Icebo ca kwa Yehova ca Mweo

Ifyo Twingafwaisha Ukwishiba mwi Buuku lya kwa Yeremia

IMBILA Yeremia abilile pa tuyofi twali no kucitika ifwile yalengele abantu bakwe ukuba no mwenso nga nshi! Itempele lya lulumbi ilyo balepepelamo Lesa pa myaka ukucila 300 bali no kulyoca. Umusumba wa Yerusalemu na Yuda fyali no kushala amapopa, e lyo abekashi bali no kubasenda bunkole. Iyi mbila pamo no bukombe bwa bupingushi bumbi fisangwa mwi buuku lya kwa Yeremia. Pa mabuuku ayakalamba mu Baibolo, ibuuku lya kwa Yeremia e lya bubili. Ili buuku lilanda na pa fyo Yeremia apitilemo pa myaka 67 ilyo ali kasesema. Ifyaba muli ili buuku tabafilembele ukulingana ne fyo fyalecitika, lelo bafilemba ukulingana ne filelandwapo.

“BUBILI UBUBI UBO ABANTU BANDI BACITA”

(Yeremia 1:1–20:18)

Yeremia bamweba ukuba kasesema mu mwaka walenga 13 uwa kuteka kwa kwa Yoshia imfumu ya mu Yuda, ninshi kushele imyaka 40 ukuti Yerusalemu yonaulwe mu 607 B.C.E. (Yeremia 1:1, 2) Ubukombe alebilisha mu myaka ya kulekeleshako 18 iya kuteka kwa kwa Yoshia bwaleta pa bwelu ifibi ifyo aba mu Yuda balecita ne fyo Yehova ali no kubapingula. Yehova atila: “Nkacita na Yerusalemu ukube miina, ica kwikalamo bamumbwe; ne mishi ya kwa Yuda nkacito kube yapomoka, umushaba mwikashi.” (Yeremia 9:11) Mulandu nshi alandile fyo? Atila: ‘Pantu kuli ububi bubili ubo abantu bandi bacita.’—Yeremia 2:13.

Yeremia alanda na pa kubweshiwa kwa baYuda abalapile. (Yeremia 3:14-18; 12:14, 15; 16:14-21) Lelo abantu tabatemenwe ubukombe Yeremia alebilisha. “Cilolo mukalamba mu ng’anda ya kwa Yehova” auma Yeremia no kumubika mu makusu ubushiku bonse.—Yeremia 20:1-3.