Kristu uwabatishiwa, uwaba ne mibele iisuma, kabili uwingabomba ama-awala ayafwaikwa mu kubila imbila nsuma. Komiti ya Mulimo iya Cilonganino e isuminisha uulefwaya ukubombako bupainiya bwa kwafwilisha no bwa nshita yonse. Lelo bapainiya baibela bena basontwa ne ofeshi lya musambo.

¹² Kasabankanya uulefwaya ukubombako bupainiya bwa kwafwilisha kuti bamusuminisha ukubombako pa mweshi umo, imyeshi iingi mu kukonkana, nelyo ukutwalilila fye ukubomba, ukulingana ne fyo ifintu fili mu mikalile yakwe. Bakasabankanya abengi balatemwa ukubombako bupainiya bwa kwafwilisha mu nshita shaibela, pamo nga lilya kuba Icibukisho nelyo mu mweshi kangalila wa muputule alebombela icilonganino cabo. Bamo babombako ilyo bali pa cuti. Bakasabankanya ababatishiwa abacili pa sukulu kuti balembesha ukubombako bupainiya bwa kwafwilisha ilyo balaalika amasukulu. Bakasabankanya kuti basalapo ukubomba bupainiya bwa kwafwilisha ubwa ma-awala ayanono mu March na mu April, e lyo na lintu kangalila wa muputule alebombela icilonganino cabo. Baeluda bakamusuminisha ukubombako bupainiya bwa kwafwilisha nga ca kuti mwaliba ne mibele iisuma, nga kuti mwabomba ama-awala ayafwaikwa, kabili nga kuti mwaipeelesha no kubomba pa mweshi umo nelyo ukucilapo.

¹³ Nga mulefwaya ukuba painiya wa nshita yonse, mufwile ukuipekanya ukulakumanisha ama-awala ayafwaikwa pa mwaka. Nga mwatendeka bupainiya bwa nshita yonse, mulingile ukulabombela pamo ne cilonganino cenu. Bapainiya abacincila lipaalo ku ba mu cilonganino, balafwa bambi ukutemwa umulimo wa kubila imbila nsuma, no kubakoselesha ukutendeka bupainiya. Pa kuti mufikepo ukuba painiya wa nshita yonse, pafwile ukupita imyeshi 6 ukutula apo mwabatishiwilwe kabili mufwile ukuba aba ca kumwenako cisuma.

¹⁴ Ilingi line bapainiya ba nshita yonse ababomba bwino ebo basonta ukuba bapainiya baibela. Bafwile ukuitemenwa ukuya mu kubombela konse uko iofeshi lya musambo lingabatuma. Ilingi line babatuma ku ncende ishabela ukutali uko bengasanga abalefwaya ukusambilila Baibolo, kabili uko bengapanga ifilonganino ifipya. Limo limo bapainiya baibela babatuma ku filonganino ukwaba bakasabankanya abanono, pa kuti babafwe ukubila imbila nsuma mu cifulo conse ico icilonganino cibombelamo. Bapainiya baibela bamo aba kuti ni baeluda balabatuma ku kwafwa ifilonganino ifinono, nangu ca kuti muli ifyo filonganino mwaliba bakasabankanya abengi. Bapainiya baibela balabapeela indalama ishalinga isha kubomfya muli fimo fimo ifyo bakabila. Bamo balabasonta ukuba bapainiya baibela pa nshita fye iinono.

BAMISHONARI

¹⁵ Komiti ya Mulimo iye Bumba Litungulula e isonta bamishonari. Lyena Komiti ya Musambo iya mu calo ico babatumako e ibatuma ukuya mu kubombela mu ncende umwaba sana abantu. Bamishonari balakoselesha aba bwananyina ukulabila sana imbila nsuma kabili balabafwa ukulabomba bwino imilimo ya mu cilonganino. Ilingi line, ilyo umuntu talaba mishonari, alabala aya kwi Isukulu lya Bakabila ba Mbila Nsuma iya Bufumu. Nga babatuma mu mulimo wa bumishonari, balabapekanishisha umwakwikala kabili balabapeelako ne ndalama ishalinga isha kushitamo ifyo balekabila.

