Tulapeelwa Amaka ya Kucimfya Amatunko no Kushipikisha Ilyo Twafuupulwa

“Mukapokelela amaka ilyo umupashi wa mushilo ukesa pali imwe.”—IMIL. 1:8.

1, 2. Bwafwilisho nshi Yesu alaile abasambi bakwe, kabili mulandu nshi balebufwaila sana?

YESU alishibe ukuti ku maka yabo fye, abasambi bakwe nga balifililwe ukukonka ifyo abebele. Apo umulimo wa kushimikila wali uukalamba sana, na balebalwisha bali aba maka, e lyo kabili abasambi bene bali bantunse fye abenganaka, calimoneke bwino bwino ukuti balekabila amaka ayacila pa ya buntunse. E ico, ilyo talaya ku muulu, Yesu akoseleshe abasambi bakwe ukuti: “Mukapokelela amaka ilyo umupashi wa mushilo ukesa pali imwe, kabili mukaba inte shandi mu Yerusalemu na mu Yudea monse na mu Samaria, na ku mpela ya pano isonde.”—Imil. 1:8.

² Bulya bulayo bwatendeke ukufikilishiwa pa Pentekoste ya mu 33 C.E. ilyo umupashi wa mushilo wapeele abasambi ba kwa Yesu Kristu amaka ya kushimikila mu Yerusalemu monse. Takwali ica kwesha icili conse icalengele baleke ukushimikila. (Imil. 4:20) Abasambi ba kwa Yesu aba cishinka kumo na ifwe balakabila sana amaka yafuma kuli Lesa “inshiku shonse mpaka na ku mpela ya calo.”—Mat. 28:20.

3. Finshi amaka yafuma kuli Lesa yengatwafwa ukucita?

³ Yesu alaile abasambi bakwe ukuti ‘bakapokelela amaka ilyo umupashi wa mushilo ukesa pali bena.’ Umupashi uo Lesa wa maka yonse Yehova apeela ku babomfi bakwe, ulalenga ifwe umo umo ukukosa no kukwata amaka ya kubomba umulimo wapeelwa ku Bena Kristu, e lyo no kutwafwa ukulwisha ifingatunenuna nga fyabako.—Belengeni Mika 3:8; Abena Kolose 1:29.

4. Finshi twalalandapo muli cino cipande, kabili mulandu nshi?

⁴ Bushe amaka ayo umupashi wa mushilo utupeela yamonekela muli finshi? Bushe umupashi wa mushilo ulenga twacita finshi nelyo twacita shani ilyo kwacitika fimo? Ilyo tulefwaya ukulabombela Lesa muli bucishinka, tulakwata amafya ayengi, ayafuma limo kuli Satana nelyo ku fya mu calo cakwe, nelyo ayesa pa mulandu wa kukanapwililika kwesu. Calicindama ukucimfya aya mafya pa kuti twatwalilila ukuba Abena Kristu, no kulashimikila lyonse, e lyo no kutwalilila ukuba ifibusa fya kwa Yehova. Natulande pa fyo umupashi wa mushilo utwafwa ukucimfya amatunko no kushipikisha ilyo twanaka no kufuupulwa.

Tulapeelwa Amaka ya Kucimfya Amatunko

5. Bushe ipepo kuti lyatwafwa ukucita cinshi?

⁵ Yesu asambilishe abasambi bakwe ukupepa ati: “Mwitutwala mu kutunkwa, lelo tupokololeni ku mubifi.” (Mat. 6:13) Yehova talekelesha ababomfi bakwe abapepa ili ipepo. Inshita imo Yesu atile, “Shinwe wa mu muulu ena akacishapo ukupeela umupashi wa mushilo ku bamulomba.” (Luka 11:13) Tulakoseleshiwa ukwishiba ukuti Yehova alilaya ukutupeela aya maka ayengalenga twalacita icalungama. Ici tacipilibula ukuti Yehova akulatucingilila pa kuti twilatunkwa. (1 Kor. 10:13) Lelo nga twatunkwa, e lyo tufwile ukupepa sana.—Mat. 26:42.

6. Cinshi Yesu alelandapo pa kwasuka ilyo Satana alemutunka?

⁶ Ilyo Yesu balemutunka kuli Kaseebanya, pa kwasuka aleambula amalembo. Aleibukisha bwino bwino ifyo Icebo ca kwa Lesa cilanda ilyo aleasuka ati: “Amalembo ya mushilo yatila . . . Na kabili calilembwa ukuti . . . Fuma apa, we Satana! Pantu calilembwa ukuti, ‘Yehova Lesa obe e o ulepepa, kabili eka fye e o ulebombela.’” Ukutemwa Yehova ne Cebo cakwe kwalengele Yesu ukukaana amatunko ya kwa Kaseebanya. (Mat. 4:1-10) Ilyo Yesu atwalilile ukukaana amatunko, Satana alimushile.

