Yobo Alicindike Ishina lya kwa Yehova

“Libe ilyapaalwa ishina lya kwa Yehova.”—YOBO 1:21.

1. Nani nalimo uwalembele ibuuku lya kwa Yobo, kabili ni lilali alilembele?

MOSE afwile ali ne myaka 40 ilyo balefwaya ukumwipaya kuli Farao. Ici calengele afulumuke mu Egupti no kubutukila ku Midiani. (Imil. 7:23) Ilyo Mose aleikala mu Midiani, nalimo alyumfwile pa macushi Yobo alepitamo, pantu Yobo aleikala mu calo ca Usi lwa mupepi na Midiani. Ku mpela ya lwendo lwa bena Israele, lintu bacitile inkambi mupepi na ku Usi, Mose afwile e lyo aishibe ifyacitike mu myaka ya kulekelesha iya kwa Yobo. Ifyalembwa fya baYuda fyatila Mose alembele ibuuku lya kwa Yobo ninshi Yobo alifwa kale.

2. Bushe ibuuku lya kwa Yobo likosha shani icitetekelo ca babomfi ba kwa Yehova muno nshiku?

2 Ibuuku lya kwa Yobo lilakosha icitetekelo ca babomfi ba kwa Yehova aba muno nshiku. Mu nshila nshi? Ili buuku lilalenga twaishiba ifintu ifyacindama nga nshi ifyacitike mu muulu kabili lilanda na pa fyo Satana asuushishe ukuteka kwa kwa Lesa. Ili buuku lilenga twaishiba no mwalola ukuba ne cishinka kuli Lesa, no mulandu Yehova limo alekela ababomfi bakwe ukucula. Na kabili ibuuku lya kwa Yobo lilondolola ukuti Satana Kaseebanya e mulwani mukalamba uwa kwa Yehova na bantunse. Lilanga no kuti abantu abashapwililika nga filya na Yobo ali, kuti batwalilila ukuba ne cishinka kuli Yehova te mulandu ne fya kwesha bengapitamo. Natulande pali fimo fimo ifyalondololwa mwi buuku lya kwa Yobo.

Yobo Bamwesha Kuli Satana

3. Finshi twaishiba pali Yobo, kabili mulandu nshi Satana amusanshiile?

3 Yobo ali ne fyuma kabili abantu balimucindike sana. Ali mufyashi uwakwete imibele iisuma nga nshi. Ali ni mpanda mano iisuma nga nshi kabili aleafwa abapiina. Lelo, icacindama sana ca kuti Yobo aletiina Lesa. Baibolo yamulondolola ukuti ali muntu “uwa kaele kabili umulungami, aletiina Lesa kabili aletaluka ku fyabipa.” Icalengele ukuti Satana asanse Yobo, te fyuma nelyo umucinshi uo abantu balemupeela. Lelo ni co Yobo alepepa Yehova.—Yobo 1:1; 29:7-16; 31:1.

4. Bushe ishiwi lya kuti bukaele lyalola mwi?

4 Amashiwi ya kubalilapo mwi buuku lya kwa Yobo yalondolola ifyacitike mu muulu ilyo bamalaika balongene pa ntanshi ya kwa Yehova. Satana na o ali pa kati kabo kabili abepeshe Yobo ubufi. (Belengeni Yobo 1:6-11.) Nangu cingati Satana alilandile pa fyuma Yobo akwete, ico abikileko sana amano ni bukaele bwa kwa Yobo. Ishiwi lya kuti “bukaele” lipilibula ukuba umulungami, uwabula umulandu kabili uwabula akalema. Ukulingana ne fyo lyabomfiwa mu Baibolo, ili shiwi lipilibula ukuipeelesha no mutima onse kuli Yehova.

5. Finshi Satana alandile pali Yobo?

5 Satana aletila ico Yobo alepepela Lesa ni co alemwenamo fimo, te pa mulandu wa bukaele iyo. Satana aleti Yobo ali no kutwalilila fye ukuba ne cishinka kuli Yehova nga ca kuti Lesa alemupaala no kumucingilila. Pa kuti cishibikwe ukuti ifyo Satana alelanda fya bufi, Yehova alimulekele ukuti eshe ulya mwaume wa cishinka. Kabili mu bushiku fye bumo, Yobo apokelele amashiwi ya kuti ifitekwa fyakwe balifibile e lyo fimbi balifipeye, no kuti ababomfi bakwe balibepeye, e lyo no kuti abana bakwe 10 balifwile. (Yobo 1:13-19) Bushe Yobo alilekele ukuba ne cishinka kuli Lesa? Ibuuku lya kwa Yobo lyalilondolola ifyo Yobo acitile ilyo ifi fyabipa fyonse fyamucitikile. Yobo atile: “Yehova alimpeele, kabili Yehova ampokolola. Libe ilyapaalwa ishina lya kwa Yehova.”—Yobo 1:21.