UKUBOMBELA MU MUPUTULE

¹⁶ Abo Ibumba Litungulula lisonta ukuba bakangalila ba muputule, balabala babasambilisha ifya kubomba uyu mulimo. Pa kuti beshibe bwino ifya kubomba, balabatuma ukuba bakangalila wa muputule abakwikatilila. Aba baume balitemwa umulimo wa kwa Lesa kabili balitemwa na ba bwananyina. Ni bapainiya abacincila, balaisambilisha sana Baibolo, balalanda bwino amalyashi, kabili balasambilisha bwino. Balalanga sana ukuti balikwata ifisabo fya mupashi, tabapampamina fye pa fyo balefwaya kabili baleluka. Nga ca kuti kangalila wa muputule alyupa, umwina mwakwe afwile ukuba painiya uwaba ne mibele iisuma kabili uwatemwa abantu. Afwile ukwishiba bwino ifya kubila imbila nsuma. Alingile ukulanakila umwina mwakwe, kabili tafwile ukulalandilako umwina mwakwe nelyo ukulafwaya fye ukuti e o alelanda sana ilyo balelanshanya. Umulimo bakangalila ba muputule na bena mwabo babomba walikosa, kanshi abalefwaya ukubombako uyu mulimo tabalingile ukuba abalwalilila. Bapainiya tabalemba kalata ya kulomba ukuba kangalila wa muputule. Lelo nga balefwaisha ukubombako uyu mulimo, kuti baeba kangalila wabo uwa muputule pa kuti engabebako ifyo bengacita.

AMASUKULU YA BULESA

¹⁷ Isukulu lya Bakabila ba Bufumu: Bakabila ba mbila nsuma ya Bufumu balefwaikwa sana mu filonganino umwaba ukukabila e lyo na mu fifulo umo tushibombela sana. E ico bamunyinefwe na bankashi abashimbe, na baupana bene kuti bapoka formu ya balefwaya ukuya kwi Sukulu lya Bakabila ba Bufumu. Nga bapwisha ili sukulu, balabatuma mu kubomba bupainiya bwa nshita yonse mu filonganino umwaba ukukabila mu calo cabo. E lyo bambi balabapeela imilimo imbi mu calo cabo nelyo ku calo cimbi nga ca kuti nabaipeelesha ukubomba. Bamo balabatuma mu kubomba bupainiya bwaibela pa nshita iinono nelyo mu kutwalilila. Bapainiya abalefwaya ukuya kuli ili isukulu, kuti basangwa ku kukumana ukubako pa kulongana kwa citungu pa kuti bengeshiba ififwaikwa.

¹⁸ Isukulu lya Gileadi: Bamunyinefwe na bankashi abashimbe na baupana abo basala ukuya kuli ili sukulu balingile ukwishiba ukulanda iciNgeleshi, kabili bafwile ukuba mu mulimo wa nshita yonse uwaibela. Aba bamunyinefwe na bankashi balamoneka ukutila kuti bakosha ifilonganino nelyo kuti babomba bwino imilimo imo pe ofeshi lya musambo. Balilanga kale kale ukuti balitemwa ukubombela aba bwananyina kabili kuti babafwa cikuuku cikuuku ukusambilila no kulakonka ifyo Amalembo yalanda, e lyo no kulakonka ubutungulushi bwa cilonganino ca kwa Lesa. Komiti ya Musambo e isala abo bengapeela formu yakwipushishapo ukuya kuli ili isukulu. Abapwisha ili isukulu balabatuma mu kubomba umulimo wa kubila imbila nsuma nelyo ukuya mu kubombela pa musambo mu calo cabo nelyo mu calo cimbi.