7. Bushe Baibolo itwafwa shani ukukaana amatunko?

⁷ Apo Yesu alebomfya Amalembo pa kukaana amatunko ya kwa Kaseebanya, pali bufi ifwe! Na cine, pa kukaana Kaseebanya na bantu bakwe, intanshi tufwile ukubika sana amano ku kwishiba amafunde ya kwa Lesa no kuyakonka sana. Ukusambilila Baibolo no kumfwikisha ifyo amano ya kwa Lesa no bulungami bwakwe fyacindama, kwalilenga abantu abengi ukutendeka ukukonka amafunde ya mu Baibolo. Cine cine, “Icebo ca kwa Lesa” calikwata amaka ya kwishiba “amatontonkanyo na mapange ya mutima.” (Heb. 4:12) Nga tulebelenga sana Amalembo no kutontonkanyapo, e lyo ‘tukalakonka sana icishinka ca kwa Yehova.’ (Dan. 9:13) Kanshi tufwile ukulatontonkanya pa malembo ayakumine ubwafya tukwete.

8. Finshi tufwile ukucita pa kukwata umupashi wa mushilo?

⁸ Yesu alikeene amatunko pa mulandu wa kutila, alishibe Amalembo e lyo na pa mulandu wa kuti ‘ali no mupashi wa mushilo.’ (Luka 4:1) Pa kuti na ifwe tukwate amaka ya kukaana amatunko, tufwile ukupalama kuli Yehova, ne cingatwafwa, kulacita fyonse ifyo Yehova ateyanya ifilenga twakwata umupashi wakwe. (Yako. 4:7, 8) Pali ifi paba ukusambilila Baibolo, ipepo, no kwampana na basumina banensu. Abengi balimona ubusuma bwa kucita ifintu ifingi ifikabilwa ku Bena Kristu ifilenga baletontonkanya pa fya kwa Lesa ifikuulilila.

9, 10. (a) Matunko nshi yaseeka ku Bena Kristu? (b) Bushe ukutontonkanya pa fingafuma mu kubembuka e lyo ne pepo kuti fyamwafwa shani ukulwisha amatunko na lintu mwanaka nelyo mwafuupulwa?

⁹ Matunko nshi mukwata? Bushe mwalitunkwapo ukusengasenga umuntu uushili mwina mwenu? Nga muli bashimbe, bushe umutima wenu walimutunkapo ukutendeka icintemwa no ushasumina? Ilyo Abena Kristu baletamba TV nelyo ukubomfya Intaneti, limo kuti batunkwa ukutamba ifintu ifyabipa. Bushe ico calimucitikilapo, nga calimucitikilapo, mwacitile shani? Kuti cawama mwatontonkanya pa fyo ukucita icintu cimo icalubana kwingalenga mwacita ulubembu ulwabipisha. (Yako. 1:14, 15) Tontonkanyeni pa fyo Yehova, icilonganino na balupwa lwenu bengomfwa ububi nga mwacita ulubembu. Lelo nga twatwalilila ukukonka amafunde ya kwa Lesa, tukakwata kampingu musuma. (Belengeni Amalumbo 119:37; Amapinda 22:3.) Lyonse ilyo mwatunkwa, mulepepa sana pa kuti mwilawila mu lubembu.

¹⁰ Pali na cimbi ico tufwile ukulaibukisha pa matunko ya kwa Kaseebanya. Pa numa ya kuti Yesu aikala ne nsala pa nshiku 40 mu matololo, e lyo Satana ailemutunka. Ukwabula no kutwishika, Kaseebanya amwene ati ilya yali ni “nshita . . . yalinga” iya kwesha Yesu. (Luka 4:13) Satana alasala inshita iyalinga pa kututunka. Kanshi calicindama ukuba abakosa mu kupepa inshita yonse. Satana ilingi atwesha ilyo amona ukuti natunaka nelyo natufuupulwa. Kanshi lyonse ilyo twaumfwe ifyo, tufwile ukubika sana amano ku kulomba Yehova ukutucingilila no kutupeela umupashi wa mushilo.—2 Kor. 12:8-10.

Tulapeelwa Amaka ya Kushipikisha Ilyo Twanaka na Lintu Twafuupulwa

11, 12. (a) Finshi filenga abengi ukufuupulwa? (b) Cinshi cingatupeela amaka ya kucimfya ukufuupulwa?