6. (a)Cinshi cacitike ilyo bamalaika balongene na kabili pa ntanshi ya kwa Yehova? (b) Ni bani Satana aletontonkanyapo ilyo aletwishika bucishinka bwa kwa Yobo kuli Yehova?

6 Pa numa, bamalaika balilongene na kabili pa ntanshi ya kwa Yehova. Na uno muku, Satana alilandile ubufi pali Yobo, atile: “Inkanda pa nkanda, kabili conse ico umuntu akwata kuti apeelela pa mweo wakwe. Nomba, shi tambikeni ukuboko kwenu, mukumyeko na kwi fupa lyakwe na ku munofu wakwe kabili mumone nga takamutuke pa menso yenu.” Pano nomba, Satana talelanda fye pali Yobo. Ilyo atile, “conse ico umuntu akwata kuti apeelela pa mweo wakwe,” Satana aletwishika bucishinka bwa “muntu” fye onse uupepa Yehova. Pa numa ya ifi, Lesa asuminishe Satana ukulwalika Yobo ubulwele ubwabipisha. (Yobo 2:1-8) Lelo Satana tapelele apa pene.

Ifyo Twingasambilila Kuli Yobo

7. Bushe muka Yobo na baishile mu kupempula umulume wakwe balengele shani ubwesho ukukoselako?

7 Pa kubala, umukashi wa kwa Yobo alikalipwe umutima nga filya fine umulume wakwe akalipwe. Ali uwa nkumbabulili pa mfwa ya bana bakwe na pa kuloba kwa fyuma bakwete. Cifwile calemukalipa nga nshi ukumona umulume wakwe alecula ku bulwele ubwabipisha. Bushiku bumo aebele Yobo ukuti: “Bushe mucili namwikatisha bukaele bwenu? Tukeni Lesa pa kuti mufwe!” Lyena abaume batatu, Elifasi, Bildadi, na Sofari, balishile, abene baleti baishile ku kusansamusha Yobo. Lelo, bamupeele imilandu ya bufi kabili bali “bakasansamusha ba kukalifya.” Bildadi atile abana ba kwa Yobo balibembwike kabili cali fye bwino filya fine bafwile. Mu manshoko Elifasi atile Yobo aleculila pa membu acitile kale. Asosele fye no kuti Lesa tapenda abantu ababa ne cishinka kuli ena! (Yobo 2:9, 11; 4:8; 8:4; 16:2; 22:2, 3) Te mulandu ne fya kwesha fyonse ifi, Yobo atwalilile fye ukuba ne cishinka kuli Lesa. Kwena, Yobo alilubile lintu ‘aimwene uwalungama ukucila Lesa.’ (Yobo 32:2) Na lyo line, alitwalilile ukuba ne cishinka kuli Lesa te mulandu ne fi fyonse.

8. Bushe impanda mano sha muno nshiku kuti shapashanya shani Elihu?

8 Pa numa ya ifi, ibuuku lya kwa Yobo lilanda pali Elihu, na o uwaishile ku kupempula Yobo. Pa kubala, Elihu alekutika fye ku fyo Yobo na banankwe batatu balelanshanya. Nangu ca kutila Elihu ali umwaice pali Yobo na banankwe batatu, ifyebo asosele fyalangile ukuti ali sana na mano. Alelanda na Yobo mucinshi mucinshi. Alimutashishe pali bukaele bwakwe. Lelo asosele no kuti Yobo abikile sana amano ku kufwaya ukuilungamika. Lyena, Elihu akoseleshe Yobo ukuti ukuba ne cishinka kuli Lesa te kuicusha fye. (Belengeni Yobo 36:1, 11.) Ala mwandini Elihu ali ni mpanda mano isuma iyo abapanda mano muno nshiku bengapashanya! Alitekenye, alekutikisha, alitashishe Yobo umo acitile bwino, kabili alimupandile amano ayasuma.—Yobo 32:2; 33:32.

