Temweni Ubulungami no Mutima Wenu Onse

“Walitemwa ubulungami.”—AMALU. 45:7.

1. Finshi fingatwafwa ukulaenda mu “tushila twa bulungami”?

YEHOVA aletungulula abantu bakwe mu “tushila twa bulungami” ukubomfya Icebo cakwe no mupashi wakwe. (Amalu. 23:3) Lelo apo tatwapwililika, ilingi line tulafumamo muli uto tushila. Pa kuti tutampe ukucita ifyalungama na kabili, kano twabikako sana amano. Finshi fingatwafwa ukucite fyo? Tufwile ukutemwa ukucita ifyalungama nga Yesu.—Belengeni Amalumbo 45:7.

2. Bushe “utushila twa bulungami” e finshi?

² Bushe “utushila twa bulungami” e cinshi? Utu “tushila” twa mampalanya twimininako amafunde yalungama ayo Yehova abikako. Mu ciHebere ne ciGriki, “ubulungami” cipilibula ukukonka sana amafunde. Apo muli Yehova e “mwaikala ubulungami,” bakapepa bakwe bacetekela ukuti e walinga ukubeba inshila yalungama iyo bafwile ukwendamo.—Yer. 50:7.

3. Kuti twacita shani pa kuti twishibe sana ubulungami bwa kwa Lesa?

³ Nga tule-esha no mutima wesu onse ukulakonka amafunde yalungama aya kwa Lesa, e lyo twingamutemuna sana. (Amala. 32:4) Pa kuti tulekonka aya mafunde, tufwile intanshi ukusambilila pali Yehova Lesa ukubomfya Icebo cakwe, Baibolo. Nga tulesambilila sana pali ena, no kulapalama kuli ena cila bushiku, e lyo tukatemwa sana ubulungami bwakwe. (Yako. 4:8) Kabili tufwile ukukonka ifilanda Icebo ca kwa Lesa ilyo tulesala ifya kucita pa fintu ifyacindama.

Fwayeni Ubulungami bwa kwa Lesa

4. Bushe mu kufwaya ubulungami bwa kwa Lesa mwasansha na finshi?

⁴ Belengeni Mateo 6:33. Ukufwaya ubulungami bwa kwa Lesa te kuya fye mu kubila imbila nsuma iya Bufumu. Pa kuti Yehova alesekelamo mu mulimo tumubombela, lyonse tufwile ukulakonka amafunde yakwe ayalungama sana. Finshi bonse abafwaya ubulungami bwa kwa Yehova bafwile ukulacita? Bafwile “[ukufwala] ubuntu bupya ubwalengelwe ukulingana no kufwaya kwa kwa Lesa mu bulungami bwa cine na mu cishinka.”—Efes. 4:24.

5. Cinshi cingatwafwa ukukanafuupulwa?

⁵ Ilyo tule-esha na maka ukulakonka amafunde ya kwa Lesa ayalungama, inshita shimo tulafuupulwa pa mulandu wa filubo fyesu. Finshi fingatwafwa ukukanafuupulwa e lyo no kusambilila ukutemwa ifyalungama no kulacifita? (Amapi. 24:10) Tufwile ukulapepa kuli Yehova lyonse “ne mitima ya cine no kucetekela nga nshi.” (Heb. 10:19-22) Nampo nga tuli Bena Kristu basubwa nangu twakwata isubilo lya kwisaikala pe sonde, twalitetekela icilubula ca kwa Yesu Kristu ne fyo atucitila nga Shimapepo Mukalamba. (Rom. 5:8; Heb. 4:14-16) Muli magazini yabalilepo ukufuma mwali icilangililo pa fyo umulopa wa kwa Yesu wakwata amaka. (1 Yoh. 1:6, 7) Icipande casosele ukuti: “Calishibikwa ukuti nga mwamwena icintu icakashika mwi galasi ilyakashika ilyo muli apali ulubuuto, cimoneka icabuuta; e ico nangu imembu shesu shingakashika ce, Lesa nga ashilolesha ukupitila mu mulopa wa kwa Kristu, shimoneka ishabuuta.” (July 1879, ibu. 6) Ala caliwama sana ukuti Yehova alitulubula ukupitila mwi lambo lya Mwana wakwe uo atemwa!—Esa. 1:18.