¹¹ Apo tatwapwililika tulafuupulwa ilingi. Nga ni muli shino nshiku nacicila no kucila pa mulandu wa nshita tuleikalamo. Ino nshita napamo e lyo tulekwata amafya ayakalamba sana. (2 Tim. 3:1-5) Ilyo Armagedone ilepalama, amafya ya ndalama, na masakamika na mafya yambi filefulilako. Kanshi te kuti tupape ukuti cileyacileafya sana kuli bamo ukusakamana no kupeela ulupwa lwabo ifyo lukabila pantu balanaka, balafunshika, kabili balafinininwa ku fya kucita ubwingi. Nga e fyo caba na kuli imwe, cinshi mwingacita pa kupwisha ubo bwafya?

¹² Ibukisheni ukuti Yesu alaile abasambi bakwe ukutila akabapeela kaafwa, umupashi wa mushilo uwa kwa Lesa. (Belengeni Yohane 14:16, 17.) Umupashi wa mushilo e maka yapulamo pano isonde na ku muulu. Yehova alabomfya aya maka “no kulundapo” pa kuti atukoshe no kutwafwa ukushipikisha ilyo twaeshiwa. (Efes. 3:20) Umutumwa Paulo atile, nga tuleshintilila pa mupashi wa mushilo, tukapokelela “amaka ayacila aya bantunse” nangu ca kutila “monse monse balatutitikisha.” (2 Kor. 4:7, 8) Yehova tatulaya ukufumyapo amafya, lelo atulaya ukuti ukupitila mu mupashi wa mushilo, akalatupeela amaka ya kushipikisha.—Fil. 4:13.

13. (a) Finshi filenga uwacaice umo ukuba na maka ya kushipikisha ubwafya akwata? (b) Bushe mwalishibako ababa ngo yu uwacaice?

¹³ Tontonkanyeni pali Stephanie, painiya wa nshita yonse uuli ne myaka 19. Ilyo ali ne myaka 12, alikwete stroko kabili pa numa bamusangile na cimumena kuli bongobongo. Ukutule lyo, balimulepulapo imiku ibili, kabili alondapwa ukubomfya inshila shimbi e lyo kabili alikwatapo stroko imiku na imbi ibili, icalenga elaenda bwino, no kukanamona bwino. Stephanie afwaya ukubomfya utumaka akwata ku fintu ifyo amona ukuti fyalicindama sana, pamo nga ukulongana kwa Bwina Kristu e lyo no kushimikila. Na lyo line alamona ukuti umupashi wa kwa Yehova ulamwafwa ukushipikisha amafya ayengi. Impapulo shesu umuba ifyo Abena Kristu banensu bapitamo na sho shilamusansamusha ilyo aba no bulanda. Bamunyinefwe ne nkashi balamutuminako amakalata ya kumukoselesha kabili ilyo ukulongana takulatendeka na pa numa ya kulongana, balamwebako amashiwi ya nkosho. Abo asambilisha Baibolo nabo balamulanga ukuti balatasha pantu balaya ku mwakwe pa kuti basambilile Baibolo. Ifi fyonse filalenga Stephanie ukutasha sana Yehova. Ilembo atemwa sana lya Amalumbo 41:3, ilyo acetekela ukuti ifyo lyalandapo e fimucitikila.

14. Cinshi tushifwile kucita nga twanaka nelyo nga tuli na masakamika, kabili mulandu nshi?

¹⁴ Nga natunaka nelyo tuli na masakamika, tatufwile ukumona kwati icingapwisha amafya kuleka ukucita ifya kwa Lesa. Nga twaleka ukucita ifi e lyo amafya yengabipilako. Mulandu nshi? Pantu mu fya kwa Lesa pamo nga ukusambilila Baibolo, ukushimikila, no kulongana e mo Lesa atupeelela umupashi wa mushilo. Ukucita ifi kulatusansamusha lyonse. (Belengeni Mateo 11:28, 29.) Ilingi line bamunyinefwe ne nkashi balesa mu kulongana ninshi nabanaka sana, lelo pa numa ya kulongana, ciba kwati amaka yalabwelelamo.

15. (a) Bushe Yehova alaya ukuti Abena Kristu ifintu fyakulabangukila? Londololeni ukulingana na Malembo. (b) Finshi Lesa atulaya, kabili mepusho nshi twingepusha?

¹⁵ Ici tacilolele mu kuti ukuba Umwina Kristu kwalyanguka. Tufwile ukubikako sana amano pa kuba Umwina Kristu wa cishinka. (Mat. 16:24-26; Luka 13:24) Na lyo line, Yehova kuti apeela uunakile amaka ukupitila mu mupashi wa mushilo. Kasesema Esaya atile: “Abalecetekela Yehova bakaba na maka na kabili. Bakapupuka na mapindo kwati ni bakapumpe. Bakabutuka no kukanatompoka; bakenda no kukananaka.” (Esa. 40:29-31) Kanshi tufwile ukuipusha ukuti, Cinshi sana sana cingalenga nanenuka mu milimo ya Bwina Kristu?