9. Bushe Yehova ayafwile shani Yobo?

9 Na pa kulekelesha icintu ca kutiinya calicitike kuli Yobo lintu Yehova alandile nankwe. Baibolo itila: “Yehova ayaswike Yobo ukufuma mu nkuuka.” Cikuuku cikuuku, Yehova aipwishe Yobo amepusho ayengi pa kuti amulungike. Yobo alikutike ku kusalapula, kabili atile: “Nshili kantu . . . Nalapila mu lukungu na mu mito.” Pa numa ya kulanda na Yobo, Yehova akalipile abanankwe ba kwa Yobo batatu pa mulandu wa kuti ‘tabasosele icishinka.’ Lesa aebele Yobo ukubapepelako. Awe “Yehova afumishepo ubucushi bwa kwa Yobo ilyo apepeleko abanankwe, kabili Yehova alibweseshe imiku ibili conse ico Yobo akwete kale.”—Yobo 38:1; 40:4; 42:6-10.

Bushe Twalitemwa Sana Yehova?

10. Mulandu nshi Yehova ashaonawilile Satana nelyo ukusuulako fye ku fyo alesosa?

10 Yehova e Kabumba, kabili e Kateka Wapulamo uwa fintu fyonse. Mulandu nshi ashalabileko fye ku fyo Satana alepaasha? Lesa alishibe ukuti ukusuulako fye ku fyo Satana alesosa nelyo ukumonaula takwali no kupwisha ubwafya. Satana aleti Yobo, umuntu uwali ne cishinka nga nshi kuli Yehova, te kuti atwalilile ukuba ne cishinka nga ca kuti ifyuma fyakwe fyonse fyalilobele. Lelo te mulandu ne fya kwesha, Yobo alitwalilile ukuba ne cishinka kuli Lesa. Lyena Satana atile umuntu onse kuti aleka ukupepa Lesa nga ca kuti alecula. Yobo aliculile, lelo talekele ukupepa Lesa. Kanshi Yobo, umuntu uushapwililike, alangile ukuti fyonse ifyo Satana alesosa fyali fya bufi. Bushe ababomfi ba kwa Lesa bambi, na bo kuti bacita ifyo?

11. Bushe Yesu alangile shani ukuti Satana wa bufi?

11 Nangu babomfi ba kwa Lesa bambi, kuti twatila nga batwalilila ukuba ne cishinka kuli Lesa te mulandu na macushi ayo Satana engaleta pali bena, ninshi balanga ukuti fyonse ifyo uyu mulwani wakaluka asosa fya bufi. Yesu alishile pano calo no kulanga bwino bwino ukuti Satana wa bufi. Yesu ali uwapwililika nga filya fyali umufyashi wesu uwa kubalilapo Adamu. Filya Yesu atwalilile ukuba ne cishinka kuli Lesa mpaka ne mfwa fyalangile ukuti Satana wa bufi kabili na fyonse ifyo asosa pa bantunse fya bufi.—Ukus. 12:10.

12. Lishuko nshi no mulimo uo umubomfi wa kwa Yehova onse akwata?

12 Na lyo line, Satana alitwalilila ukwesha abapepa Yehova. Ifwe umo umo twalikwata ishuko no mulimo wa kulanga ukuti tubombela Yehova pa mulandu wa kuti twalimutemwa, te pa mulandu wa bukaitemwe. Kabili kuti twacita fye ifi nga twatwalilila ukuba ne cishinka kuli ena. Bushe tumona shani uyu mulimo? Tumona ukuti ukuba ne cishinka kuli Yehova lishuko nga nshi. Na kabili tulasansamuka ukwishiba ukuti Yehova alatupeela amaka ya kushipikisha kabili nga filya cali na kuli Yobo, no kwishiba ukuti alabika na po ubwesho bulingile ukupelela.—1 Kor. 10:13.