UKUBOMBELA PA BETHEL

¹⁹ Ukubombela pa Bethel lishuko ilyaibela nga nshi. Ishina lya kuti Bethel, lyalola mu kuti, “Ing’anda ya kwa Lesa,” kabili ili shina lyalilinga pantu e po imilimo iingi iya kwa Lesa ibombelwa. Bamunyinefwe na bankashi ababombela pa Bethel babomba imilimo iyacindama pamo nga ukupilibula no kupanga impapulo ishilanda pa fya mu Baibolo, ukushituma ku filonganino, e lyo ne milimo imbi. Umulimo uo ababa pa Bethel babomba ulafwa sana Ibumba Litungulula ilyangalila ifilonganino mwi sonde lyonse. Bakapilibula abengi bekala no kubombela ku ncende uko balanda indimi isho bapilibula. Ici cilenga baleumfwa ifyo abantu balanda ulo lulimi, kabili cilenga baleishiba nampo nga abantu balomfwa ifyo bapilibula mu mpapulo nelyo iyo.

²⁰ Imilimo iingi iyo babomba pa Bethel yalikosa. E ico abo beta ku Bethel bantu abaipeela, ababatishiwa, abashilwalilila, abacaice kabili ababombesha. Nga ca kuti mu calo cenu balefwaya aba kubombela pa Bethel kabili nga mulafwaya ukubombako uyu mulimo, kuti mwaeba baeluda ba mu cilonganino cenu pa kuti bamwebe ififwaikwa.

UMULIMO WA MAKUULE

²¹ Ukukuula ifikuulwa fya kubomfya ku mulimo wa kwa Lesa mulimo uwashila, kabili waba fye nga filya fine umulimo wa kukuula itempele lya kwa Solomone wali. (1 Isha. 8:13-18) Bamunyinefwe na bankashi abengi balaipeelesha ukubomfya inshita ne fyuma fyabo muli uyu mulimo.

²² Bushe na imwe kuti mwabombako uyu mulimo? Nga mwalibatishiwa e lyo kabili mulafwaya ukubombako uyu mulimo, bamunyinefwe abangalila umulimo wa makuule ku ncende mwikala bakatemwa nga nshi ukubomba nenu. Nga tamwaishiba imilimo iingi, bakamusambilisha. Nga mulefwaya ukubombako uyu mulimo kuti mwaeba baeluda mu cilonganino cenu. Bakasabankanya bamo ababatishiwa kabili abo basuminisha, balaya na mu fyalo fimbi mu kubombako umulimo wa kukuula ifikuulwa fya kulonganinamo ne fyo tubomfya ku milimo imbi iya kwa Lesa.

²³ Kwaliba inshila ishalekanalekana isho mwingafwilishishamo umulimo wa makuule. Bakasabankanya ababa ica kumwenako cisuma kabili abaishiba imilimo imo abengaipeelesha ukubombako ilyo kuli amakuule ku ncende bekala kuti baleafwilishako muli Dipartimenti ya Makuule (Local Design/Construction). Bambi balafwilishako ukubomba umulimo wa makuule ku ncende shimbi pa milungu ibili ukufika ku myeshi itatu, kabili iofeshi lya musambo e libasonta. Aba bamunyinefwe na bankashi babeta ukuti ababomba umulimo wa makuule mu kuitemenwa. Abo basonta ukubomba uyu mulimo pa nshita iitali babeta ukuti ababomfi ba makuule. Ababomfi ba makuule abo batuma ukuya mu kubombela ku fyalo fimbi bena babeta ukuti ababomfi ba makuule ababombela mu fyalo fimbi. Ibumba lya ba Makuule lipangwa na babomfi ba makuule na babomba umulimo wa makuule mu kuitemenwa. Aba bene e bangalila ubukuule, kabili babombela pamo na bafwilisha Dipartimenti ya Makuule e lyo na ba bwananyina aba mu filonganino abo ubukuule bukumine. Ibumba lya ba Makuule nga lyapwisha ukukuula pa ncende imo, lilaselela ku ncende imbi iyaba mu calo nelyo ifyalo ifyo iofeshi lya musambo lyangalila, mu kutendeka ubukuule bumbi.

FINSHI MWAPANGA UKUCITA MU MULIMO WA KWA LESA?