16. Cinshi twingacita pa kucefyako fimo ifingalenga tulenaka nelyo ukufuupulwa?

¹⁶ Icebo ca kwa Lesa citukoselesha ‘ukwishiba bwino bwino ifyacilapo ukucindama.’ (Fil. 1:10) Paulo apashenye ubumi bwa Mwina Kristu ku kubutuka ulubilo lwa ntamfu iikalamba ilyo alembele ukuti: “Tufuule conse icafina . . . , kabili tubutuke no kushipikisha ulubilo ulwabikwa pa ntanshi yesu.” (Heb. 12:1) Ico alelandapo ca kutila, tatufwile ukubika amano ku kucita ifintu ifishacindama ifingatunasha. Nalimo fwe bamo kuti tulefwaya fye ukulacita ifintu na fimbi, nangu ca kutila kale kale natukwata imilimo iingi. E ico nga ca kutila ilingi line mulanaka no kusakamikwa, kuti cawama mwapituluka mu fyo mucita ku ncito, ne miku muya ku kutandala fye, e lyo na maka mupoosa ku fyangalo, na ku fintu fimbi. Ukwishiba apapela amaka yesu kuti kwatwafwa bonse ukwishiba ifyo twingakwanisha ukucita no kukanalafusha ifya kucita.

17. Cinshi cingalenga bamo ukufuupulwa, lelo cinshi Yehova atulaya icingabakoselesha?

¹⁷ Napamo bamo pali ifwe balafuupulwa pa mulandu wa kuti impela ya cino calo tayaisa bwangu nga fintu bale-enekela. (Amapi. 13:12) Lelo bonse abafuupulwa pali uyu mulandu kuti bakoseleshiwa ku mashiwi yaba pali Habakuki 2:3 apatila: “Pantu icimonwa ca nshita ya ku ntanshi, lelo cilebutukisha ukulola ku mpela, kabili tacakabepe ubufi. Nangu fye nga cashingashinga, ulecilolela; pantu ukwisa cikesa. Tacakacelwe.” Yehova alitulaya ukuti impela ya buno bwikashi, yena ikesa pa nshita ilya ine umwine asala!

18. (a) Bulayo nshi bumukosha? (b) Bushe icipande cikonkelepo cikatwafwa muli finshi?

¹⁸ Ababomfi ba kwa Yehova bonse aba cishinka, balafuluka ubushiku ilyo ukunaka no kufuupulwa fikapwa, lintu bonse abakaba abomi bakakwata amaka ya “bulumendo.” (Yobo 33:25) Na ino ine inshita nga tulecita ifya kwa Lesa, umupashi wa mushilo kuti watwafwa ukukwata amaka mu kati. (2 Kor. 4:16; Efes. 3:16) Te kwesha ukuleka ukunaka kukalenge mukapanye amapaalo. Ubwesho ubuli bonse, nampo nga bwaisa pa mulandu wa matunko, ukunaka, nelyo ukufuupulwa, kuti bwapita, nga te pali ino nshita, ninshi ni mu calo cipya ica kwa Lesa. Mu cipande cikonkelepo, tukalanda pa fyo umupashi wa mushilo wafwa Abena Kristu ukushipikisha lintu balebacusha na lintu bali na macushi yambi ayalekanalekana e lyo ne fyo ubafwa ukukaana ukukonkelela bambi mu kucita ifyabipa.

Umupashi Ulatwafwa Ukucimfya Ubwesho Ubuli Bonse

“Muli fyonse ndi na maka pantu kuli uulenkosha.”—FIL. 4:13.

1. Mulandu nshi abantu ba kwa Yehova bakwatila amafya ayengi?

ABANTU ba kwa Yehova ilingi line balacula ku mesho ayalekanalekana. Yamo yesa pa mulandu wa kuti tatwapwililika e lyo yambi ni pa mulandu wa ficitika muli cino calo cabipa. Kwaba na mafya ayesa pa mulandu wa bulwani ubwaba pa bantu ababombela Lesa na bashimubombela. (Ukute. 3:15) Ukutula fye na kale, Lesa alaafwa abantu bakwe aba cishinka ukushipikisha ilyo balebacushisha pa mulandu wa fyo basuminamo, kabili alabafwa no kukanakonkelela abanabo, e lyo no kushipikisha amafya yambi. Umupashi wakwe uwa mushilo kuti watwafwa na ifwe bene ukucita fimo fine.