Satana Mulwani Uwapama Kabili Musangu

13. Fyebo nshi ifyo ibuuku lya kwa Yobo lisokolola pali Satana?

13 Amalembo ya ciHebere yalilondolola ifyabipa ifyo Satana acita pa kusonsomba Yehova na pa kulufya abantunse. Mu Malembo ya ciGriki na mo, mwaliba ifyebo na fimbi ifilanda pa fyo Satana alwisha Yehova, kabili ibuuku lya Ukusokolola lyalilondolola ifyo Yehova akalenga bonse ukwishiba ukuti e Mfumu yapulamo iyalinga ukuteka e lyo ne fyo akonaula Satana. Ibuuku lya kwa Yobo lilalenga twaishiba ifyo Satana apondweke. Ilyo Satana alongene pamo na bamalaika pa ntanshi ya kwa Lesa, taile mu kulumbanya Yehova. Lelo ali na mapange ayabipa mu mutima wakwe. Abepeshe Yobo ubufi kabili ilyo bamusuminishe ukwesha Yobo, “Satana afumine ku cinso ca kwa Yehova.”—Yobo 1:12; 2:7.

14. Bushe Satana aletontonkanya shani pali Yobo?

14 Kanshi ibuuku lya kwa Yobo lilondolola Satana ukuti mulwani wa bantu uwakaluka nga nshi. Pa numa ya kulya kukumana kwaliko mu muulu ukwalandwapo pali Yobo 1:6, palipitile inshita e lyo kwaishileba kulya kukumana kwalondololwa pali Yobo 2:1, kabili muli iyi ine nshita e mo Satana aeseshe Yobo icabipisha. Bucishinka bwa kwa Yobo bwalengele Yehova ukweba Satana ukuti: “[Yobo] acili uwa kaele, nelyo ca kuti ulentunka ukuti imonaule apabula umulandu.” Lelo Satana tasumine ukuti ifyo aletontonkanya pali Yobo fyalilubene. E ico, alombele ukuti alete ubwesho na bumbi ubwabipisha pali Yobo. Kanshi Satana alyeseshe Yobo lintu ali ne fyuma na lintu ifyuma fyonse fyalobele. Ici cilanga fye ukuti Satana talangulukilako abapiina nelyo abaponenwe na macushi, kabili alipata abantu aba kaele. (Yobo 2:3-5) Na lyo line, bucishinka bwa kwa Yobo bwalangile ukuti Satana wa bufi.

15. Bushe abasangu ba muno nshiku baba shani kwati ni Satana?

15 Satana e wabalilepo ukusangukila Yehova. Abasangu ba muno nshiku bakwata fye amano ya kwa Satana Kaseebanya. Kuti balatontonkanya fye ifyabipa pa bantu baba mu cilonganino, pali baeluda, nelyo pe Bumba Litungulula. Abasangu bamo balakaanya fye no kulabomfya ishina lya kwa Lesa ilya kuti Yehova. Tabafwaya ukusambilila pali Yehova nelyo ukulamubombela. Balwisha ukonaula icitetekelo ca bantu ababa ne cishinka kuli Yehova, nga filya fine ficita wishibo Satana. (Yoh. 8:44) E mulandu wine ababomfi ba kwa Yehova bashifwaila ukukutika ku basangu nangu panono!—2 Yoh. 10, 11.

Yobo Alicindike Ishina lya kwa Yehova

16. Bushe Yobo aletontonkanya shani pali Yehova?

16 Yobo alebomfya ishina lya kwa Yehova no kulicindika. Na lintu imbila ya kuti abana bakwe nabafwa yamuponeshe pa musao, tasaalwile Lesa. Nangu cingati Yobo alilubile no kumona kwati Lesa e walengele ukuti alufye ifyuma na bana, alicindike ishina lya kwa Yehova. Mu mashiwi yamo Yobo asosele, atile: “Mona! Ukutiina Yehova—e mano, no kutaluka ku bubi e mucetekanya.”—Yobo 28:28.

17. Cinshi calengele ukuti Yobo atwalilile ukuba ne cishinka kuli Yehova?

17 Cinshi calengele Yobo ukutwalilila uwa cishinka kuli Yehova? Ilyo amacushi yashilaisa pali ena, Yobo ali na bucibusa ubusuma na Yehova. Kwena, takwaba ubushininkisho ubulanga ukuti Yobo alishibe ifyo Satana alesonsomba Yehova. Na lyo line, Yobo atwalilile fye ukuba ne cishinka kuli Yehova. Atile: “Nshakaleke ukuba uwa kaele mpaka ne mfwa yandi!” (Yobo 27:5) Bushe cali shani pa kuti Yobo abe na bucibusa busuma na Yehova? Ukwabula no kutwishika alyumfwile ifyo Lesa aleumfwana no kucitila balupwa lwakwe Abrahamu, Isaki, na Yakobo. E lyo ifyo Lesa abumba, na fyo fyalengele Yobo ukwishiba imibele na imbi iya kwa Yehova.—Belengeni Yobo 12:7-9, 13, 16.

