Yerusalemu ne Tempele lya kwa Solomone

WALEITWA ati “uwa musuma wa ciyembo,” kabili “umusumba wa Mfumu nkulu.” (Amb 48:2; 50:2; Inyi 2:15) Yerusalemu wali musumba wa bulashi uwa luko lwa kwa Lesa. (Amb 76:2) Ilyo Davidi apokolwele umusumba ku bena Yebusi no ku-upanga umusumba wakwe uwa bulashi, waleitwa ati “umusumba wa kwa Davidi,” nelyo fye ati “Sione.”—2Sa 5:7.

Nangu ca kuti tawali apasuma sana, Yerusalemu alilumbwike pa mulandu wa kuti Lesa e po abikile ishina lyakwe. (Amlg 26:2) Cali cifulo ca pa kati ica mapepo no bulashi ica lulya luko.

Yerusalemu abela pa muulu apalepa bamita 750 lwa pa kati ka mpili sha Yudea. Baibolo ilanda pa “kulepa” na pali bakapepa ati ‘balenina’ ukuya kulya. (Amb 48:2; 122:3, 4) Umusumba wa pa kale washingulwikwe ne mipokapoka: Umupokapoka wa Hinomu ku masamba na ku kapinda ka ku kulyo no mumana wa mukuku uwa Kidrone ku kabanga. (2Ish 23:10; Yer 31:40) Akamfukumfuku ka Gihonea mu Mumana wa Mukuku uwa Kidrone na Ene-rogele ku kapinda ka ku kulyo fyaleleta amenshi yasuma, ayalebomfiwa sana sana abalwani nga basansa.—2Sa 17:17.

Pa cikope cili pe bula 21, Umusumba wa kwa Davidi uli mu fyakashika. Mu kuteka kwa kwa Davidi na Solomone, umusumba wafikile ku kapinda ka ku kuso ukushinta ku Ofele (mu fya katapakatapa) na ku Lupili lwa Moria (muli bulu). (2Sa 5:7-9; 24:16-25) Solomone akuuliile Yehova itempele lya lulumbi pa lubali lwa lupili apalepele sana. Elenganyeni ilongo lya bakapepa balenina ukuya ku “lupili lwa kwa Yehova” ukuya ku mitebeto ya pa mwaka! (Sek 8:3) Imisebo ilangililwe pe bula 17 e mo balepita.

[Akabokoshi pe bula 21]

Umuye nshiku, Yerusalemu alikulileko ukufika ku masamba na ku kapinda ka ku kuso. Ishamfumu sha Yuda ishatekele pa numa ya kwa Solomone shakuuliileko ifibumba ne mpongolo. Ukufwailisha ifyashulwa ukucili kuletwalilila kuti kwasokolola apabelele ifibumba na kuntu lyafikile. Umusumba waonawilwe mu 607 B.C.E. kabili washele amapopa pa myaka 70. Pa numa ya myaka nalimo 80 ukutula apo abaYuda babwelelemo ku mwabo, Nehemia atendeke umulimo ushaikulila uwa kukuula ifibumba fya Yerusalemu cipya cipya.