Afweni Abafuma mu Mukuni wa kwa Lesa

“Sekeleleni pamo na ine, pantu ninsanga impaanga yandi iyalubile.”—LUKA 15:6.

1. Bushe Yesu alanga shani ukuti mucemi wakwata ukutemwa?

UMWANA wa kwa Yehova uwafyalwa eka, e kutila Yesu Kristu, etwa ati “umucemi mukalamba uwa mpaanga.” (Heb. 13:20) Amalembo yalilandiile kabela ukuti ali no kwisa kabili yalanga ukuti ali Umucemi uwaibela uwalefwaya “impaanga ishaluba” isha mu bena Israele. (Mat. 2:1-6; 15:24) Kabili, nga filya kacema engafwilapo pa kuti fye acingilile impaanga shakwe, e fyo na Yesu afwilile abantu ababa kwati ni mpaanga abali no kutetekela ilambo lyakwe pa kuti abalubule.—Yoh. 10:11, 15; 1 Yoh. 2:1, 2.

2. Finshi nalimo ifyalenga Abena Kristu bamo ukunenuka?

² Ku ca bulanda, bamo abaletasha pe lambo lya kwa Yesu kabili abaipeele kuli Lesa pali ino nshita balileka ukulongana na Bena Kristu banabo. Ifyalenga banenuke kufuupuka, ukulwalilila, nangu amafya yambi. Lelo, pa kuti babe ne cibote ne nsansa ifyo Davidi alandilepo mu Amalumbo 23, kano baba mu mukuni wa kwa Lesa. Ku ca kumwenako, Davidi aimbile ati: “Yehova e mucemi wandi. Tapali ico nkabulisha.” (Amalu. 23:1) Impaanga sha mu mukuni wa kwa Lesa shilakwata fyonse ifyo shikabila pa kukosha bucibusa na Lesa, lelo impaanga ishaluba shena tashikwata. Ni bani bengashafwa? Kuti bashafwa shani? Finshi fingacitwa pa kushafwa ukubwela mu mukuni?

Ni Bani Bengabafwa?

3. Finshi Yesu alandile pa kulanga icifwaikwa pa kupususha impaanga sha kwa Lesa ishaluba?

³ Pa kupususha impaanga sha kwa Lesa ishaluba, kano kwaba ukubombesha. (Amalu. 100:3) Yesu alangilile ici ilyo atile: “Umuntu nga akwete impaanga umwanda umo (100) kabili paluba imo, bushe takashe amakumi pabula na pabula (99) mu mpili no kuya alefwaya imo iilubile? Kabili nga aisanga, ndemweba icine cine nati, alasekelela nga nshi pali yena ukucila pa mpaanga amakumi pabula na pabula (99) ishishaluba. Ifyo fine na Tata uwaba mu muulu tafwaya ukuti umo pali aba abanono alobe.” (Mat. 18:12-14) Ni bani bengaafwa abantu ababa kwati ni mpaanga abafuma mu mukuni wa kwa Lesa?

4, 5. Bushe baeluda bafwile ukulamona shani umukuni wa kwa Lesa?

⁴ Nga ca kuti baeluda balefwaya ukwafwa impaanga shaluba, bafwile ukulaibukisha ukuti umukuni wa kwa Lesa, bantu abaipeela kuli Yehova, ‘umukuni uwaba mu mpanga yakwe iya mulemfwe’ uo atemwa sana. (Amalu. 79:13) Impaanga isho Yehova atemwa muli uyu musango shifwile ukusungwa bwino sana, e kutila abacemi bakwata ukutemwa bafwile ukushibikako amano. Ukucita ifipempu fya bucemi kuti kwa-afwa sana. Bakacema nga bashikoselesha mu kutemwa, isho mpaanga kuti shabukulula na bucibusa bwa shiko na Yehova no kufwaisha ukubwelela mu mukuni.—1 Kor. 8:1.

⁵ Ukufwaya impaanga ishaluba no kushafwa, mulimo wa bakacema ba mukuni wa kwa Lesa. Umutumwa Paulo acinkwileko baeluda ba ku Efese ukuti balikwete umulimo wa kucema impaanga ilyo abebele ati: “Muleisakamana mwe bene, kabili mulesakamana no mukuni onse, uo umupashi wa mushilo wamubikapo ukuba bakangalila, ku kucema icilonganino ca kwa Lesa, ico ashitile mu mulopa wa Mwana wakwe.” (Imil. 20:28) Umutumwa Petro na o akonkomeshe abakalamba abasubwa ati: “Mulecema umukuni wa kwa Lesa uo amupeela ukwangalila, mwilapatikishiwa fye uku-ucema, lelo muleitemenwa; mwilaucema pa kuti fye mumwenemo ubunonshi bwa nsoni, lelo mulebomba pa mulandu wa kuti mulefwaisha ukubomba. Mwilatitikisha abantu ba kwa Lesa, lelo muleba abantu abo umukuni wingapashanya.”—1 Pet. 5:1-3.

