amenso yandi nayamona Imfumu, Yehova wa mabumba, umwine!” Esaya alipapile nga nshi ica kuti ali-icefeshe ilyo aishibe ifyo icilonganino ca kwa Yehova cakula. Ifyo amwene fyalimufikile pa mutima ica kuti ilyo Yehova alefwaya uwa kuyabila ubupingushi bwakwe, Esaya atile: “E po ndi! Ntumeni.”—Esa. 6:1-5, 8.

¹³ Nga twaishiba bwino icilonganino ca kwa Yehova, no kulacimona ukuti calicindama, tukalacita nga filya fine Esaya acitile. Ilyo kwaba fimo ifya-aluka mu cilonganino ca kwa Yehova, tulaitemenwa ukwaluka. Tulesha na maka ukucita ifilanga ukuti twalicetekela sana icilonganino ca kwa Yehova.

ICILONGANINO CA KWA YEHOVA CILELUNDULUKA

¹⁴ Icipandwa 1 mwi buuku lya kusesema ilya kwa Esekiele, cilanda ukuti Yehova aliniina pe celeta ilikalamba ilya ku muulu. Ili iceleta limininako icilonganino ca kwa Yehova ica ku muulu. Yehova mu mampalanya e wensha ili iceleta pantu e utungulula icilonganino cakwe pa kuti afikilishe ubufwayo bwakwe.—Amalu. 103:20.

¹⁵ Cila mupeto wa ili iceleta walikwata umupeto uwaucilinganya, uwalingana na o. Ici e cilenga imipeto ‘ukuya ku mbali shine.’ (Esek. 1:17) Imipeto ilaaluka bwangu bwangu no kuya ku ntunga iili yonse. Lelo ici tacilolele mu kuti ili celeta talyakwata uulitungulula. Yehova taleka fye icilonganino cakwe ukulaitungulula. Pa kulanda pa mipeto ye celeta, Baibolo pali Esekiele 1:20 itila: “Konse uko umupashi wafwaya ukuti [imipeto] iye, e ko yaleya.” Kanshi Yehova e ulenga icilonganino cakwe ukuya uko umupashi wakwe wacitungulula. E ico, tufwile ukuyipusha atuti, ‘Bushe nyendela pamo ne cilonganino ca kwa Yehova?’

¹⁶ Ukubombela pamo ne cilonganino ca kwa Yehova tacipilibula fye ukusangwa mu kulongana no kubombako umulimo wa kubila imbila nsuma. Lelo icikalamba ico tufwile ukucita pa kulanga ukuti tulabombela pamo ne cilonganino ca kwa Lesa, kulalunduluka mu fya kwa Lesa. Tufwile ‘ukwishiba bwino bwino ifyacilapo ukucindama’ no kulaisambilisha lyonse ifya kwa Lesa. (Fil. 1:10; 4:8, 9; Yoh. 17:3) Tufwile no kulaibukisha ukuti, pa kuti ifintu file-enda bwino na pa kuti tube abaikatana, tufwile ukuba mu cilonganino icateyanishiwa bwino. Kanshi tufwile ukwishiba ukuti calicindama ukulakonka fyonse ifyo icilonganino ca kwa Lesa citusambilisha no kulabomfya bwino ifyo Yehova atupeela pa kuti tulebomba bwino umulimo wakwe. Nga tule-endela pamo ne celeta lya ku muulu ilya kwa Yehova, kuti tulecita ifintu ukulingana ne mbila nsuma iyo tubila.

¹⁷ Apo icilonganino ca kwa Yehova cilatwafwa, tulatwalilila ukucita ukufwaya kwa kwa Lesa. Muleibukisha ukuti uwensha ili iceleta lya ku muulu ni Yehova. E ico nga tule-endela pamo ne celeta lya ku muulu, ninshi tulelanga ukuti twalicindika Yehova kabili twalicetekela “Icilibwe” cesu. (Amalu. 18:31) Baibolo yatulaya ukuti: “Yehova akapeela abantu bakwe amaka. Yehova akapaala abantu bakwe pa kuti babe no mutende.” (Amalu. 29:11) Apo twaba mu cilonganino ca kwa Yehova, na ifwe Lesa alatukosha kabili twaliba no mutende uo Lesa apeela abantu bakwe abateyanishiwa. E ico, tatutwishika no kutwishika ukuti Yehova akatupaala nga twatwalilila ukucita ukufwaya kwakwe pali ino nshita e lyo na ku ciyayaya.

