Icebo ca kwa Yehova ca Mweo

Ifyo Twingafwaisha Ukwishiba mwi Buuku lya kwa Yoshua

ILYO abena Israele bacitile nkambi mu Mawanga ya Moabu mu 1473 B.C.E., bafwile balitemenwe sana ukumfwa aya mashiwi: “Ipekanishisheni impao; pantu apo tashilapita inshiku shitatu muleabuka Yordani uyu, ku kwingila ku kukwate calo, ico Yehova Lesa wenu alemupeela ku kucikwata.” (Yoshua 1:11) Ulwendo lwabo ulwa mu matololo umo baendawike pa myaka 40 lwali mupepi no kupwa.

Ilyo papitile myaka ukucila pali 20, Yoshua intungulushi yabo aiminina pa kati na nkati ka calo ca Kanaani no kweba abakalamba ba mu Israele ukuti: “Moneni, ndependwila imwe inko ishi ishashala ku kube cikwatwa ku mikowa yenu, ukutula pa Yordani, ne nko shonse isho nafita, ukufika kuli Bemba mukalamba lubali ukuwa akasuba. Yehova Lesa wenu e ukashitandula ku cinso cenu, no kushipyanununa ku mulola wenu, mukasuke amukwate calo ca shiko, ifyo Yehova Lesa wenu asosele kuli imwe.”—Yoshua 23:4, 5.

Ibuuku lya kwa Yoshua lyalembelwe na Yoshua wine mu 1450 B.C.E., kabili musangwa ilyashi lya kale ilisuma nga nshi ililanda pa fyacitike muli ilya myaka 22. Apo tuli mupepi no kwingila mu calo cipya, inshiku tuleikalamo nashipalana sana na shilya isha bena Israele abali mupepi no kupyana Icalo ca Bulayo. Apo tuli apepi ne calo cipya, natupooseko amano ukubebeta ibuuku lya kwa Yoshua.—AbaHebere 4:12.

MU “MAWANGA YA KU YERIKO”

(Yoshua 1:1–5:15)

Yoshua nomba apokelela umulimo wacindama ilyo Yehova amweba ati: “Mose umubomfi wandi alifwa; e ico nomba ima, abuka Yordani uyu, iwe, na aba bantu bonse, ukuya ku calo ico ndepeela kuli bene, ku bana ba kwa Israele.” (Yoshua 1:2) Umulimo wa kwa Yoshua wa kwingisha uluko lwa bantu abengi nga nshi mu Calo ca Bulayo. Pa kuipekanya ukwingila mu calo, atuma inengu shibili ku Yeriko, umusumba bali no kubalilapo ukucimfya. Muli uyu musumba, mwikala cilende Rahabu uwaumfwileko imilimo ya maka Yehova acitiile abantu bakwe. Rahabu acingilila inengu, na bo bamulaya ukuti akapusuka.

Ilyo inengu shabwela, Yoshua na bantu baipekanya ukwabuka Yordani. Nangu ca kuti umumana naupoosa, taubacilikile ukwabuka pantu Yehova alenga amenshi yalefuma ku muulu ukwiminina fye nga yali mu cishiba kabili aleka amenshi yali kwi samba ukuya muli Bemba Wafwa. Ilyo bayabuka Yordani, abena Israele bacite nkambi pa Gilgali mupepi na ku Yeriko. Pa numa ya nshiku shine, mu cungulo pa bushiku bwalenga 14 ubwa mweshi wa Abibu, basefya ica Kucilila mu mawanga ya ku Yeriko. (Yoshua 5:10) Ubushiku bwakonkapo, batendeka ukulya ifisabo fya muli cilya calo, kabili mana yaleka ukupona. Pa nshita yine iyi, Yoshua asembulula abaume bonse abafyalilwe mu matololo.

UKUCIMFYA KWATWALILILA

(Yoshua 6:1–12:24)

Umusumba wa Yeriko ‘waliisalwa bwino . . . , takuli wa kufumamo nangu wa kwingilamo.’ (Yoshua 6:1) Bushe umusumba kuti wacimfiwa shani? Yehova aeba Yoshua ifya kucita. Mu nshita fye iinono ilinga lyawa kabili umusumba waonaulwa. Rahabu fye na ba mu ng’anda yakwe e bapusuka.