6. Mulandu nshi impaanga sha kwa Lesa shikabila ukusakamanwa kuli bakacema maka maka pali ino nshita?

⁶ Bakacema Abena Kristu bafwile ukulapashanya “kacema musuma,” Yesu. (Yoh. 10:11) Alibikile sana amano ku mpaanga sha kwa Lesa kabili alilangile ukuti calicindama ukushisakamana ilyo aebele Simone Petro ‘ukucema utwana Twakwe utwa mpaanga.’ (Belengeni Yohane 21:15-17.) Impaanga shilakabila ukusakamanwa maka maka pali ino nshita ilyo Satana Kaseebanya aletunka sana abaipeela kuli Lesa pa kuti baleke ukuba aba cishinka kuli Lesa. Satana ashukila ukukanapwililika kwesu kabili alabomfya ne calo pa kutunka impaanga sha kwa Yehova ukubembuka. (1 Yoh. 2:15-17; 5:19) Abaleka ukulongana e bo canguka sana ukusansa, kanshi e bakabila sana ubwafwilisho pa kuti bakonkanyepo “ukukonka ifyo umupashi uletungulula.” (Gal. 5:16-21, 25) Pa kwafwa impaanga sha musango yo, mulingile ukupepa kuli Lesa ukuti amulange ifya kucita, ukulomba umupashi wakwe, e lyo no kubomfya bwino sana Icebo cakwe.—Amapi. 3:5, 6; Luka 11:13; Heb. 4:12.

7. Bushe umulimo wa kucema ababa kwati ni mpaanga wacindama shani kuli baeluda?

⁷ Abacemi ba mu Israele balebomfya umutambu, nangu inkonto iitali pa kutungulula umukuni. Ilyo impaanga shileingila nangu ukufuma mwi cinka, ‘shalepita mwi samba lya nkonto’ pa kuti kacema ashipende. (Lebi 27:32; Mika 2:12; 7:14) Kacema Umwina Kristu na o wine afwile ukwishiba bwino bwino impaanga sha kwa Lesa isho bamuseekesha e lyo no kwishiba ifyo imo na imo ili. (Linganyeniko Amapinda 27:23.) E ico, pa milandu yacindama iyo ibumba lya baeluda lilandapo, palaba no bucemi. Muli uku kulanshanya, balapangana ne fya kucita pa kuti bafwe impaanga ishaluba. Yehova umwine atile akafwaya impaanga shakwe no kushisakamana. (Esek. 34:11) Kanshi Lesa alatemwa ilyo baeluda na bo bale-esha na maka ukwafwa impaanga ishaluba ukubwelela ku mukuni.

8. Ni nshila nshi shimo isho baeluda bengalangilamo ukuti balesakamana impaanga?

⁸ Umwina Kristu nga nalwala, kuti asansamuka no kukoseleshiwa ilyo kacema wa mukuni wa kwa Lesa amupempula. E fyo ciba na ku mpaanga iyanaka nga baipempula. Baeluda nga baya ku kupempula uwaleka ukulongana, nalimo kuti babelenga amalembo, bapituluka mu cipande cimo ica mu lupapulo, balanshanya ifishinka fyacindama ifya mu kulongana, nangu ukupepa nankwe, atemwa ukucitako na fimbi. Kuti bamulondolwela ukuti aba mu cilonganino kuti batemwa sana ukumumona atendeka ukulongana na kabili. (2 Kor. 1:3-7; Yako. 5:13-15) Kuti aumfwa bwino sana ukumupempulako, ukumutuminako foni, nangu ukumulembelako kalata! Umucemi Umwina Kristu na o wine alaba ne nsansa icine cine nga ca kuti ayafwa impaanga iyaleka ukulongana.

Mulimo wa Kubombela Pamo

9, 10. Mulandu nshi mwingasosela ukuti ukubika amano ku mpaanga iyaluba te mulimo wa baeluda beka fye?

⁹ Ino nshita tuleikalamo, ifya kucita fyalifula e lyo kabili ni nshita sha-afya. Kanshi nalimo te kuti tumone ukuti Umwina Kristu munensu alesensenunwa ukufuma ku cilonganino. (Heb. 2:1) Lelo, impaanga sha kwa Yehova shalicindama sana kuli ena. Imo na imo yalicindama, filya fine fye ne cilundwa cimo na cimo ku mubili wa muntu cacindama. E ico, ifwe bonse tufwile ukubika amano kuli bamunyinefwe no kulasakamanana. (1 Kor. 12:25) Bushe mwalikwata umutima wa musango yu?