Mulebebeta Ifya Kufwala Fyenu Ifya Bulwi

6. Mulandu nshi ukulabebeta ifya kufwala fyesu ifya bulwi kwacindamina?

⁶ Lyonse fye tufwile ukufwala “ubulungami nge ca kucinga icifuba,” pantu ubulungami ca kufwala cacindama ica bulwi icafuma kuli Lesa. (Efes. 6:11, 14) Nampo nga ni nomba line twaipeele kuli Yehova nangu nga twalimubombela pa myaka iingi, calicindama ukuti tulebebeta ifya bulwi fyesu ifya ku mupashi. Mulandu nshi? Pantu Satana ne fibanda fyakwe balipooswa ukufuma mu muulu kabili baba pe sonde. (Ukus. 12:7-12) Satana alikalipa, kabili alishiba ukuti inshita ashele na yo inono. Kanshi, alifundumana mu kusansa abantu ba kwa Lesa. Bushe mwamona ifyo cacindamina ukuti lyonse tulefwala “ubulungami nge ca kucinga icifuba?”

7. Nga twaishiba ubucindami bwa kufwala “ubulungami nge ca kucinga icifuba,” finshi tushakulacita?

⁷ Ica kucinga icifuba cicingilila umutima. Apo tatwapwililika, umutima wesu uwa mampalanya waba uwa bucenjeshi kabili walipelelwa. (Yer. 17:9) Apo walemenena ku kucita ifyabipa, calicindama ukuti tuleusambilisha no ku-usalapula. (Ukute. 8:21) Nga twaishiba ubucindami bwa kufwala “ubulungami nge ca kucinga icifuba,” tatwakulasala ifya kuleseshamo icitendwe ifyo Lesa apata; kabili tatwakulatontonkanya pa kucita ifyabipa, pantu ukucite fyo cimo no kufuula ica kucinga icifuba. Tatwakulapoosa inshita iikalamba ku kutamba TV. Lelo, tukalaesha na maka ukucita ifisekesha Yehova. Na lintu twacita fimo ifishalungama no kuwa pa kashita kanono, Yehova kuti atwafwa ukwima na kabili.—Belengeni Amapinda 24:16.

8. Mulandu nshi tulingile ukukwatila “inkwela iikalamba iya citetekelo”?

⁸ Pa fya bulwi fyesu ifya ku mupashi, paba ne “nkwela iikalamba iya citetekelo.” Ilalenga ‘tuleshimya imifwi yonse iya mulilo iya mubifi.’ (Efes. 6:16) E lyo icitetekelo no kutemwa Yehova no mutima onse kulatwafwa ukucita ifyalungama no kukanafuma mu musebo uutwala ku mweo wa muyayaya. Nga twatemwa sana Yehova, e lyo tukatemwa sana ubulungami bwakwe. Inga kampingu yesu? Bushe itwafwa shani ukutemwa ubulungami?

Beni na Kampingu Musuma

9. Bushe ukukwata kampingu musuma kutunonsha shani?

⁹ Ilyo twabatishiwe, twalombele Yehova ukutupeela “kampingu musuma.” (1 Pet. 3:21) Apo twalitetekela mu cilubula, umulopa wa kwa Yesu ulafimba pa membu shesu ne co cilenga tube abasanguluka kuli Lesa. Lelo, pa kuti tutwalilile ukuba abasanguluka kuli Lesa, tufwile ukusungilila kampingu musuma. Nga ca kuti nshita shimo kampingu yesu iletupeela imilandu no kutusoka, tufwile ukutemwa pantu ninshi ilebomba bwino. Nga kampingu iletucinkulako muli uyo musango ninshi tayakunkuma, icili ilatwafwa ukwenda mu nshila sha kwa Yehova ishalungama. (1 Tim. 4:2) Lelo kampingu kuti ya-afwa balya abafwaya ukutemwa ubulungami, na muli fimbi.

10, 11. (a) Shimikeni icacitike icilelanga ico tulingile ukumfwila kampingu yesu nga twali-isambilisha ifya mu Baibolo. (b) Mulandu nshi ukutemwa ubulungami kwingatuletela insansa ishingi nga nshi?

¹⁰ Ilyo twalufyanya, kampingu kuti yatuseka nangu ukutucusha. Umulumendo umo alifumine mu “tushila twa bulungami.” Alikunkwime mu kutamba ifye shiku kabili atampile no kupeepa ibange. Nga aya mu kulongana aleumfwa ububi kabili ilyo aya mu mulimo wa mwi bala aleimona uwa bumbimunda, e ico alilekele ukulongana no kushimikila. Atile: “Lelo nshaishibe ukuti kampingu yandi yali no kulanshinina pa fyo nalecita.” Asosele no kuti: “Nalecita ifintu ifya buwelewele pa myaka ine.” Lyena atampile ukutontonkanya pa lwa kubwelela mu cine. Nangu ca kuti aletontonkanya ati Yehova teti omfwe amapepo yakwe, ukupepa kwena alipepele no kulomba ubwelelo kuli Lesa. Tapapitile na mamineti 10 ukufuma apo apepeele, banyina balishile no kumukoselesha ukutampa ukulongana na kabili. Aile ku Ng’anda ya Bufumu no kulanda na eluda umo ukuti alemutungulula isambililo. Mu kuya kwa nshita, alibatishiwe kabili alatasha sana Yehova pa kupususha ubumi bwakwe.

