Abana bobe bonse abaume bakaba abasambilishiwa kuli Yehova, kabili umutende wa bana bobe abaume ukafula.

23. (a) Bushe ‘ukusambilishiwa kuli Yehova’ kwayafwa shani Abena Kristu basubwa mu nshiku sha kulekelesha? (b) Ni mu nshila nshi abantu ba kwa Lesa bapaalwa ukuba ne ‘mipaka ya mabwe ayawama’?

²³ Icikomo 13 ica kwa Esaya icipandwa 54 cilaasuka ico cipusho—citila, bonse ‘bakasambilishiwa kuli Yehova.’ Yesu umwine alandile amashiwi ya muli ici cikomo ku bakonshi bakwe abasubwa. (Yohane 6:45) Kasesema Daniele asobele ukuti muli iyi “nshita ya ku mpela” abasubwa bakapaalwa pa kupeelwa ukwishiba kwine kwine ukwapaka no kushilimuka kwa ku mupashi. (Daniele 12:3, 4) Ukushilimuka kwa musango yo kwalibalenga ukuba pa ntanshi mu kutungulula kampeni wakulisha uwa kusambilisha uushatalile acitikapo kale, ukwananya amasomo ya bulesa mwi sonde lyonse. (Mateo 24:14) Kabili, ukushilimuka kwa musango yo kwalibaafwa ukwiluka ubupusano bwaba pa kupepa kwa cine no kwa bufi.

24. Kuti twashininkisha shani ukuti tulesambilishiwa kuli Yehova?

²⁴ Kanshi, cila muntu alingile ukuipusha ati, ‘Bushe ndesambilishiwa kuli Yehova?’ Ukusambilishiwa tusambilishiwa ukwa musango yo takuiishila fye. Tulingile ukubombesha. Nga tulebelenga Icebo ca kwa Lesa lyonse no kwetetulapo kabili nga tulefundwa ukupitila mu kubelenga impapulo shashimpwa pali Baibolo ishisabankanishiwa no “musha wa cishinka kabili uwashilimuka” e lyo no kupekanishisha ukulongana no kusangwako, cine cine tukasambilishiwa kuli Yehova. (Mateo 24:45-47) Nga twapampamina pa kubomfya ifyo tusambilila no kuba abalola lyonse lwa ku mupashi, amasomo ya bulesa yakatupaatulako ku ba muli cino calo cabulwa bukapepa. (1 Petro 5:8, 9) Icacilapo ukuwama ca kuti, kukatwafwa ‘ukupalama kuli Lesa.’—Yakobo 1:22-25; 4:8.