¹⁰ Nangu ca kuti baeluda e bashingamwa sana ukufwaya impaanga shaluba no kushafwa, te beka fye abalingile ukubika amano ku basumina banensu abaleka ukulongana. Na bambi kuti babombela pamo na ba bakacema. Na ifwe tufwile ukulakoselesha no kula-afwilisha bamunyinefwe na bankashi abalekabila ubwafwilisho pa kuti babwele mu mukuni. Kuti twacita shani ifyo?

11, 12. Lishuko nshi mwingapeelwa ukukuma ku waleka ukulongana uulekabila ubwafwilisho?

¹¹ Inshita shimo, baeluda kuti bapekanya ukuti bakasabankanya ba Bufumu ababelesha baletungulula isambililo lya Baibolo ku baleka ukulongana abalefwaya ubwafwilisho. Umulandu bacitile fi kufwaya ukwafwilisha aba bantu ukuba no kutemwa kulya bali na ko pa kutendeka. (Ukus. 2:1, 4) Icitetekelo ca aba Bena Kristu kuti cakosa nga kwaba ukupituluka na bo mu fyebo bapushilwe ilyo bashalesangwa ku kulongana.

¹² Nga ca kuti baeluda bamweba ukusambilila no Mwina Kristu munenu uulekabila ubwafwilisho pa kuti abwelele kuli Lesa, pepeni kuli Yehova ukuti amwafwe no kumupaala ilyo mulecita ifyo. ‘Tuulileni Yehova imilimo yenu e lyo yakapampamikwa amapange yenu.’ (Amapi. 16:3) Tontonkanyeni pa malembo ya mu Baibolo ne fishinka fimo ifyo mwingalandapo ifingakosha icitetekelo ca balekabila ubwafwilisho ilyo mulesambilila nabo. Tontonkanyeni pa fyalecita umutumwa Paulo ifyalebomba bwino sana. (Belengeni Abena Roma 1:11, 12.) Paulo alefuluka ukumona Abena Kristu ba mu Roma pa kuti abapeeleko ica bupe cafuma kuli Lesa icali no kubakosha. Na kabili alefwaisha ukukoseleshanya nabo. Bushe na ifwe tatufwile ukuba nga Paulo ilyo tuleafwa abafuma mu mukuni wa kwa Lesa?

13. Finshi mwingalandapo ilyo mulesambilila no waleka ukulongana?

¹³ Ilyo mulesambilila, nalimo kuti mwabepusha ati, “Mwasambilile shani icine?” Bafweni ukwibukisha ifyo calewama ilyo balebombela Yehova, bakoselesheni no kulanda pa fyo baleipakisha ku kulongana, mu kushimikila, na ku kulongana kwa citungu. Landeni pa fyo calewama ilyo mwalebomba na bo mu mulimo wa kwa Yehova, nga mwalibombelepo na bo. Landeni na pa busuma imwe mwasanga mu kupalama kuli Yehova. (Yako. 4:8) Tasheni pa fyo Lesa apeela fwe bantu bakwe ifyo tulekabila, maka maka pa fyo atusansamusha no kutupeela isubilo ilyo tuli na macushi.—Rom. 15:4; 2 Kor. 1:3, 4.

14, 15. Mapaalo nshi yamo ayo abaleka ukulongana baleipakisha ayo cingawama ukubacinkulako?

¹⁴ Nalimo kuti caba bwino ukumucinkulako pa mapaalo yamo aleipakisha ilyo ali mu cilonganino. Ku ca kumwenako, cali lipaalo ukwishiba na fimbi ifya mu Cebo ca kwa Lesa no bufwayo bwakwe. (Amapi. 4:18) Ilyo ‘alekonka ifyo umupashi waletungulula,’ ukwabula ukutwishika, calemwangukilako ukukaana ifya kutunka. (Gal. 5:22-26) Ico calengele abe na kampingu iyasanguluka iyalelenga alepepa kuli Yehova no kupokelela ‘umutende wa kwa Lesa uwacila amatontonkanyo yonse kabili uulinda imitima yesu na matontonkanyo yesu.’ (Fil. 4:6, 7) Muleibukisha ifi fintu, mulelanga ukuti namumubikako amano, kabili te kwesha ukulaba ukukoselesha munyinenwe nangu nkashi ukubwelela mu mukuni.—Belengeni Abena Filipi 2:4.