¹¹ Bushe na imwe tamwamona ukuti mu kucita ifyalungama mwaliba insansa ishingi? Ilyo tule-esha na maka ukutemwa ubulungami no kucita ifyalungama, tukasanga ukuti ukucita ifitemuna Shifwe wa ku muulu, kuletuletela sana insansa. Taleni tontonkanyeni! Inshita ileisa ilyo abantu bonse bakakwata kampingu iikalabaletela fye insansa; bakalanga bwino bwino ukuti baba mu cipasho ca kwa Lesa. E ico, ino ine nshita, natutemwe ubulungami ne mitima yesu yonse no kulenga Yehova ukusekelela.—Amapi. 23:15, 16.

12, 13. Kuti twasambilisha shani kampingu yesu?

¹² Kuti twacita shani pa kuti tusambilishe kampingu yesu? Ilyo tulesambilila Baibolo ne mpapulo shesu ishilanda pa fya mu Baibolo, calicindama ukulaibukisha ukuti “umutima wa mulungami ulatontonkanya pa kwasuka.” (Amapi. 15:28) Tontonkanyeni pa fyo ukwibukisha ici cishinka kwingatwafwa ilyo tulefwaya incito ya kwingila. Nga twasanga ukuti incito tulefwaya ukwingila tayawama nga kukonka ifilanda Amalembo, fwe bengi tulakonka bwangu bwangu ifyalanda umusha wa cishinka kabili uwashilimuka. Lelo, nga twafilwa ukwishiba bwino nga kuti twaingila iyo ncito nangu iyo, tufwile ukufwaya ifishinte fya mu Baibolo ifingatutungulula e lyo no kupepelapo.a Ifishinte fimo twingatontonkanyapo ni filya ifilanda pa kukanapunwisha kampingu ya bambi. (1 Kor. 10:31-33) Ifyo tufwile ukwangwako sana, ni filya ifilanda pali bucibusa bwesu na Lesa. Nga ca kuti twalishininkisha ukuti Yehova e ko aba, icikalamba ico tufwile ukuyipusha ca kuti, ‘Bushe nga naingila iyi ncito, ndi no kulungulusha Yehova no kumukalifya?’—Amalu. 78:40, 41.

¹³ Ilyo tulepekanya Isambililo lya Ulupungu lwa kwa Kalinda nelyo Isambililo lya Baibolo Ilya pa Cilonganino, tufwile ukulaibukisha ukuti tulingile ukulaetetula pa fyebo tulesambilila. Bushe lyonse tushila fye ifyasuko lubilo lubilo no kuya kuli paragrafu ikonkelepo? Ukusambilila kwa musango yo takwingalenga twatemwa sana ubulungami nelyo ukulenga kampingu yesu ukulatucinkulako. Nga tulefwaya ukutemwa ubulungami, tulekabila ukubikako sana amano ku kusambilila no kwetetula pa fyo tulebelenga mu Cebo ca kwa Lesa. E nshila fye yeka twingasambililamo ukutemwa ubulungami no mutima wesu onse!

Kwateni Insala ne Cilaka ca Bulungami

14. Bushe Yehova Lesa na Yesu Kristu bafwaya tuleumfwa shani ilyo tulebomba umulimo wa mushilo?

¹⁴ Yehova Lesa na Yesu Kristu bafwaya tuleba ne nsansa ilyo tulebomba umulimo wa mushilo. Finshi fimo ifingalenga tuleba ne nsansa? Mulandu nshi tulingile ukutemenwa ubulungami? Ilyo Yesu alelanda Ilyashi lya pa Lupili, atile: “Balipaalwa abomfwa insala ne cilaka ca bulungami, pantu bakekuta.” (Mat. 5:6) Ni mwi aya mashiwi yalola kuli balya abafwaya ukutemwa ubulungami?

15, 16. Bushe ababa ne nsala ne cilaka ca ku mupashi bakekuta shani?

