Tufwile Ukupashanya Yesu

12, 13. (a) Bushe abantu muno nshiku baleyankula shani ku mbila nsuma ya Bufumu? (b) Finshi tulingile ukutontonkanyapo nga tulefwaya ukulakonka mu makasa ya kwa Kristu?

¹² Muno nshiku, imbila nsuma ya Bufumu ileshimikilwa mu fyalo ifingi nga filya Yesu asobele ukuti e fyo cikaba. (Mateo 24:14) E ico, abantu abengi sana bali-ipeela kuli Lesa. Balatemwa sana ukumfwa ifisuma ifikabako mu Bufumu. Balafwaisha ukwisaikala umuyayaya mu mutende kabili mu cibote muli paradaise pano calo, kabili balashimikilako na bambi ifi fintu fisuma. (Amalumbo 37:11; 2 Petro 3:13) Bushe na imwe mulashimikila abantu ifya Bufumu? Nga mulashimikila, e pashili pa kuleka. Na lyo line, kuli na cimbi ico bonse tufwile ukutontonkanyapo.

¹³ Umutumwa Petro alembele ukuti: “Kristu aculiile imwe, pa kumushila ica kumwenako ukuti mukonke bwino bwino mu ntampulo shakwe.” (1 Petro 2:21) Moneni ukuti Petro pali ili lembo talandile pa fyo Yesu ali uwapimpa mu kushimikila nelyo pa fyo ali uwakampuka ukusambilisha, lelo alandile pa kucula kwa kwa Yesu. Apo e ko aali ilyo balecusha Yesu, Petro alishibe bwino ifyo Yesu aipeeleshe ukucula pa kuti alange ukutila asalile imitekele ya kwa Yehova no kushinina Satana ukuti wa bufi icine cine. Nomba, kuti twakonka shani mu makasa ya kwa Yesu? Natuipushe ukuti: ‘Bushe kuti nacula ukufika pi pa kuti cimoneke ukutila nasalapo ukulatekwa na Yehova no kumucindika? Bushe imikalile yandi ne fyo momba umulimo wa kushimikila filalanga ukuti imitekele ya kwa Yehova e yo nacindamika sana?’—Abena Kolose 3:17.

14, 15. (a) Bushe Yesu acitile shani ilyo Petro atile icabipa tacakamuponene na lintu balefwaya ukumubika pa bufumu, kabili mulandu nshi acitiile ifyo? (b) Mulandu nshi uwacindama uo tufwile ukulaibukisha lyonse fye? (Landeni na pa fili mu mukululo uleti “Beni ku Lubali lwa kwa Yehova.”)

¹⁴ Cila bushiku, kulaba amatunko ayakalamba na yanono, kabili tulakabila no kwishiba ifingawama ukucita ilyo kwacitika fimo nampo nga fikalamba nelyo finono. Cinshi tulingile ukutontonkanyapo ilyo twatunkwa na lintu tulesala ifya kucita? Tutile twatunkwa ukucita ifingonaula ubuKristu bwesu, tukacita shani? Ilyo Petro aebele Yesu ukuti icabipa tacakamuponene, bushe ayaswike shani? Atile: “Kabiye ku numa yandi, we Satana! . . . Tautontonkanya ifya kwa Lesa, kano ifya bantu.” (Mateo 16:21-23) Bushe tukacita nga filya Yesu acitile nga kwamoneka imilimo ingalatuletela sana indalama nelyo ishuko lya kusambilila sana, ilyo nacimoneka no kuti ifi fintu fikalenga tukafilwe ukubombela Lesa bwino bwino? Ilyo Yesu aishibe ukuti abamumwene alecita ifisungusho “balaswa bamwikate ku kumucite mfumu,” alifulumwike no kuyafisama.—Yohane 6:15.

¹⁵ Mulandu nshi Yesu acitiile ifi pali iyi miku ibili e lyo na pa nshita imbi? Ni co alishibe bwino bwino ukutila icacindeme sana te kuicingilila nelyo ukuisekesha. Alefwaya ukucita ubufwayo bwa kwa Wishi no kulanga abantu ukuti nangu bengamucusha shani, te kuti aleke ukumfwila Yehova Kateka Wapulamo. (Mateo 26:50-54) Kanshi, nga tuleibukisha lyonse fye ukuti Yehova e walinga ukututeka, nga filya fine Yesu aleibukisha, te kuti tuneenuke nangu ukufilwa ukucita icisuma. Mulandu nshi twasosele fyo? Pantu te kuti tusendwe na Satana uufwaya ukutubeleleka, incenjeshi ya kapela makufi uulenga ifyabipa fyalamoneka kwati fisuma, nga filya acitile pa kutunka Efa.—2 Abena Korinti 11:14; 1 Timote 2:14.

[Akabokoshi ne Fikope pe bula 29]

BENI KU LUBALI LWA KWA YEHOVA

Abena Kristu nga balepita mu mesho ayayafya icine cine, bafwile ukulaibukisha ico amesho yeshila pali bena. Balapashanya bamunyinefwe abengi mu calo ca Korea na mu fyalo fimbi abashilaba ico amesho yeshila pali bena.

Nte umo uo bakakile mu cifungo mu buteko bwali kale Soviet Union atile: “Icatwafwile sana ukushipikisha ni co twaleibukisha sana umulandu uukalamba uo Satana aimishe kale mu Edene uwa kuti imitekele ya kwa Lesa tayawama. . . . Twalishibe ukuti ili lyali lishuko lya kulanga ukutila ifwe twasala imitekele ya kwa Yehova. . . . E calengele ukuti tukose no kutwalilila aba cishinka.”

Nte na umbi ashimike icamwafwile pamo na baNte bambi ilyo bali mu nkambi umo balebomba incito yakosa sana. Atile: “Yehova aletwafwa sana. Nangu ca kuti ifintu fyalibipile icine cine mu nkambi, twali fye abakosa mu kupepa. Twalekoseleshanya no kusansamushanya pantu twalishibe ukutila ukucula kwesu kwalelanga fye ukuti twaba ku lubali lwa kwa Yehova kabili twasala imitekele yakwe.”