¹⁵ Tutile ni mwe baeluda e lyo mwaya ku cipempu ca bucemi. Kuti mwakoselesha abaupana abaleka ukulongana ukutontonkanya pa nshita basambilile icine icaba mu Cebo ca kwa Lesa. Bebukisheni pa fyo icine caweme, ifyo caleumfwika, ifyo batemenwe ilyo baishibe cine, ne fyo cabalubwile! (Yoh. 8:32) Ukwabula no kutwishika balitashishe pa fintu balesambilila pali Yehova, pa kutemwa kwakwe, na pa bufwayo bwakwe ubwawamisha! (Linganyeniko Luka 24:32.) Bacinkuleniko pali bucibusa busuma na Yehova ne shuko lya kulanda nankwe mwi pepo ilyakwata Abena Kristu baipeela. Bakoselesheni ukutetekela na kabili “imbila nsuma iya bukata iya kwa Lesa wa nsansa,” Yehova.—1 Tim. 1:11.

Twalilileni Ukubatemwa

16. Shimikeni ica kumwenako icili mu paragrafu nangu icili conse icilanga ukuti umuntu cine cine kuti apuupuutuka nga bamwafwilisha.

¹⁶ Bushe ifi twalandapo cine cine filabomba? Ee filabomba. Ku ca kumwenako, uwacaice umo uwali kasabankanya wa Bufumu ilyo ali fye ne myaka 12, alilekele ukulongana ilyo ali ne myaka 15. Pa numa, alibwelele no kutampa ukulongana, kabili pali ino nshita alibomba umulimo wa nshita yonse pa myaka ukucila 30. Icalengele sana ukuti apuupuutuke ni co eluda umo alimwafwile. Alitashishe sana pa fyo ulya eluda amwafwile!

17, 18. Mibele nshi mulingile ukuba na yo pa kwafwa uwafuma mu mukuni wa kwa Lesa?

¹⁷ Ukutemwa e kulenga Abena Kristu baleafwa abaleka ukulongana pa kuti babwele mu cilonganino. Yesu aebele abasambi bakwe ati: “Ndemupeela ifunde ilipya, ilya kuti muletemwana; ifyo namutemenwe, e fyo na imwe muletemwana. Nga muletemwana, e lyo bonse bakeshiba ukuti muli basambi bandi.” (Yoh. 13:34, 35) Cine cine, ukutemwa e ca kwishibilako Abena Kristu ba cine. Bushe tatulingile ukulanga uku kutemwa ku Bena Kristu babatishiwa abaleka ukulongana? Tufwile ukukulanga! Lelo pa kwafwilisha aba musango yo, kano mwakwata imibele ya buKristu iyalekanalekana.

¹⁸ Mibele nshi mulingile ukuba na yo nga mulefwaya ukwafwa uwafuma mu mukuni wa kwa Lesa? Nga fintu tulandilepo, mufwile ukuba no kutemwa, kabili mufwile ukuba ne cikuuku, ukutekanya, ukushishimisha no kulangulukilako. Kabili ukulingana fye ne fyo ifintu fili, nalimo kuti mwakabila no kubeleela. Paulo alembele ati: “Fwaleni umutima wa nkumbu, icikuuku, ubupete, ukufuuka, no kushishimisha. Muleshipikishanya no kubelelana uluse nga umo ali ne ca kuilishanya ku munankwe. Ifyo Yehova amubelela uluse, e fyo na imwe mulebelelana uluse. Lelo, pali ifi fyonse, fwalilenipo no kutemwa, pantu e cikakilo cafikapo ica kwikatana.”—Kol. 3:12-14.

19. Mulandu nshi amaka mwingapoosa pa kwafwa ababa kwati ni mpaanga ukuti babwele mu mukuni wa kwa Lesa yashiila fye mu menshi?

¹⁹ Mu cipande cikonkelepo, tuli no kulanda pa filenga bamo ukufuma mu mukuni wa kwa Lesa. Tuli no kulanda na pa fyo abalebwela bengenekela ukubapokelela. Ilyo mulebelenga icipande cikonkelepo no kutontonkanya pa fili muli cino cipande, mwishibe ukuti amaka mwingapoosa pa kwafwa ababa kwati ni mpaanga ukuti babwele mu mukuni wa kwa Lesa tayaya fye mu menshi. Muli cino calo, abantu abengi baikalila fye ukubombesha ubumi bwabo bonse pa kuti bakwate ifyuma, lelo ukupususha umuntu umo fye kwalicindama ukucila indalama shonse mu calo. Yesu akomaile pali ci cishinka ilyo alandile icilangililo ca mpaanga yalubile. (Mat. 18:12-14) Kuti cawama ukulaibukisha ico cishinka ilyo mule-esha na maka ukwafwa bwangu abantu ba kwa Yehova ababa kwati ni mpaanga ukubwela mu mukuni wakwe.

Bafweni Ukubwela Bwangu Bwangu!

“Ni kuli nani twingaya? Ni mwe muli na mashiwi ya mweo wa muyayaya.”—YOH. 6:68.