Ulatwafwa Ilyo Baletucushisha pa fyo Twasuminamo

2. Cinshi abacusha bakapepa bemininapo, kabili babacusha shani?

² Abantu balabacusha pa mulandu wa mipepele yabo pa kuti basuule ifyo basuminamo, na pa kuti imipepele yabo ilunduluka e lyo na pa kuti baleke ukucetekela Lesa. Bakapepa balacushiwa mu kulungatika e lyo na mu nshila shimbi isha bucenjeshi. Baibolo yapashanya ukusansa kwa kwa Satana kuli filya umusepela wa nkalamo na ngoshe fisansa.—Belengeni Amalumbo 91:13.

3. Bushe Satana asansa shani nge nkalamo nelyo nga ngoshe?

³ Filya fine inkalamo iikalipe isansa mu kulungatika, e fyo na Satana acita. Alatunka abantu ukusansa bakapepa, no kubabika mu fifungo nangu ukubinda imipepele yabo. (Amalu. 94:20) Amalipoti ayaba muli Yearbook ayalondolola imilimo ya Nte sha kwa Yehova muno nshiku, yalilanda na pa nshila ishingi isho Satana abomfya pa kucusha bakapepa. Bashimapepo nelyo aba mu tubungwe twa fikansa fya calo balatunka amabumba ya bampulamafunde ukuti balecusha abantu ba kwa Lesa mu fyalo fyalekanalekana. Ishi nshila Satana abomfya pa kusansa abantu nge nkalamo, shalilenga bamo ukuleka ukubombela Lesa. Nga filya fine na ngoshe abelama no kusuma umuntu pa kuti ubusungu busalangane umubili onse, e fyo na Kaseebanya limo asansa abantu mu bumfisolo no konaula amatontonkanyo yabo pa kuti babelelekwe no kutendeka ukumukonka. Ico Satana atusanshila mu bumfisolo, kufwaya ukutunenuna nelyo ukonaula icitetekelo cesu. Lelo, umupashi wa mushilo kuti walenga twashipikisha ilyo Satana atusansa mu kulungatika nelyo mu bumfisolo.

4, 5. Kuti mwaipekanya shani pa kuti mwikanenuka ilyo bakamucusha, kabili mulandu nshi mwasosela ifyo? Landeni pa ca kumwenako.

⁴ Ukulaelenganya ifintu fyalekanalekana ifyo bengacita pa kutucusha ku ntanshi, te nshila isuma iya kuipekanishishamo. Icishinka ca kuti, tatwaishiba ifyo bengatucita, kanshi te kuti citwafwe nangu panono nga tulesakamana pa fintu ifishingacitika no kucitika. Lelo, kuli icintu cimo ico twingacita. Icalenga abengi ukushipikisha ilyo babacusha pa mulandu wa mipepele yabo, kutontonkanya pa fyalecita ababomfi ba kwa Lesa aba cishinka abo Amalembo yalandapo, na pa fyo Yesu atufunda e lyo ne fyo alecita. Ici calenga ukuti batemwe sana Yehova. E lyo, uko kutemwa kwalenga bacimfye amesho yonse ayo balekwata.

⁵ Moneni ica kumwenako ca bankashi babili aba ku Malawi. Apo ubuteko bwalefwaya ukuti bashite amakardi ya kabungwe ka mapolitiki, ibumba lya bantu abafulilwe lyaumine aba bankashi, lyabalepawila ifya kufwala, no kufwaya ukuulungana nabo. Ili bumba lyabepele bankashi ukuti na ba pa Bethel nabashitako amakardi. Bushe bankashi bayaswike shani? Batile: “Tubombela Yehova Lesa eka fye. Nangu ca kuti bamunyinefwe pa Bethel nabashitako amakardi, ifwe natukaana filya fine tulandile. Nga kutwipaya, mutwipaye fye!” Pa numa ya kulanga ukushipa kwa musango yu, aba bankashi balibalekele.

6, 7. Bushe Yehova akosha shani ababomfi bakwe pa kuti bashipikishe nga balebacusha?

