AbaFarise na BaSaduke Bamoneka

Ni lintu alelemba pa lwa kuteka kwa kwa Hyrcanus e lyo Josephus abalile alanda pa fyo amaka ya baFarise na baSaduke pa bantu yalekulilako. (Josephus alumbwile abaFarise abaliko ilyo Jonathan aleteka.) Talanda uko bafumine. Abasoma bamo batila abaFarise bali kalibumba akafumine mu bena Hasidi, abali cakaniko ca mipepele icaletungilila Yuda Makabe mu fya mapepo lelo icamutalwike ilyo atendeke ifya bupolitiki.

Ishina lya kuti umuFarise lyalyampana ne shiwi lya ciHebere ilipilibula “abapaatulwa,” nangu ca kutila bamo bamona kwati lyafuma kwi shiwi lya kuti “bakapilibula.” AbaFarise bali bantu basoma abafumine mu bantu yaweyawe. Tabali ba mu lupwa lwaibela. Baitalwishe ku kusefya kwa ntambi ukushasanguluka pa kuipeelesha sana mu kupepa, ukukonka amafunde ya pe tempele aya kuba bashimapepo ba mushilo no kulayakonka mu mikalile ya cila kasuba. AbaFarise batendeke umusango upya uwa kulondolwelamo Amalembo uwaishibikwe ati Ifunde lya pa kanwa. Mu kuteka kwa kwa Simon baishilekwata sana amaka ilyo baishilesontwa ukuba mu Gerousia (icilye ca bakalamba), icaishileishibikwa nge cilye ca Sanhedrin.

Josephus ashimika ukuti John Hyrcanus pa kubala ali musambi wa baFarise kabili alebatungilila. Lelo, pa nshita imo, abaFarise balimukalipile pa kukanasha bushimapepo. Ici caletele amalekano. Hyrcanus atobele ifunde lya baFarise ilya fya mipepele. Pa kubakalifya na kabili, aishiletungilila abaSaduke abalelwishanya na baFarise mu fya mipepele.

Cimoneka kwati ishina lya kuti abaSaduke lyafuma kuli Shimapepo Mukalamba Sadoke, uo ifikolwe fyakwe fyaleba pali bushimapepo ukutula ku nshita ya kwa Solomone. Lelo, te baSaduke bonse bafumine muli ulu lupwa. Ukulingana na Josephus, AbaSadoke bali ni bakateka abakankala aba cilya calo, kabili te bengi balebatungilila. Profesa Schiffman, uwasambilila ifya Baibolo, atile: “Abengi . . . bali ni bashimapepo nelyo balya abaleupila mu ndupwa sha bashimapepo bakalamba.” E mulandu wine bakumineko sana kuli bakateka. E co, ukubombesha kwa baFarise ukwa kutungulula abantu mu mikalile yabo no kufwaisha ukuti bonse babe abashila nga bashimapepo kwamwenwe nge cintinya ca kupoka abaSaduke bukateka bapyene. Nomba, mu myaka ya kulekeleshako iya kuteka kwa kwa Hyrcanus, abaSaduke balitendeke ukuteka na kabili.

Ifyashile Abena Hasimonani

Mu nshiku sha bena Hasimonani, ukutendekela kuli Yuda Makabe ukufika kuli Aristobulus II, e yali intendekelo ya mipepele yayakanika iyaliko lintu Yesu ali pe sonde. Abena Hasimonani batendeke ukupimpila ukupepa Lesa, lelo uko kupimpa kwalibipile ilyo ukupepa kwasangilwe ukwa bukaitemwe. Bashimapepo wabo, abakwete ishuko lya kwafwa abantu ukukonka Ifunde lya kwa Lesa capamo, balengele abantu ukuitumpa mu kukansana kwa bupolitiki. Ici, e calengele amalekano mu mipepele ukufula. Abena Hasimonani tabalipo, lelo abaFarise na baSaduke na bambi bali no kutwalilila ukulwila ubutungulushi na mu calo cali no kulatekwa na Herode na Roma.