• “Ukwishibo Kutemwa kwa kwa Kristu”
    Palameni Kuli Yehova

    • 11, 12. (a) Bushe aba fibashi balemonwa shani mu nshita sha mu Baibolo, lelo Yesu acitile shani ilyo umuntu “uwaisulamo ifibashi” apaleme kuli wene? (b) Bushe ulya uwa fibashi afwile aumfwile shani ilyo Yesu amukumishe, kabili bushe icamwene dokota umo cilangilila shani ici?

      11 Aleafwa abalecula. Abalelwala amalwele yapusanapusana balemona ukuti Yesu ali wa cililishi, e ico balepalama kuli wene. Ici camoneke sana ilyo umwaume “uwaisulamo ifibashi” apaleme kuli Yesu ninshi pali na mabumba. (Luka 5:12) Mu nshita sha mu Baibolo, aba fibashi balebabika beka pa kuti bambi beambulako. (Impendwa 5:1-4) Lelo mu kupita kwa nshita, intungulushi sha barabi shapangile amafunde yabulamo inkumbu kabili ayaletitikisha aba fibashi.a Lelo, moneni ifyo Yesu acitile kuli ulya wa fibashi: “Kuli wene kwaisa no wa fibashi, alamupaapaata no kumufukamina, no kumweba, ati, Nga mwatemwa, kuti mwansangulula. Pa kwikatwe nkumbu, atambalike ukuboko, amukumya, amweba, ati Nintemwa; usangululwe. Na po pene ifibashi fyamuleka.” (Marko 1:40-42) Yesu alishibe ukuti ukulingana ne funde ulya wa fibashi talingile ukusangwa palya. Nalyo line, ukucila ukumutamfya, Yesu aiketwe inkumbu ica kuti acitile icapeseshe amano. Alimukumishe!

      12 Bushe kuti mwaelenganya ifyo ulya wa fibashi aumfwile ilyo bamukumishe? Ku kulangilila, tontonkanyeni pali ci cacitike. Paul Brand, dokota waishibisha ifya fibashi, ashimika pa wa fibashi umo untu aundepe ku India. Pa kumupima, uyu dokota aikete uyu wa fibashi pa kubeya no kumulondolwela, ukubomfya kapilibula, ifyo bali no kumundapa. Apo pene, uwa fibashi atampile ukulila. Dokota aipwishe ati: “Bushe pali ifyo nalufyanya ukusosa?” Kapilibula aipwishe ulya mulumendo mu lulimi lwakwe kabili ayaswike ati: “Iyo badokota. Atila ico alelila ni co mwamwikata pa kubeya. Pa myaka iingi tapaba uwamwikatapo mpaka ilyo aishile kuno.” Ku wa fibashi waile kuli Yesu, wena ukumukumya kwali no bupilibulo bwacilapo. Pa numa ya kumukumya, ubulwele bwalengele abantu ukumusuula bwalipwile!

  • “Ukwishibo Kutemwa kwa kwa Kristu”
    Palameni Kuli Yehova

    • a Amafunde ya cirabi yatile umuntu tafwile ukupalama ku wa fibashi pa mamita 1.8. Lelo nga umwela ulepuupa, uwa fibashi afwile ukutaluka amamita 45. Icitabo ca Midrash Rabbah cishimika ulwa kwa rabi umo uwalefisama aba fibashi na umbi uwalebapusa amabwe ukuti bemupalama. E ico aba fibashi balishibe ifyo cikalipa ukukaanwa, ukusuulwa no kupatwa ku bantu.