18. (a) Bushe Yobo alangile shani ukuti ali-ipeeleshe mu kupepa Yehova? (b) Kuti twapashanya shani Yobo?

18 Ifyo Yobo asambilile fyalengele ukuti afwaishe ukulasekesha Yehova. Pa mulandu wa kutiina ukuti abana bakwe nalimo nabacita icabipa nelyo “[nabatuka] Lesa mu mitima yabo,” Yobo aletuula amalambo lyonse. (Yobo 1:5) Nangu fye ni lintu ale-eshiwa icabipisha, Yobo alesosa ifisuma pali Yehova. (Yobo 10:12) Ala mwandini muntu uo tulingile ukupashanya! Na ifwe bene tufwile ukulaishibilapo na fimbi pali Yehova na pa bufwayo bwakwe. Twalikwata ifintu ifisuma ifilenga tulekosha bucibusa bwesu na Yehova pamo nga ukulabelenga Baibolo, ukusangwa ku kulongana, ipepo, no kulashimikila imbila nsuma. Na kabili, tulesha na maka yesu yonse ukulabilisha ishina lya kwa Yehova. Filya fine bucishinka bwa kwa Yobo bwalengele Yehova ukusekelela, e fyo na bucishinka bwa babomfi ba kwa Lesa muno nshiku bulenga umutima wa kwa Yehova ukusekelela. Ili line e lyashi tukasambilila mu cipande cikonkelepo.

Bucishinka Bwenu Bulalenga Umutima wa kwa Yehova Ukusekelela

“We mwana wandi, ube na mano, kabili ulenge umutima wandi ukusekelela, pa kuti njasuke uulenseebanya.”—AMAPI. 27:11.

1, 2. (a) Bufi nshi Satana abepele ubo ibuuku lya kwa Yobo lyalondolola? (b) Cinshi cilanga ukuti Satana alitwalilila ukuseebanya Yehova na pa numa Yobo alifwa kale?

YEHOVA alisuminishe Satana ukwesha umubomfi wakwe uwa cishinka Yobo. Ne co calengele ukuti Yobo alufye ifitekwa, abana, kabili aishilelwala no bulwele ubwabipisha. Lelo, ilyo Satana alebepesha Yobo ubufi, taletontonkanya fye pali Yobo eka. Atile: “Inkanda pa nkanda, kabili conse ico umuntu akwata kuti apeelela pa mweo wakwe.” Ubu bwafya tabwapelele fye pali Yobo lelo bwasanshamo na bambi abali no kubako ninshi Yobo alifwa kale.—Yobo 2:4.

2 Ilyo papitile imyaka nalimo 600 ukutula apo Yobo bamweseshe, umupashi wa mushilo walengele Solomone ukulemba ukuti: “We mwana wandi, ube na mano, kabili ulenge umutima wandi ukusekelela, pa kuti njasuke uulenseebanya.” (Amapi. 27:11) Ukwabula no kutwishika, na pali ilya ine nshita, ninshi Satana alasonsomba Yehova. E lyo na mu cimonwa Yohane amwene, alondolola ukuti amwene Satana alebepesha ababomfi ba kwa Lesa ubufi. Ici cacitike pa numa Satana bamutamfishe mu muulu lintu Ubufumu bwa kwa Lesa bwatendeke ukuteka mu 1914. Nangu fye ni pali ino ine nshita, ilyo tuli ku mpela ya nshiku sha kulekelesha isha buno bwikashi, Satana acili alesha bucishinka bwa babomfi ba kwa Lesa.—Ukus. 12:10.

3. Masambililo nshi ayacindama ayo tusambilila mwi buuku lya kwa Yobo?

3 Moneni amasambililo yacindama yatatu ayo tusambilila mwi buuku lya kwa Yobo. Ilya kubalilapo lya kuti amesho Yobo apitilemo yalenga twaishiba umulwani wa bantu bonse kabili uukaanya abantu ba kwa Lesa. Uyu mulwani ni Satana Kaseebanya. Ilya bubili lya kuti ukuba na bucibusa busuma na Lesa kuti kwalenga twatwalilila ukuba aba cishinka te mulandu na mesho twingapitamo. Isambililo lyalenga butatu lya kuti nga twaeshiwa mu nshila ili yonse, Lesa alatwafwa ukushipikisha nga filya ayafwile na Yobo. Muno nshiku, pa kutwafwa, Yehova abomfya Icebo cakwe, icilonganino cakwe, no mupashi wakwe uwa mushilo.