²⁴ Nga ca kuti mwali-ipeela kuli Yehova, ninshi mufwaya ukulamubombela ubumi bwenu bonse. Nomba finshi ifyo mwapanga ukucita mu mulimo wa kwa Lesa? Nga mwapangila libela ifya kucita mu mulimo wa kwa Lesa mukalabomfya amaka yenu e lyo ne fintu fimbi ifyo mwakwata ku kumubombela. (1 Kor. 9:26) Nga mwapangila limo ifya kucita, mukalunduluka mu fya kwa Lesa kabili mukalabika sana amano ku fintu ifyacilapo ukucindama. Ici cikamwafwa ukubombako imilimo na imbi mu mulimo wa kwa Lesa.—Fil. 1:10; 1 Tim. 4:15, 16.

²⁵ Nga ca kuti tulefwaya ukulabombesha mu mulimo wa kwa Lesa tufwile ukulapashanya umutumwa Paulo. (1 Kor. 11:1) Paulo alebombesha mu mulimo wa kwa Yehova. Alimwene ukutila Yehova alefwaya ukuti alebombako imilimo iyalekanalekana. Paulo alembeele aba bwananyina mu Korinti ati: “Ninkwata ishuko ilikalamba ilya kuti mombeshe.” Ifi fine e fyo caba na kuli ifwe. Kwaliba imilimo iingi iyo twingabombako mu cilonganino, maka maka umulimo wa kubila imbila nsuma ya Bufumu. Lelo nga filya fine cali kuli Paulo, na ifwe bene pa kuti tukwate “ishuko ilikalamba” tufwile ukulwishanya na ‘bengi abatukaanya.’ (1 Kor. 16:9) Paulo aleisalapula. Moneni ifyo alandile, atile: “Ntuutaula umubili wandi no ku-uteka ubusha.” (1 Kor. 9:24-27) Bushe ifi e fyo na ifwe tucita?

²⁶ Bonse tufwile ukupangila libeela imilimo twingabombako ukulingana ne fyo ifintu fyaba mu mikalile, kabili tufwile ukulabombesha pa kuti tukafikilishe ifyo twapanga. Abengi ababa mu mulimo wa nshita yonse balipangiile libeela ukubombako uyu mulimo ilyo baali fye abaice. Ukutula fye ku bwaice bwabo, abafyashi babo na bantu bambi balebakoselesha ukuti bakabombeko iyi milimo. E ico umulimo wa kwa Yehova uo babomba ulalenga baba ne nsansa kabili tabalanguluka ukuti baipoosela fye inshita. (Amapi. 10:22) Kwaliba na fimbi ifyo mwingapanga ukucita pamo nga, ukulabila imbila nsuma cila mulungu, ukutendeka no kulatungulula isambililo lya Baibolo, e lyo no kulapaatulako inshita ya kupekanya ukulongana. Icacindama ico tufwile ukucita kutwalilila ukubombesha mu mulimo wesu onse. Nga tulebombesha, tukacindika Yehova kabili tukafikilisha ifyo tufwaisha ukucita, e kutila ukulamubombela ubumi bwesu bonse.—Luka 13:24; 1 Tim. 4:7b, 8.

YEHOVA alyeba Abena Kristu ba cine ukuti balelongana pamo pa kuti balesambilila no kukoseleshanya. (Heb. 10:23-25) Icikuulwa ca kubalilapo ico abena Israele abali abantu ba kwa Lesa balepepelamo, cali “cikuulwa ca mushilo.” (Ukufu. 39:32, 40) Pa numa ya myaka iingi, Solomone umwana wa kwa Davidi akuulile ing’anda nelyo itempele, ilyalengele Lesa acindikwe. (1 Isha. 9:3) Ilyo itempele Solomone akuulile balyonawile mu 607 ninshi Yesu talaisa pano isonde, abaYuda batendeke ukupepela Lesa mu fikuulwa ifyo baleita abati amasunagoge. Mu kupita kwa nshita, balikuulile itempele cipya cipya, kabili lyaishileba e cifulo cikalamba ica kupepelapo Lesa wa cine. Yesu alesambilisha abantu mu masunagoge na mwi tempele. (Luka 4:16; Yoh. 18:20) Limo alebasambilishisha na pa lupili.—Mat. 5:1–7:29.