1. Finshi Petro asosele ilyo abasambi abengi bashiile Yesu?

INSHITA imo, abasambi abengi balishiile Yesu Kristu pantu tabasumine isambilisho limo ilyo asambilishe. Aipwishe abatumwa bakwe ati, “Bushe na imwe mulefwaya ukuya?” Petro ayaswike ati: “Mwe Shikulu, ni kuli nani twingaya? Ni mwe muli na mashiwi ya mweo wa muyayaya.” (Yoh. 6:51-69) Takwali kumbi ukwa kuya. Mu buYuda tamwali “amashiwi ya mweo wa muyayaya,” kabili amashiwi ya musango yo tayasangwa na muli Babiloni Mukalamba, e kutila mu kupepa kwa bufi konse. Kuli bonse abafuma mu mukuni wa kwa Lesa lelo abalefwaya ukutemuna Yehova, “ni nshita ya kushibuka mu tulo” no kubwelela mu mukuni.—Rom. 13:11.

2. Cinshi tufwile ukwibukisha pa lwa milandu ifwile ukubombelwapo na komiti ya bupingushi?

² Yehova alilangile ukuti alibikile amano ku mpaanga shaluba isha mu Israele. (Belengeni Esekiele 34:15, 16.) Na baeluda pali lelo balafwaya ukwafwa uwaba kwati ni mpaanga uwafuma mu mukuni, kabili ni ncito yabo ukucite fyo. Nga ca kuti baeba kasabankanya ukusambilila no waleka ukulongana uulekabila ubwafwilisho, cinshi alingile ukucita nga asanga ukuti uyo muntu alicita ulubembu lwabipisha? Ukucila ukumupanda amano pa milandu ifwile ukubombelwapo na komiti ya bupingushi, afwile ukumweba ati akalande na baeluda. Nga afilwa ukucite fyo, kasabankanya afwile ukwishibisha baeluda.—Lebi 5:1; Gal. 6:1.

3. Finshi umuntu uwakwete impaanga 100 acitile ilyo asangile imo iyalubile?

³ Mu cipande cifumineko, twalandile pa cilangililo Yesu alandile pa lwa muntu uwakwete impaanga 100. Ilyo imo yalubile, ashiile impaanga 99 no kuya alefwaya iyalubile. Ulya muntu alitemenwe cine cine ilyo aisangile! (Luka 15:4-7) Na ifwe e fyo tusekelela ilyo impaanga ya kwa Lesa imo iyalubile yabwela mu mukuni. Nalimo baeluda na bambi aba mu cilonganino balitandalilepo uyo muntu pa mulandu wa kumutemwa. Na bo, balafwaya ukumona uyo muntu abwela mu mukuni pa kuti Lesa alemwafwa, alemucingilila, no kumupaala. (Amala. 33:27; Amalu. 91:14; Amapi. 10:22) Nga balefwaya ukwafwa umo ukubwela mu mukuni, cinshi bengacita?

4. Bushe ilembo lya Abena Galatia 6:2, 5, litwafwa ukwiluka cinshi?

⁴ Nalimo kuti bakoselesha uyo muntu ukubwela mu cilonganino nga bamulondolwela cikuuku cikuuku ukuti Yehova alitemwa impaanga shakwe kabili ifyo afwaya tulecita, te fintu twingafilwa. Fimo pali ifi, kusambilila Baibolo, ukusangwa ku kulongana, e lyo no kushimikila imbila nsuma ya Bufumu. Kuti cawama ukubelenga Abena Galatia 6:2, 5 no kumweba ukuti Abena Kristu kuti basendelana ifisendo, lelo “cila muntu ali no kuisendela icipe cakwe umwine” pa ntanshi ya kwa Yehova. Tapali uwingatubelako ne cishinka kuli Lesa.

Bushe “Amasakamika ya Mikalile” E Yalenga?

5, 6. (a) Mulandu nshi cacindamina ukukutikisha ilyo Umwina Kristu munensu uwaleka ukulongana alesosa? (b) Kuti mwa-afwa shani abaleka ukulongana ukumona ukuti ukuleka ukulongana takwabafwa nangu panono?

⁵ Pa kwishiba ifya kwafwa Abena Kristu banabo abaleka ukulongana, baeluda na bakasabankanya bambi abakosoka bafwile ukukutikisha ilyo uyo uwaleka ukulongana alelanda ifili ku mutima. Tutile ni mwe baeluda mulepempula abaupana abashisangwa ku kulongana pa mulandu wa “masakamika ya mikalile.” (Luka 21:34) Nalimo ubwafya bwa kusanga indalama nangu ukusakamana ulupwa e bwalenga ukuti baleke ukubomba imilimo ya Bwina Kristu. Nangu limbi balemona ukuti nga baleka ukucitako fimo, kuti ba-angukilwako. Lelo kuti mwabalondolwela ukuti ukuitalusha kuli bamunyinabo te cingabafwa iyo. (Belengeni Amapinda 18:1.) Nalimo kuti mwabepusha mu kucenjela amuti: “Bushe ifi mwaleka ukusangwa ku kulongana, insansa shalifulilako? Bushe imikalile ya lupwa lwenu yaliwaminako? Bushe ukusekelela muli Yehova kucili e bucingo bwenu?”—Nehe. 8:10.