Muleibukisha Uwaba Umulwani Wenu Uwa Cine Cine

4. Nani walenga ukuti ifyabipa filecitika mu calo?

4 Abengi bamona kwati Satana tabako. E ico nangu cingati kuti basakamikwa pa filecitika mu calo, tabaishiba ukuti Satana Kaseebanya e ulenga ifya musango yu ukulacitika. Kwena, ca cine ukuti ifingi ifyo abantu bacita, e filenga sana ukuti abantu banabo balecula. Abafyashi besu aba kubalilapo, Adamu na Efa, basalilepo ukukaana ubutungulushi bwa kwa Kabumba wabo. Ukutula lilya, abantu abengi balacita ifintu ifiletelela abantu banabo. Lelo, ni Satana e wabepele Efa pa kuti apondokele Lesa. E utungulula abantu abashapwililika, abena kufwa. Apo Satana e “lesa wa bwikashi buno,” abantu abengi bapashanya imibele yakwe, pamo nga icilumba, ukukansana, ubufuba, icimfulunganya, ubucenjeshi, na bucipondoka. (2 Kor. 4:4; 1 Tim. 2:14; 3:6; belengeni Yakobo 3:14, 15.) Iyi mibele yalenga ukuti kube ulupato, amafisakanwa, ubufunushi, no kukansana mu mapolitiki na mu mapepo. Ifi e filenga sana ukuti abantunse balecula.

5. Finshi tukacita ne fi fyebo fyacindama ifyo twaishiba?

5 Ala mwandini fwe babomfi ba kwa Yehova twalishiba ifyebo ifyacindama nga nshi! Twalishiba uulenga ukuti ifintu fileya filebipilako fye mu calo. Bushe ukwishiba ifi takulenga tulebombako umulimo wa kushimikila pa kuti twafwe abantu ukwishiba umulwani wesu uwa cine cine? Kabili bushe tatuba ne nsansa ukulatungilila Lesa wa cine Yehova, no kulaebako bambi ifyo akonaula Satana ne fyo akapwisha amacushi abantu bapitamo?

6, 7. (a) Nani alenga ukuti Abena Kristu ba cine balebacusha? (b) Bushe kuti twapashanya shani ifyacitile Elihu?

6 Satana talenga fye amacushi ayaba muli cino calo, lelo e ulenga no kuti abantu ba kwa Lesa balebakaanya. Aiminina pa kutwesha. Yesu Kristu aebele umutumwa Petro ukuti: “Simone, Simone, mona! Satana alefwaisha ukumwela nga filya bela ingano.” (Luka 22:31) E fyo caba na kuli ifwe fwe bakonka mu nkasa sha kwa Yesu, Satana akulatwesha mu nshila ishalekanalekana. Petro apashenye Satana ku “nkalamo iilebuluma, iilefwaya untu ingalya.” E lyo Paulo na o atile: “Bonse abafwaisha ukwikala ukulingana na bukapepa muli Kristu Yesu bakabacusha.”—1 Pet. 5:8; 2 Tim. 3:12.

7 Bushe kuti twalanga shani ukuti tulebukisha ukuti twalikwata uyu mulwani nga ca kuti uwa bwananyina aponenwa na macushi? Mu nshita ya kutaluka kuli uyo uwa bwananyina, tucita nga filya fyacitile Elihu, uwalangile ukuti ali cibusa wine wine ilyo alelanda na Yobo. Tulafwilisha uwa bwananyina ukulwisha umulwani wesu Satana. (Amapi. 3:27; 1 Tes. 5: 25) Nangu ifintu fyafye shani, ico tufwaya kwafwa uwa bwananyina ukutwalilila ukuba ne cishinka kuli Lesa pa kuti alenge umutima wa kwa Yehova ukusekelela.

