“UBUFUMU BWA MU MUULU NABUPALAMA”

(Mat. 1:1–20:34)

Icikalamba ico Mateo alandapo sana Bufumu na masambilisho ya kwa Yesu, kabili ici calengele ukuti elemba ifintu nga mulya mwine fyalekonkanina ukucitika. Ica kumwenako fye, Mateo alandile pa Lyashi lya pa Lupili mu fipandwa fya kutendekelako fye ifya mwi buuku lyakwe, nangu cingati ilyo Yesu alandile ili lyashi ninshi alibomba umulimo wa kushimikila nalimo pa mwaka umo na hafu.

Ilyo Yesu aleshimikila mu Galili, acita ifipesha mano, aeba abatumwa bakwe 12 amafundisho pa fya kubomba umulimo wa kushimikila, ashimaula abaFarise, no kusosa ifilangililo ifilanda pa Bufumu. Lyena afuma mu Galili no kuya ku “mipaka ya Yudea kwi shilya lya Yordani.” (Mat. 19:1) Mu nshila, Yesu aeba abasambi bakwe ati: ‘Tuleya ku Yerusalemu kabili Umwana wa muntu bali no kumupingwila ukufwa, kabili pa bushiku bwalenga shitatu akabuuka.’—Mat. 20:18, 19.

“UMWANA WA MUNTU AKATWALWA KU KUPOOPELWA”

(Mat. 21:1–28:20)

Yesu aisa ku Yerusalemu pa Nisani 9, mu 33 C.E. ninshi ‘nanina pa mpunda.’ (Mat. 21:5) Ubushiku bwakonkapo, aya kwi tempele no kulisangulula. Pa Nisani 11, asambilisha abantu mwi tempele, ashimaula bakalemba na baFarise, kabili pa numa aeba abasambi bakwe “icishibilo ca kubapo [kwakwe] ne ca mpela ya bwikashi.” (Mat. 24:3) Ubushiku bwakonkapo, aeba abasambi ukuti: “Namwishibo kuti inshiku shibili ukufuma pali nomba kukabe ca kucilila, e lyo Umwana wa muntu akatwalwa ku kupoopelwa pa cimuti.”—Mat. 26:1, 2.

Nomba ni pa Nisani 14. Ilyo atendeka Icibukisho ca mfwa yakwe iili fye mupepi, Yesu bamufutuka, bamwikata, bamulubulwisha, kabili bamupoopela pa cimuti. Pa bushiku ubwalenga butatu, abuuka. Ilyo talanina ukuya ku muulu, Yesu aeba abasambi bakwe ukuti: “E ico kabiyeni, kalengeni aba nko shonse ukuba abasambi.”—Mat. 28:19.