⁶ Umutumwa Paulo alishibe ukuti nangu ca kutila Abena Kristu mu Tesalonika bapokelele ubukombe bwa cine “mu bucushi ubwingi” babupokelele “no kusekelela ukufuma ku mupashi wa mushilo.” (1 Tes. 1:6) Ca cine, Abena Kristu abengi ku kale na muno nshiku, abakwatapo amesho no kuyacimfya balanda abati ubwesho nga bwakosa sana, balaba no mutende lwa nkati, ne yi mibele, yaba pa fisabo fya mupashi wa mushilo uwa kwa Lesa. (Gal. 5:22) Uyu mutende ulalenga balinda imitima na matontonkanyo yabo. Cine cine, Yehova alabomfya umupashi wa mushilo ku kupeela ababomfi bakwe amaka ya kushipikisha amesho no kubapeela amano ilyo baba no bucushi.a

⁷ Abantu balipapile pa mupampamina wa babomfi ba kwa Lesa uwa kutwalilila ukuba aba cishinka na lintu balebacusha sana pa mulandu wa fyo basuminamo. Ba Nte balemoneka ukuti balikwete amaka ayacila pa ya bantunse. Kwena tatutwishika ukuti balikwete aya maka. Umutumwa Petro atukoselesha ukuti: “Abantu nga balemupontela pa mulandu we shina lya kwa Kristu, ninshi mwalipaalwa, pantu ninshi umupashi uumulenga ukucindama, e kutila umupashi wa kwa Lesa, uli na imwe.” (1 Pet. 4:14) Nga baletucushisha pa mulandu wa kuti tulekonka amafunde ayalungama, cilangililo ca kuti Lesa alitutemwa. (Mat. 5:10-12; Yoh. 15:20) Ala tulaba ne nsansa sana ukwishiba ukuti Yehova aletupaala!

Ulatwafwa Ukukanakonkelela Bambi

8. (a) Cinshi calengele ukuti Yoshua na Kalebu bakaane ukukonkelela abanabo? (b) Cinshi twingasambililako ku fyacitile Yoshua na Kalebu?

⁸ Cimo ico Satana atunka Abena Kristu mu bucenjeshi ico bafwile ukukaana, kukonkelela ifibusa ifingonaula bukapepa bwabo. Lelo apo umupashi wa kwa Yehova wa maka sana ukucila umupashi wa calo, kuti twacimfya abantu abatupumya, abatubepesha ubufi, nelyo ukutupatikisha ukucitako ifyo bacita. Ku ca kumwenako, cinshi calengele Yoshua na Kalebu ukukaana ukukonkelela ifyo inengu shimbi 10 ishatuminwe ku calo ca Kanaani shalemona ifintu? Umupashi wa mushilo e walengele ukuti ‘bapusaneko,’ belamona ifintu nga banabo.—Belengeni Impendwa 13:30; 14:6-10, 24.

9. Mulandu nshi Abena Kristu bafwile ukukanina ukukonkelela icinabwingi?

⁹ Umupashi wa mushilo walengele na basambi ba kwa Yesu ukupampamina pa kunakila Lesa ukucila ukunakila abantu abo abengi balemona ukuti e bakasambilisha mu kupepa kwa cine. (Imil. 4:21, 31; 5:29, 32) Abantu abengi balasalapo ukucitako ifyo icinabwingi cilecita, pa kuti kwiba ifyongo nangu beba mu bwafya. Abena Kristu ba cine bena, ilingi line bacita ico beshibe ukuti nacilungama. Na lyo line, umupashi wa mushilo uwa kwa Lesa e ubapeela amaka ayalenga baleshipa pa kuti belakonkelela bambi. (2 Tim. 1:7) Moneni umulandu umo uo tushifwile ukukonkelela ifibusa.

10. Bwafya nshi ubo Abena Kristu bamo bengakwata?

¹⁰ Abacaice bamo nalimo kuti balafilwa ifya kucita ilyo umunabo acita ifyo Baibolo yalesha. Bamona kwati nga baeba baeluda ukuti baafwe umunabo, ninshi umunabo te kuti abacetekele; e ico tabalandapo pa co umunabo alufyenye, nangu ca kutila ukukanalanda cimo no kusungila amafina pa cilonda. Uubembwike nalimo kuti aeba na banankwe ukuti besokolola ulubembu lwakwe. Kwena te bacaice fye beka abakwata ubwafya bwa musango yu. Na bakalamba bamo nabo balafilwa ukweba baeluda pa lubembu ulo cibusa nelyo lupwa lwabo acitile. Lelo cinshi Abena Kristu ba cine bafwile ukucita ilyo ifya musango yu fyacitika?

11, 12. Cinshi tulingile ukucita nga ca kuti umo mu cilonganino atweba ukuti twisokolola ulubembu lwakwe, kabili mulandu nshi?