⁶ Ukutontonkanya pa mepusho ya musango yo kuti kwalenga bailuka ukuti ukuleka ukulongana kwalilenga baleka ukumona ifintu filya Yehova afimona kabili ne nsansa bakwete shalipwa. (Mat. 5:3; Heb. 10:24, 25) Nalimo kuti mwabafwa no kumona ukuti ukuleka ukushimikila imbila nsuma kwalilenga belaba ne nsansa. (Mat. 28:19, 20) Ninshi finshi uwaleka ukulongana alingile ukucita?

7. Cinshi twingakoselesha abafuma mu mukuni ukucita?

⁷ Yesu atile: “Mucenjele epali imitima yenu yafinininwa ku buliili na kuli bucakolwa na ku masakamika ya mikalile . . . E ico, mulelola inshita yonse no kulapepa amapepo ya kupapaata pa kuti mukapusuke kuli fyonse ifikacitika.” (Luka 21:34-36) Kuti mwakoselesha abafuma mu mukuni lelo abalefwaya ukuba ne nsansa isho bali na sho kale, ukulomba umupashi wa mushilo no bwafwilisho kuli Lesa, e lyo no kucita ifyo balepepelapo.—Luka 11:13.

Bushe Bali-ipununa?

8, 9. Finshi eluda engalanda pa kupelulushanya no waipunwine?

⁸ Apo abantu tabapwililika, limo limo kuti bapusana, kabili umo kuti aipununa. Bamo balaipununa ilyo untu bacindika mu cilonganino acita ifyapusana ne fyo Baibolo isosa. Nga ca kuti e calenga umo ukuleka ukulongana, ilyo eluda alemupempula, kuti amulondolwela ukuti Yehova tapunwisha uuli onse iyo. Nomba cinshi umuntu engafulilwa Lesa no kuleka ukulongana na bantu Bakwe? Ukucila ukufulilwa Lesa, alingile ukutwalilila ukumubombela no kucetekela ukuti “Kapingula wa pano isonde ponse” alishiba icacitike kabili akabombelapo bwino bwino. (Ukute. 18:25; Kol. 3:23-25) Nga ca kuti umuntu ali-ipunwine, awa na pa nshi, te kuti ekalilile fye apo pene, lelo kuti aesha ukwima.

⁹ Pa kwafwa uwaleka ukulongana, eluda kuti amweba no kuti bamo basanga ukuti mu kuya kwa nshita icalengele ukuti baipunune cimoneka nga kantu fye akanono. Na kuba, icalengele baipunune limbi tacabapo no kubapo pali nomba. Nga ca kuti icalengele uyo muntu aipunune mulandu wa kuti balimusalapwile, nga atontonkanya sana pa fyo bamufundile no kupepelapo, kuti asanga no kuti na o alilufyenye kabili talingile no kuipununa pa fyo bamufundile.—Amalu. 119:165; Heb. 12:5-13.

Bushe Pali Isambilisho Ilyo Ashaumfwikishe?

10, 11. Finshi napamo mwingalanda ifingafwa uushaumfwikishe fimo ifyo Baibolo isambilisha?

¹⁰ Nalimo icalengele bamo ukufuma mu mukuni wa kwa Lesa ni co balifililwe ukumfwa isambilisho limo ilya mu Baibolo. Abena Israele abalubwilwe ukufuma mu busha mu Egupti ‘balilabile ifyo Lesa abacitiile’ kabili “tabapembelele ukuti abapande amano.” (Amalu. 106:13) Kuti cawama ukucinkulako uwaleka ukulongana ukuti “umusha wa cishinka kabili uwashilimuka” alatupeela ifya kulya fya ku mupashi ifyawamisha. (Mat. 24:45) Na kuba, e calengele uyo muntu ukusambilila icine. E ico mulandu nshi ashingapingwilapo ukuti ale-enda mu cine na kabili?—2 Yoh. 4.

¹¹ Pa kwafwa uwafuma mu mukuni wa kwa Lesa, eluda nalimo kuti alanda pa basambi balya abashiile Yesu pa mulandu wa kukaana cimo ico asambilishe. (Yoh. 6:53, 66) Ilyo balekele ukwampana na Kristu na basambi bakwe aba cishinka, balilekele ukutemwa ifya kwa Lesa ne nsansa shabo shalipwile. Bushe abaleka ukulongana, balisanga kumbi ukwaba ifya kulya fya ku mupashi ifisuma? Awe, pantu takwaba kumbi ukwaba ifya kulya fya musango yo!