¹⁵ Icalo twikalamo citekwa no mubifi. (1 Yoh. 5:19) Nga twabelenga inyunshipepala ya mu calo icili conse, tusangamo fye amalyashi ya fya bunkalwe no lukaakala ifilecitika sana. Ilyo abantu abalungami batontonkanya pa bunkalwe ubo abantu balecita ku bantu banabo, cilabapesha sana amano. (Luk. Mil. 8:9) Lelo, fwe batemwa Yehova, twalishiba ukuti eka fye e wingapwisha insala ne cilaka ca ku mupashi ifyo abantu bakwata abafwaya ukusambilila ubulungami. Nomba line fye, bonse abashipepa Lesa bakabafumya pa calo, kabili abatemwa ubulungami tabakalelunguluka na kabili ku mibele ya bampulamafunde na ku micitile yabo. (2 Pet. 2:7, 8) Ala abatemwa ubulungami bakalubuka icine cine!

¹⁶ Fwe babomfi ba kwa Yehova kabili abasambi ba kwa Yesu Kristu, twalishiba ukuti abakwata insala ne cilaka ca bulungami “bakekuta.” Bali no kwikushiwa nga nshi ukupitila mu fyo Lesa apekanya imyulu ipya ne sonde lipya “umukaba ubulungami.” (2 Pet. 3:13) E ico, tatufwile ukufuupulwa nangu ukupapa pa mulandu wa kuti umutitikisha no lukaakala fyalenga mu calo ca kwa Satana mwiba ubulungami. (Luk. Mil. 5:8) Yehova, Uwapulamo, alishiba ifilecitika kabili nomba line fye ali no kulubula abatemwa ubulungami.

Nonkelenimo mu Kutemwa Ubulungami

17. Fisuma nshi fifuma mu kutemwa ubulungami?

¹⁷ Ilembo lya Amalumbo 146:8 lilanda sana pa bunonshi bumo ubwacindama sana ubwaba mu kulaenda mu nshila ya bulungami. Kemba wa malumbo aimbile ukuti: “Yehova atemwa abalungama.” Taleni tontonkanyeni pali co! Mulopwe wa bubumbo bonse alitutemwa pantu twalitemwa ubulungami! Apo Yehova alitutemwa, tatuletwishika ukuti ali no kutupeela ifyo tukabila ilyo tulebika ifya Bufumu pa ntanshi mu mikalile yesu. (Belengeni Amalumbo 37:25; Amapinda 10:3.) Kanshi, abakekala fye pali lino isonde ni balya abatemwa ubulungami. (Amapi. 13:22) Abantu ba kwa Lesa abengi, bakakwata insansa ishingi sana no bumi bwa muyayaya muli paradaise iyayemba pano isonde pa mulandu wa kutemwa ubulungami. Nangu fye, ni pali ino ine nshita, abatemwa ubulungami bwa kwa Lesa tabasakamikwa kabili ici cilenga mu mayanda yabo na mu filonganino baba, muleba ukumfwana.—Fil. 4:6, 7.

18. Finshi tufwile ukutwalilila ukucita ilyo tulelolela ubushiku bwa kwa Yehova?

¹⁸ Ilyo tulelolela ubushiku bukalamba ubwa kwa Yehova, tufwile ukutwalilila ukufwaya ubulungami. (Sefa. 2:2, 3) E ico, natulelanga ukuti twalitemwa inshila sha kwa Yehova Lesa ishalungama no mutima wesu onse. Ico cilesanshamo no kufwala bwino “ubulungami nge ca kucinga icifuba” pa kuti tulecingilila umutima wesu uwa mampalanya. Na kabili tufwile ukusungilila kampingu umusuma, e kutila iingatuletela insansa no kulenga umutima wa kwa Lesa ukusekelela.—Amapi. 27:11.

19. Finshi tufwile ukupampaminapo ukucita, kabili finshi tuli no kusambilila mu cipande cikonkelepo?

¹⁹ “Amenso ya kwa Yehova yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.” (2 Imila. 16:9) Ayo amashiwi yalatusansamusha sana ilyo tulecita ifyalungama mu calo umwaba ulukaakala, ububifi na macushi kabili umo ifintu filebipilako! Ca cine ukuti, abantu abataluka kuli Lesa balapapa ilyo balemona tulecita ifyalungama. Lelo tulanonkelamo nga nshi ilyo twatwalilila ukukonka ubulungami bwa kwa Yehova. (Esa. 48:17; 1 Pet. 4:4) E ico, natube ne mitima ya cishinka no kupampamina pa kutemwa ubulungami no kulacita ifyalungama ne mitima yesu yonse pa kuti tuleba ne nsansa. Lelo, pa kuti tuleba no mutima wa cishinka tufwile no kupata ifyabipa. Icipande cikonkelepo cili no kutulanga umo ico calola.