² Pa numa ya mfwa ya kwa Yesu, Abena Kristu balelonganina mu fifulo fya cintubwingi na mu mayanda pa kusambilisha Amalembo no kukoseleshanya na ba bwananyina. (Imil. 19:8, 9; Rom. 16:3, 5; Kol. 4:15; File. 2) Limo Abena Kristu ba kubalilapo balelongana na mu bumfisolo pa kuti abalebacusha beishiba uko bali. Ukwabula no kutwishika, ababomfi ba cishinka aba kwa Lesa balitemenwe ukulongana pamo mu fifulo fya kupepelamo pa kuti ‘balesambilishiwa na Yehova.’—Esa. 54:13.

³ Na muno nshiku mwine, fwe Bena Kristu tulalonganina mu fifulo fya cintubwingi na mu mayanda ya ba bwananyina. Ilingi line tukumanina mu mayanda ilyo tushilaya mu mulimo wa mwi bala. Bamunyinefwe na bankashi abasumina ukuti tulekumanina mu mayanda yabo, bamona ukuti lipaalo nga nshi. Abengi abasumina ukuti tulekumanina mu mayanda yabo balanda ukuti balinonkelamo sana lwa ku mupashi.

ING’ANDA YA BUFUMU

⁴ Pa Ng’anda ya Bufumu, e po Inte sha kwa Yehova balonganina. Ilingi line, ba Nte bashita fye incende e lyo bakuulapo Ing’anda ya Bufumu, e lyo limo bashita fye icikuulwa e lyo baciwamya. Pa kuti belabomfya indalama ishingi ku kukuula Amayanda ya Bufumu, na pa kuti yalebomfiwa sana, limo ifilonganino ifingi fibomfya Ing’anda ya Bufumu imo. Mu ncende shimo, bamunyinefwe balonganina mu fikuulwa fya kusonkela. Nga bakuula Ing’anda ya Bufumu, nelyo nga bawamya ifintu ifingi ku Ng’anda ya Bufumu iyakuulwa kale, balapeela iyi ng’anda kuli Yehova. Lelo nga finono fye bawamyako, tabaipeela kuli Yehova na kabili.

⁵ Ing’anda ya Bufumu taifwile ukuba iya lulumbi pa kuti fye abantu balepapa nga baimona. Nangu ca kuti Amayanda ya Bufumu yalapusanapusana mu kumoneka ukulingana ne ncende bakuulilako, ico tuyakuulila, kulonganinamo. (Imil. 17:24) Na lyo line, Ing’anda ya Bufumu yonse ifwile ukuba iisuma ukulonganinamo, kabili ifwile ukuba pa ncende iisuma apo Abena Kristu bengalalongana bwino.

⁶ Aba mu filonganino fyonse ifya Nte sha kwa Yehova balasangula indalama ishibomfiwa mu kusunga bwino Ing’anda ya Bufumu iyo balonganinamo. Takuba ukusonkesha nelyo ukulombelesha indalama. Lelo mu Mayanda ya Bufumu mulaba akabokoshi ka misangulo umo abalelongana bengabika indalama sha kubomfya ku fifwaikwa pa Ng’anda ya Bufumu. Bonse abasangula indalama baitemenwa fye kabili bapeela ukufuma pa nshi ya mutima.—2 Kor. 9:7.

⁷ Bonse mu cilonganino balishiba ukuti cisuma ukusangula indalama no kubombako imilimo pa Ng’anda ya Bufumu pa kuti ilemoneka bwino. Ilingi line, eluda nelyo umubomfi utumikila e utantika ifya kuwamya Ing’anda ya Bufumu. Mu filonganino ifingi, amabumba ya mulimo e yabomba umulimo wa kuwamya Ing’anda ya Bufumu, kabili kangalila we bumba nelyo kaafwa e utungulula. Ing’anda ya Bufumu ifwile ukuba iya busaka mu kati na ku nse pa kuti ilemoneka ukuti ni ng’anda ya kwa Yehova iyo abantu bakwe balonganinamo.