8. Mulandu nshi Satana afiliilwe ukulesha Yobo ukucindika Yehova?

8 Ifitekwa ifyo Yobo akwete e fyo Satana abalilepo ukulofya. Filya fitekwa fyali e cuma ca kwa Yobo pantu nalimo e fyo alesangilamo imiliile. Lelo alefibomfya na pa kupepa Lesa. Pa numa ya kusangulula abana bakwe, “alecelela ulucelo no kutuula amalambo ya koca ukulingana ne mpendwa yabo yonse; pantu Yobo atile, ‘napamo abana bandi nababembuka no kutuka Lesa mu mitima yabo.’ E fyo Yobo alecita lyonse.” (Yobo 1:4, 5) Kanshi, lyonse Yobo aletuula amalambo ya nama kuli Yehova. Ilyo amesho yaishile pali ena, alefilwa ukucita ifi pantu takwete “ifyuma” ifyo ali no kucindikilako Yehova. (Amapi. 3:9) Na lyo line, Yobo alecindika Yehova ukubomfya imilomo yakwe!

Beni na Bucibusa Busuma na Yehova

9. Cintu nshi icacindama sana ico twakwata?

9 Nampo nga tuli bakankaala nelyo tuli bapiina, nga tuli baice nelyo nga tuli bakalamba, nga twalikwata ubumi ubusuma nelyo tulalwalilila, kuti twaba na bucibusa busuma na Yehova. Te mulandu no bwesho bwingesa pali ifwe, bucibusa busuma na Lesa kuti bwalenga twatwalilila ukuba ne cishinka no kulenga umutima wa kwa Yehova ukusekelela. Nangu fye bantu abashaishibishe icine, balishipile kabili balitwalilile ukuba ne cishinka kuli Lesa.

10, 11. (a) Bushe nkashi yesu umo acitile shani ilyo bucishinka bwakwe bwaeshiwe? (b) Bushe uyu nkashi alangile shani bwino bwino ukuti Satana wa bufi?

10 Tontonkanyeni pa fyacitikile Nkashi Valentina Garnovskaya. Uyu nkashi ali pa ba bwananyina ba mu Russia abengi nga nshi abaeshiwe icabipisha lelo abatwalilile ukuba ne cishinka kuli Lesa nga filya na Yobo ali. Mu 1945, ilyo ali ne myaka 20, balimushimikile imbila nsuma. Munyinefwe uwamushimikile abweleleko imiku ibili mu kulanshanya nankwe pali Baibolo, nomba ukutule lyo tatalile amumonapo na kabili. Nangu cali ifyo, Valentina atampile ukushimikila ku bena mupalamano. Ici calengele ukuti bamwikate no kumukaka imyaka 8 mu nkambi sha kucushishamo abantu. Mu 1953 balimukakwile kabili apo pene fye, atendeke ukushimikila na kabili. Na uno muku, balimwikete no kumukaka imyaka 10. Pa numa ya kwikala mu nkambi imo imyaka iinono, bamutwele ku nkambi imbi. Muli iyi nkambi, mwali bankashi abakwete Baibolo. Bushiku bumo nkashi alangile Valentina Baibolo. Ala mwandini alisansamwike! Pantu Baibolo imbi iyo Valentina amwenepo ni ilya yakwete munyinefwe uwamushimikile mu 1945!

11 Mu 1967, Valentina balimukakwile kabili ali-ipeele kuli Yehova no kubatishiwa. Alitwalilile ukuba uwacincila mu mulimo wa kushimikila mpaka mu 1969 ilyo bamwikete no kumukaka imyaka itatu mu cifungo. Na lyo line, Valentina alitwalilile ukushimikila. Ilyo ashilafwa mu 2001, Valentina ayafwile abantu 44 ukusambilila icine. Nga kubika pamo, imyaka yonse apoosele mu cifungo na mu nkambi sha kucushishamo abantu yali 21. Ali-ipeeleshe ukuipusula ku fintu fyonse, ukubikako no buntungwa bwakwe, pa kuti fye engatwalilila ukuba ne cishinka kuli Lesa. Ilyo ashilafwa, Nkashi Valentina atile: “Nshatalile nkwatapo ing’anda iyandi. Ifipe fye nakwete fintu fyali mu cola cimo, na lyo line nali ne nsansa kabili naleipakisha ukubombela Yehova.” Ala mwandini Valentina alilangile bwino sana ukuti Satana wa bufi, uutila abantu te kuti batwalilile ukuba ne cishinka kuli Lesa nga bale-eshiwa! (Yobo 1:9-11) Ukwabula no kutwishika Valentina alilengele umutima wa kwa Yehova ukusekelela kabili Yehova alafulukisha ukwisamubuusha pamo na bambi abafwa pa mulandu wa kuba ne cishinka kuli Lesa.—Yobo 14:15.