¹¹ Tontonkanyeni pali ici. Tutile munyinefwe wacaice Alex, aishiba ukuti cibusa wakwe uwa mu cilonganino Steve alitemwa ukutamba ifye shiku. Alex aeba Steve ukuti nasakamana sana pa fyo alecita. Lelo Steve akaana ukubika amano ku fyo Alex alemweba. Ilyo Alex akoselesha Steve cibusa wakwe ukuti ebeko baeluda, Steve atila, nga walintemwa, tawakansosele kuli baeluda. Bushe Alex alingile ukutiina ukuti icibusa calapwa? Kuti nalimo atendeka ukutwishika nampo nga baeluda bakacetekela ifyo alelanda nga ca kuti Steve akaaninina fye ndai. Na lyo line, Steve te kuti alule imibele nga ca kuti Alex tebele baeluda. Na kuba, bucibusa bwa kwa Steve na Yehova kuti bwasuka bwapwa. Alex alekabila ukwibukisha ukuti “ukututuma abantu citeyo, lelo uutetekela Yehova akacingililwa.” (Amapi. 29:25) Cinshi cimbi ico Alex engacita? Nalimo afwile ukubwelela kuli Steve no kulandapo pa cilubo cakwe. Pa kucita ifyo, afwile ukushipa. Nalimo uyu muku, Steve kuti afwaya balandapo pa bwafya bwakwe. Alex afwile ukukoselesha Steve na kabili ukuti ebe baeluda, no kumweba ukuti nga afilwa ukubeba mu nshiku fye ishinono, ninshi Alex wine e ukabeba.—Lebi 5:1.

¹² Nga wacita ifyo, pa kubala cibusa obe nalimo te kuti amone ukuti ulefwaya ukumwafwa. Lelo pa numa kuti ailuka ukuti ico wacitila ifyo ni co ulefwaya ukumwafwa. Nga ca kuti uwacitile ulubembu bamwafwa kabili ayalula ne mibele, limbi kuti atendeka no kukutasha pa kushipa kobe na bucishinka. Ni shani nga atwalilila ukukufulilwa, bushe kuti awama ukuba cibusa obe? Icacindamisha kulatemuna Cibusa wesu uwapulamo, Yehova. Nga twamubika pa ntanshi, abantu bambi abamutemwa bakatucindika pali bucishinka bwesu kabili bakaba ifibusa fyesu ifya cine. Tatufwile ukupeela Kaseebanya apa kwikala mu cilonganino ca Bwina Kristu. Nga twacita ifyo, ninshi twalenga umupashi wa mushilo uwa kwa Yehova ubulanda. Lelo nga tulesungilila icilonganino ca Bwina Kristu icasanguluka, ninshi tuletungululwa no mupashi.—Efes. 4:27, 30.

Ulatwafwa Ukushipikisha Amacushi Yalekanalekana

13. Mafya nshi abantu ba kwa Yehova bakwata, kabili mulandu nshi ayo mafya yafulile sana?

¹³ Tulakwata amacushi yalekanalekana. Yamo, kubulwa indalama, ukubulwa incito, utuyofi, imfwa ya muntu wesu, ukulwala na yambi ayengi. Apo twikala mu “nshita ishayafya,” bonse tulenekela ukuti inshita ili yonse kuti twaponenwa na mesho ayapala aya. (2 Tim. 3:1) Ilyo ifya musango yu fyacitika, tatufwile ukusakamikwa. Umupashi wa mushilo kuti walenga twashipikisha ubwafya ubuli bonse.

14. Finshi fyalengele Yobo ukushipikisha amacushi?

¹⁴ Yobo alikwete amafya ayengi. Ifikwata fyakwe fyalyonaike, abana balifwile, ifibusa fyakwe fyalimusuulile, alilwele sana, kabili umukashi wakwe alilekele ukutetekela Yehova. (Yobo 1:13-19; 2:7-9) Lelo, Yobo alikwete kasansamusha wa cine cine, Elihu. Ifyo Elihu alandile, pamo ne fyo Yehova aebele Yobo fyalekomaila pa cishinka ca kuti: “Iminina shilili no kubika amano ku fipesha amano fya kwa Lesa.” (Yobo 37:14) Cinshi calengele Yobo ukushipikisha amesho akwete? Kabili cinshi cingatwafwa ukulashipikisha amesho tukwata? Kulaibukisha no kutontonkanya pa nshila shalekanalekana isho Yehova abomfeshamo umupashi wa mushilo na maka yakwe. (Yobo 38:1-41; 42:1, 2) Nalimo tulebukishapo fimo ifyatucitikile ifyalangile ifyo Lesa atusakamana ngo muntu umo umo. Na ino ine nshita alatusakamana.