⁸ Nga ca kuti pa Ng’anda ya Bufumu paba ifilonganino ifingi, baeluda muli ifyo filonganino balapanga Komiti ya Ng’anda ya Bufumu iya kulolekesha pa Ng’anda ya Bufumu ne cifulo conse. Aba baeluda e basala na munyinefwe uwa kuba kampanya wa iyi komiti. Iyi komiti ibombela pamo na baeluda ilyo ilelolekesha pa mulimo wa kuwamya Ing’anda ya Bufumu, kabili balashininkisha ukuti fyonse ififwaikwa pa Ng’anda ya Bufumu e po fili. Pa kuti uyu mulimo ule-enda bwino, ifilonganino fyonse fifwile ukulabombela pamo.

⁹ Nga ca kuti ifilonganino ifingi fibomfya Ing’anda ya Bufumu imo, baeluda balatantika ukuti ifilonganino filealula inshita sha kulonganinapo. Baeluda mu filonganino bafwile ukumfwana bwino no kulangulukilana pa kutantika inshita sha kulongana. (Fil. 2:2-4; 1 Pet. 3:8) Takufwile ukuba icilonganino icifwile ukulapingwilako ifilonganino fimbi. Kangalila wa muputule nga atandalila icilonganino cimo pali ifi, ifilonganino fimbi kuti fya-alula inshita ya kulongana muli uyo mulungu ukulingana no kukabila kwa cilonganino ico aletandalila.

¹⁰ Ing’anda ya Bufumu kuti yabomfiwa nga kuli icililo nelyo ubwinga, cikulu fye Komiti ya Mulimo iya Cilonganino yasuminisha. Nga kwaba uwalomba ukubomfya Ing’anda ya Bufumu, baeluda balakonka bwino bwino ifyo babeba kwi ofeshi lya musambo ilyo tabalamusuminisha.

¹¹ Nga ca kuti Komiti ya Mulimo iya Cilonganino yasuminisha bamo ukubomfya Ing’anda ya Bufumu, ifyo balecita pa Ng’anda ya Bufumu, fifwile ukulanga ukuti Bena Kristu ba cine. Tabafwile ukucita ifingakalifya aba mu cilonganino nelyo ifingaleta umuseebanya pali Yehova na pa cilonganino cakwe. (Fil. 2:14, 15) Iofeshi lya musambo kuti lyasuminisha no kuti Ing’anda ya Bufumu baibomfye ku masukulu pamo nga, Isukulu lya Bapainiya e lyo na Isukulu lya Butumikishi bwa Bufumu.

¹² Aba mu cilonganino balingile ukulacita ifilanga ukuti balicindika Ing’anda ya Bufumu. Ifyo bafwala, ifyo bamoneka ne mibele yabo fifwile ukulanga ukuti balicindika Yehova uo bapepa. (Luk. Mil. 5:1; 1 Tim. 2:9, 10) Nga tulekonka ifi twalandapo ninshi twalicindika ukulongana kwa Bwina Kristu.

¹³ Nga tulelongana, tatufwile ukucita ifingapumfyanya abanensu. Abana bafwile ukwikala na bafyashi babo. Kuti cawama nga ca kuti abafyashi ababa na bana abanono, baleikala apo bashingapumfyanya sana bambi nga balefwaya ukufumisha umwana pa nse, pa kuti bamusakamane nelyo ukumusalapula.

¹⁴ Bamunyinefwe abafikapo balabapeela umulimo wa kubomba bukapyunga mu Ng’anda ya Bufumu. Bafwile ukulamona ifilecitika no kwiluka ifyo balingile ukucitapo, kabili tabafwile ukuba abaifinya. Pa milimo babomba paba no kusengela abapya, ukulanga abacelelwe apa kwikala, ukulemba impendwa ya basangilwe ku kulongana, e lyo no kushininkisha ukuti mu Ng’anda ya Bufumu mulepita umwela. Limo bakapyunga balacinkulako abafyashi ukubika sana amano ku bana pa kuti bela-angalila pa cisebele, nelyo ukubutauka ilyo ukulongana takulatendeka na pa numa