Na kabili ishiwi lya kuti “umweo” lilabomfiwa mu nshila imbi. Pali Yobo 33:22, tubelenga ukuti: “Umweo wakwe naupalamina ku cilindi, no bumi bwakwe nabupalama ku ba kubwipaya.” (Luvale Bible) Muli ili lembo amashiwi ya kuti “umweo” na “ubumi” yalepilibula icintu cimo cine, ilya kubalilapo lilelondolola bwino ishiwi lya kulekelesha. Kanshi ishiwi “umweo” kuti lyapilibula no bumi umuntu akwata ilyo ali umumi. E mulandu wine, Amalembo yalandila pa balwani ba kwa Mose abalefwaya ukumwipaya ukuti ‘abantu bonse abafwaile umweo [wakwe].’ (Ukufuma 4:19) Pa kulanda pali Yesu Kristu, Baibolo itila: ‘Umwana wa muntu aishile . . . ku kupeelo mweo wakwe [ubumi] icilubula pa kuti alubule abengi.’—Mateo 20:28.

Nga cinshi amalembo yamo yalandila ukuti umweo walifuminemo no kuti umweo walibwelelemo? Ilyo Baibolo ilanda pa fyacitikile Rakele pa numa fye ya kupaapa umwana umwaume, itila: “Nomba, pa kufumamo umweo wakwe (pantu alifwile), e lyo ainike ishina lyakwe Benoni: lelo wishi amwinike Benyamini.” (Ukutendeka 35:15-18) Kabili ilyo Baibolo ilanda pa kubuuka kwa mwana mwaume wa kwa mukamfwilwa, pali 1 Ishamfumu 17:22 itila: “Yehova aumfwile ishiwi [ipepo] lya kwa Eliya; umweo wa mwana wabwelelemo, na o apuupuutuka.” Bushe aya malembo yalelanda ukuti umweo cintu icishimoneka icingafuma nelyo ukwingila mu mubili?

Mwilaba ukuti ishiwi “umweo” kuti lyapilibula no “bumi” umuntu akwata. Kanshi ukulanda ukutila umweo wa kwa Rakele walefumamo cipilibula ukuti ubumi bwakwe bwalepwa. Na kuba, mu maBaibolo yamo amashiwi yatila “umweo wakwe walefumamo” yapilibulwa ukuti “ali pa kufwa” (Diocese of Mbala) na “apeemene uwa kupeelako” (Jerusalem Bible). Cimo cine e cacitike na ku mwana wa kwa mukamfwilwa, ubumi e bwabwelele ku mulumendo.—1 Ishamfumu 17:23.