Abalelemba Baibolo babomfeshe ishiwi lya ciHebere ruʹach nelyo ilya ciGriki pneuʹma ilyo balelanda pa “mupashi.” Amalembo ayene yalilondolola umwalola aya mashiwi. Ku ca kumwenako, Amalumbo 104:29 yatila: “Mufise cinso cenu, fyasakamikwa; mufumyo mupu [nelyo umupashi, NW] wa fiko [ruʹach], fyaleko mweo, fyabwelela na ku lukungu lwa fiko.”

E ico kanshi ukulingana ne fi fikomo, “umupashi” e ulenga umubili ukuba uwa bumi. Umubili nga taukwete mupashi, ninshi naufwa. E ico, mu Baibolo ishiwi lya ruʹach lyayalulwa ukuti “umupashi,” “amaka,” nelyo umupu wa mweo. Ku ca kumwenako, Lesa alandile pa Lyeshi lyaliko mu nshiku sha kwa Noa ati: “Ine, mona, nkalete lyeshi lya menshi pe sonde ku konaule ca mubili conse umuli umupu wa mweo [ruʹach], ukucifumya mwi samba lya muulu; conse icili pe sonde cikaleko mweo.” (Ukutendeka 6:17; 7:15, 22) E ico “umupashi” maka yashimoneka (ayalenga ubumi ukubako) ayaba mu fibumbwa fyonse ifya mweo.