Bushe Mwalipata Ifyabipa?

‘Wapatile ifyabipa.’—HEB. 1:9.

1. Finshi Yesu asambilishe abasambi pa kutemwa?

ILYO Yesu Kristu alekomaila pa fyo ukutemwa kwacindama, aebele abasambi bakwe ati: “Ndemupeela ifunde ilipya, ilya kuti muletemwana; ifyo namutemenwe, e fyo na imwe muletemwana. Nga muletemwana, e lyo bonse bakeshiba ukuti muli basambi bandi.” (Yoh. 13:34, 35) Yesu aebele abasambi bakwe ukutemwana ica kuti baipeelesha ukucitila bambi ifisuma. Uko kutemwa e ko beshibikilwako. Yesu abakonkomeshe no kuti: “Muletemwa abalwani benu kabili mulepepelako abamucusha.”—Mat. 5:44.

2. Bushe finshi abasambi ba kwa Kristu bafwile ukupata?

² Yesu tasambilishe fye abasambi ukutemwana, lelo alilandile na pa fintu ifyo bafwile ukupata. Amalembo yasosele pali Yesu ati: “Watemenwe ubulungami, no kupata ifyabipa.” (Heb. 1:9; Amalu. 45:7) Ici ciletulanga ukuti tufwile ukutemwa ubulungami e lyo no kupata ulubembu, nangu ifyabipa. Moneni ifyo umutumwa Yohane alandile mu kulungatika ilyo atile: “Onse uubembuka ninshi alapula na mu mafunde, pantu ulubembu ni bumpulamafunde.”—1 Yoh. 3:4.

3. Finshi twalalandapo muli cino cipande ifikumine ukupata ifyabipa?

³ E ico, fwe Bena Kristu tufwile ukuyipusha atuti, ‘Bushe nalipata ifyabipa?’ Lekeni tumone ifyo twingalanga ukuti twalipata ifyabipa ilyo tulelanda pali ifi fintu fine: (1) ifyo tumona ukunwensha ubwalwa, (2) ifyo tumona ukumfwana ne mipashi, (3) ifyo tumona ubulalelale, na (4) ifyo tumona abatemwa ifyabipa.

Mwitekwa Ubusha ku Bwalwa

4. Cinshi calengele Yesu ukuba no buntungwa bwa kufunda abantu ukukananwesha umwangashi?

⁴ Yesu alenwako umwangashi limo limo pantu alishibe ukuti bupe Lesa atupeela. (Amalu. 104:14, 15) Lelo, Yesu talenwesha. (Amapi. 23:29-33) E calengele akwate ubuntungwa bwa kufunda abantu pa kukananwesha. (Belengeni Luka 21:34.) Ukunwensha ubwalwa kuti kwalenga umuntu acita imembu shimbi ishabipisha. E ico, umutumwa Paulo alembele ati: “Mwilakolwa umwangashi, uulenga abantu ukuipoosaika, lelo muleisulamo umupashi.” (Efes. 5:18) Akonkomeshe na banakashi abakalamba mu cilonganino ukuti tabafwile ‘ukutekwa ubusha ku kunwa umwangashi uwingi.’—Tito 2:3.

5. Mepusho nshi abanwa ubwalwa bafwile ukuyipusha?

⁵ Nga mulanwa ubwalwa, mufwile ukuyipusha amuti: ‘Bushe filya Yesu alemona ukunwensha umwangashi e fyo na ine mona? Bushe nga ndi no kufunda bambi pa kukananwensha ubwalwa, bushe kuti naba no buntungwa bwa kusosa? Bushe ico nwena kufwaya ukulaba ku masakamika nelyo mulandu wa kunakisha? Bushe ubwalwa nwa cila mulungu bulafula sana nelyo iyo? Bushe umo nga anjeba ati ndanwensha, ncita shani? Bushe ndakaana nangu bushe ndafulwa?’ Nga twaleka ubwalwa bwatuteka ubusha kuti twalafilwa ukutontonkanya bwino no kufilwa ukulasala bwino ifya kucita. Abasambi ba kwa Kristu balesha na maka ukutaluka ku fingonaula amaka yabo aya kulingulula.—Amapi. 3:21, 22.

Talukeni ku fya Mipashi

6, 7. (a) Bushe Yesu aleumfwana na Satana ne fibanda? (b) Mulandu nshi ukumfwana ne mipashi kuseekele nga nshi pali lelo?