BAIBOLO itila: “Pa kutendeka Lesa apangile umuulu e lyo ne sonde,” kabili fyonse ifyo apangile ‘fyaliweme nga nshi.’ (Ukute. 1:1, 31) Yehova abumbile abantunse pa kuti bakekale pe sonde umuyayaya. Nomba filya Adamu na Efa bapondokeele Lesa mu Edeni fyalilenga ukuti abantu belaba ne nsansa. Lelo ubufwayo bwa kwa Yehova kwi sonde na ku bantunse tabwa-alwike. Lesa alandile ukuti aali no kulubula abana ba kwa Adamu aba cumfwila. Ukupepa kwa cine kwali no kutendeka cipya cipya, kabili Lesa aali no konaula umubifi ne milimo yakwe yonse iyabipa. (Ukute. 3:15) Ifi nga fyacitika, ifintu ‘fikawama nga nshi’ na kabili. Yehova akafikilisha ubufwayo bwakwe ukupitila mu Mwana wakwe, Yesu Kristu. (1 Yoh. 3:8) Kanshi calicindama ukwishiba imilimo iyo Lesa apeela Kristu.—Imil. 4:12; Fil. 2:9, 11.

IMILIMO IYO KRISTU AKWATA

² Tufwile ukwishiba ukuti Lesa alipeela Kristu imilimo iyalekanalekana. Yesu ni Kalubula wa bantunse, ni Shimapepo Mukalamba, e Mutwe wa cilonganino ca Bena Kristu, kabili pali ino nshita ni Mfumu iya Bufumu bwa kwa Lesa. Nga tuletontonkanya pa milimo iyo Yesu akwata, tukalatasha Lesa pa fyo ateyanya ifintu, kabili tukatemenwako Kristu Yesu. Baibolo yalilanda pa milimo iyalekanalekana iyo Lesa apeela Kristu.

³ Ilyo Kristu aali pano isonde, calimoneke apabuuta tuutu ukuti e wali no kubwesesha abantu aba cumfwila kuli Lesa. (Yoh. 14:6) Yesu e Kalubula wa bantunse, e ico ali-ipeele ukuba icilubula pa kuti alubule abengi. (Mat. 20:28) Apo Yesu alabomba imilimo iikalamba, e ukalenga ubufwayo bwa kwa Yehova ku bantunse bukafikilishiwe, no kuti tukabwelele kuli Lesa. (Imil. 5:31; 2 Kor. 5:18, 19) Imfwa ya kwa Yesu e lyo no kubuuka kwakwe fyalilenga ukuti abantu aba cumfwila bakapaalwe ilyo Ubufumu ubwa kwa Lesa ubwaba ku muulu bukalateka isonde.

⁴ Apo Yesu ni Shimapepo Mukalamba, ‘alatulangulukilako pa kukanapwililika kwesu,’ kabili alalenga imembu sha basambi bakwe ukufuutwa. Umutumwa Paulo alandile ukuti: “Tatuli na shimapepo mukalamba, uushingatulangulukilako pa kukanapwililika kwesu, lelo tuli na shimapepo mukalamba uwaeshiwa muli fyonse nga ifwe, nomba ena taba na lubembu.” Paulo alyebele na batetekela muli Yesu Kristu ukuti baletasha pali ifi Lesa ateyanya ukuti tubwelele kuli ena. Atile: “E ico, tupalamine ukwabula umwenso ku cipuna ca Bufumu ica cikuuku ca kwa Lesa, pa kuti tupokelele uluse no kusanga icikuuku ca kwa Lesa pa kuti atwafwe pa nshita tulekabila ubwafwilisho.”—Heb. 4:14-16; 1 Yoh. 2:2.