15. Cinshi calengele umutumwa Paulo akwate amaka ya kushipikisha amesho?

¹⁵ Umutumwa Paulo alishipikishe amafya ayengi ayaishile pa mulandu wa citetekelo cakwe, na ya mafya yalikulile ica kuti ni cikanga yamutwale ku mfwa. (2 Kor. 11:23-28) Cinshi calengele ukuti ashipe no kukanasakamikwa? Alepepa lyonse kuli Yehova kabili alimucetekele. Ilyo akwete ubwesho ubo napamo bwamufishishe fye na ku kwipaiwa, Paulo alembele ukuti: “Shikulu aiminine kuli ine no kumpeela amaka, ukuti mbile nga nshi imbila nsuma na bena fyalo bonse bomfwe; kabili balimpokolwele ku kanwa ka nkalamo.” (2 Tim. 4:17) Ifyo Paulo apitilemo fyalengele akoseleshe Abena Kristu banankwe no mutima onse ukutila tabafwile ‘ukusakamikwa nangu kamo.’—Belengeni Abena Filipi 4:6, 7, 13.

16, 17. Landeni pa ca kumwenako icilelanga ifyo Yehova akosha abantu bakwe nga baba na mafya muno nshiku.

¹⁶ Roxana, painiya wa nshita yonse na o alimona ifyo Yehova asakamana abantu bakwe. Ilyo alombele ku mukalamba wa ncito ukuti akayesangwa ku kulongana kwa citungu, umukalamba wa ncito alikalipe no kumweba ati, nga aya ku kulongana, ninshi incito yapwa. Roxana aliile, kabili alipepele ukufuma pa nshi ya mutima ukuti bekamutamfya incito. Pa numa ya kupepa, alilekele ukusakamana. Nga filya fine bamusokele, ilyo abwelele ku ncito pali Cimo pa numa ya kulongana, balimutamfishe incito. Roxana alisakamene. Nangu ca kuti alefola indalama ishinono, incito alebomba yalemwafwa ukusunga ulupwa lwakwe. Alipepele na kabili, e lyo ayeba ati, apo Lesa alimupeele ifyakoseshe bukapepa bwakwe ku kulongana kwa citungu, te kuti afilwe ukumupeela ifyo akabila mu bumi. Ilyo Roxana alebwelelamo ku ng’anda, amwene icipampa apo balembele ukuti “Tulefwaya Uwa Ncito” uwaishiba sana ukubomfya cimashini ca kubililako. Awe alilembeleko. Nangu ca kutila umukalamba wa ncito alimwene ukuti Roxana taishibe sana ifya kubomfya cilya cimashini, alimwingishe incito, kabili indalama atendeke ukufola shali ishingi sana ukucila isho alefola uko bamutamfishe. Roxana alimwene ukuti amapepo yakwe yalyaswike. Lelo, ipaalo ilikalamba sana ilyo akwete, kushimikila ku bengi abo alebomba nabo. Pa bo ashimikile, pali abantu 5 kumo no mukalamba wa ncito abatemenwe icine no kubatishiwa.

¹⁷ Limo kuti tulemona kwati amapepo yesu tayasukwa ilyo line fye twapepa nangu ati tayasukwa ukulingana ne fyo tule-enekela. Nga caba ifyo ninshi pali umulandu. Yehova aleshiba bwino umulandu, lelo ifwe pa kuti twishibe umulandu kuti papita inshita. Cimo ico tushifwile ukutwishika ca kuti, Lesa talekelesha abantu bakwe aba cishinka.—Heb. 6:10.

Ulatwafwa Ukucimfya Amesho na Matunko

18, 19. (a) Mulandu nshi tushingapapila nga twakwata amesho nelyo nga twatunkwa? (b) Cinshi mwingacita pa kuti mulecimfya amesho?

¹⁸ Abantu ba kwa Yehova balenekela ukutila kuti batunkwa, bafuupulwa, bacushiwa nelyo ukupatikishiwa ukucitako ifyo bambi balecita. Aba muli ici calo balitupata sana. (Yoh. 15:17-19) Lelo umupashi wa mushilo ulatwafwa ukucimfya ubwesho ubuli bonse ubo twingakwata ilyo tulebombela Lesa. Yehova takaleke tukeshiwe ubwesho ubo tushingashipikisha. (1 Kor. 10:13) Takatushe nangu ukutulekelesha nakalya. (Heb. 13:5) Nga tuleumfwila Icebo cakwe, tukalacingililwa no kukoshiwa. Na kabili, umupashi wa kwa Lesa kuti walenga Abena Kristu banensu ukutwafwa ilyo tulekabila sana ukwafwiwa.

¹⁹ Lekeni ifwe bonse tutwalilile ukulapepa no kusambilila Baibolo pa kuti tulekwata umupashi wa mushilo. Natutwalilile ‘ukulalomba kuli Lesa ukuti aletupeela amaka pa kuti tuleba na maka ukulingana na maka yakwe ayacindama pa kuti tuleshipikisha muli fyonse no kushishimisha pamo no kusekelela.’—Kol. 1:11.

[Futunoti]