⁶ Ilyo Yesu ali pano isonde, alikeene Satana ne fibanda fyakwe. Alikeene ilyo Satana amutunkile mu kulungatika ukuti apondokele Lesa. (Luka 4:1-13) Kabili aleiluka na lintu Satana alemutunka mu bucenjeshi ukuti aletontonkanya pa fyabipa no kuficita. (Mat. 16:21-23) Yesu aleafwa abalefwaya ubwafwilisho pa kuti ifibanda ifyabatekele ubusha fibataluke.—Marko 5:2, 8, 12-15; 9:20, 25-27.

⁷ Ilyo Yesu bamubikile pa Bufumu mu 1914, alisangulwile imyulu ilyo atamfishemo Satana ne fibanda fyakwe. Ici calenga ukuti Satana nomba abilingane sana pa kuti ‘alufye aba pano isonde bonse.’ (Ukus.12:9, 10) Kanshi tatufwile ukupapa ukuti ukumfwana ne mipashi nakuseeka nga nshi kabili kuleilako fye pa ntanshi. Finshi twingacita pa kuti tuleicingilila?

8. Kuti twaibebeta shani ukukuma ku fya kuleseshamo icitendwe ifyo tusala?

⁸ Baibolo yalitusoka bwino bwino pa bubi bwaba mu kumfwana ne mipashi. (Belengeni Amalango 18:10-12.) Ilelo, Satana ne fibanda fyakwe balonaula amatontonkanyo ya bantu ukupitila mu filenga baleumfwana ne mipashi, pamo nga amafilimu, ifitabo, ne fyangalo fya pa kompyuta. Ilyo tulesala ifya kuleseshamo icitendwe, cila muntu afwile ukuyipusha ati: ‘Bushe pa myeshi iyapita, nalitambapo amafilimu na maprogramu ya pa TV, nangu ukwangalako ifyangalo fya pa kompyuta umwaba ifya mipashi? Bushe nalishiba ukuti nshifwile ukuitumpa mu fya mipashi, nelyo bushe imona kwati mu kucita ifi tamwaba sana ubusanso? Bushe nalitontonkanyapo pa fyo Yehova engomfwa nga ndecita ifya musango yu? Nga nalisuminisha Satana ukunsonga muli uyu musango, bushe ukutemwa Yehova na mafunde yakwe ayalungama, kukalenga naesha na maka ukuleka ukucita ifyo Satana antunka ukulacita?’—Imil. 19:19, 20.

Umfwileni Ifyo Yesu Asokele pa Bulalelale

9. Bushe cinshi cingalanga ukuti umuntu alitemwa ifyabipa?

⁹ Yesu alekonka amafunde ya kwa Yehova ayalesha ubulalelale. Atile: “Bushe tamwabelenga ukuti uwababumbile pa kutendeka ababumbile umwaume no mwanakashi, kabili atile, ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo’? E ico tabali babili na kabili iyo, lelo bali umubili umo. Kanshi, ico Lesa alundenye, umuntu ecilekanya.” (Mat. 19:4-6) Yesu alishibe ukuti ifyo tumona kuti fyasonga umutima wesu. E ico, mu Lyashi alandile pa Lupili, atile: “Mwalyumfwa ukuti batile, ‘Wilacita ubucende.’ Lelo ine ndemweba nati onse uwatwalilila ukulolekesha umwanakashi no kumukumbwa, ninshi nacita kale ubucende nankwe mu mutima wakwe.” (Mat. 5:27, 28) Abasuula uku ukusoka kwa kwa Yesu ninshi balitemwa ifyabipa.

10. Shimikeni icacitike kuli munyinefwe umo icilanga ukuti umuntu kuti aleka ukutamba ifye shiku.

¹⁰ Satana alabomfya ifikope fye shiku pa kusonga abantu ukutemwa ubulalelale. Ifye shiku nafifula nga nshi muno nshiku. Abatamba ifye shiku basanga ukuti calyafya ukulaba ku fikope fye shiku ifyo bamona. Balafilwa ukuleka ukufitamba. Moneni icacitikile Umwina Kristu umo. Atile: “Naletamba ifye shiku mu bumfisolo. Nalemona kwati kuti ndetamba ifye shiku, uku ninshi ndabombela na Yehova. Nalishibe ukuti cibi ukutamba ifye shiku lelo nalemona kwati nangu ndecita ifi, Lesa akulasekelamo mu mulimo imubombela.” Cinshi calengele uyu munyinefwe ukwaluka mu fyo aletontonkanya? Atile: “Napingwilepo ukweba baeluda pa bwafya bwandi, nangu ca kuti calyafishe sana pa kubeba.” Uyu munyinefwe alisukile aleka ici cimusango cabipa. Atila: “Ilyo nalekele ukucita ulu lubembu, natampile ukumfwa ukuti nomba nakwata kampingu iyasanguluka.” Abapata ifyabipa bafwile ukupata ne fye shiku.