Umusumba wa bufumu uwa Ai e wali no kukonkapo ukucimfiwa. Inengu batumine kulya shatila mu musumba mwaba fye abantu abanono, e co baume fye abanono balekabilwa ukucimfya uyu musumba. Lelo, ifita mupepi na 3,000 ifyatuminwe ku kusansa umusumba fyafulumuka abaume ba mu Ai. Cinshi calenga? Yehova tali na bena Israele. Akani uwa mu mukowa wa kwa Yuda alibembwike ilyo balesansa Yeriko. Ilyo bapwisha ubu bwafya, Yoshua asansa Ai. Apo imfumu ya Ai yalicimfishe abena Israele umuku wafumineko, ili iyaipekanya ukubalwisha. Lelo Yoshua abomfye nshila iisuma sana iyabeleleka abaume baicetekela aba mu Ai kabili apoka umusumba.

Gibeone ‘mushi ukalamba sana ukucila Ai, na baume bonse ba uko ni mpalume.’ (Yoshua 10:2) Lelo, ilyo baumfwile ifyo Israele acimfishe Yeriko na Ai, abaume ba mu Gibeone babepa Yoshua kabili acita icipangano ca mutende na bo. Inko shapalamina na bo shatiina ilyo shaumfwa ukuti nabacita icipangano na bena Israele. Kabili ishamfumu 5 isha muli shilya nko shaumana akapi no kusansa Gibeone. Abena Israele bapususha abena Gibeone no kucimfya shilya nko. Pa misumba Israele acimfishe ilyo Yoshua ali intungulushi paba imisumba ya ku kapinda ka ku kulyo na ku masamba, pamo fye ne shamfumu shaumene akapi isha ku kapinda ka ku kuso. Ku masamba ya Yordani, ishamfumu shonse pamo ishacimfiwe shali 31.

YOSHUA ATENDEKA UKUBOMBA UMULIMO WAKWE UWACINDAMA UWA KULEKELESHA

(Yoshua 13:1–24:33)

Apo Yoshua nomba nakota, alebutukila ku myaka 90, atendeka ukwakanya impanga. Mwandini uyu mulimo uukalamba! Aba mu mukowa wa kwa Rubene na Gadi na hafu wa mukowa wa kwa Manase bena balipoka kale ubupyani bwabo ku kabanga ka Yordani. Aba mu mikowa yasheleko na bo nomba bapeelwa ubupyani bwabo ku masamba ya Yordani pa kupendula.

Ica kwikalamo ica kwa Yehova caimikwa mu Shilo mu mpanga ya kwa Efraimu. Kalebu apeelwa umusumba wa Hebrone, e lyo Yoshua ena abula umusumba wa Timnati-sera. Abena Lebi bapeelwa imisumba 48, pamo ne misumba ya kushinamo 6. Ilyo balebwelelamo ku bupyani bwabo ku kabanga ka Yordani, ifita fya kwa Rubene, Gadi, ne fya muli hafu wa mukowa wa kwa Manase bakuula iciipailo ‘icikalamba mu kumona.’ (Yoshua 22:10) Imikowa yali ku masamba ya Yordani yamona kwati ubu busangu, kabili ubulwi bwati bwime pa kati ka mikowa, lelo ukulanshanya bwino kwalenga ukuti kwiba ukusumya umulopa.

Pa numa ya kwikala mu Timnati-sera pa myaka imo, Yoshua alonganya abaume abakalamba, bakasomo, abapingushi, na bacilolo ba mu Israele no kubeba ukuti bafwile ukushipa no kutwalilila aba cishinka kuli Yehova. Pa numa, Yoshua alonganya imikowa yonse iya kwa Israele ku Shekemu. Apituluka mu fyo Yehova acitile ukutula pali Abrahamu ukufika na mu nshiku shabo, kabili abwekeshapo ukubakonkomesha ‘ukubela Yehova akatiina, no kumubombela muli bumpomfu na mu cishinka.’ Kabili abantu bayankula abati: “Yehova Lesa wesu e o tulebombela, kabili kwi shiwi lyakwe e ko tuleumfwa.” (Yoshua 24:14, 15, 24) Pa numa ya ifi, Yoshua afwa ne myaka 110.