapo, natutwalilile “ukwabulo kuleka ukusambilisha no kubila imbila nsuma pali Kristu” na pa Bufumu bwakwe ilyo tulelolela icilambu mwi sonde lipya ilyalungama ilya kwa Yehova.—Imilimo 5:42; Yakobo 5:11.