Bushe Alicitile Ulubembu Lwabipisha?

12, 13. Nga ca kuti uwafuma mu mukuni atila alicita ulubembu lwabipisha, cinshi cingacitwa ku kumwafwa?

¹² Bamo balaleka ukushimikila no kusangwa ku kulongana pa mulandu wa kuti balicita ulubembu lwabipisha. Bamona kwati nga bayebelela kuli baeluda, kuti batamfiwa. Lelo teti batamfiwe nga balileka ifyo fintu fyabipa kabili balilapila no mutima onse. (2 Kor. 7:10, 11) Bali no kupokelelwa, kabili baeluda bakabafwilisha ukuba bacibusa ba kwa Lesa na kabili.

¹³ Nga ni mwe kasabankanya wakosoka uwapeelwa umulimo wa kwafwa uwaleka ukulongana, cinshi mwingacita nga uyo muntu amweba ukuti alicita ulubembu lwabipisha? Nga fintu tulandilepo kale, ukucila ukuti imwe mweshe ukubombelapo, mwebeni ukuti akalande na baeluda. Nga talefwaya ukucita ifyo, kuti mwakonka ifyo Yehova alanda ukuti e fya kucita nga caba ifyo, ne co cikalanga ukuti mwalibikako amano kwi shina lya kwa Lesa, no kuti mufwaya icilonganino ukuba icasanguluka. (Belengeni Ubwina Lebi 5:1.) Baeluda bakeshiba ifya kwafwa uulefwaya ukubwela no kulaikala ukulingana ne fyo Lesa afwaya. Napamo kuti bamufunda mu kutemwa. (Heb. 12:7-11) Nga ca kuti uyo muntu asumina ukuti alibembukila Lesa, alileka ukucita imembu, kabili nga alilapila icine cine, baeluda bakamwafwa, kabili Yehova kuti amwelela.—Esa. 1:18; 55:7; Yako. 5:13-16.

Ukubwela kwa Mwana Kwaleta Insansa

14. Londololeni mu mashiwi yenu icilangililo ca kwa Yesu ica mwana walubile.

¹⁴ Pa kwafwa impaanga iyaluba, uupeelwe umulimo wa kuyafwa kuti alanda pa cilangililo ca kwa Yesu icalembwa pali Luka 15:11-24. Muli ulya mulumbe, umulumendo alyonawile ifyuma fyakwe fyonse ku mikalile ya bucilende. Asukile apata iyi mikalile. Ali ne nsala, alefuluka ku ng’anda, kabili apingwilepo ukubwelela ku ng’anda! Ilyo acili fye ukutali, wishi alimumwene, amubutukila, amukumbatila no kumutomona kabili atemenwe cibi. Ukutontonkanya pali ici cilangililo, kuti kwalenga uwaluba ukubwela mu mukuni. Apo cino calo cili no konaulwa nomba line, afwile ‘ukubwela ku ng’anda’ bwangu bwangu.

15. Cinshi cilenga bamo ukusensenunwa ukufuma mu cilonganino?

¹⁵ Abengi abasensenunwa ukufuma ku cilonganino tababa nga ulya mwana walubile. Bamo basensenunwa fye panono panono, nga filya fine ubwato busensenunwa ukufuma ku mulundu. Bamo balafinininwa ku masakamika ica kuti basuula na kuli bucibusa bwabo na Yehova. Bambi na bo balaipununa ilyo uwa mu cilonganino acita fimo, nangu balaleka ukulongana pa mulandu wa kuti tabasumine isambilisho limo ilya mu Baibolo. Bamo bamo ukubembuka e kulenga. Lelo, ifyalandwa muli cino cipande kuti fyalenga mwa-afwa abafuma mu mukuni pali iyi milandu ne milandu imbi ukubwela ilyo inshita tailapwa.

“Mwabweleni, We Mwana!”

16-18. (a) Bushe eluda umo ayafwile shani munyinefwe umo uwalekele ukulongana pa myaka iingi? (b) Cinshi calengele uyu munyinefwe ukuleka ukulongana, bamwafwile shani, kabili bamupokelele shani ilyo atendeke ukulongana na kabili?

¹⁶ Eluda umo atila: “Mwi bumba lyesu ilya baeluda, twalitemwa sana ukupempula abaleka ukulongana. Inshita imo naibukishe munyinefwe umo uo natungulwileko isambililo no kwafwa ukwisa mu cine. Alilekele ukulongana pa myaka 25 kabili ifintu tafyalemwendela bwino. E ico namulondolwelele ifyo ukukonka ifyaba mu Baibolo kwingamwafwa. Ilyo papitile inshita, atampile ukusangwa mu kulongana ku Ng’anda ya Bufumu kabili alisumine ukulasambilila Baibolo pa kuti akose no kubwela mu mukuni.”