12. Bushe ukutemwa kutwafwa shani ukuba bacibusa ba kwa Yehova?

12 Ukutemwa Yehova e kulenga tube na bucibusa na ena. Twalitemwa imibele ya kwa Lesa kabili tulesha na maka yesu yonse ukuti tulecita ifintu ukulingana no kufwaya kwakwe. Ukupusanako ne fyo Satana Kaseebanya asosa, ifwe takwaba uutupatikisha ukutemwa Yehova kabili ico twamutemenwa te pa mulandu wa fintu atupeela. Ukutemwa Lesa e kulenga tuletwalilila ukuba ne cishinka kuli ena lintu tule-eshiwa. E lyo Yehova na o ‘akalinda umwenda aba cishinka bakwe.’—Amapi. 2:8; Amalu. 97:10.

13. Bushe Yehova amona shani ifyo tucita ilyo tulemubombela?

13 Ukutemwa e kulenga tulecindika ishina lya kwa Yehova, nangu ni lintu tulefilwa ukubomba ukulingana ne fyo twingafwaya. Yehova alamona mu mitima yesu kabili tatupingula nga twafilwa ukumubombela ukulingana ne fyo imitima yesu ifwaya. Icacindama sana te fyo tucita, lelo mulandu tucitila ifyo fine. Nangu cingati Yobo ali no bulanda kabili alipitile mu fya kwesha ifingi, alilandile pa fyo atemenwe inshila sha kwa Yehova ku balemubepesha ubufi. (Belengeni Yobo 10:12; 28:28.) Mu cipandwa ca kulekeleshako mwi buuku lya kwa Yobo, Lesa alikalipile Elifasi, Bildadi, na Sofari pantu tabasosele icishinka. Pa nshita imo ine, Yehova alangile ukuti alesekela muli Yobo lintu amwitile ukuti “umubomfi wandi” imiku 4 kabili amwebele no kupapaatilako balya bakasansamusha ba bufi. (Yobo 42:7-9) Shi na ifwe tulecita ifintu ifingalenga ukuti Yehova alesekela muli ifwe.

Yehova Alatungilila Ababomfi Bakwe Aba Cishinka

14. Bushe Yehova ayafwile shani Yobo ukulungika amatontonkanyo yakwe?

14 Nangu cingati Yobo ali uushapwililika, alitwalilile ukuba ne cishinka kuli Lesa. Limo limo ilyo ifintu fyaleafya nga nshi, aleluba. Ku ca kumwenako, aebele Yehova ukuti: “Nalilila kuli imwe, lelo tamungasuka . . . Ku kuboko kwa maka yenu ayengi mwaba umulwani wandi.” Na kabili, Yobo alicililemo ukuilungamika lintu atile: “Nshabifya nangu cimo,” no kuti “mu minwe yandi tamwaba ubunkalwe, ne pepo lyandi lyalisanguluka.” (Yobo 10:7; 16:17; 30:20,21) Lelo, Yehova alyafwile Yobo cikuuku cikuuku. Lesa aipwishe Yobo amepusho ayengi ayalengele aleke ukuilungamika no kwiluka ukuti Lesa alipulamo kabili umuntu te kuti alingane nankwe. Yobo alinakilile ilyo balemwafwa kabili alyalwike.—Belengeni Yobo 40:8; 42:2, 6.

15, 16. Bushe Yehova afwa shani ababomfi bakwe muno nshiku?

15 Muno nshiku Yehova alafunda ababomfi bakwe cikuuku cikuuku, kabili kuti twanonkelamo mu kufunda kwakwe. Ku ca kumwenako, Yesu Kristu alituulile ilambo lya cilubula ililenga ukuti Lesa ale-elela imembu shesu. Pa mulandu wa ili lambo, kuti twaba na bucibusa busuma na Lesa nangu cingati tuli babembu. (Yako. 4:8; 1 Yoh. 2:1) Nga tulepita mu fya kwesha, tulalomba no kuti Lesa atwafwe no kutukosha ukupitila mu mupashi wakwe uwa mushilo. Na kabili, twalikwata na Baibolo iituntulu, kabili nga twabelengamo no kutontonkanya sana pa fyo twabelenga, tulaipangasha ukushipikisha amesho ayo twingapitamo. Isambililo lya pa lwesu lilatwafwa ukwishiba ifyo Satana asuushishe ukuteka kwa kwa Lesa no mwalola ukuba uwa cishinka kuli Lesa.