Ifyo Twingafwaisha Ukwishiba mwi Buuku lya kwa Esaya—II

ESAYA alebomba umulimo wakwe uwa kusesema muli bucishinka. Ifyebo alandile pa bufumu bwa mikowa 10 ubwa Israele naficitika kale. Nomba nakwata ifyebo na fimbi pa fyo Yerusalemu akaba ku ntanshi.

Umusumba wa Yerusalemu ukonaulwa, na bekashi ba uko bakasendwa muli bunkole. Nomba, tawakonaulwe ku ciyayaya. Nga papita inshita, ukupepa kwa cine kukatendeka cipya cipya. Ubu e bukombe bwacindama ubwaba pali Esaya 36:1–66:24.a

“MONA, INSHIKU SHILEISA”

(Esaya 36:1–39:8)

Mu mwaka walenga 14 uwa kuteka kwa Mfumu Hisekia (732 B.C.E.), abena Ashuri basansa Yuda. Yehova alaya ukucingilila Yerusalemu. Icintiinya ca bena Ashuri capwa ilyo malaika wa kwa Yehova umo fye aipaya abashilika abena Ashuri 185,000.

Hisekia alwala. Yehova ayasuka ipepo lyakwe kabili amuposha, amulundilako imyaka 15 ku bumi bwakwe. Ilyo imfumu ya ku Babiloni yatuma aba kuyamweba ukuti cawama apo naupola, Hisekia alufyanya ilyo abalanga icuma conse ico akwata. Esaya aeba Hisekia ubukombe bwa kwa Yehova, ukutila: “Mona, inshiku shileisa ilyo cikasendwa conse icili mu ng’anda yobe, na conse ico bawiso balongelemo ukufika kuli lelo, cikatwalwa ku Babele.” (Esaya 39:5, 6) Ilyo papita imyaka ukucilako fye panono pali 100, ukusesema kwafikilishiwa.

“UKAKUULWA”

(Esaya 40:1–59:21)

Ilyo fye asobela pa konaulwa kwa Yerusalemu no kusendwa kwa bantu mu busha mu Babiloni, Esaya asesema na pa kukuulwa cipya cipya. (Esaya 40:1, 2) Esaya 44:28 itila: “Ukakuulwa [umusumba wa Yerusalemu].” Ifilubi fya balesa ba mu Babiloni fikasendwa kwati “fipe.” (Esaya 46:1, NW ) Babiloni akonaulwa. Uku kusesema konse kwafikilishiwa pa numa ya myaka 200.

Yehova akapeela umubomfi wakwe ku kubo “lubuuto ku nko.” (Esaya 49:6) “Imyulu” ya bena Babiloni nelyo bakateka, “ikaanduluka nge cushi,” kabili na batekwa “bakafwa ngo tushishi”; lelo ‘umwana mwanakashi Sione uwaba muli bunkole aka kunta ifikakilo fya pa mukoshi wakwe.’ (Esaya 51:6; 52:2) Yehova alanda kuli bonse abesa kuli ena no kukutika, ukutila: “Ndepinga kuli imwe icipingo ca muyayaya, ifya luse ifya cishinka ifyalailwe Dabidi.” (Esaya 55:3) Nga tulecita ifyo Lesa afwaya kuti calenga ‘twasanga insansa muli Yehova.’ (Esaya 58:14, NW) Lelo, amampulu ya bantu yena, ‘yalapatukanya pa kati kabo na Lesa wabo.’—Esaya 59:2.