‘Ukutemwana Kwenu Bonse Kulecililako’
AMANSANSO yalengwa ne fyabumbwa pe sonde yalicitike mu Japan mu mwaka wa 2004. Ifyalengele aya masanso fikuku fya mwela, ilyeshi, e lyo ne finkukuma. Abantu abengi baliculile sana, ukusanshako ne Nte sha kwa Yehova. (Lukala Milandu 9:11) Nangu cali fyo, aya masanso yalengele ukuti Inte sha kwa Yehova balange ukutemwa kwa bwananyina kuli umo no munankwe.—1 Petro 1:22.
Ku ca kumwenako, pa mulandu wa kuti imfula yalilokele sana mu July, umumana umo pa kati na nkati aka calo ca Japan walipoosele. Ilyeshi lyaonawile amayanda ya Nte sha kwa Yehova ukucila pali 20. Mu Ng’anda ya Bufumu imo amenshi yaliswile mu kati monse ukufika na mu fibumba pa muulu. Mu kwangufyanya, Inte sha kwa Yehova ukufuma ku filonganino ifyapalamineko balishile mu kubafwa. Abengi bali-ipeele ukuwamya amayanda, ukufumya amatipa. Bapwishishe ukuwamya Ing’anda ya Bufumu yonse, ukufumya amatipa, no kuwamya ifyaonaike mu milungu ibili fye.
Pa October 23, icinkukuma icikalamba capumine incende imo ine. Abantu 40 e bafwile, kabili abantu ukucila 100,000 e bo bayafwile ukufuma mu mayanda. Takwali amenshi, amafuta, na malaiti. Nangu ca kuti apo icinkukuma cacitikile pali fye mupepi na po Ing’anda ya Bufumu bawemye pa numa ya lyeshi yali, tayaonaike nakalya. E yo batendeke no kubomfya nge cifulo ca kupayanishishapo ifya kukumbusuka. Baeluda mu kwangufyanya baile ku basumina banabo ukumona nga bali umutende, kabili balitemenwe ukwishiba ukuti takwali nangu umo uwacenekwe nelyo ukwipaiwa kuli cilya cinkukuma. Lucelocelo ubushiku bwakonkelepo, ba Nte 6 abali mu busanso bwa lyeshi mu July, bali-ipeeleshe ukutwala ifya kulya na menshi ku ncende ukwapitile icinkukuma. Papitile fye ama-awala ayanono apo icinkukuma cacitikile, ne fya kukumbusuka fyalipeelwe.
Eluda umo atila: “Balya bamunyinefwe abaponenwe ne lyeshi bamwene umulimo wa kukumbusuka abaponenwe ne cinkukuma nge shuko lyabo ilya kulanga ukutasha pa fyo babafwile. Balibombeshe ukufuma ulucelocelo ukufika fye ubushiku sana. Bali aba nsansa sana.”
Ukuponenwa ne lyeshi atemwa ifinkukuma takufumyapo ukutemwa ukwikatanya Inte sha kwa Yehova capamo. Na kabili, ilyo ubusanso bwa musango uyu bwacitika, Abena Kristu bayumfwa ifyo umutumwa Paulo aebele abasumina banankwe mu Tesalonika ukuti: ‘Ukutemwana kwenu bonse umo umo kulecililako.’—2 Abena Tesalonika 1:3.