11, 12. Ukukuma ku nyimbo twatemwa ukukutikako, kuti twalanga shani ukuti twalipata ifyabipa?

¹¹ Inyimbo na mashiwi ya shiko kuti fyakuma sana ukutontonkanya kwesu no kusonga umutima wesu uwa mampalanya. Inyimbo bupe ubo Lesa atupeela kabili pa nshita yalepa shalibomfiwa mu kupepa kwa cine. (Ukufu. 15:20, 21; Efes. 5:19) Lelo icalo ca kwa Satana cilenga abantu ukutemwa inyimbo ishilumbilisha ubulalelale. (1 Yoh. 5:19) Kuti mwaishiba shani nga ca kuti inyimbo mukutikako shilekowesha umutima wenu nangu iyo?

¹² Nalimo ico mufwile ukuyipusha intanshi ca kuti: ‘Bushe mu nyimbo nkutikako balalumbilishamo ukwipayana, ubucende, ubulalelale, ne miponto? Nga nali no kubelengela umo amashiwi ya nyimbo shimo, bushe uyo muntu kuti amona ukutila nalipata ifyabipa, nangu bushe amashiwi ya ulo lwimbo kuti yalanga ukuti umutima wandi walikowela?’ Teti tutile twalipata ifyabipa, nga ca kuti tulakutika ku nyimbo umwaba ifyabipa. Yesu atile: “Ififuma mu kanwa fifuma mu mutima, kabili ifi e fikowesha umuntu. Pantu mu mutima e mufuma amatontonkanyo ayabipa, ukwipaya, ubucende, ubulalelale, ukwiba, ubunte bwa bufi, ne miponto.”—Mat. 15:18, 19; linganyeniko Yakobo 3:10, 11.

Mulemona Abatemwa Ifyabipa nga Filya Yesu Alebamona

13. Bushe Yesu alemona shani abatwalilile ukucita ifyabipa?

¹³ Yesu atile aishile mu kwita ababembu, nangu abacita ifyabipa ukuti balapile. (Luka 5:30-32) Lelo bushe alemona shani balya abashaleleka ukucita ifyabipa? Yesu alisokele Abena Kristu ukuti tabafwile ukukonkelela aba musango yu. (Mat. 23:15, 23-26) Alandile no kuti: “Te onse uutila kuli ine, ‘Shikulu, Shikulu’ akengila mu bufumu bwa mu muulu, kano uucita ififwaya Tata uwaba mu muulu e ukengilamo. Abengi muli bulya bushiku [ilyo Lesa akalapingula] bakatila kuli ine, ‘Mwe Shikulu, mwe Shikulu, bushe tatwasesemene mwi shina lyenu, no kufumisha ifibanda mwi shina lyenu, no kucitila ifipesha amano ifingi mwi shina lyenu?’” Lelo, atile abantu nga bakaana ukuleka ukucita ifyabipa no kulapila, akabakaana. Akabeba ati: “Fumeni apa.” (Mat. 7:21-23) Mulandu nshi akabapingwila ifi? Pantu abantu ba musango yo balaseebanya Lesa kabili ifyabipa ifyo bacita filenga bambi ukuculilamo.

14. Mulandu nshi kwabela ukutamfya ababembu abashilapila mu cilonganino?

¹⁴ Icebo ca kwa Lesa calanda ukuti ababembu abashilapila bafwile ukutamfiwa mu cilonganino. (Belengeni 1 Abena Korinti 5:9-13.) Ukucita ifi kulafwaikwa pa milandu nalimo itatu iyakonkapo: (1) pa kuti ishina lya kwa Lesa taliseebene, (2) pa kuti icilonganino cikowela, na (3) pa kuti baafwe umubembu, kusuka alapila.

15. Nga tulefwaya ukutwalilila ukuba aba cishinka kuli Yehova, mepusho nshi ayacindama ayo tufwile ukuyipusha?

¹⁵ Bushe tumona balya abacita ifyabipa no kukanalapila nga filya Yesu alebamona? Tufwile ukutontonkanyapo pali aya mepusho: ‘Bushe kuti cawama ukula-ampana no watamfiwa nangu uwaifumya mu cilonganino ca Bwina Kristu? Ni shani nga ca kuti uwatamfiwa ni lupwa lwandi lelo tatwikala nankwe ing’anda imo?’ Ica musango yo nga cacitika, kuti caba bwesho sana ubwingalenga cimoneke nga twalitemwa ubulungami kabili nga tuli ba cishinka kuli Lesa.a

16, 17. Bwafya nshi Umwina Kristu umo akwete, kabili cinshi camwafwile ukwiluka ukuti caliba fye bwino ukutamfya abacita ifyabipa abashilapila?

