“Natulecita Ifingaleta Umutende”

U MUSEBO nga e lyo baupanga fye, ulamoneka uwakosa uushingonaika. Lelo mu kupita kwa nshita, ulatendeka ukukwata imilale ne filindi. Ulafwaikwa uku-uwamya pa kuti mwilaba amasanso na pa kuti utwalile ukubomfiwa.

Na bucibusa bwesu na bambi limo bulalubana bwaleta na mafya. Umutumwa Paulo alisumine ukuti Abena Kristu mu Roma balepusana mu fyo balemona ifintu. Afundile Abena Kristu banankwe ukuti: “Natulecita ifingaleta umutende kabili ifingatukuula.” (Rom. 14:13, 19) Mulandu nshi cawamina ‘ukulacita ifingaleta umutende’? Cinshi cingatwafwa ukushipa no kutendeka ukulacita ifingaleta umutende?

Mulandu Nshi Tufwile Ukubela Aba Umutende?

Nga ca kutila imilale mu musebo tabaiwemye, ilakula yasanguka ifilindi ifingaleta ubusanso. Nga tatuwikishenye ilyo twapusana, ico na co kuti caleta amafya. Umutumwa Yohane alembele ukuti: “Ngo muntu asosa ati: ‘Nalitemwa Lesa,’ lelo alipata munyina, ninshi wa bufi. Pantu uushatemwa munyina, uo amona, te kuti atemwe Lesa, uo ashamona.” (1 Yoh. 4:20) Ukukanapwisha ubwafya nga paba ukupusana kuti kwalenga Umwina Kristu ukupata munyina.

Imilale iinono mu musebo kuti baiwamya nga baicilika fye. Bushe na ifwe te kuti tulelabako fye ku filubo ifinono ifyo bamunyinefwe bacita? Nga tulecite fi kuti twapwisha amafya ayengi ayo tukwata na banensu, pantu umutumwa Petro alembele ukuti: “Ukutemwa kufimba pa membu ishingi.”—1 Pet. 4:8.