⁵ Yesu na kabili e Mutwe wa cilonganino ca Bena Kristu. Nga filya fine cali ku basambi bakwe aba kubalilapo, na ifwe bene e ututungulula. Yesu abomfya umupashi wa mushilo pa kututungulula e lyo na bacemi banono abafikapo, abakalubulula kuli ena na kuli Shifwe wa ku muulu pa fyo basakamana umukuni wa kwa Lesa. (Heb. 13:17; 1 Pet. 5:2, 3) Yehova alandile pali Yesu ukuti: “Moneni! Nimupeela ukuba inte ku nko, kabili ukuba intungulushi no kuba umukalamba wa bashilika ku nko.” (Esa. 55:4) Yesu alilangile ukuti uku kusesema kwalifikilishiwe ilyo aebele abasambi bakwe ukuti: “Mwileka abantu balemwita ati ‘intungulushi,’ pantu Intungulushi yenu imo, Kristu.”—Mat. 23:10.

⁶ Pa kulanga ukuti alitutemwa kabili alafwaya no kutwafwa, Yesu atweba ukuti: “Iseni kuli ine imwe bonse mwe balecula kabili abafininwa, na ine nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya, e lyo mwalasanga ukutuusha. Pantu ikoli lyandi talyafina, ne cipe candi calyanguka.” (Mat. 11:28-30) Apo Yesu Kristu uutungulula icilonganino ca Bena Kristu alifuuka kabili alatusansamusha, ni “kacema musuma” kabili apashanya Wishi wa ku muulu, Yehova Lesa.—Yoh. 10:11; Esa. 40:11.

⁷ Muli kalata ya kubalilapo iyo Paulo alembeele abena Korinti, alandile pa mulimo na umbi uo Yesu Kristu akwata. Atile: “Ali no kuteka mpaka Lesa akabike abalwani bonse pe samba lya makasa yakwe. Nomba ilyo fyonse fikalengwa ukunakila ena, e lyo no Mwana wine akainashisha ku Walengele fyonse ukunakila ena, pa kuti Lesa akabe fyonse kuli bonse.” (1 Kor. 15:25, 28) Ilyo Yesu ashilaisa pano isonde, ‘alishibishe imilimo,’ pantu e o Lesa abalilepo ukubumba. (Amapi. 8:22-31) Ilyo Lesa amutumine pano isonde, Yesu alecita lyonse ukufwaya kwa kwa Lesa. Alishipikishe ubwesho ubukalamba sana, kabili alitwalilile ukuba uwa cishinka kuli Wishi mpaka ne mfwa. (Yoh. 4:34; 15:10) Apo Umwana wakwe ali ne cishinka ukufika fye ne mfwa, Lesa alimubuushishe ku bumi bwa ku muulu kabili alimupeele amaka ya kuba Imfumu ya Bufumu bwa ku muulu. (Imil. 2:32-36) Apo ni Mfumu, Kristu Yesu alikwata umulimo uukalamba uo Lesa amupeela uwa kutungulula ifibumbwa fya kwa Lesa ifya ku muulu, pa kufumyapo imitekele ya bantunse pe sonde e lyo no kufumyapo ububifi bonse. (Amapi. 2:21, 22; 2 Tes. 1:6-9; Ukus. 19:11-21; 20:1-3) Lyena Ubufumu bwa kwa Lesa ubwa ku muulu e buteko bweka fye ubukaba pe sonde, kabili Yesu e mfumu ya ubu Bufumu.—Ukus. 11:15.

UBUSUMA BWABA MU KWISHIBA IMILIMO IYO KRISTU AKWATA

⁸ Yesu Kristu uo tupashanya alipwililika. Balimupeela umulimo uwa kutusakamana. Pa kuti tulenonkelamo mu fyo atusakamana, tufwile ukutwalilila ukuba aba cishinka kuli Yehova, kabili tufwile ukulabombela pamo ne cilonganino cakwe icilelunduluka.

⁹ Abasambi ba kwa Yesu aba kubalilapo balishibe bwino imilimo iyo Lesa apeela Kristu. E calengele ukuti balebombela pamo, e lyo no kulaumfwila Kristu ilyo alebatungulula no mupashi wa mushilo. (Imil. 15:12-21) Umutumwa Paulo alandile pa fyo icilonganino ca Bena Kristu basubwa caikatene. Atile: “Pa kuba abalanda icine, mu kutemwa tukule muli fyonse ukupashanya Kristu