Bapasta Babili Abacindike Ifyalembele Russell

MU 1891, Charles Taze Russell, uwabombele umulimo wacindamisha ku Bena Kristu ba cine abapepa Yehova, atandele ku Bulaya umuku wa kubalilapo. Ukulingana ne fyo bamo bashimika, ilyo aiminineko panono mu Pinerolo, ku Italy, Russell amonene na Profesa Daniele Rivoire, uwali pasta we bumba lya mapepo ilyo beta abena Waldo.a Nangu line Rivoire ali acili alebishanya na bena Waldo pa numa ya kuleka bupasta, atwalilile ukufwaya ukwishibilapo na fimbi kabili abelengele impapulo ishingi isho C. T. Russell alembele.

Mu 1903, Rivoire apilibwile icitabo calembele Russell ica The Divine Plan of the Ages mu lulimi lwa cina Italy kabili abomfeshe indalama shakwe pa kuti ici citabo cipulintwe. Pali iyi nshita ici citabo ninshi tacilapilibulwa mu lulimi lwa cina Italy. Mu mashiwi ya pa kutampa aya muli ici citabo, Rivoire alembele ati: “Twabika ici citabo ca cina Italy mu maboko ya kwa Shikulu. Shi nacipaale pa kuti, nangu muliko ifilubo, cikaafwe ukukusha ishina lyakwe ilyashilisha no kukoselesha abalanda ululimi lwa cina Italy ukulapepa sana. Shi imitima ya bonse ababelenga ici citabo, no kumfwikisha amano, ukwishiba na mapange yakwe no kutemwa, itashe Lesa umwine, uwalenga ici citabo ukusabankanishiwa.”

“Cali Kwati Amamba Yapona mu Menso Yandi”

Pasta wa baWaldo na umbi uwacindike sana impapulo sha kwa Russell ni Giuseppe Banchetti. Wishi kwa Giuseppe uwashiile buKatolika, amusambilishe ifisambilisho fya baWaldo. Mu 1894, Giuseppe aishileba pasta kabili atumikile mu mishi ya baWaldo mu Apulia na Abruzzi na mu fishi fya Elba na Sicily.

Icitabo ca Divine Plan of the Ages icalembele Russell casuminishiwe ukupilibulwa mu cina Italy no kusabankanishiwa mu 1905. Banchetti alembele ifyo asangile ilyo apitulwike muli ici citabo. Ifyo asangile fyalembelwe mu lupapulo lwa ciProtestanti ulwa La Rivista Cristiana ulwalefuma mu nshita mu nshita. Banchetti alembele ati: “Ifwe, [icitabo ca kwa Russell] e citulenga ukwishiba Amalembo kabili e butungulushi bwine bwine ubo Umwina Kristu engasanga nga alefwaya ukunonkelamo no kupaalwa pa kusambilila Amalembo ya Mushilo . . . Ilyo nacibelengele fye, cali kwati amamba yapona mu menso yandi, no kuti inshila ya kuya kuli Lesa yaololokelako kabili yayanguka. Ne fingi ifyalemoneka ukuti filaipilika fyatendeke ukumfwika. Ifisambilisho ifyakosele ukumfwikisha kale fyamoneke ifyayanguka kabili ifyo wingasumina bwino bwino. Ifishaleumfwika kale fyatendeke ukumfwika. Ipange lisuma ilya kupususha icalo muli Kristu lyamoneke ilyayanguka sana kuli ine ica kuti nabilikishe nge fyacitile Umutumwa ati: “Iye, kushika kwa bucindami kabili ukwa mano kabili ukwa kwishiba ifya kwa Lesa!”—Abena Roma 11:33.