¹⁶ Umfweni icacitikile nkashi umo, uwakwete umwana umulumendo uwatemenwe Yehova pa nshita imo. Lelo, mu kuya kwa nshita, atampile ukucita ifyabipa ukwabula no kulapila. Ici calengele atamfiwe mu cilonganino. Uyu nkashi alitemenwe Yehova, lelo alitemenwe no mwana wakwe kabili calimukosele sana ukukonka filya Baibolo ifunda ukuti tatufwile ukwampana no watamfiwa.

¹⁷ Aciba ni mwe, nga mwayafwile shani uyu nkashi? Eluda umo alimwafwile ukumona ukuti Yehova alishibe ukuti aleumfwa ububi pa cacitike. Uyu munyina amwebele ukutontonkanya pa fyo Yehova na o aumfwile ububi ilyo abana bakwe, bamalaika bapondweke. Uyu eluda alimwafwile ukumona ukuti nangu ca kuti Yehova alishiba ifyo cikalipa ica musango yu nga cacitika, alilanda ukuti ababembu abashilapila baletamfiwa. Uyu nkashi alyumfwilile uku kufunda kabili alimwene ico abashilapila babatamfisha mu cilonganino.b Bucishinka bwa musango yo bulalenga umutima wa kwa Yehova ukusekelela.—Amapi. 27:11.

18, 19. (a) Bushe ukuleka ukwampana no ucita ifyabipa uushilapila, kulanga ukuti twalipata finshi? (b) Cinshi cingafumamo nga twaba aba cishinka kuli Lesa no kulakonka ifyo afwaya ukuti filecitwa mu cilonganino?

¹⁸ Nga ca kuti ica musango yu camucitikila, mukwai muleibukisha ukuti Yehova alamulangulukilako. Nga mwaleka ukwampana no watamfiwa nangu uwaifumya mu cilonganino, ninshi mulelanga ukuti mwalipata ifyo acitile ifyalengele atamfiwe no kuti mwalitemwa uyo uwalufyenye kabili mulefwaya akabwele. Bucishinka bwenu kuli Yehova nalimo kuti bwalenga uwatamfiwa alapila no kubwelela kuli Yehova.

¹⁹ Umuntu umo uwatamfiwe, na pa numa abweshiwa, alembele ukuti: “Nalitemwa pa kwishiba ukuti Yehova alitemwa abantu bakwe ica kuti alafwaya ukuteyanya kwakwe kwaba ukwa busaka. Ukutamfiwa kulafwaikwa kabili kulanga fye ukuti uwatamfiwa mwalimutemwa, nangu ca kuti abashili ba Nte bamona kwati bunkalwe.” Bushe muleti uyu muntu nga alitashishe nga ca kuti aba mu cilonganino na balupwa lwakwe balitwalilile ukula-ampana nakwe ilyo atamfiwe? Ukukonka ifyo Baibolo yalanda pa kutamfya abacita ifyabipa, cilanga ukuti twalitemwa ubulungami kabili twalishiba ukuti Yehova e ufwile ukutweba icalungama ne cishalungama.

“Pateni Ifyabipa”

20, 21. Mulandu nshi tufwile ukupatila ifyabipa?

²⁰ Umutumwa Petro aletusoka ukuti: “Beni abalola, cenjeleni.” Mulandu nshi? Pantu “umulwani wenu, Satana Kaseebanya, endauka nge nkalamo iilebuluma, iilefwaya untu ingalya.” (1 Pet. 5:8) Bushe mukaleka akamulye? Cikashintilila sana pa fyo mwapata ifyabipa.

²¹ Tacayanguka ukupata ifyabipa, pantu tuli babembu kabili icalo twikalamo cifwaya tulecita ifikumbwa umubili wesu. (1 Yoh. 2:15-17) Lelo, nga tulepashanya Yesu Kristu no kutemwa sana Yehova Lesa, te kuti tufilwe ukupata ifyabipa. Kanshi natupampamine pa ‘kupata ifyabipa,’ no kucetekela umupwilapo ukuti Yehova “alinda . . . aba cishinka bakwe; no kubapokolola mu minwe ya babifi.”—Amalu. 97:10.