¹⁷ Cinshi calengele uyu munyinefwe ukuleka ukulongana? Umwine atila: “Natampile ukubika sana amano ku fya calo ukucila ku fya kwa Lesa. Lyena nalilekele ukubelenga Baibolo ne mpapulo, naleka no kushimikila, e lyo no kusangwa ku kulongana. Naishilesanga fye nalileka ukulongana na Bena Kristu banandi. Lelo icalengele ukuti mbwele, ni co uyu eluda alingafwile no mweo onse.” Amafya uyu munyina akwete yatendeke ukucepa ilyo atampile ukusambilila Baibolo. Asosa ati, “Naishileiluka ukuti ico nalebulisha mu bumi bwandi, kutemwa kwa kwa Yehova no butungulushi bwakwe no bwa kuteyanya kwakwe.”

¹⁸ Bushe aba mu cilonganino bapokelele shani uyu munyinefwe ilyo abwelele? Atila: “Ng’umfwa kwati ni ulya mwana walubile untu Yesu Kristu alandilepo. Na kuba, nkashi umo umukote uwaba muli co cilonganino pa myaka 30, kabili acili alikosa mu kupepa, anjebele ati, ‘Mwabweleni, we Mwana!’ Nalyumfwile bwino sana. Cine cine, nalibwelele uko mfwile ukuba. Kabili ndetasha sana pa kutemwa kwa kwa ulya eluda ne cilonganino conse, no kutekanya, e lyo ne fyo bonse mu cilonganino bambikileko amano. Ukutemwa batemwa Yehova no bantu banabo e kwangafwile sana ukubwela mu mukuni.”

Bacincisheni Ukubwela Ili Line!

19, 20. Kuti mwacita shani pa kukoselesha abaleka ukulongana ukubwela mu mukuni bwangu bwangu, kabili kuti mwacita shani pa kubalanga ukuti Lesa afwaya fye tulebomba ukulingana na po twingapesha?

¹⁹ Tuleikala mu nshiku sha kulekelesha, kabili ukupwa kwa cino calo kuli mupepi sana. E ico, koselesheni abaleka ukulongana ukulasangwa ku kulongana. Bacincisheni ukutendeka lino line. Balondolweleni ukuti Satana ale-esha ukonaula bucibusa bwabo na Lesa no kubalenga ukumona kwati nga bafuma mu kupepa kwa cine, e lyo ifintu fingabako bwino. Bebeni ukuti kuti basanga ukutuusha kwine kwine nga ca kuti fye baba abasambi ba busumino aba kwa Yesu.—Belengeni Mateo 11:28-30.

²⁰ Cinkuleniko abaleka ukulongana ukuti Lesa afwaya fye tulebomba ukulingana na po twingapesha. Ilyo Maria, nkashi ya kwa Lasaro bamulengulwile pa kusuba Yesu amafuta ya mutengo ilyo kwashele inshiku ishinono ukuti epaiwe, Yesu atile: “Mulekeni umwine. . . . Abombele apapelele amaka yakwe.” (Marko 14:6-8) Yesu alitashishe mukamfwilwa umupiina uwapeele fye umusangulo unono pe tempele. Na o wine acitile apapelele amaka yakwe. (Luka 21:1-4) Fwe bengi twalikwata amaka ya kusangwa ku kulongana no kubombako umulimo wa kubila pa Bufumu. Apo Yehova alatwafwa, na bengi abaleka ukulongana kuti batendeka ukucita ifi fintu.

21, 22. Finshi mwingeba abalebwelela kuli Yehova ukuti e fyo bakaipakisha?

²¹ Nga ca kuti uwaba kwati ni mpaanga uwafuma mu mukuni aleumfwa insoni ukuyamonana na bamunyina na bankashi mu cilonganino, kuti mwamucinkulako pa kusekelela kwaliko ilyo umwana uwalubile abweleele ku ng’anda. Abatampa ukulongana na kabili balalenga kwaba ukusekelela ukwapala kulya. Bakoselesheni ukubwela lino line pa kuti bakaane Satana Kaseebanya no kupalama kuli Lesa.—Yako. 4:7, 8.

²² Bonse ababwelela kuli Yehova bakapokelelwa ne nsansa. (Inyimbo 3:40) Kale ilyo balebombela Lesa, bafwile baleba ne nsansa sana. Bonse abalebwela mu mukuni bwangu bwangu, bakapaalwa nga nshi ku ntanshi!